Luk 17 | XteSC | STEP | Yesusdi er nyapu 12 neng tep aupu pepu. “Ware keca do mali kudiserepa, Allah er upu teka tenepra dombaramum ngeda, yanirtamrumdi mali kunkamrume. Autopu mali kudina deiyo kecada, pio tupa kunkamre dinino, mali kuna deiyo kudiramsenge nengda, sun pio kange mun kupkamre. Anengda, Allah ila di wenepkamra tepa.

Luke 17

Yesusdi er nyapu 12 neng tep, peterepu upu

1 Yesusdi er nyapu 12 neng tep aupu pepu. “Ware keca do mali kudiserepa, Allah er upu teka tenepra dombaramum ngeda, yanirtamrumdi mali kunkamrume. Autopu mali kudina deiyo kecada, pio tupa kunkamre dinino, mali kuna deiyo kudiramsenge nengda, sun pio kange mun kupkamre. Anengda, Allah ila di wenepkamra tepa. 2 Ware neng do yuma, sun mali kuramenge nge deiki di, yuk nesala ton epmengedi, ‘Sun kungetopu nun pe ton ukupkupe’ tenen, mali kupmengopda, sun mali kudina deiyo neng, sun wenemna tep nengeda, ukupmanto keca pepkusene. Kanam ngeda ake. Ada menmena mali kuramya deiyo ngeboda, ila gel di, er kum gerekra, laut mokon neitam dongoptengepa, mokon jeptue. Angeda, yambul ikin dinino, amali kudina deiyo nengda, sun mali kungada, yuk neng tep, mali kudingepa, yuk neng peda mali kununga cadi, Allahdi, amali kudina deiyo nesala tep ila di wenepkamrada, angeda ikine pio weik kupkamre.

3 – 4 Ange tep nengeda, sun kun kecada moupra tenenkamrume. Yuk nengdi mali kupmengopda, ‘Sundi mali kupmarume,’ pepra wenepkurum dinin, wenepmumpa, mali kuna ngebo, er mali kuramre keca tapyopda, sundi er mali kupmar keca tep, tupa tenena gum di, kaukepra kunkamrume. Tonda, atumipu dinin, amali kuna ngebodi sun tep, ue yoneitam deiki di mali kupmaser dinin, sun damai yaredi, ‘Ne mali kupmasen ngeda, kau kepneo,’ pepra katuai di lap pepra, tek sisi amali kure keca tapyopda, yoneitam taru peda, er mali kupmasernge tep kaukemkamrume, Yesusdi pepu.

5 Upepupa, erdi wepra deiamu neng, er nyapu sun 12 nengdi tamupra pepi. ‘Nun naio, nun teka tenenupa deiyo kecada, weike karepsetumpa, weik kupbanmaryanen, weika di teka tenenkamkepe,’ pepra moropi. 6 Upepra moropi pangeda, Yesusdi tamupra pepu. ‘Sumi yal pio metek kecapu dinin, sundi ne tep teka tenepmanerum ngeda, ametek keca utopu metekanunpu teka tenepnetumopda, orkwarang co tep, “Kan pedipapu ereprap, aca di ortara laut mokon deiki tengberume,” peptumpa, sundi aupu pepmaremtopu, aco er pedipapu erepra, laut mokon deiki tengbetue.’ Yesusdi pepu. Aupu pepu dingeda, ‘Ne nyapudi, nun naidi peseretopu, nun pelda telep-telep kuprap, pel donkamepe, tenepkameng’ tenen, ukupmanto upu ton pepu. Yesusdi pepu upuda ake.

7 Tonda, ware ila deiyo ngebo do, er pel melimna ngebodi, wa pena pel cap, bisam pein pel cap, kunmaryanen, ati tamupra yare pangeda, sundi er tep, ‘Menmena buka jen jepo,’ pememerum do, gum do? 8 Angeda, men pepkamrum dinino, sundi sun pel melimna ngebo tep, upepkamrume. ‘Menmenada, kan telep opkal kenekrapmemdi, ne jen keca keteneipnerume. Ne jen jenmane taruda, kan tali melipra bukmamempane, ne jen jepra sengpepnyopda, kan amenda, jenkamrume,’ upepkamrume.

