Luk 16 | XteSC | STEP | Yesusdi, er upu gekepra kikiman embarami neng tep ukupmanto upu pepu. Tenpu taruda, isomka ngebo, er co bo moupra derina deiyo ngebo pel doramupa, yuk nengdi, ‘Angeboda pel malipu dorure,’ teneramidi, aisomka ngebo tep luludina upu deiki di inipra peryai. “Kan co bo moupra derina deiyo ngebodi, pel mali dorya deiki di, kan co bo weika di gum kupbanmakere,” pepra luludina upu peryai.

Luke 16

Tenpu ngebodi, ‘Ne pel gum kupneryopda, amenda taru ware kupkamne do?’ tenepudi, kupu keca tep, pepu upu

1 Yesusdi, er upu gekepra kikiman embarami neng tep ukupmanto upu pepu.

Tenpu taruda, isomka ngebo, er co bo moupra derina deiyo ngebo pel doramupa, yuk nengdi, ‘Angeboda pel malipu dorure,’ teneramidi, aisomka ngebo tep luludina upu deiki di inipra peryai. “Kan co bo moupra derina deiyo ngebodi, pel mali dorya deiki di, kan co bo weika di gum kupbanmakere,” pepra luludina upu peryai. 2 Upepi pangeda, aisomka ngebodi, er co bo derina deiyo ngebo kongpepupa, yau pangeda, aupu pepu. “Yuk nengdi, ‘Er pel mali kupra dororya deiki di, kan co bo gum kupbakerure,’ pekenungada, dan do? Ware kuramuma deiki di, ne co bo gum kupbanmaner do? Kanda ne co bo moupra derina deiyo ngebo tupa men kunkamrume. Ne tapkukena tep, ne co bo deiki pel doramumnge yumada, ‘Ukuprap, ukuprap pel doramsi,’ pepra, lape pepkunerume,” pepu.

3 Upepu pangeda, aco bo moupra derina deiyo ngebodi, utenepu. ‘Uo, ne deiyo ngebodi, ne done pelda, er pe ngebo dopropredi, ne tapkamnera tep, ware kunkamne do? Neda puto gum ngebo cadi, tu paliprap perameng wada, ikin pel cadi, apel men doptene.’ Tonda, ‘Ne ali kupnerur’ tenen, yuk neng tep, ‘Tali karepneso,’ pepra men moronkamne, tenenmau. 4 Ukupra tenenmauanen, ‘E, angeda, ukupkune,’ tenepu dingeda, upepu. “Ne deiyo ngebodi ne done pel dopropneryopda, ‘Yuk nengdi ne tep, kange deipnengedi, sun ati pumbon melipra napropkamneng’ tenen, ukutaru kupkune kecada, konum tenipne,” pepu.

5 Utenepudi pepka tep, er nai bo keca ke doprami neng tep, kongpepupa, tenpu-tenpu yakanmai. Yakanmai pangeda, aneng tep autopu upu pepu. Menmena yau ngebo tep, asipetepu. “Ne naidi karepkeupa, ke dopramum kecada, ware kuprap do?” pepra asipetepu. Asipetepupa, angebodi tamupra pepu. 6 “Kan deiyo ngebodi, pio ila me gwen mau er sida, tampayan, 100 karepneupa, minyak zaitun literan weika di gwepra dikdongopsidi, ke dopramsi,” pepu. Upepupa, aco bo moupra derina deiyo ngebodi pepu. “Atep, ‘Ukupra dopropsi,’ pepra, nukra si sekra kareamumpa, ne naidi deiamu kertasda, dopropmemdi, menmena 100 ila me mau er sida tampayan minyak zaitun weike sekmumnge kilipra, lima puluh (50) tampayanpu sekra deipkurume. Ada tek sisi dopropmumnge utopu gum dinin, neitamaipu sekurume,” pepu.

7 Ange peputopu, butene ngebo yaupa, aupu pepu. “Ne naidi karepkeupa, ke dopramum kecada, ware kuprap do?” pepra asipetepu. Asipetepupa, angebodi tamupra pepu. “Kan deiyo ngebodi, roti dana deiyo keca, er sida, gandum yamupra kipdongopudi, ila karong denge weike seribu (1.000) karong ke karepneupa dopramsi,” pepu. Upepupa, aco bo moupra derina deiyo ngebodi pepu. “Atep, ‘Ukupra dopropsi,’ pepra, nukra si sekra kareamumpa, ne naidi deiamu kertasda, dopropmemdi, menmena 1.000 karong kilipra, 800 karongpu sekra deiprume,” pepu.

