Luk 13 | XteSC | STEP | Yesusdi er upu peterenmau taruda, ton nengdi aupu pepi. “Galilea tara neng, ton nengda, ‘Nun mali kun keca Allahdi kaukepkamser’ tenen, gam kun keca popra, Allah tep karenmaiya neitamai di, Pilatusdi peipupa, er jen talen nengdi, aGalilea tara neng poptapi. Poptapipa, aneng sun yapi cap, sundi, ‘Allah karepkamep’ tenen, popra karenmai keca yapi cap, tapakra kikiman embeu,” penmai.

Luke 13

Yesusdi, “Sun mali kumum keca men tapmumdi, depmumyopda, gam pio men kunkamrume,” pepu upu

1 Yesusdi er upu peterenmau taruda, ton nengdi aupu pepi. “Galilea tara neng, ton nengda, ‘Nun mali kun keca Allahdi kaukepkamser’ tenen, gam kun keca popra, Allah tep karenmaiya neitamai di, Pilatusdi peipupa, er jen talen nengdi, aGalilea tara neng poptapi. Poptapipa, aneng sun yapi cap, sundi, ‘Allah karepkamep’ tenen, popra karenmai keca yapi cap, tapakra kikiman embeu,” penmai. 2 Upenmaipa, Yesus gekepudi, ‘Aupu penmaneng nengda, sun Galilea tara poptapi nengda, pio mali kuramya deiki di poptapi, tenepmangdi penmanenge,’ tenepmaudi aupu pepu.

“Sunda, yuk neng ton weik kurami dinin, ‘Sun Galilea tara konum poptapi nengda, pio mali kuramya tep, poptapi,’ tenepmarum ngeda, gume. 3 Ne tek sisi pepsene. Sun peda, sun mali kurumu keca tapra, amnyo karengdongona gum dingeda, amenda taruda Allahdi poptapserepa depmumyopda, kange di ton cap gam pio men kunkamrume.” Yesusdi aupu pepu.

4 Upepu dingeda, aupu ton cap pepu. “Tonda, Siloam mutu neitamai, ila lyom ati domipa, loka baudi, 18 neng popu ngeda, Yerusalem mutu kurami neng ton yambul mali kupra kurami neng ton akurami dinin, ‘Akati loka popu nengpuda, pio mali kuramya dia,’ tenerumada, walwal di tenerume. 5 Ne tek sisi pepsene. Sun peda, sun mali kurumu keca tapra, amnyo karengdongona gum dingeda, amenda taruda Allahdi poptapserepa, depmumyopda, kange di ton cap, gam pio men kunkamrume,” Yesusdi pepu.

6 Aupu konum pepu dingeda, kirikra adomon upu ton pepu.

Tenpu ngeboda, er wa peiamnga neitamai di, kwarang co tenpu kouamu. Kouamudi dakuramnganen, ‘Du moupmaner do?’ tenen, tupa-tupa dirbaramu. Dirbaramu dinin, du pio men mouramu. 7 Du men moupka tep, er wa pepra kouamupa melipra orleramu ngebo tep, aupu pepu. “Keteng tamun weneri deiki di, ‘Akwarang co du moupkamner’ tenen, pio diryakaramsi dinin, du tenpu pe men moupka tep, adipapu kweptaprume. Tu telepai koupsi dinin, tali bopu dourya tep, kweptapo,” pepu.

8 – 9 Upepupa, er melipra awa orleramu ngebodi tamupra pepu. “Gume naio, aco dakuamrepanen, ‘Orketeng tamun du moupkamre do?’ tenen, nedi tu paliprapnedi, penga deipterepnepane, orketeng tamun du moupyopda, mawa dakwapkamre. Gum dingeda, apepmaneremtopu, aco kweptapkamne,” pepu. Yesusdi adomon upu pepu.

