Luk 21 | XteSC | STEP | Yahudi yala neng, sun Allah tep karerbarami ati pumbon, Allah karena tep, ‘Co bo dongopkameng’ tenen, bekine utopu keca moupra deiami. Aco bo dongoryakanmai bekin damai, Yesus cap, er nyapu cap bukmaidi, aco bo dongoryakanmai neng tep, sun kunmai keca kamo dinmai. Sun adinami taruda, isomka nengdi ila kunumna weik co bo dongoryakanmaipa, Yesusdi dinmau.

Luke 21

Solu kuramu nerdi Allah tep karepupa, Yesusdi pepu upu

1 Yahudi yala neng, sun Allah tep karerbarami ati pumbon, Allah karena tep, ‘Co bo dongopkameng’ tenen, bekine utopu keca moupra deiami. Aco bo dongoryakanmai bekin damai, Yesus cap, er nyapu cap bukmaidi, aco bo dongoryakanmai neng tep, sun kunmai keca kamo dinmai. Sun adinami taruda, isomka nengdi ila kunumna weik co bo dongoryakanmaipa, Yesusdi dinmau.

2 Tonda, solu kuramu ner, pio kan-kan ner tenpupuda, erdi gel uang butene, kunumna pio meteknge, yandongopupa, Yesusdi epu. 3 Dongopu pangeda, Yesusdi er nyapu meneng damai abukmaiya tep, pepu.

“Sun dipetepso. Ne tek sisi upu pepsene. Aisomka neng yumadi, co bo weik dongoryanmang dinino, sundi tupa talenung kecada, pio weike. Atep, ila co bo dongopmangada, Allah er kangeda yuma tapakra nungnada metekpu kupmare. Dinino, asolu nerda pio kan-kan ner kurura tep, akeca-keca yuma men talerur ner cadi, weika di men dongoptue. Er dongopmauada, gel uang metekngepu dongopmau dinin, Allah er kangeda, kunumna weiknge utopu dongopmare. ^{▼▼kunumna weiknge utopu – Yesusdi aupu pepunge deiyoda, ake. Akeca-keca weik talenge nesalada, sun keca neitamai di bokra, Allah er karena tep, weika di karenkamenga peda, Allah er kangeda, akarepmenge ngeda, metek atonun kurure. Deiyoda, sun tupa talenkameng kecada, weik tupa akapkamra cadi, sun kanam dipu akeca karenenunga tepa. Dinino, akeca-keca yuma men talenge nesalada, akapmarenge neitamai di bokra, meteka dipu karenung dinin, Allah er kangeda, ‘Telep kupra karenenunge. Sundi ne tep karenenung kecada, weik atonun kurure,’ tenerure. Deiyoda, sun kankan kunge nesala tupa talenkamengada, pio metekpu kupkamra cadi, sun ikin dipu karenunga tepa. Tonda, 1 Korintus 16:2 dinkurume.} 4 Sun aisomka nengdi, sun akeca-keca weike talepya neitamai di, mawa weik akwapmarepane, ila co bo dongopmange dinin, asolu nerda, pio kan-kan ner cadi, er talepu keca yuma apu konum dongopmaue.” Yesusdi er nyapu tep pepu.

Yesusdi akeca-keca yuma gum kupkamre taru damai kupyopda, kupkamre keca tep, lap pepu upu

5 Yesusdi aupu konum pepu dingeda, er nyapu cap, Allah karerbarami ati pumbon kunmai taruda, er nyapudi akati domya dipterepidi, aupu pepi. “Naio, dipterepo. Akatida, ila pala urasin telep gel di domi. Tonda, Allah gispal dona tep kareamipa, akati pum dopra derirami ati kwerya kecada, urasin pio telepe. Akati-akati yuma domi ngeda, urasin pio telepe,” pepi. 6 Upepi dinin, Yesusdi er nyapu yuma tep tamupra pepu. “Ila ati dopyai yuma dipetepso. Ila lyom gel pala di deipra welepidi, domi gel yumada, amenda taruda uruptapmengepa, gel deiki tenpunge pe men tapkamenge. Ayuma daktapkamenge,” pepu.