8 Upepka tep nengeda, aco bo moupra derina ngebo, er ila deiyo ngebodi pepu. “Sun ke doprami keca tep, kilipra yuknge seku ngeda, mali dinino, angebodi, ‘Amenda taru ne pel gum kupneryopda, ware kupkamne do? Nedi sun ke doprami neng tep melipnyopda, amenda taruda ke doprami nengdi ne tep napropkamnenge,’ tenepu ngeda, telepe pua. Ila deiyo ngebodi pepu.” Yesusdi ukupmanto upu deiki di pepu. ^{▼▼ukupmanto upu – Yesusdi ukupmanto upu pepunge deiyoda, ake. Ada, ‘Mok upu penada telepe pua, tenepkameng’ tenen, gum dinin, ‘Amenda taru nun nai bo Allahdi ware kupkamser do?’ tenepmengedi, sun ila Deiyo Ngebo Allah tenere kecapu tenepra, dumsisipu kupmengopda, ‘Amenda taru Allahdi nun tep, kange derinkamser tenen, kael kepkamenge,’ tenepra, Yesusdi ukupmanto upu pepu.}

Yesusdi ukupmanto upu pepu dingeda, aupu dukdongopra pepu. “Ne tek sisi pepsene. Allah er dirin deiki di kunge nengda, sun pel tep upu talepmengedi, wepra derinungada, ataru kun kecapu tenenunge. Sunda amenda taru kupkamrenge tep men tenenunge. Atep, teka tenepra dirine neitamai kunge nengda, yambul kael di kununge pepne.

Dinino, sun teka tenena gum nesaladi, ‘Amenda taru isomka nesala kunkamepe’ tenen, sun kayapu neng tep, ‘Ware keca kuptepepa, nun kayapu neng melimkamsenga deiki di, isomka nesala kunkamep do?’ tenenunge. Tonda, sun pel tep, upu talepmengdi wepra derinungada, ila kael di kununge. Ada sundi, ‘Amenda taru ware kupkamser do? Ikin kunkamep do, teleppu kunkamep do?’ tenen, moupra tenenunga tep pepsene,” Yesusdi pepu.

9 “Atep, ware keca do yuma, Allahdi kareserur keca yuma, co bo cap, tali tuai keca yuma cap, yuk neng tep bicau tenepra, melipra tali kareramrumnya deiki di, sun kayapu neng sisa kemdinkamrume. Ukuramrumupane, amenda taru tali tuai keca yuma gum kupyopda, sundi yuk nesala meliamuma tep nengeda, sun im deiki bena pio ikunkamrum taruda, Allahdi telepe pepra napronkamsere.” Yesusdi pepu.

10 Yesusdi aupu pepu dingeda, aupu ton cap dukdongopra pepu. “Ware neng do yuma, sun deiyo nengdi, ‘Ukupra pel dopkurume,’ pepra yambul kecapu dopra deipmengepa, akeca dopra pel moupra telep kupra pel donge nengda, amenda taruda, sun deiyo nengdi ila mambul keca peda, weika di karepmengopda, anengdi akeca dopra, pio teleppu pel donkamenge. Dinino, ware neng do yuma, sun deiyo nengdi metek kecapu karepmengepa, akeca dopra inipmengedi, mok upu pertamengedi, upula dopropmengopda, amenda taru anengda, sun deiyo nengdi ila mambul keca peda, weika di karepmengopda, inipmengedi mok upu pertamnapu kunkamenge. Sun dipru mali neng kununga tep, malipu kunkamenga tepa.

11 Ange tep nengeda, sun peda utopu, tuai kunumna kecapu karepsengepa, moupra telep kupra men pel dopmumdi, upula dopropmumnyopda, amendada ware ngebodi tek sisi ila mambul im deiki keca ton karepkamser do? Ada men kupmanto. Sunda dipru mali neng cadi, im deiki ila mambul kecada, Allahdi men karepkamsere. 12 Tonda, ange utopu, sundi yuk neng talenge bunga moupra men talepmumdi, dumsisipu men kupmumyopda, ware ngebodi, sun pe keca karepkamser do? Ada men kupmanto. Sun mali kumum neng cadi, sun pe keca men karepkamsere,” Yesusdi pepu.

13 Upepudi aupu ton pepu. “Ware neng do yuma, sun deiyo neng butene neng kuprengopda, tenpu taru neitamai di, abutene neng tep, ton ngebo tep dipru kareprap pel doapmengedi, ton yuk ngebo tep yuk pel doap, men keptenge. Tenpu pel don ngebodi, er deiyo neng butene neng kuretenge pangeda, tenpu ngebodi abutene neng tep pel men doptue. Er deiyo neng butene neng tep, dipru kareprap, ton ngebo pel doap, ton ngebo pel doap, men keptue. Ato pel don nengda, ton deiyo ngebo tep, dipru kareprap, ton deiyo ngebo tep, song teneprap kunkamenge. Tonda, sun deiyo neng butene keprengepa, ton deiyo ngebo tep, pio talepra kunkamenge.