Yesusdi isok taleamu ner, Sabat tumi deiki kwetepu upu

10 Yuk taruda, sun Yahudi yala neng Allah gispal dona tep, pel dona gum dipapu, beipye peingne tumi, Sabat tumi deiki, Yesusdi Yahudi yala neng, sun Allah upu peteremna ati wekrapudi, Allah upu peterenmau. 11 Yesusdi peterenmau taru, akati neitamai tenpu ner isok taleamnga deiki di, nong geiyamu ner kunmau. Anerda, keteng tamun denge weik 18 tahun deiki di pio amnyo geiamupa, kwirye men lepsisikra tekronmanto kuramu. 12 Yesus peteremau atida, aner bukmaupa epudi, “Abukmang neng urasin dam tengyayo,” pepupa tengyau. Tengyau pangeda, aner tep aupu pepu. “Anero, isok taleamkupa, amnyo geiamkuada, konum kwetepkene,” pepu. 13 Yesusdi aupu pepu dingeda, aner nong deiki buru deipupa, adipapu aner lepsisikra kwirye tekroudi, Allah si eremaudi, Allah tep, “Telepe,” pepu.

14 Yesusdi aner kwetepupa, akati Allah upu peteremna ati talepra deiyo ngebo epudi, akati bukmai nesala tep pepu. “Ngantan tumi deiki dipapu pel donupa neitamaida, ‘Akati pum kwetepsetue’ tenen, yakana telep dinin, nun Allah gispal dona tep, beipye peingnup tumida, nimi kwetedinada, pel dona utopu kurura cadi, ‘Sabat tumi deiki di kwetepkusere’ tenen, akati yakana gume,” pepra wenepu. 15 Upepupa, Yesusdi akati deiyo ngebo tep tamupra pepu. “Sun Farisi nengda, sun dipru neitamai pio mali keca akwapmaserpapu, ‘Yuk nengdi, nun tep telep neng kununge tenepkamseng’ tenen, nong bol deikingepu telep kurum neng adano. Sun yumada, Sabat tumi deiki peda, sun sapi bisam cap, sun keledai bisam cap, ati dongopmarumyanen, ‘Me jepkur’ tenen, ati buplan pakra, me damai men gerengbarum do? Teka, sun peirum gam keca yumada, Sabat tumi akwapmarya peda, telep kupra melimrume.

16 Ange ukuramrumtopu, Abraham yala nengdi deiami nerda, keteng tamun 18 tahun deiki di, isok taleamupa amnyo geipdongomupa, kwetepmana tep, mali tenepmarumada, warya tep do? Sabat tumi deiki peda, sun keledai bisam lopra, me damai gerengbaramrumtopu, aisok taleamu nerda, ware deiyo keca tep, Sabat tumi deiki men kweteiptene do?” Yesus aneng tep, aupu pepudi wenepu. 17 Upepra wenepu pangeda, Yesus upu yanipmai neng gekepidi, ali kupupa, dimpepra wekmaipane, yuk nengda, Yesus apio telep pel donmaupa epmaiya tep, sun yumadi, Yesus tep pio kange deipi.

Yesusdi, “Pio metek co du dinin, bongopredi, ila co nerure,” pepu upu

(Markus 4:30-32; Matius 13:31-33)

18 Yesusdi aupu pepu dingeda, aweka gekenmai neng tep, adomon upu ton cap pepu.

“Uda, Allahdi nesala yuma lyepredi, sun dipru talenkamserada, ‘Sun tenepra kael kepkurum’ tenen, ukupmanto upu ton pepkusene. Allahdi nesala lyepredi, sun dipru talenkamsera utopu kecada, ake.

19 Tenpu ngebodi, lyesa ^{▼▼lyesa du – Pumun seki buku neitamaida, lyesa du men seki. Akecada sun mutu men kuramu. Sundi seki ngeda, pio metek du, betei du utopu keca seki. Dinino, akeca kouamipa, ila co nepka cadi, sun Ketengban nesala moupra tenena tep nengeda, lyesa co du sekmepu. Deiyoda, du kecada pio metek dinin, amenda taru nepmareanen, tekamre coda ila lyom co tekamra tepa. Aupu nong neitamai deiyoda, ake. Allah upuda, metek utopu keca dinin, amendada nimi pio weike teka tenepmengyopda, Allah er nyapuda pel weik kupbankamenge.} co du metek dinin, wa peprapudi, bolokamupa, alyesa pakra nepudi, alyesa teru kwakudi, weik kupupa, ma yala-yala yuma ateru deikipu maryakarami. Lyesa co du metek dinin, ila neramretopu, Allahdi nesala lyepredi sun dipru talepkamrada, nesala denge pio weik kupbankamre.” Yesusdi pepu.