7 Upepu pangeda, sun yumadi Yesus tep asipetepi. “Nun naio pepseo. Akatida, dan taru di daktapkameng do? Ware keca kuptua deiki di, ‘Akati daktapkamenga tep, damai kupre,’ tenen, kael keptepe do?” pepra asipetepi. 8 Asipetepipa, Yesusdi aupu tamupra pepu.

Nimi weika di, “Yesus er si cap, er puto cap deiki di yakanupe,” pepmengedi, “Mesias yankamre perami ngeboda, ne pua. Tonda sirya taruda konum damai kupre,” penkamenga deiki di, nimi weike amok upu gekepra, teka tenenkamenge. Amok neng upenkamsenga deiki di, nimi weike sun dipru kange yuma gipra, yuk tara dubankamenge. Ukupkamsenga tep, sun ne nyapuda kange dipru moupra kunkamrume. Amok upu penkameng nengda, sun upu gekepra, sun tara neng men kemdongonkamrume. 9 Tonda, amenda taru nimidi, “Ton tara neng cap, ton tara neng cap podanmange,” pepra penkamenge nge cap, “Nun mutu talesenge neng ‘Popbisipkamep’ tenen, podanmange,” penkamenge nge cap, yan pepmengepa, gekepmumyopda, kware men dangkamrume. Allahdi ‘Autopu keca kunkamre,’ konum teneramnga tep, akeca ukunkamre dinin, ‘Sirya taru gawal dangne ngeda, kapula,’ tenenkamrume.

10 Siria dangne taru ton kunkamre ngeda, ila nimi deiyo neng, Raja ^{▼▼Raja – Aupu pepu ngeda, pumun seki buku neitamaida, “Kerajaan melawan kerajaan dan negara akan melawan negara,” pepra seki. Atep, metek mutu neitamai kunge neng podana tep men pepu. Ada ila pala mutu neitamai kunge nesaladi, yuk ila pala mutu neitamai kunge nesala tep podankamenge.} nengdi talemenge mutu nengdi, yuk Raja talemenge mutu neng tep, bena podankamenge. Tonda, ton yala nengdi, ton yuk yala neng tep, podankamenge.

11 Ukuramenge taruda, mutu yuk-yuk weika di longkamre. Tonda, wa pepra kouamenge keca nong men kupre pangeda, nimi pio weika di jen pio putanapu kunkamre. Tonda, mutu-mutu yuma yuk-yuk nesala weike ila mambul pu weike jeramrepane, nimi weik depkamenge. Tonda, im deiki kupkamre keca epmengedi, kware pio weik kunkamrenge cap, ‘Sirya taru konum kupre’ tenen, kael kepkamenga tep, Allahdi peten kemne keca im deiki deipkamrenge cap, weik kupkamre.

12 Ange tep nengeda, akeca-keca kupkamre ngeda, moupra dimumdi, tenenkamrume. Dinino, apepmasen keca yuma kapul men kupre taruda, sunda, ‘Upu talena deiyo nengdi wenepra popkameng’ tenen, ateng koupra karerbankamsenge. Ada, ne tep teka tenemuma tep, sun nong deiki ikin keca weik derinkamsenge. Tonda, ‘Anengdi wenepra popkameng’ tenen, Allah upu peteremna ati neitamai cap, tali wenemna ati pumbon cap, dubankamsenge. Ne tep teka tenepmanuruma tep, ‘Anengdi popkameng’ tenen, ila-ila nimi deiyo neng, Raja neng cap, Gubernur neng cap, sun damai dubankamsenge.

13 Aneng damai dubesenge taru yumada, nedi nimi lyemnun upu, sun aneng gekena tep, ne si pepra lap penkamrume. 14 Sundi aila neng damai dubankamseng dinino, ukutaruda, tenepra keteneipkurume. Wenemna neng damai dubenkamseng taruda, sundi popkamsenga tep, ‘Ware upu peptepe deiki di upu sektepe do?’ tenen, tenimtona gume. Akunkamrenge tep kwar dangna gume. 15 Sun wenepkamseng taruda, nedi ila kael upu sun dipruai karepsenepa, penkamrum upuda, anengdi bisipra yanipmanto men kupkamsenge.