Ton deiyo ngebo tep, dabale kuprepa, tapkamenge. Er pel deiyo neng butene neng kuretengopda, ton ngebo tep, song tenepra tapredi, ton ngebo tep, kange deipra melimredi pel donkamre. Ton ngeboda, tapkamre, ton ngeboda, pio talenkamre. Aupu pepmasentopu, Allah cap, yuk tali keca cap, kikiman talepra men pel doptume. Ada, Allah cap, co bo cap, tonda yuk tali tuai keca yuma cap tep, kikiman talepra men pel doptume. Tenpungepu wepra talenkamrume,” Yesusdi pepu.

14 Yesusdi aupu penmau taruda, sun Farisi neng gekenmai. Gekenmai dinin, sunda, co bo pio putaramupa, co bo tep pio kange derirami neng cadi, Yesusdi aupu penmaupa, ‘Apenmaser upuda, tali penmasere,’ tenenmaidi, Yesus tep autunmaidi, mali upu pepra, er nong deiki deipmai. 15 Ukunmaipa, Yesusdi aFarisi neng tep aupu pepu. “Sun Farisi nengda, ‘Yuk nengdi mali neng tenepsenung’ tenen, sun mali kumum keca inimdongomumdi, telep kun kecada, nong bol deikingepu pel dorum dinin, sun dipru neitamai tenepra inimdongorum kecada, mali keca weik tupa akwapmare ngeda, Allahdi kael kepra teneserure. Tuai nengdi, ‘Akecada mambule’ tenen, putaprepa kange derinung kecada, Allahdi akeca tep, er kangeda, ‘Akecada pio mali,’ tenepra dabale tenerure.” Yesusdi pepu.

Yesusdi, “Ne pesene upu yumada, tenpunge peda men gum kupkamre,” pepu upu

16 “Pumun taru di diprap, aneitam taru yumada, Allahdi, ‘Ange kunkamrume, angeda pio men kunkamrume’ peiamupa, Musadi sekeiamu mem upu cap, tonda Allah upu lap perami neng, nabi-nabi nengdi sekami upu cap dopra, peteremna deiyo nengdi peteremyakarami. Pumun taru yumada, aupupu peteremami dinin, Yohanesdi er upu peteremamu taru di gonga kepra, adipdongopra ukutaru yumada, men di peteremaminge konum gawal dangmange. Ukutaruda, Allah er kai telep upu peteremnupe. Aupuda, Allahdi nesala weika di lyepredi, sun dipru talenkamser upu tep pepne. Aupu peteremepepa, nesala weik gekepmengedi, ‘Nun ton teka tenepmepepa, Allah lyepsetudi, teleppu kunkamepaida, nun peda wektepe’ tenen, pio pe deipra puto di pirirterenunge.

17 Im neitamai kure keca yuma cap, tuai mutu kure keca yuma capda, yambul kanam dipu gum kupbankamre ja. Dinino, Allah upu neitamaida, pio metek upu kwapmarenge peda, gum kunada pio ikine. Ada men kupmanto tepa. Musa sekamu mem upu neitamaida, tenpu huruf pe, pio metek sengna keca pape, men gum kupkamre. 18 Ne tek sisi pepsene. Ware ngebo do yuma, er domu ner sisa tapredi, yuk ner ton dopyopda, ada nimidi yuk nerapu upula tali nyangtamengtopu kurura tep, ukunada, pio meme. Tonda, ware ngebo do yuma, yuk nengdi domenganen, tamenge ner dopra dopyopda, ada yuk nengdi tali ner nyangtamengtopu kurure. Ange peda pio mali kuna pepsene.” Yesusdi Farisi neng tep pepu.

Yesusdi, Lazarus cap, isomka ngebo cap tep, pepu upu

19 Yesusdi aupu pepu dingeda, aupu dukdongopra pepu.

Tenpu taruda, isomka ngebo kuramudi, ataru-ataru yumada dupnong-nong kupra kuramudi, sun pio ila isomka neng mirin opkal cap, pio telep opkal cap kemamitopu, er peda aopkal kenekra kuramu. 20 Tonda, tenpu pio kan-kan ngebo er sida Lazarus er nong yumada, bol kouna susu utopunge pio weik jeramu. Atep, yuk nengdi, ‘Uo, aisomka ngebodi nun kabo Lazarus tep, bicau tenepra, telep keca tali karenkamre do?’ tenen, anengdi Lazarus dopra, isomka ngebo er ati dam dinin, bura tara beilya buplan dam deriryakaramipa, bungamu. 21 Acapu bungamudi, ‘Uo, isomka ngebo er jen keca deipra jerepa, bun sangre ngeda, ne bupra jeptene’ tenen, putaramu. Tonda, Lazarus er nong bol deiki bol kouna susu utopunge jeramngaida, kam weike yakaramidi, lulangami.

