Luk 22 | XteSC | STEP | Yahudi yala neng Kaplemna Kailya Kalemna tep tumi, er si ton Paskah cap, Nena Gum Roti kalemna tumi cap, dam kupu.

Luke 22

Yudasdi, ‘Yesus popkameng’ tenen, nimi kai perbeu upu

1 Yahudi yala neng Kaplemna Kailya Kalemna tep tumi, er si ton Paskah cap, ^{▼▼Kaplemna Kailya Kalemna atau Paskah deiyoda ake. Yahudi yala nesala Mesir mutu neitamai kurami taruda, Allahdi aneng dubenkou lukunda neitamaida, nimi deiamenge weni nyapu pon malaikat dokotepu. Yahudi yala nesaladi, domba popra yapi bupra sun buplan dana-dana tara cap, deiki tara cap likeipya tep, amalaikatdi ayapi epuopda, sun ati wengna gum, akati kaplepra benmaudi, sun weni nyapu men poptapu. Dinino, sun Mesir mutu nesalada, yapi keca sun buplan dam men likeipya cadi, nimi pon malaikatdi, sun weni nyapu poptapu. Akeca yuma tupa tenena tep nengeda, keteng tamun yumada, Yahudi yala nengdi Kaplemna Kalemna kalemami.} Nena Gum Roti kalemna tumi cap, ^{▼▼Nena Gum Roti kwaneng tenena tep kalemna – Sun Yahudi yala nesaladi, utenerami. Mesir mutu kuramepu taru, Allahdi lyepra dubenkuseu taruda, ‘Nena gum roti jepmeputopu, tupa tenenkamepe’ tenen, keteng tamun yuma Nena Gum Roti kwaneng tenena tep, akalemna kalemami. Mesir mutu benkui taruda, Musadi peipu. “Menmena benkupa tep, roti kwaneng nena deiyo keca roti bun dongoptepe dinin, go gum tep, berbera di amutu tapra benkamepa tep, roti kwaneng nenange dana gum, nena gum ngepu jepkupe,” pepra deipupa kupi. Lap pena upu nomor 30 dirume.} dam kupu. 2 Yahudi yala neng Allah tep karena deiyo neng cap, Musa sekeiamu upu dopra peteremna deiyo neng cap, aneng yumadi, ‘Yesus poptepe,’ tenenmai dinin, ila kalemna tumi damai kupupa, nimi weik konum bulupmai cadi, ‘Sun anengdi epsenung’ tenen, kware kupu. Ada, ‘Yesus popmepepa, yuk nengdi derepsenung’ tenen, kware kupu. Kware kupka cadi, yuk neng men kael kepi dinin, ‘Yesus ware koupra inipra popkamep do?’ tenenmai.

3 Uda, Yesus wepra deiamu neng kan-kanpu dinin, tenpu ngebo er si Yudas Iskariot, Kain Jen Ngebo er dipru neitamai weku. 4 Wekra peipupa, Yudasdi, ‘Anengdi Yesus poryankameng’ tenen, Allah karena tep deiyo neng cap, Yahudi yala nengdi Allah tep karerbarami ati kalengami neng, sun deiyo neng cap, aneng sun damai nimi upu perbeu. Ada, ‘Sundi Yesus er pona tep, nedi ware kupra Yesus dopra, sun tep kareptene do?’ tenen, upu sisingmai. 5 Ben pepu pangeda, sun anengdi kange deipidi, pingping kupupa, “Ukupsememnyopda, co bo weika di karepkamkepe,” pepi. 6 Upepipa, Yudasdi, ‘Ukupkamne,’ tenepudi, “Jo,” pepka tep, ‘Ware telep go kwapre taru di, yuk nengdi men dinmaneng taru dipu, Yesus dopra adeiyo neng kareptene do?’ teneramudi, dinapu kuramu.

