Luk 14 | XteSC | STEP | Tenpu Sabat tumi deiki di, tenpu Farisi ngebo ila ngebo, er ati pum Yesusdi jen jepra bukmau panenda, yuk nengdi, ‘Yesus er mali kupkur do?’ tenen, kaleka dinmai.

Luke 14

Yesusdi Farisi ngebo ati bukmaudi pepu upu

1 Tenpu Sabat tumi deiki di, tenpu Farisi ngebo ila ngebo, er ati pum Yesusdi jen jepra bukmau panenda, yuk nengdi, ‘Yesus er mali kupkur do?’ tenen, kaleka dinmai. 2 Sundi Yesus kaleka dinmai taruda, ila pu jeramupa, nong bol yuma nemupa ai bukamu ngebo, Yesus damai bukmaupa epu. 3 Yesusdi ai bukamu ngebo epudi, Farisi neng cap, Musa sekeiamu upu peteremna deiyo neng cap, awekmai neng tep pepu. ‘Allahdi “Ukunkamrume, angeda men kunkamrume,” peipupa, Musadi sekeiamseu upu neitamaida, ware pesere do? Sabat tumi deikida, pel dona gum di, Allah er tep gispal donup tumi cadi, atumi deikida, nimi kwetena telep do, mali do?’ pepra asipetepu. 4 Asipetepu dinin, sun tali dimpepra buknapu kunmaiya cadi, Yesusdi ai bukamu ngebo dopra kweteipudi, ‘Daberume,’ pepupa, tekra beu.

5 Angebo beu pangeda, Yesusdi awekmai neng tep pepu. ‘Sun nyapu do, sapi bisam do, Sabat tumi deiki ^{▼▼Sabat tumi – Farisi nengdi, ‘Allah tep gispal donup tumi, Sabat tumi deiki di, pel meteka dipu men pel doptepe. Angeda pio mali kun keca,’ tenereami dinin, Yesusda, ange men peteremamu. ‘Nimi kwetena cap, yuk neng makuna cap kunup keca yumada, tumi-tumi yuma deiki di pel dopra kunada telepe pua,’ pepra peteremamu.} di ila tu pumbon saktengopda, adipapu lyepra men dopra derinkamrum do?’ pepu. 6 Yesusdi upepupane, ‘Nundi ware upu pepkup guma’ tenen, dimpepra bukmai. 7 Sun jen jepkoi taruda, Farisi nengdi, ila neng bukmantoaipu wepra bungmaipa, epu. Yesus epudi adomon upu pepu.

8 Sunda, ila kailya kalepmengedi, ‘Sunda jeryaso,’ pepsengopda, ila neng bukmantoaipu wepra men bungbankamrume. Sunda yambul mambul kurum dinin, akailya deiyo nengdi, ila mambul neng konum upupmatengepne, amenda yatu ngeboda, ila neng bukmantoaida, sun bukmaruma cadi, sun tep, ‘Gopropso, amambul ngebo sun bukmarumai bukure,’ pepsenge pangeda, sunpu ali kunkamserure. 9 Akalemna deiyo ngebodi, ila mambul neng konum upupmatuopda, sun bukmarum bungnaida, ila neng yana bukunga tep, ‘Sun gopra amnyo tara bungnai bungbenkurume,’ pepsetuopda, ali dakmumdi, amnyo tara tali kankan kunge nesala bungamengai bungbankamrume.

10 Sundi, ‘Telepaipu bukamepe,’ tenena gume. Ange men kunkamrum dinin, kailya jena tep upupseryopda, tali kankan kunge nesala bungamengaipu, bena bukmamumpane, akailya deiyo ngebodi, ‘Ila neng bungnai bungyarume,’ pepseryopda, sun awekmange nesala yumadi, ‘Angeboda ila ngebo,’ tenepsengepa, pio telepaipu bungbankamrume. 11 Ada tali tep men pepsene. Ware nesala do yuma, sun pedi sun pepu eremdindaramenge nengda, amenda taru Allahdi aneng dopra amnge keipkamre. Dinino, sun dipru bouna di amnge kuramenge nengda, amenda taru Allahdi aneng erepra, telepaipu deipkamre,” Yesusdi pepu. Upepu dingeda, Yesusdi er bukmau ati deiyo ngebo tep pepu.