9 Tonda, sundi er tep, ‘Ukupra pel dopseo,’ pepmumpa, apepmarumtopu pel dopseryopda, sundi er tep, ‘E, nun kabo telepe,’ pepra gispal men dorume. Angeboda, tali pel don ngebo cadi, ‘Dakwapye’ tenen, kaukemdongorume. 10 Ange utopu, sun peda atali pel don ngebo utopu kunkamrume. Allah upu peseretopu konum pel dopmumyopda, adipapu upenkamrume. ‘Allahdi peipseua utopu pel dopmapa tep, nunda, ila mambul neng gume. Nunda mali pel don nengpu,’ penkamrume. Utenepra, dipru bouna di amutara kunkamrume. ‘Nunda, mambul neng kunupe,’ tenepra dipru eremna neng men kunkamrume,” Yesusdi pepu.

Yesusdi 10 neng kot susu jeramupa kwetepu upu

11 Yesusdi, ‘Yerusalem mutu benkun’ tenen, bisi banmauanen neitamaida, Samaria dana tara, Galilea dana tara, daneitam kwa bisi deleka beu. 12 Bisi banmauanen, tenpu ati arum doramyai wengbeu taruda, morokyo damai dutara 10 neng, kot susu jeramupa kunmaiyai beupa antapi. 13 Antapidi, anengda, kot susu jeramnga tep, ‘Kip neng damai men yatepe,’ tenepmaia cadi, karenai kunmaiya di, Yesus tep ila upu di kongpepi. “Nun nai Yesuso, bicau tenepsetumdi, kwetepsetume,” pepra moropi.

14 Moropi pangeda, Yesus erda bisi yuk banmau dinin, kongpepipa gekepudi, tamupra dipterepudi aupu pepu. “Sunda, Allah karena tep, ila deiyo ngebo damai berumupa, dipterepseredi, ‘Anengda susu konum sakropka cadi, kange di ton cap Allah er si eremna ati yatenge,’ pepkamsera tep, sun nong peteremberume,” Yesusdi pepu. Upepupa, sun kot susu jeramu neng adipapu bisi banmai taruda, sun susu yuma sakropupa, teleppu kupu. ^{▼▼susu jeramu neng – Ataruda, sun Yahudi yala nengdi, ila susu jeramu nesala tep nengeda, ‘Allah er si eremna ati damai men yatenge. Sunda pio mali pua,’ tenerami. Tonda, utenerami, ‘Sun susu gum kuptuopda, Allah er si eremna ati damai ka di ton cap yatenge. Atep, Musadi sekeiamutopu, Allah karena tep deiyo nengdi, susu jeramu nesala dirtereramipa, “Susu gum kupmara cadi, telepe” konum pepyopda, anesala ka di ton cap, Allah er si eremna ati damai yatenge. Gum dingeda, gume,’ tenerami.}

15 Sun kot susu kaikudi telep kupupa, tenpu susu jeramu ngebo tamupra, Allah si eremaudi Yesus damai tamupra beu. 16 Allah si eremaudi, Yesus yan damai gutam tu dipdongopudi, Yesus tep “Telepe,” pepu. Telepe pepu ngeboda, Samaria ^{▼▼Samaria tara neng – Yahudi yala nesaladi, Samaria mutu neng tep, ‘Anengda nun pio songe,’ tenerami. Angebo peda, Samaria mutu ngebo kuramu dinin, Yesusda Yahudi yala ngebodi angebo kwetepu.} tara ngebodi pepu. 17 Yesusdi kwetepu ngebo, Samaria ngebodi Yesus tep “Telepe,” pepupa, Yesusdi aupu pepu. “Nedi 10 neng kwetepmanu dinin, sun Yahudi yala neng, 9 neng tamupra men yanmang nengda, dan kunmang do?