Kaplemne Kalemna jena tep, ketenem din upu

7 Sun Yahudi yala nengdi, Nena Gum Roti kwaneng tenena tep gonga kepra kalemna tumi di, sun apu yapu Mesir mutu tapra benkui taruda, domba popra buplan sirik dana-dana yapi lekeipi ngeda, ‘Tupa tenenkamep’ tenen, atumi di domba tenpu popra, Allah tep karerami. Adomba bisamda, er si Kaplemna Domba perami. 8 Ukuramya tep, Nena Gum Roti kwaneng tenena tep gonga kepra kalemna tumi deiki di, Yesus er nyapu butene neng, Yohanes cap, Peterus cap tep, aupu pepu. “Kaplemna Kailya Kalemna nun yuma kikiman jepkamepa tep, ketemdirbereso,” pepu. 9 Upepupa, sun butenedi Yesus tep asipeteprei. “Kanda, Kaplemna Kailya Kalemna keca jepkamrem ngeda, dan ati ketenem derirbenkunem do?” pepra asipeteprei. 10 Asipterepreipa, Yesusdi er nyapu butene neng tep, aupu pepu.

Sun Yerusalem ati arum doramya neitamai bererum taru, nimi tenpu me gwena ila mau morokyo deiki deipra dubarepa, epra antapkurerume. Epdamum dingeda, er amenda tara bererumdi, er wekure ati wekrap, akati deiyo ngebo tep asipetepkururume. 11 “Nun peteremna deiyo ngebodi asipetepmakere. ‘Ne cap, ne nyapu cap, Kaplemna Kailya Kalemna keca jepkamepa tep, kan nimi bo neng wengmeng atida dan do?’ upepra asipetepkurerume.”

12 Asipeteprerumpa, angebodi er nimi bo ati peterepkamsere. Akatida, arum deiki, ban kupra dopu ati ^{▼▼Arum deiki ban kupra domi ati perami ngeda, ukuprap. Amutuda mo meteka dipu cemamua cadi, sun ati arumda mesa bodi men wipi. Sun ati arumda gel dopra ban kepra domi. Amutu nesala sun ati dopnopda, ukurami. Ati pirman tara di, apio bura tara di adine, alupai dimami. Nimi bo neng wengbana tep, sun ati arumda banpu kupra domya deiki di nimi bo neng wengnai tep, alupai ati domi. Ukurami atida, Yesus er nyapsilip autopu ati weki. Tonda, lap pen upu nomor 27 dinkurume. Gambar dina tep, Lukas 5:19 dinkurume.} alau ngeda, nun bukamepai cap, jen keca deipkamepai cap, keteneipmange ngeda, sundi epkarerume. Akati pum nun Kaplemna Kailya Kalemna jepkamep kecada, ketenepkamarerume. Yesusdi er nyapu butene neng tep pepu.

13 Upepupa, abutene nengdi Yerusalem mutu bereidi, Yesus peipmau keca utopu kupka tep, eprei dingeda, Kaplemna Kailya Kalemna jena tep jepkamai keca ketenepra deiprei. 14 Akunmareipane, sun jen jepkamai keteng konum kupupa, Yesus cap, erdi wepra deiamu nyapu, sun 10 neng cap, Yerusalem mutu yai. Yaidi, sun jen keca ketenepra deipmaiyai, alau ati bukra, jen jenmai taruda, Yesusdi er nyapu 12 neng yuma tep aupu pepu. 15 Ne kapul kange mun men kupmanere taru, ne cap, sun cap kikiman, Kaplemna Kailya Kalemna jena tep pio putaramneu.

16 Ada mesum tep men pepne. Ne tek sisi pepsene. Ataru di dipra dortaru yumada, aKaplemna Kailya Kalemna ton cap men jenkamne. Ukupra dakuramnyanen, Allah nesala weik lyepredi, sun cap, akeca-keca yuma cap talenkamre taru, Kaplemna Kailya Kalemna jeramepnge deiyo gawal dakredi, katuai kupkamre tarupu, ne kange di ton cap jepkamne. Yesusdi pepu.

17 Amendada, Yesusdi anggur me mau gwepra, tenpu keteneipmangunge dopra, Allah tep, “Telepe,” pepu dingeda, er nyapu yuma tep, “Ame mau dopra karepdanen embemumdi jepso,” pepra karepupa, amau tenpu di jepra embanmai. 18 Sun ame jepkoi taruda, aupu ton pepu. “Sunpu anggur me jepkurum dinin, neda ataru di gonga keprap, adinen dipra, dortaru yuma cap, anggur me ton pio men jenkamne dinin, dakuramnyanen, Allahdi weiamu nesala weik lyepredi, anesala cap, akeca-keca yuma cap, talenkamre taru konum kupre pangeda, nun yuma im deiki wekmepyopda, ame ka di ton cap jepkamne,” Yesusdi pepu.