20 Aupu pepu dingeda, adomon upu ton pepu. “Allahdi nesala lyepredi, sun dipru talenkamsera utopu keca ton pepkusene. 21 Tenpu nerdi, ‘Roti kwaneng dapkun’ tenen, roti kwaneng nena deiyo keca, meteka dipu dopra, aroti kwaneng bun deipmauai neitamai dongopupa, daembanmauanen, aroti kwanengda, ila di nepu. Ada roti kwaneng nena deiyo kecada, pio metek kecapu dinin, akeca ila neramretopu, Allahdi nesala lyepredi sun dipru talenkamrada, nesala denge pio weike kupbankamenge.” Yesusdi pepu.

Yesusdi nimi lyemna tep, yambul buplan bisi wengna tep, pepu upu

22 Ataru di dipra, Yesusdi, ‘Yerusalem mutu orbenkamne,’ tenepudi, bisi mapbanmau taruda, metek ati arum doramyai cap, ila ati arum doramyai cap, mapbanmaudi peterep embanmau. 23 Bisi mapbanmaudi, peterep embanmau taruda, tenpu ngebodi Yesus tep asipetepu. “Ne naio, Allahdi nesala yambulanunpu lyepkamre do, nesala weika di lyepkamre do?” pepra asipetepu. 24 Upepra asipetepupa, Yesusdi aupu gekenmai neng yuma tep tamupra pepu.

Ne tek sisi pepsene, Allah nesala lyepredi sun dipru talenkamser taru neitamaida, nesala weika di, ‘Nun ton wektepe’ tenen, piripetepkameng dinin, men wekmanto kunkamenge. Allah cap tonpa kunkamepaida, wengna buplan bisida, bon pio metek kurura cadi, ‘Akati wektene’ tenen, pio pe deipra, puto di piripetepkamrume. 25 Akati deiyo ngebodi buplan konum dekdongopre pangeda, sunda, bura tara buplan damai tengbemumdi, ‘Naio, nun ton wektepe’ tenen, putapsera cadi, “Nun tep buplan pakaipseo,” pepra, gogo pepra, ila di moropkamrum dinin, akati deiyo ngebodi tamupra, “Sun dan mutu di yanmarum neng do? Ne cap kikiman men kuramepua tep, sunda ne pio walwale. Ne tara neng men kurume,” pepseredi tapkamsere.

26 Upepseryopda, sundi tamupra upepkamrume. “Gume naio, nun cap, kan cap kuramupu taruda, jen keca cap, me cap, kikiman jeramupu. Tonda, nun ati dam Allah upu peteremamsemumpa gekeramupke,” pepkamrume. 27 Upepkamrum dinin, adeiyo ngebodi tamupra pepkamsere. “Sun dan mutu di yanmarum neng do? Ne cap kikiman men kuramepua tep, sunda ne pio walwale. Ne tara neng men kurume. Sunda, pio mali kurum neng cadi, sun adipapu yuk karenai beso. Ne damai men kunkamrume,” pepkamsere.

28 Upepredi, pio bura tara dokotepserepa, yukai bemum dingeda, Abraham cap, Isak cap, Yakub cap, Allah upu jenek lap perami neng, sun nabi-nabi yuma cap, Allah pio talenkamserai, kikiman kunmangepa epmumdi, pio kange mun kange doupra, giso talepra engepmumdi, yu dounkamrume. 29 Sun Farisi nengda, pio bura tara dokotepkamser dinin, yuk neng dangeda, keteng yakan tara cap, keteng dangban tara cap, utara cap, itara cap, yakankamenge. Yangepa, Allahdi nesala yuma talenkamserai, kailya kalepra deiprepa, ‘Jepkamenge’ tenen, Allahdi konum keteneipseuai, bungyakankamenge.