22 Autopu kupra bungamupane, sirya taruda, Lazarus depupa, Allah er im deiki pel don neng, malaikatdi Lazarus dopra, im deiki dubena, Abraham damai derirbei. Tonda, aisomka ngebo depupa, tu palipi. 23 Tu palipipa, er sambalada uku jen ban beupa, uku jeramupa, pio mali peramudi dinmaupa, Abraham im deiki karenai kunmaupa epu. Epu taruda, Lazarus peda, Abraham damai tekmaupa epu. 24 Epu dingeda, isomka ngebo ila upu di Abraham tep pepu. “Uo ne nai Abrahamo, bicau tenepnetumdi, Lazarus tep peiptum pangeda, Lazarus buru du di bul me burupra, ne lyemu deiki deriryanetue. Ada, uku jenmanerpa, pu weike jenmanerpa, dounmana tep, moropkene,” pepu.

25 Upepu dinin, Abrahamdi aisomka ngebo tep pepu. “Amio, kanda teniprume. Kan tuai tup gam kuramum taru yumada, kan putaramkeu keca yumada, taleramumdi dupnong-nong kuramume. Dinino, Lazaruspuda, ikin weik kuramnga tep, pio kange mun kangepu doupra kuramu. Ukutaruda, Lazarus im deiki akunmar taruda, Allahdi er kange mun keca gum kupra deipupa, teleppu kurur dinin, kanpuda, uku jenmakerpa, kange mun kange doupra kunmareme.

26 Angepu gume, tonda, kan kunmaremai utara mutu ukurure. Nun akunmapai im deiki mutu aca dinin, daneitamaida, Allahdi ila kot sekroudi ila go deipka tep, im deiki aca di utara uku jen ban men benmanto. Angetopu, uku jen banai utara di, aca im deiki men yanmanto. Atep nengeda, im deiki tara nengdi, ‘Uo utara neng melipra betepe’ tenenge nengda, uku jen ban men betenge. Utopu, uku jen ban kunge nengdi, ‘Uo im deiki welerbetepe,’ tenenge nengdi, men weleryatenge. Ada men kupmanto.” Abrahamdi aisomka ngebo tep pepu.

27 Upepupa, isomka ngebodi tamupra pepu. “Ange tep nengeda, ne pio ila di moropkene. Kandi peiptumpa, Lazarusdi ne nai ati betudi, ne du yapu cap, ne weit yapu cap tep, lap perbetu. 28 Ne weit yapu cap, du yapu capda, pamu bari neng kununge. Ne kune mutuda, uku jen ban mutu cadi, pu ila di jenerure. Atep, ne weit yapu cap, ne du yapu capda, mangkau kange doupmengedi, ‘Moupra tenena gum di, amutu yanung’ tenena tep, Lazarusdi aneng damai bena lap peptudi, upu sengbetupa, ‘Sundi amutu men yankameng’ tenen, moropkene,” pepu.

29 Upepka, Abrahamdi tamupra pepu. “Gume, Allahdi, ‘Ange kunkamrume, angeda pio men kunkamrume,’ peipupa, Musadi sekeiamu upu yuma cap, Allah er upu lap perami neng, nabi nengdi sengami upu cap, akwapmara tep, aupupu moupra gekeptenge,” Abrahamdi pepu.

30 Upepupa, isomka ngebodi tamupra, pepu. “Gume ne nai Abrahamo, konum deamtu ngebo, gam buktudi, sun damai lap perbetu pangeda, aupu gekeptengedi, sun mali kun keca tapra teka teneptenge,” pepu. 31 Aisomka ngebodi upepu dinin, Abrahamdi tamupra pepu. “Gume, Allahdi ‘Ukunkamrume, angeda men kunkamrume,’ peiamupa, Musadi sekeiamu upu cap, Allah upu jenek perami neng, nabi nengdi sengami upu cap, men gekepmengopda, depmatu ngebo gam buktudi, sun damai bena lap peptua peda, teka men tenepkamenge,” pepu. Ada Abrahamdi aisomka ngebo tep pepu. Aupu yumada, Yesusdi pepu.