19 Nena Gum Roti kwaneng tenena tep kalemna jepkoi taruda, Yesusdi aroti kwaneng dopra, Allah tep, “Telepe,” pepu dingeda, aroti kwaneng topra, er nyapu tep bokra karenmaudi aupu penmau. “Sun lyemna tep, ne nong karepkamnetopu, aroti kwanengda, ne nong utopu tep karepsene. Atep dopra jepso. Akarepmasen rotida, ‘Ne nong tenepra jenkamruma’ tenen, karepmasena tep, dopra jepso,” pepu.

20 Ange kuputopu, sun jen keca jepra sengpepyopda, anggur me mau di gwepra, dopudi aupu pepu.

“Ameda ne yapi utopu kurure. Ne yapi deiki di ukupu pedina upu pepra deipsene. Dinino, pumun taru Allahdi pediramseu ngeda, konum punupkure. Atep, nedi pepkusen upuda, menop taru ngeda, konum punupkure. ^{▼▼yo punupkure (pedina upu) – Pumun taruda, Allahdi pediramngada, ake. Ada, pumun taru, Allahdi, ‘Ukunkamrume, ange men kunkamrume,’ peipupa, Musadi sekeiamu upu yuma, Israel nesaladi moupra gekeramidi, dombaramya deiki di, Allahdi sun mali kurami keca kaukemamu. Dinino, ukutaru ange utopu men kurure. Ukutaruda, Yesus er yapi embeua deiki di, er kange dipapu bicau teneseredi, nun mali kun keca Yesus depka deiki di, gum kupra deipseredi lyemserure. Nundi mambul pel dona deiki di men lyemserure. Ange tep nengeda, ‘Pumun taru pedina upu konum punupre,’ pepu.} Ada, yu nengdi popnengepa, ne yape embenkamra deiki di, nesala ban-ban yuma, sun mali kunge keca cap, mali tenenge keca cap, gum kupra deipnepa, Allahdi sun mali keca kaukepredi, nesala weik lyepredi sun dipru pio talenkamre.

Dinino, pumun di pediramseutopu gume. Ukutaru Allahdi pedisere upu yuk kurure. Ada, ukutaru pe, amenda taru peda, ne yapi deiki di tuai nesala sun mali kun keca cap, mali tenenge keca cap, gum kupra deipnedi lyepkamne. Ada, Nimi Lyemna upu tep, ukupu pedinange pepsene,” Yesusdi pepu. (Ada, “Nimi ban-ban yuma kununga neitamai, nimi weik sun mali kuraminge cap, mali teneraminge cap tep, gum kupra deipnedi, ne yapi deiki di lyepkamsene,” Yesusdi pepu.) Upepudi, aupu ton cap pepu.

21 “Dinino, ne cap bukmapdi jen jenmarum neng neitamaipu dinin, tenpu ngebodi, ne popkamnenga tep, nimi upu perbenkure. 22 Allah upu lap perami nengdi, ne tep sekamneitopu, neda Nimi Mi Sisa Utopu Ngebo tep, mali nengdi popnengepa depkamne. Sun Allah upu lap perami nengdi, lap peramneitopu, amutu nengdi kupkamneng dinino, neda Nimi Mi Sisa Utopu Ngebo napkamaner ngeboda, napnerepa popnengopda, Allahdi angebo weika di wenepra popkamra tep, erda pio bicaue,” Yesusdi pepu.

23 Yesusdi upepupa, sun gekepidi, sun pe nengpu asipdaidi, “Yesus tep popkamenga tep, napkamre ngeboda, ware ngebo do?” pepra asimdanmai. 24 Tonda, sun pepu upu pedanmai taruda, ‘Nun awekmap neng kan-kan neitamai di, ware ngebo erepra, nun deiyo ngebo konum kunmaser do?’ tenenmaidi upu pedanmai. 25 Utenepra pedanmaipa, Yesusdi er nyapu 12 neng yuma tep bulupra deipudi aupu pepu. “Yahudi yala gum nengdi, ‘Nun deiyo neng aca,’ tenenge nengda, adeiyo nengdi sun amutara neng tep, yu kuprepa aneng yanipmengedi, sun nong deiki ikin keca derinunge. Tonda, sun ila-ila neng, deiki tara kungedi, sun amutara neng tep, kange mun keca sun nong deiki derinung dinin, sundi sun pe tep, ‘Nunda telep nengdi, nun amutara neng tep makunupe,’ tenepra tali upu pertamnunge.” Yesusdi pepu. Upepu dingeda, aupu ton dukdongopra pepu.