12 “Sun kailya kalepra deipkamrum taruda, sun kayapu neng cap, sun weitapsilip cap, sun yala neng cap, isomka neng cap, ‘Kalya jeryankung’ tenen, anengpu men upunkamrume. Ato nengpu upupmumyopda, sundi ka tamupra, sun tep kalepra derinkamsenga cadi, ‘Erdi tamupra kailya kalepra deipkamnere,’ tenepmum nengpu men upunkamrume. 13 Sun kailya kalepra derinkamrum taruda, tali kankan kunge nesala cap, yo kwanen nesala cap, ai bungne nesala cap, asuru pun nesala cap, ‘Sun yuma jeryankung’ tenen, upunkamrume. 14 Ukuramum pangeda, Allahdi sun tep telep kudinkamsere. Ato nesalada, ka di tamupra, kailya kalepra men deipsetenge dinin, Allahdi sun dumsisi kunge nesala gam bukra deipkamre taruda, Allahdi sun kareamumnge kunumna tep, menenga keca weika di, tali karenkamsere.” Yesusdi er bukmau ati deiyo ngebo tep pepu.

Ila kalemna tep, ukupmanto pepu upu

15 Yesusdi aupu pepu pangeda, Yesus cap jenmai neng kan-kan, tenpu ngebodi, aupu pepu. “Allahdi nesala lyepredi, akeca-keca yuma talenkamre taru, ila kailya deiprepa jenkamre ngeboda, pio teleppu kunkamre. Allahdi ato ngebo tep, telep kudinkamre,” pepu. 16 Angebodi upepupa, Yesusdi er upu gekenmai nengda, nesala teka tenepmengepa, ‘Allahdi sun dipru talepra kure keca, kael kepkameng’ tenen, ukupmanto upu deiki di penmau. Yesusdi upenmau.

17 Tenpu deiyo ngebodi, ‘Ne kailya jeryankameng’ tenen, men di konum peiamu neng tep, konum keteneipu dingeda, er melimna neng dopra deipupa, perbei. Anengdi, “Ukuda, nun deiyo ngebodi akeca-keca yuma konum keteneipmasera tep, sun jeryaso,” perbei. 18 Anengdi, “Ukuda, sun jeryaso,” pepra perbei dinino, er peiamu nengdi dabal kupupa, “Nun men yankupe,” pepra, aneng yuma tenpu-tenpudi dabal kupupa, donkaua tep, yuk-yuk bei. Sun yuk-yuk dinin, sun yumadi, mawa upu deiki di, “Nun men yatepe,” pepi.

Ton ngebodi, “Ne wa tu ukupu kunupmanua tep, dirbenkune. Ukupkamna cadi, kalya men jeryankune,” pepu. 19 Ton ngebodi, “Gume, ne pel don sapi bisam pamu bari, ukupu kunupmanuada, ‘Pel telep kupra dopkamneng do?’ tenen, pirirtererenkuna cadi, kalya men jeryankune. Tali moropterepmanera cadi, erda men yankamare peipnerume,” pepu. 20 Ton ngebodi, “Gume, ne ner ukupu dopmanua cadi, ne peda, kalya men jeryankune. Tali moropterepmanera cadi, erda men yankamare, peipnerume,” pepra mawa di tali upu peptapu.

21 Sun aneng-aneng yumadi upepipa, akai perbeu ngebo gekepudi, er deiyo ngebo damai lap peryau. Lap pepu pangeda, akalemna deiyo ngebodi, yu weik kupupa, er melimne ngebo tep aupu peipu. “Menmena ila bisi cap, metek bura bisi cap yuma bemumdi, antapdamum tali kankan kunge nesala cap, yo kwanen nesala cap, asuru pun neng cap, ai bungne neng cap, aneng yuma tep, ‘Nun deiyo ngebo kailya kalepra deipmarada, jerbeso,’ pepmemdi, dopra duyankurume,” peipu.

22 Upepupa, er melimna ngebodi er peiputopu, bisi kwangdanai yuma embanmaudi, antamau neng yuma bulupra, er nai ati weki. Weki pangeda, amelimna ngebodi, er nai bo tep pepu. “Naio, kandi pepnememtopu konum kupman dinino, kan ati go tup kwapmare,” pepu. 23 Upepupa, akalemna deiyo ngebodi tamupra pepu. “Ange tep nengeda, pio metek bura bisi cap, metek mutu kungai cap, pio karen mutu cap bememdi, nesala ton akunmangopda, anesala yuma puto di pepmempa, yangopda, ne ati dekpepkamnere. 24 Yuk nesala yangepa nati dekpepneryopda, ne men di upupsi nesala yuma tenpu pe, ne kalepra deipman keca men jepkamenge,” akalemna deiyo ngebodi pepu. “Aupu konum pepsene,” Yesusdi pepu.

