Luk 3 | XteSC | STEP | Roma mutu yuma ila nimi deiyo ngebo Kaisar Tiberius taleamu taru, adinen dipra, keteng tamun 15 konum kupu taruda, Pontius Pilatus dopra, ‘Yudea tara talenkamre’ tenen, Gubernur kepra deipu. Atarupu, Galilea tara taleamu ngebo, Herodes pemerintah neng, sun deiyo ngebo kepra deipu. Er weit bo Pilipusdi, Iturea tara cap, Trakonitis tara cap, taleamu. Atarupu Abilene tara taleamu ngeboda, Lisanias kuramu.

Luke 3

Amendada Yesus yankamua tep, Yohanesdi peteremamu upu

(Matius 3:1-12; Markus 1:3-8)

1 Roma mutu yuma ila nimi deiyo ngebo Kaisar Tiberius taleamu taru, adinen dipra, keteng tamun 15 konum kupu taruda, Pontius Pilatus dopra, ‘Yudea tara talenkamre’ tenen, Gubernur kepra deipu. Atarupu, Galilea tara taleamu ngebo, Herodes pemerintah neng, sun deiyo ngebo kepra deipu. Er weit bo Pilipusdi, Iturea tara cap, Trakonitis tara cap, taleamu. Atarupu Abilene tara taleamu ngeboda, Lisanias kuramu. 2 Aneng taleamya taru neitamai di, sun Hanas cap, Kayapas cap, Allah karena tep, er si eremna ati pumbon pel dona ila deiyo neng ^{▼▼Allah karena deiyo neng, sun ila deiyo ngebo tep, lap pena upu nomor 14 dinkurume.} kuramrei. Sun apel dopra kuramrei keteng tamun deiki di, Zakaria er mi Yohanes nimi gumai kuramupa, Allahdi Yohanes tep upu peryau.

3 Upu yan pepu pangeda, Yohanesdi Yudea tara neitamai dinin, Yordan me dana-dana tara, Allah upu peterep embaramudi, teka tenepi nesala dopra me dongoramu. Peterep embaramu taruda, aupu peteremamu.

Yohanes peteremamu ngeda, ake. “Sun yuma, sun kange dipru mali tenemum keca cap, sun mali kumum keca yuma cap, tapmumdi amnyo karikromumpa, Allahdi sun mali kun keca yuma gum kupra deipredi, kaukepsere pangeda, nedi me dongopkamsene,” pepra peterep embaramu. 4 Ada tali tep gume. Allah upu lap peramu ngebo, nabi Yesayadi pediramutopu, angebo Yesus yankamnga tep, Yohanesdi apel doramu. Yesayadi pediramu domon upuda adano.
‘Ne Allahda, ne upu kai pedin ngebodi, nimi gum kwamngai di aupu perure. Nun Ila Nimi Deiyo Ngebo yankamre bisida, keteneipkurume. Ada Nimi Deiyo Ngebo yankamra tep, bisi kwiryepu yapra derinkamrume. 5 Mutu bongongai yumada, gonai di dalupra ban kemdinkamrume. Mutu dup yuma cap, mutu buma yuma cap, dalupra ban kemdinkamrume. Gwalin bisi yumada, lepsisikra kwiryepu yadinkamrume. ^{▼▼“Bisi kwiryepu yapra derinkamrume,” pepkada, tek sisi bisi yapra derina gum dinin, nimi sun dipru ketenem dina tep pepu. Ada sun mali kunge keca yuma tapra, Yesus teka tenepmengedi, ‘Teleppu kunkameng’ tenen, adomon upu pepu.} Gormaringne bisi yumada, bon kwamyaida, tu derinkamrume. Gel takke belemyai yumada, lukra lepsisikra teleppu kudinkamrume. 6 Amendada, nesala ban-ban yuma Allah lyepredi, nimi dipru pio talenkamser deiyo ngebo epkamenga tepa.’ Yesayadi pepu. (Yesaya 40:3)

7 Yohanesdi nesala me dongomu taruda, nesala gung weika di, ‘Me dongopkamser’ tenen, Yohanes peteremamngai gekerbarami. Baramidi, sun tupa mali kurami nesala yaipa epu dingeda, aneng tep aupu pepu. “Sun yu kuna cap, mawa di tali upu pepra inimtamna cap, kumumnyada, nimi ton bal inipra mapmarya di, toramsertopu kurume. Allahdi mali kun nesala wenepra popkamra tep, ‘Popsurur tep, sepdaro berume,’ pepra lap pepseu ngeboda, ware ngebodi do? 8 Sundi, ‘Nundi nun mali kupe keca konum tapmepe,’ pepra, tali upu deiki di pepnetum dinin, co du mouramya engamretopu, sun mali kurumu keca tek sisi taptumdi, dumsisipu kutumpa, eptenetoda, teka tenepsetene. Atep, sun mali kumum keca adipapu tapmumdi, teleppu kunkurume.