26 Sun anengda ukunung dinino, sun ne nyapuda ange utopu men kunkamrume. Sun awekmarum neng neitamai di, ware ngebo do, ‘Neda telep deiyo ngebo kunkamne’ tenen, deiyo ngebo utopu kupre ngeboda, er kayapu sun amngai bukredi, sun kange mun kupre keca tep, makunkamre. Tonda, sun ila ngebo kunkamre ngeboda, kange eremna gum di, adipapu, sun amutara bukredi, sun weit ngebo utopu kunkamre.

27 Sun tenipetepso. Ila mambul ngeboda, dan ngebo do? Jen keca deipra jeramengai, bukredi jerur ngebo do, jen keca ketenepra karerur ngebo do? Gume, jen keca deipra jeramengai menmena bukredi jerur ngeboda, ila mambul ngebo kurure. Dinino, nepuda ila mambul ngebo kune dipunen, sun amutara kunedi, jen keca ketenepra kareramenge neng utopu, kange dipru boun ngebo kunune. 28 Sunda, ne ikin kuramneu taru neitamai yuma, sun cap melipra tonpa embaramepu.

29 Ange tep nengeda, ne naidi, ‘Akeca yuma erdi talenkamre’ tenen, ereipneudi, nimi deiyo keca karepneutopu, nedi sun tep erepra deipsenepa, sundi ne tenepsisi keca talenkamrume. 30 Ada, akeca karepsenepa, akeca-keca yuma talepra kunkamne mutuda, ne cap, sun cap, kikiman bukra jen keca jepedi, ila nimi deiyo neng bungameng keca deiki bukmumdi, Israel nesala 12 yala neng yuma tep, upu bongdina deiyo neng kunkamrume. ‘Ukunkamruma’ tenen, sun erepra deipkamsene. Yesusdi er nyapu 12 neng tep pepu.

31 Upepu dingeda, Simon Peterus tep aupu pepu. “Simon, Simono, nimidi kacang tanah dapmengedi, ‘Kasbal kepman men jepkup’ tenen, mali keca tep kapyukra tapmengedi, du telep kecapu jeramengtopu, Simon kan peda Kain Jen Ngebodi, ‘Mali kuptu tenen, pio teka tenenkamre do, tapkamre do?’ tenen, kurpeten keca weike kupetepkamkere. 32 Ukupkamker dinin, ‘Teka tenepneunge, men tapkamre’ tenen, Allah moropkesi. Amendada, ne tapmanememyanen, ka di tamupra ne tara tamupra yana kepmem dingeda, kan kayapu, akunmang neng yuma tep, dipru kwa dimna upu penkamrume.”

33 Yesusdi upepupa, Peterusdi tamupra pepu. “Gume naio, wenemna ati dongopnetenga pe, ne popnetenga peda, ne kangeda ange telepe pua. Ne cap kan cap, kikiman kunkamneme,” pepu. 34 Upepu pangeda, Yesusdi Peterus tep tamupra pepu. “Kao, tek sisi pepkene. Alukundapu dinin, kapul men berekre taru, jem ayam kapul men gapupmare taruda, kan peda u weneri deiki di, ‘Angebo Yesusda, ne walwale,’ pepra iniptapkunerume,” pepu.

35 Yesusdi upepu dingeda, aupu ton cap pepu. “Nedi dokotepsisipa, sun mawa keca kiramrum alen cap, tali jen keca kin alen cap, yan dongona cap, men doupmum dipapu, ne upu peterep embaramum taru yumada, ware keca ton tenpu keca pepe gum kupseupa, putaramseu do?” Yesusdi asipetepupa, sundi tamupra, “Nunda akeca-keca yumada, men gum kupka tep, men putaramseue,” pepi.