18 Warya tep animi bo ngebo, Samaria tara ngebo er tenpu dipapu, telepe pena tep tamupra penmaner do? Kot susu jeramu nengda, 10 neng kweteipmaneu dinin, angebo tenpu dipapu, Allah si erepra, ‘Telepe,’ peryanmasere. Sun yuk neng sembilan (9) Yahudi yala neng yumada, kwetepmanu dinin, telepe pepra gispal donada, yapronmasenge,” Yesusdi er cap kikiman banmai neng tep pepu. 19 Upepu dingeda, akweteipmau Samaria ngebo tep pepu. “Kandi ne tep teka tenepmanerema deiki di, konum kweteipmakena tep, tekra beo,” Yesusdi pepu.

Yesusdi, Allah nesala lyepredi, ‘Sun dipru talenkamne’ tenen, yankamre taru tep, pepu upu

20 Tenpu taruda, sun Farisi nengdi Yesus tep, “Allahdi nesala lyepredi, sun dipru talenkamser taruda, ware taru yankamre do?” pepra asipetepipa, Yesusdi tamupra pepu. “Gume, Allahdi nesala lyepredi, dipru talenkamre taruda, tali katuai di men yankamre. 21 Tonda, Allah nesala lyepredi dipru talerur ada, nimi dipru pumbon kusere keca. Ada tali katuai keca guma tep, yare pangeda, yuk nengdi, ‘Oryana kunmar adano, ayan kunmar adano,’ men penkamenge,” Yesusdi Farisi neng tep pepu. 22 Upepu dingeda, Yesusdi wepra deiamu neng tep upepu. Amenda taruda, sun yumadi, ‘Uo, nun nai bo Nimi Mi Sisa Utopu Ngebo, tamupra yaredi talenkamser taru neitamai, tenpu tumipu eptepe’ tenen, pio putaprepa dinapu kunkamrum dinin, men epkamrume.

23 Dortaru neitamaida, yuk nengdi, sun tep, “E, Nimi Mi Sisa Utopu Ngebo konum amutu yana akunmare. Uo, Nimi Mi Sisa Utopu Ngebo konum ormutu yana kunmare,” penkamseng dinin, sun upu gekepra teka tenemumdi, aneng cap ‘Dan kunmar do?’ tenen, adipapu sepdaro men erbankamrume. 24 Neda, Nimi Mi Sisa Utopu Ngebo amenda yankamne taruda, ada perenglang peprepa, im sirik dana-dana diriramretopu, ne ataru peda, pio jenek kupra katuai yankamna tep, yanyopda, nesala ban-ban yuma, tek sisi moupra kael kepkamenge. Nimidi, ‘Yanmar do, gum do?’ tenen, tenimtona pio men kunkamenge. Konum katuai yanyopda kael kepkamenge. 25 Menmena yankamne dinin, ataru neitamaida, ukutaru kunge nengdi, ikin keca ne nong deiki deriramnenganen, “Angebo nun songe,” pepra tapkamnenge.

26 Pumun taru, Nuh kuramu taru, er cap kurami neng kuramitopu, ne Nimi Mi Sisa Utopu Ngebo yankamne taru peda, nesala ban-ban yuma utopu kunkamenge. 27 Ada, Nuh kuramu taru ila mokon kapul men deiamu taruda, sun anesala yumadi, me jena cap, jen keca yala yuma jena cap, ner karedana cap, ayuma ukupbaramyanen, Nuh ila gapung co wekronkou tumi peda, tupa ukunmai. ‘Mokon jepserur,’ tenena gum di, tali kange doupra ukupbarami. Ukupbaramipane, ila mo cemamudi, mokon deipra erepropudi, akurami nesala yuma jepropu. Uda, sun tali mankau kange doua kuramipane, mokon deiya jeproputopu, ne Nimi Mi Sisa Utopu Ngebo yankamne taruda, utopu tali mankau kange doupra, ‘Yesus tamupra men yankamre’ tenen, kunkamenge.