Tonda, ‘Gume, nun co puna ngeboda, Abraham kuserura tep, Allahdi men wenepkamsere,’ tenepra men penkamrume. Angeda tenena gume. Allahdi, ‘Abraham er nyapu ne doproptene’ tenen, putaptutoda, akwapu gel di dopra, Abraham er nyapu ton ketekeiptue. 9 Co kwemna deiyo ngebodi, co kwepkamra tep, ^{▼▼Co kwemna pepka deiyoda ake. Ada, mali kuramenge nesalada, Allahdi anesala tep wenepra poptapkamre taru, konum damai kupmasera tep, adomon upu pepu.} er ya dopra co deiyoi keteneipmare. Telep co du men mouramre co yumada, kweprapredi uku dongopkamre.” Yohanesdi anesala yuma tep, adomon upu pepu.

10 Upepu pangeda, er upu gekenmai nesaladi tamupra asipetepi. “Ange tep nengeda, ‘Allah di wenepra popserur’ tenen, nun adipapu ware kupkamep do?” pepra asipetepi. 11 Asipetepipa, Yohanesdi tamupra aupu pepu. “Opkal butene kwamre ngeboda, opkal pio men kwamre ngebo tep karenkamre. Jen keca kwamre ngeboda, jen keca pio men kwamre ngebo tep karenkamre,” pepu. 12 Tonda, amutu taleami deiyo neng karena tep, pajak co bo bulupra derina neng ton, “Nun nai guruo nunda, ‘Allahdi lyepsetue’ tenena tep nengeda, ware kupkamep do?” pepra asipetepi. 13 Asipetepipane, Yohanesdi tamupra pepu. “Amutu talena deiyo nengdi, ‘Pajak co boda, ukuprap doronkamrume,’ peramengtopu, angepu doronkamrume. Ton cap tapakra upula dorona meme,” pepu.

14 Tonda, jen talen nengdi asipetepi. “Nunda, ‘Allah lyepsetu’ tenen, ware kupkamep do?” pepra asipetepi. Asipetepipane, Yohanesdi pepu. “Sun deiyo nengdi, sun pel dona tep, menenga keca karepmenge ngepu, kange deipra doronkamrume. Yuk tali nesala, sun keca ton dalupra dorona meme. Tonda, sun mali men kupmangepane, mok upu deiki di, ‘Sun mali kupmarume,’ pepra luluna meme.” Yohanesdi ajen talen neng tep pepu.

15 Ataru kurami nesala yumada, ‘Allahdi Nimi Lyemna Ngebo, Kristus dokotepkamser’ tenen, ketenepra deiya dirami cadi, ‘Kristusda, Yohanes akonum kurur do, gum do?’ tenen, tenimtonapu kurami. 16 Utenepra penmaiya tep, Yohanesdi anesala tep pepu.

“Sun mali keca yuma tamumpa, me pumbon dongosenun dinin, neda yambul mambul ngebo cadi, amenda taru yankamra ila deiyo ngeboda, erda ila mambul ngebo. Neda, mambul ngebo gum tep, pio mali pelpu dinin, er sandal kodongon tapu nedi men loptaptene. Nedi me pumbon dongosenepa, sun nong yuma me singiramretopu, amenda yankamre ngeboda, er puto pio weike tep, erdi Allah Lek Sambala kareserepa, sun kange dipru yuma talenkamsere. Uku di mali keca jeroramretopu, Allah er Lek Sambaladi, sun mali kun keca yuma dopra, gum kupra deipkamsere.

17 Bakke jepkure ngeboda, bakke bam lapra, uku dongopredi, bakke nongpu jeramretopu, Allahdi nimi yuma bokra utopu kupkamre. ^{▼▼Bakke bam – Allah upu menop taru seki ngeda, bakke men pepi. Sundi, gandum keca tep, domon upu pepi dinin, aupu deiyoda utoto pua.} Nesaladi jen keca telepnge, co ladina deiki deriramengtopu, Allahdi er tep teka tenepra, telepe kunge nengda dopra, im deiki deiprepa, er cap tonpa pio kunkamenge. Tonda, nesaladi jen keca bam lapra uku dongoramengtopu, Allahdi mali kun nesala yuma dopra, uku jerurai dongopkamre. Aukuda pio men taproptue, pio jenkamre.” Yohanesdi awekmai nesala yuma tep pepu. 18 Aupu cap, yuk upu cap deiki di, ‘Anesala sun mali kunge keca tapra, teleppu kunkameng’ tenen, “Yesus tep teka tenepmepepa, er dipu nun malinge daepseredi, lyepkamsere,” pepra, Yohanesdi Allah er kai telep upu peteremamupa, er damai yakarami nesala gekerami.