16 Sun nai yapu sisa cap, sun nin yapu sisa cap, sun weite-du sisa cap, sun kayapu neng sisa capdi, sun teka tenenerum neng tep, ‘Nimi deiyo nengdi popkameng’ tenen, tomopra dubenkamsenge. Napdaro basengepa, ton nengda, adipapu potamkamsenge, ton nengda tali tamkamsenge. 17 Ne tep teka tenenenge neng yumada, ‘Anengda, Yesus er nyapu kununga cadi, nun songe,’ tenepra tamkamsenge. 18 Ukupkamseng dinin, Allahdi moupra diserura cadi, sun giso potong tenpu peda, men gum kupkamsere. 19 Sun kwar dangna gum dipapu, tali dimpepra kumumyopda, Allahdi lyepkamsere. Ada, sun nongpuda popsetenge dinin, Allahdi gam kuna deiyo keca konum karepseryopda, sun sambalapu pio men depkamre. Pio gampu kunkamrume.

20 Ange tep nengeda, sun jen talen neng pio weika di, Yerusalem mutu dana-dana tara yuma warekrapsengedi, ketenepmengepa epmumyopda, ‘Yerusalem mutu kure keca kuluprapsengedi, sikke bukra popkamseng taruda, konum damai kupre,’ tenenkamrume. 21 Akeca kupre taruda, sun Yudea tara kunkamrum nengda, Yudea tapra, adipapu sepdaro co palpal mutu inipra benkamrume. Sun Yerusalem ati arum neitamai kunkamrum nengda, ati bo tapra, bura tara saka inimbenkamrume. Sun bura tara kuramum nengda, tamupra ati neitamai yakana gume. 22 Angeda mesum tep men pepsene. Deiyoda ake. Akeca kupkamre taruda, ada Allah upu jenek lap perami nengdi, “Allahdi nesala yuma wenepra popkamre,” pediramitopu kupkamre taru tep, pepsene. 23 Yesus aupu pepudi, aupu ton dukdongopra pepu.

Mundu douamkamenge nerapu cap, mi moum dinimamkamenge nerapu cap, anerapuda adipapu sepdaro men benmanto tep, pio ikin kunkamre. Amutu neitamai kunkameng nesala yuma tep nengeda, Allah er yu weik kuprepa, wenepredi deneprepa, pio ila di kange mun kuprepa, kange mun kunkamre.

24 Amutu yana popbisipkameng nengdi, Yahudi yala nesala weike balal ya di portamkamenge. Ton nengda ateng kouprapmengedi, yuk karen mutu ban-ban yuma dubengedi, pel dipembankamenge. Yerusalem ati arum dongai yumada, Yahudi yala gum nesaladi, ‘Amutuda mambulai,’ tenena gum dipapu, tali yan yanipra kunkamenge. Ukupra dakuramengepane, Yahudi yala gum nesala ila nimi deiyo neng kepmengedi, mutu ban-ban yuma pio talenkamenge. Allahdi tenemu tarupu kunkamenge.

25 Im alau tara kure kecada, keteng cap, kuru cap, ware cap deiki di, ila mambul keca, peten kemdina tep kupkamre. Laut mokon yumada, mokon ila di longteng-longteng pepredi, mokon puto ila di topdoua welepredi, ila lelim pepre pangeda, tuai mutu nesala ban-ban yumadi, ‘Mokon jepserur’ tenen, ila kange mun kuprepa, ‘Ware kupkamep do?’ tenen, pio tenimtonapu kunkamenge. 26 Im alau tara kure keca yumada, lung-lung pepredi, embendankamre cadi, nesala ban-ban yuma, ‘Ware kupkamser do?’ tenen, kware pio weik kuprepa, giso biri-biri peprepra depmanto kunkamenge.