28 Ange utopu, Lot kuramu taru peda, sun yuk neng yumadi utopu kurami. Sun jen keca jena cap, me jena cap, bung keca kunumna cap, wa pena cap, ati dona cap, kuramidi tali kange doupra kuramipane, Lotdi Sodom mutu tapra beu. 29 Sun tali mankau kange doupra kuramipane, Lotdi Sodom mutu tapra beu tumida, Allahdi uku bu cap, gel lyein cap, im deiki di dokotepupa, Sodom mutu cap, anesala cap jepropu.

30 Sun tali mankau kange doua kuramipane, uku im deiki di dokotepupa, anesala menmena jeproputopu, ne Nimi Mi Sisa Utopu Ngebo yankamne taruda, utopu tali kange doupra kuramengepane, men tenepmenge taru, dato-dato di menmena tamupra tuai mutu yankamne. 31 Ne yankamne taruda, sun ati bo men kunkamrum nengda, ati pum tapmaumum keca tamupra men dorbenkamrume. Tonda ataru sun wa pel donmamum nengda, sun keca ati deipmamum ngeda, tamupra ati pum deipmamumnyai men dorbenkamrume. 32 Sunda, moupra tenimkamrume. Lot er ner Sodom mutu tapra bisi banmankapudi, ‘Neda Sodom mutu tamupra benkun do?’ tenen, karekra dinmaupa, gel garam utopu daudi, tei deipu. Yesusdi aupu yuma pepu.

33 Upepudi aupu ton dukdongopra pepu. Ware neng do yuma, sun pe keca tepapu, ‘Ange mambule’ tenen, sun putapre kecapu tenepra, akecapu talepra kuramenganen, ‘Yesus er nyapu kunada, nun songe’ tenen, tapkamneng nengda, amenda sirya taruda, Allahdi ato nesala wenepredi, poprepa, depmengopda, kange di er cap gam pio men kunkamenge. Uku jen banpu kunkamenge. Dinino, ware neng do yuma, ‘Nun pe keca cap, nun putapsere keca cap, angepu mambule’ tenena gum dipapu, ne upupu gekepra, ‘Angeda ila mambule’ tenen, domyakankamneng nesalada, amenda taruda sun nong depkameng dinin, Allah cap kikiman pio gam kunkamenge.

34 Ukupmanto upu weneri pepkusene. Ne tamupra yankamne taru dinin, alukundada, nimi butene tenpu asonpu mapmarengepane, ton ngebo tapredi, ton ngebo tenpungepu Allahdi dopropkamre. 35 Tonda, ataruda, nerapu butene di, du keca er si gandum taikrengedi, jen keca ketenem dinmarengepane, ton ner tapra, ton ner tenpupu Allahdi dopropkamre. 36 Tonda, ataruda, nimi butene wa penmarengepane, ton ngeboda tapra, ^{▼▼ton neng tapkamre – Aupu butene pepunge deiyoda ake. Ada, Yesus tamupra yankamre taruda, ton neng tapkamre dinin, teka tenena nengda, dopropredi im deiki dubenkamre. Atep ukupmanto upu weneri pepu.} ton ngebopu Allahdi dopropkamre. Yesusdi er nyapu tep pepu.

37 Yesusdi upepupa, er nyapudi tamupra asipetepi. “Naio, apepmaserem upuda, dan mutu di kupkamser do,” pepra asipetepipa, Yesusdi tamupra pepu. “Potamne keca poptamrepa, lyuramredi tong peramrepa, deibum weika di amuramrepa, nesaladi, ‘E lyun keca ake’ tenen, katuai dipu kael kemamengtopu, ne yanyopda, jenek kupa yankamna tep, ‘Oryanmar do, ayanmar do?’ men tenenkamrume. Ne yankamne taru katuaipu kupkamra cadi, sundi kael kepkamrum ja.” Yesusdi pepu.