19 Uda, anesala gekerami dinin, amutu pemerintah nimi deiyo ngebo Herodes er mali kupunge tep, Yohanesdi wenepupa, Herodesdi peipupa, Yohanes ateng kouprapidi, wenemna ati dongopi. Yohanesdi Herodes wenepunge deiyoda ake. Ada Herodes er weit bo ner Herodias upula dalupra dopropudi dopunge cap, ton mali keca pio weike kuramunge cap tep, Yohanesdi Herodes tep wenepu. 20 Herodesda, mali kun keca weike konum kuramu dinin, Yohanes wenemna ati dongopu ngeda, ange deiki di mali keca ton cap tapakra kupu.

Yohanesdi Yesus me dongopunge cap, Yesus er co puna neng cap tep, pepu upu

(Matius 3:13-17; Matius 1:1-7; Markus 1:9-11)

21 Amutu nesala weika di, ‘Yohanesdi me dongopkamser’ tenen, er damai yakarami tarupuda, Yesus ton yaupa, Yohanesdi Yesus me dongopu. Me dongopupa, tekroudi, Allah moronmau. 22 Allah moronmau panenda, adipapu Allahdi im deiki pakeipupa, Yesusdi dinmau. Dinmaupa, Allah er Lek Sambalada, yalma ma utopu daudi, Yesus er nong deiki bungyau. Bungyau pangeda, Allah im deiki di aupu peipu. “Kanda ne Mi Sisa kurume. Nedi kan tep pio bicaue tenekenuna cadi, kan tep ne kange pio derikenune.” Allahdi Yesus tep pepu.

23 Yesus gonga kepra peterep embaramu taruda, keteng tamun denge weneri, 30 tahun konum kupu. Yesus er naida, Yusup tenerami. Yesus er co puna neng sida, ake. Yusup er nai sida, Heli. Heli er nai sida, Matat.
24 Matat er nai sida, Lewi. Lewi er nai sida, Malki.
Malki er nai sida, Yanai. Yanai er nai sida, Yusup.
25 Yusup er nai sida, Matica. Matica, er nai sida, Amos.
Amos er nai sida, Nahum. Nahum er nai sida, Hesli.
Hesli er nai sida, Nagai. 26 Nagai er nai sida, Mahat.
Mahat er nai sida, Matica. Matica er nai sida, Simei.
Simei er nai sida, Yosek. Yosek er nai sida, Yoda.

27 Yoda er nai sida, Yohana. Yohana er nai sida, Resa.
Resa er nai sida, Zerubabel. Zerubabel er nai sida, Sealtiel.
Sealtiel er nai sida, Neri. 28 Neri er nai sida, Malki.
Malki er nai sida, Adi. Adi er nai sida, Kosam. Kosam er nai sida, Elmadam.
Elmadam er nai sida, Erya. 29 Erya er nai sida, Yesua.
Yesua er nai sida, Eleasar. Eleasar er nai sida, Yorim.
Yorim er nai sida, Matat. Matat er nai sida, Lewi.
30 Lewi er nai sida, Simeon. Simeon er nai sida, Yehuda.
Yehuda er nai sida, Yusup. Yusup er nai sida, Yonam.
Yonam er nai sida, Elyakim. 31 Elyakim er nai sida, Melea.
Melea er nai sida, Mena. Mena er nai sida, Matata.
Matata er nai sida, Natan. Natan er nai sida, Daud.
32 Daud er nai sida, Isai. Isai er nai sida, Obed.
Obed er nai sida, Boas. Boas er nai sida, Salmon.
Salmon er nai sida, Nahason. 33 Nahason er nai sida, Aminadab.
Aminadab er nai sida, Admin. Admin er nai sida, Arni.
Arni er nai sida, Hesron. Hesron er nai sida, Peres.
Peres er nai sida, Yehuda. 34 Yehuda er nai sida, Yakub.
Yakub er nai sida, Isak. Isak er nai sida, Abraham.
Abraham er nai sida, Terah. Terah er nai sida, Nahor.
35 Nahor er nai sida, Seruk. Seruk er nai sida, Rehu.
Rehu er nai sida, Pelek. Pelek er nai sida, Eber.
Eber er nai sida, Salmon. 36 Salmon er nai sida, Kenan. Kenan er nai sida, Arpakhsad.
Arpakhsad er nai sida, Sem. Sem er nai sida, Nuh.
Nuh er nai sida, Lamek. 37 Lamek er nai sida, Metusala. Metusala er nai sida, Henok.
Henok er nai sida, Yared. Yared er nai sida, Mahalalel.
Mahalalel er nai sida, Kenan. 38 Kenan er nai sida, Enos.
Enos er nai sida, Set. Set er nai sida, Adam.
Adam ketekepra deipu ngebo sida, Allah.