36 Upepipa, Yesusdi tamupra pepu. “Ukuramrum dinin, ukutaruda, yuknge pepkusene. Sun mawa keca kin alen cap, tali jen keca kin alen cap, akwapyopda, akeca dopra peterep embankamrume. ‘Nun barye buknup’ tenen, bupu kemna tep, deiki kemrum opkalda, ‘Angeda ila mambule,’ tenerum dinin, aopkal doupra, yuk neng damai co bo kunupmumdi, aco bo dopra parang yapu kunumbenkurume. ^{▼▼parang ya – Yesusdi, ‘Parang ya kunupso,’ pepunge deiyoda ake. Ada, ‘Tek sisi parang ya kunupkameng’ tenen, men pepu. Deiyoda, ‘Amenda taru yu nengdi ikin keca weik sun nong deiki derinkamsenga cadi, sun kange moupso,’ pena tep pepu.} Ada, ware keca do yuma men di, ‘Ange mambule,’ teneramrum keca yumada, ‘Ange mambul,’ tenena gum, tapmumdi, tek sisi ila mambulngepu ketenepkamrume. Amendada, kange mun keca pio weike yankamra tepa.” Yesusdi pepu.

37 Upepudi, aupu ton pepu. “Ne tek sisi pepsene. Allah upu jenek perami neng, sun nabi nengdi, pediramneitopu, ‘Angeboda, pio mali kun ngebo,’ tenepmengedi, tek sisi mali kun neng cap, er cap, kikiman dopra popkamenge. ^{▼▼Yesaya 53:12} Ange pepmasentopu, Allah upu jenek lap perami neng, nabi nengdi, ‘Ukupkamre’ pepra sekeiamneitopu, tek sisi kupkamnere. Akeca yuma gawal dangna taru konum dam kupre,” Yesusdi pepu.

38 Upepupa, er nyapu 12 nengdi, ‘Deiyo ake’ tenen, moupra men kael kepya tep, sundi tamupra pepi. “Nun nai, dipterepo. Nun parang ya butene ^{▼▼Nun parang ya butene – Yesus er nyapudi, “Nun parang ya butene,” pepinge deiyoda, Yesusdi domon upu deiki, “Ya kunupso,” pepmauada, nong neitamai, ‘Deiyo ake’ moupra men tenepmaia tep, apu tali walwal di peptapi. Yesusdi, ‘Parang ya sisa ketenepkameng’ tenen, men pepu dinin, sun walwal di pepi.} keteneipmap adano,” pepi. Upepipa, Yesusdi tamupra, “Angeda, konuma,” pepu.

Yesusdi Zaitun mutu deiki Allah moropu upu

39 Yesusdi upepu dingeda, er cap, er nyapu cap, sundi ataru-ataru yuma ukuramyatopu, sun yuma alau ati Yerusalem mutu sun bukmai ati tapra, banmaiyanen, Zaitun mutu deiki bei. 40 Zaitun mutu deiki welepra beidi, Yesus er nyapu 12 neng tep pepu. “Sun abukaprumupane, ne yukai Allah mororbenkune cadi, ‘Kain Jen Ngebodi sun dipru gidorepa mali kuprum’ tenena tep, Allah moronkurume,” pepu. 41 Upepu dingeda, sunda acapu kunmaipa, er yambul karenai beudi, gutam tu deiki dipra Allah moropu. 42 Moronmau taruda, aupu penmau. “Ne naio, ne popkamaneng taru ikin kupnerepa, donmanya depkaman ngeda, ‘Kandi lyepnetumpa, ange men kupkamneng’ tenen, moronmakene. Dinino, ne putanmanerpa moronmakena utopu gume. Kan men di teneramnemuma utopu kupkunerume,” Yesusdi upepra moronmau.

43 Allah moropu taru neitamaida, ‘Popnengepa depkaman ngeda, Allahdi lyepnetutoda men deptene’ tenen, pio ikin kange doupupa, Allah moronmau. Ukunmaua cadi, Allah moronmaupane, malaikat im deiki dato-dato di tengyaudi, Yesus er dipru kwa dipu. 44 Er popkaminge tep, kange mun kupmaudi, mali kange doupra, puto di Allah moronmaupa, er nong me pakudi, me tu deiki sangmau ngeda, nimi popdangepa, yapi weik embaretopu, nong me weik pakudi sangmau.