30 Tonda ange ton pepsene. Ukutaru nimidi, ‘Anengda, mambul gum neng’ tenen, sunda bicauto kupra amngai kunge nengda, amenda taruda Allahdi aneng ereipredi, pio mambul neng kupra deipkamre. Ange utopu, ukutaru, yuk nengdi, ‘Anengda, mambul weik neng’ tenen, eremna neng kupra deipmengepa kunge nengda, amenda taruda, Allahdi aneng ton amutarapu deiprepa, mambul gum neng kunkamenge. Yesusdi pepu.

Yesusdi Yerusalem mutu kurami neng tep, bicau tenepudi pepu upu

31 Yesusdi aupu pepu taruda, sun Farisi neng Yesus damai yaidi, aupu pepi. “Amutu ila deiyo ngebo Raja Herodesdi, ‘Angeboda, poptene,’ tenekerura cadi, amutu tapra, yukai benkurume,” pepi. 32 Upepipa, Yesusdi aneng tep tamupra pepu. “Herodesda, mawa di tali upu pertamrur ngebo ^{▼▼Herodes – Pumun taru seki buku neitamaida, ukupmanto upu tep, Israel mutu kuramu binatang si aca seki. Alkitab TB neitamaida, serigala si seki. Agam kuramu kecada, yambulanun bura tara kuramre yu kam utopu, er si seki. Dinino, nundi aupu ukupmantonge deiyo neitamai ngepu sekmepu. Ada sun kael kemna tep sekmepu.} tep, ne pepkusen upu dopra, er damai lap perbenkurume.”

“Yesusdi upekerure, ‘Nedi, atumi cap, ambutumi cap, ortumi capda, nesala taleami isok enepra dokotena cap, pu nesala kwetena cap, kunkamne. Ukupbaramnyanen, ne tenepsi pel gawal bena dakamne. Yesusdi upepkere.’ Aupu dopra, Herodes damai perbenkurume,” Yesusdi pepu. 33 Upepudi aupu ton pepu. “Herodesdi ne tep, ‘Angeboda poptene,’ tenepnetu dinin, kapul men popkamnere. Ne pel dopbaramnyanen, Yerusalem mutu tek sisi benkamne. Ada tali tep men pepne. Allah upu jenek kupra lap penge neng, sun nabi nengda, yuk mutu men ponunge. Yerusalem mutu neitamaipu ponunga tep, Yerusalem benkamne ja, pepne,” Yesusdi pepu.

34 Upepu dingeda, aupu ton cap, dukdongopra pepu. “Uda, sun Yerusalem mutu kurumu nesalada, Allah upu lap pepra peteremnung neng, Allahdi nabi-nabi weike, sun damai dokotemrur dinin, sundi anabi sun nong deiki gel dopra pona cap, tonda, tali potamna cap kurume. Nedi sun Yerusalem mutu kurum nesala tep, ‘Ayam madi er nyapu iriramretopu, ne weamsi nesala kalekra makupkamsen’ tenen, putanerepa sun tep tupa tenesenun dinin, sun Yerusalem deiyo nengdi, ‘Angebo Yesusda, nun song’ tenen, yamdongonerume.

35 Ange tep nengeda, sun Allah si eremna tep karerbarumu atida, Allahdi taprepa, akatida tali gopu kupkamre. Ada tali tep gume. Nedi sun tapra bendopnyopda, dorkunkamre taru yumada, ne ton men dinkamnerume. Dakuramrumyanen, sirya taruda, ne si ereipkamnerum tarupuda, epkamnerume. Ataruda, sundi, ‘Uo, Nimi Lyemna Ngebo, Mesias ^{▼▼Mesias – Yunani nengdi, Kristus perami. Ibrani nengdi Mesias perami. Dinino, nunda asi butene penupe. Aupu butene deiyoda, ‘Nesala Lyemna Deiyo Ngebo kunkamre’ tenen, Allahdi weiamu ngebo tep penupe. Tonda lap pena upu nomor 3 dinkurume.} ngebo konum yanmasere,’ tenepkamnerum taru, aupu pepkamnerume. Ataruda, aupu pepkamnerume. ‘Allah er puto cap, er si cap deiki di yanmaser ngeboda, ila mambul ngebo cadi, pio teleppu kunkamre,’ pepra, ne si ereipkamnerum taru, atarupuda epkamnerume. Yesusdi sun Farisi neng tep pepu.