27 Akeca yuma kupre pangeda, neda Nimi Mi Sisa Utopu Ngebodi, ne puto weik cap, dirine weik cap, urasin telep kuna cap, ayuma deiki di, doua kan-kan yakanepa, tuai nesala yumadi epkamnenge. 28 Apepmasen keca yuma gonga kepra kupre taruda, sun tekromumdi, ‘Nun nai, nun Lyemna Deiyo Ngebo yankuser’ tenen, kange yang-yang pepserepa, ereiya dinkamrume. Ada, ‘Allahdi lyepkamser taru konum kupre,’ tenepkamruma tep, pepne. Yesusdi pepu. 29 Yesusdi aupu pepu dingeda, adomon upu ton cap pepu.

30 Sun yuma kaele, delek co kait ^{▼▼delek co kait – Pumun seki buku neitamaida, delek co men seki dinin, nun mutu kure keca sekmapada, ‘Nimidi moupra kael keptenge’ tenen, sekmepu. Sun pumun taru seki ngeda, Ara co du mouramre co seki. Tonda, aco er co bo belepyopda, ada dou mapkamra tep tenerami.} pomyanen, kalum bupkure atep, telel ongopyopda, ada ‘Dou mapkamra tepa,’ tenerume. Tonda, ‘Apouwa kupmara cadi, dou mankamre’ tenen, perume. 31 Akeca dimumdi, ‘Dou mapkamare’ tenen, kael kemamrumtopu, apepmasen keca epmum dingeda, ‘Sirya gawal dakamre taru konum dam kupre,’ tenepkamrume. Ada, Allahdi akeca-keca yuma cap, nesala ban-ban yuma cap, talepredi, Ila Nimi Deiyo Ngebo kunkamre taru, ‘Konum gonga kepre’ tenen, kael kemkamrume.

32 Ne tek sisi pepsene. Apepmasen keca gonga kepre taru epkameng nesalada, sun yuma kapul men depmange taruda, apepmasen keca gawal dangne taru peda, tek sisi epkamenge. 33 Im alau tara kure keca yuma cap, tuai tara kure keca yuma capda, gum kupkamre dinin, ne pesene upu yumada, tenpu pe ton men gum kupkamre. Pio akapkamre. Ne penetopu tek sisi nong kupkamre.

34 Ange tep nengeda, sun kange moupra kunkamrume. Ada, mali-mali kuna cap, tali kange doupra mesumpu kuna cap, kange yawaramne me tali jena cap, uda, ‘Nun ati, nun opkal, nun jen cap, ware kupkup do?’ tenen, tenimtona cap deiki di, sun kange dipru tenena ngeda, ikin weik kupseredi, boun yuksera tep pepne. Boun yukserepa, ne pel dopmanto men kurum tep, kange pio moupra kunkamrume. Ukupmantoda, kapang bisi embaramreai pena pemengepa, kapang tali mankau di barepa, youramretopu, ne yankamne tumi mankau kange doupmum taru, dato-dato di yana kupserur tep, kange pio moupra kunkamrume. 35 Tuai mutu ban-ban yuma kunge nesalada, apepmasen keca tek sisi konum kupkamra tep, sun kange moupso pepsene.

36 Ange tep nengeda, pio moupra kaleka dimumdi, kunkamrume. Tonda, nesala yuma tep, kunkamre keca kupserepa, ‘Allah tapra malipu kupnup’ tenen, Allah moronapu kunkamrume. Tonda, ‘Ikin pio weike kupserur’ tenen, Allah moronapu kunkamrume. Ton ngeda, Nimi Mi Sisa Utopu Ngebodi, nesala yuma wenepredi upu lepsikra bokeipkamre taruda, ‘Er damai bepedi, ali men dakamep’ tenen, Allah moronapu kunkamrume. Yesusdi er nyapu tep pepu.

37 Ataruda, Yesusdi tumi-tumi yuma, Yahudi yala neng, sun Allah tep karerbarami ati pum peteremanpane, ipnopda, Zaitun mutu buma welepra marbaramu. 38 Mapmana bereknopda, atumi-atumi ipna taru yuma, anesala yumadi, ‘Yesus upu gekepkup’ tenen, Allah karerbarami ati wengyanpa, peteremamu.