45 Yesusdi Allah moronmauanen, sengpepkopda, er nyapu kunmaiyai tamupra bena dinmaupa, ‘Nun nai bo Yesus popmengepa depkamre’ tenenmangua tep, dipru kange sukunmaupa, puto boun kupmaua cadi, mapnapu kupmaipa epu. 46 Epudi, er nyapu tep aupu pepu. “Sun mapmarumada, warya tep do? Sun bukroso, Kain Jen Ngebodi sun dipru gidorepa, ‘Nun mali kupnup’ tenena tep, kange mouprumudi, Allah moronapu kunkurume.” Yesusdi er nyapu tep pepu.

Yesus popkoiya tep, ateng koupra dubei upu

47 Yesusdi aupu tup penmau taruda, Yesusdi wepra deiamu neng, sun 12 neng kan-kan dinin, angebo er si Yudas mepmaupa, Yesus er ateng koupkamai neng weika di amenda yakanmai. Yakanmaipa, Yudasdi, ‘Yesus mutupkun’ tenen, er damai tengyaupa, Yesusdi Yudas tep asipetepu. 48 “Yudaso, neda Nimi Mi Sisa Utopu Ngebo tep tenepneremdi, ‘Mutuna deiki di napkaman’ tenen, yanmaneremada, warya tep do?” Yesusdi pepu. 49 Yesus er nyapudi, ‘Anengda, Yesus ateng koupkunga tep, yanmanga,’ tenepra kael kepidi, Yesus tep pepi. “Naio, nun parang ya doprapmepedi, aneng popkup do?” pepra asipetepi. 50 Asimpetenmai taruda, Yesus er nyapu kan-kan di tenpu ngebo er parang ya dopropudi, Allah karena tep deiyo ngebo, er amutara pel melimna ngebo, er amul dumsisinge toupkotepu. 51 Toupkotepupa, Yesusdi, “Ukuna yapo, akonuma,” pepra upu seku. Upepu dingeda, amul toupkotepmauai, Yesus er buru deipudi kweteipupa, men di telep akwamutopu kupu.

52 Ataruda, Yahudi yala neng, sun Allah karena tep deiyo neng cap, Allah karerbarami ati kalengna neng, sun deiyo neng cap, Allah karena tep, deiyo neng cap, sun Yahudi yala neng, yuk deiyo wisi neng cap, ada, ‘Yesus ateng koupkup’ tenen, yanmai neng tep, Yesusdi pepu. “Anengo, sundi ne tep, ‘Amutu talenge deiyo neng popbisipkamra tep, er gonga kepra er nyapu dubenmare,’ tenepmanerumdi parang ya cap, nimi pon co balana cap, dopra tomoryanmanerum do? 53 Tumi-tumi yuma, Allah tep karerum ati dam peteremamsi dinin, ateng koupra men tomamnerume. Dinino, Allahdi teneamutopu, kupkura tep, Kain Jen Ngebo er puto deiki pel donmaser taru dipapu kupkunerume.” Yesusdi er tomoryanmai neng tep pepu.

Peterusdi, “Yesusda ne walwale,” pepu upu

54 Yesusdi upepu pangeda, Yesus adipapu taleproi. Taleproidi, tomopra Allah karena tep, ila deiyo ngebo er ati dubei. Yesus dubanmai taruda, Peterusdi amenda dipdongopnen banmau. 55 Yesus menmena dubanmai pangeda, Peterusda, amenda Allah karena tep ila deiyo ngebo, er ati dam yaudi, jen talen neng uku sekra peingmaiyai yana buku. Bukudi, er peda uku peingmau. 56 Peterus uku peingmau taruda, akati ila deiyo ngebo, er pel melipra doramu ner tenpu, Peterus kunmauai yana dinmau.

Yau pangeda, Peterus uku peingmaupa, anerdi Peterus dinmaudi, er urasin tep minmau. Mipudi, ‘Angeboda, Yesus er melimna ngebo, akonuma,’ tenpu di aupu pepu. “Angebo cap, aNasaret ngebo Yesus cap, kikiman kuramrei,” pepu. 57 Upepupa, Peterusdi tamupra aner tep pepu. “Apepmanerem ngeboda, ne walwale,” upepra iniptapu.