Yesusdi, “Ne tep teka tenepnemumdi, domyankamnerum ngeda, ikin kunkamsera cadi, moupra tenimkamrume,” pepu upu

25 Yesusdi peterep embanmau taruda, nesala pio weika di, ‘Yesus er upu gekepra er tep dombankamepe,’ tenen, melipra embanmaipa, Yesusdi er cap kikiman abanmai neng tep aupu pepu. 26 “Ware neng do yuma, sun nai yapu cap, sun nin yapu cap, sun nerapu cap, sun weitapsilip cap, sun pe nyapu cap tep, ila di dipru karerur dinin, ne tep nengeda, dipru yambula dipu karerurdi, ne tep tapmengopda, anengda, ne nyapu men kuptenge. 27 Tonda, ware neng do yuma, ne domyakankamneng taruda, sun pe sengdin co dopra, ne upu gekepra, ne tep men domyakankamneng nengda, ne nyapu men kuptenge. Ada sun pe keca tepapu, ‘Ange mambule,’ tenepmengedi, ‘Yuk nengdi nun popsenung’ tenen, dabal tenepmengedi, ne upu gekepra men domyakankamneng nengda, ne nyapu men kuptenge.” Yesusdi pepu.

28 Upepu dingeda, ukupmanto upu ton pepu.

Ware neng do yuma, ‘Nun ila lyom ati dopkup,’ teneptenge taruda, telep ngeda diptereptengedi, ‘Akwapmaner co bo cap, ati don keca cap deiki di gawal daktene do?’ moupra tenenkamenge. 29 Akeca men diptereptenge teptoda, gonga keptengedi doramtenganen, ayumnya co cap, ati dela co neitamainge cap, konum doptengedi, yuma gawal men daktengedi taptengopda, yuk neng epmengedi, nyek-nyek pepmengedi aneng tep autunkamenge. 30 Nyek-nyek pepmengedi, “Angeboda, ‘Ila ati dopkun’ tenen, gonga kepra dopbaramu dinin, suktalepudi, men gawal dakmanto kupka tep, tapu atep, erda walwal ngebo kurure, pepra nyek-nyek pepkamenge.”

31 Angeda utopu, tenpu ila nimi deiyo ngebodi, ‘Yuk neng popbisipkamne,’ teneptu taruda, menmenada teniptereptue. Ada, ‘Ne cap, ne jen talen neng 10 ribu neng capdi, ormutu 20 ribu neng poryakasenge nengda, popbisiptepe do, gum do?’ tenen, moupra teniptereptue. 32 Teniptereptudi, ‘Gume nimi weik cadi, men popbisiptepe,’ teniptuopda, 10 ribu neng sun deiyo ngebodi, upu sengna tep, nimi dopra deiptupa, 20 ribu neng bisi yakanmatengai bengedi, “Nun kikiman telep kuna tep, pedina upu pepdatepe. Nun podana gum di, telep kupra kikiman kunkamepe,” pepra, upu moroptereptenge. Yesusdi ukupmanto upu deiki di pepu. Upepudi aupu ton pepu.

33 Adomon upu pepmasen neng kungetopu, tek sisinge deiyo ake. Ada, ‘Amenda ware kupkamser do?’ tenen, pio moupra tenimkamrume. Ange tep nengeda, ware neng do yuma, sun taleamenge keca men tapmengopda, ne men domyakankamnenge. Ne nyapu men kuptenge.

34 Garam uwada, telep peramre deiyo keca gum kuptupane, ka tamupra telep kupra deiptumpa, tau peptu do? Gume, angeda pio men kupmanto tep, matang peprepa men jeptenge. 35 Tali bura tara donokmengepa, nimidi akeca deiki yanipra embanunge. Garam uwa konum matang pepyopda, ware keca do yuma, yuk keca peda telep kupra men deiptue. Yuk keca di lepsikra telep kupra men deiptue. Ange utopu, sunda Allah upu perseretopu men kupmumdi, mali kun kecapu talepra kumum pangeda, yuk neng epmengedi, Allah kun keca men kael kepkamenge. Tonda, sun malipu kumum nengda, Allahdi tapkamsere. Atep, sun amul kwapserepa, ‘Aupu deiyoda ake’ tenen, gekepmanto nengda, moupra gekepkurume. Yesusdi aupu yuma pepu.