58 Dakunmaiyanen, yambul yuk taru yuk ngebo ton epudi, Peterus tep aupu pepu. “Kanda, aNasaret ngebo er melipra kurami neng cap, kuramum ngeboda, kan abukmareme,” pepu. Upepupa, Peterus aupu gekepudi, “Ne gume. Angeboda, ne walwale,” pepra iniptapu. 59 Upepra iniptapupa, sun yuma dakunmaiyanen, Peterus cap tekmai neng kan-kan tenpu ngebodi, Peterus tep, ka di ton cap pepu. “Kanda, Galilea tara kurum ngebo cadi, tek sisa angeboda er melipra embaramrum ngeboda, kan konuma,” pepu. 60 Upepu pangeda, Peterus upu puto di ton cap pepu. “Apepmanerum ngeboda, tek sisi pio ne walwale,” pepra inipu. Peterus er aupu tup penmau taruda, adipapu jem ayamdi, gapupu.

61 Ayam upu pepu pangeda, adipapu, Yesusdi Peterus tep dinmaupa, Peterusdi, Yesus arup taru pepmau upuda, ka di ton cap tenepu. Tenepudi, ‘Uo, Yesusdi,’ “Jem ayam u butene kapul men gapupmare taru, ‘Angeboda ne walwale,’ pepra, u weneri deiki di iniptapkamanereme,” pepmaneutopu, ‘Ne konum kupne,’ tenepu. 62 Utenepudi, aneng acapu tapra, bura bena, er dipru kange pio ikin kupupa, ila di engenmau.

Jen talena nengdi, Yesus tep nalemai upu

63 Amendada, ‘Yesus berur’ tenen, Yesus tep kalengmai jen talen nengdi, nyek-nyek penmaidi, sun buru getepra, Yesus er nong deiki tukra ponmai. 64 Ton nengdi Yesus er asuru, opkal di getepra kepdongopmaidi, buru getepra ponmai taru di, Yesus tep aupu penmai. “Allah upu cap, Allahdi amenda kupkamre keca cap, lap pena ngebo, nabi ngebo kurema cadi, lap pepseo. Allah upu lap pen ngebo, nabi ngebo kuruma cadi, ware ngebodi, er buru di ponmaker do?” penmai. 65 Tonda, aupu utopu upu weika di ton cap, penmaidi, Yesus tep mali upu pepra nalemai.

Yesus dopra Pilatus cap, Herodes cap, sun damai dubei upu

66 Sun ukupmaidi dakunmaipane, berekyopda, sun Yahudi yala neng, sun ila deiyo neng cap, Allah karena tep ila deiyo neng cap, Musa sekeiamu upu peteremna tep deiyo neng cap, ‘Nun yumadi upu sisikmepedi, Yesus upu lepsikra bokeipkup’ tenen, bulupmai. Bulupmaiya tep, yuk nengdi, Yesus dopra aneng damai dubei. 67 Dubeipa, anengdi Yesus tep asipetepi. “Kanda, pepseo. Allahdi wepra dokotepupa, nesala weik lyepredi pio talenkamser ngebo, Mesias ngeboda, kan akurum do, gum do?” pepra asipetepi. Asipetepipa, Yesusdi, “Asipetepnerum ngeda, pepsetenya peda, teka men tenepkunerume.

68 Tonda, ‘Neda nimi Lyemna Deiyo Ngebo, Mesias Ngebo kunun do, gum do?’ upepra asipetepsetenya peda, sundi tamupra men pepkunerume. 69 Dinino, ne tek sisi pepsene. Ataru di dipra, dortaru yumada, Neda Nimi Mi Sisa Utopu Ngebo, Allah er Pio Puto Ngebodi ereipnerepa, er dumsisi tara buknedi, akeca-keca yuma talepra pio kunkamne.” Yesusdi pepu.

70 Upepu pangeda, sun yumadi Yesus tep asipetepi. “Ange tep nengeda, kanda, Allah er Mi Sisa kurum do, gum do?” pepra asipetepi. Asipetepipa, Yesusdi tamupra, “Sun tek sisi penmarume, neda Allah er Mi Sisa kunun adano,” pepu. 71 Upepupa, sun yumadi upepi. “Gume, yuk nengdi ton cap pepkunge upuda, nun putana gume. Er pedi, ‘Allah er Mi Sisa kunune,’ pepmaserpa, gekepmapa tep, angeda, konuma. Aupu pepmara deiki di popkamepe,” pepi.