Luk 8 | XteSC | STEP | Ataru neitamaida, Yesusdi, ila-ila ati arum domyai cap, nimi meteka di kuramyai cap, embaramudi, Allah nesala lyepredi, sun dipru talenkamre upu, kai telep upu peteremamu. Peterep embaramu taru yumada, erdi wepra deipu neng 12 neng cap, melipra embarami.

Luke 8

Yal keca gwengna tep, pepu upu

(Matius 13:2-23; Markus 4:1-20)

1 Ataru neitamaida, Yesusdi, ila-ila ati arum domyai cap, nimi meteka di kuramyai cap, embaramudi, Allah nesala lyepredi, sun dipru talenkamre upu, kai telep upu peteremamu. Peterep embaramu taru yumada, erdi wepra deipu neng 12 neng cap, melipra embarami. 2 Tonda, isok taleamupa, Yesusdi enepra dopudi kwetemu nerapu cap, pu jeramupa kwetemu nerapu cap, Yesus cap embarami. Yoneitam bari isok taleamu ner, er sida Maria Magdalena kwetepu ner cap, kuramu. 3 Tonda, Herodes er ati pel doramu ngebo Kusa, er ner Yohana cap, Susana cap, ton yuk nerapu weike ton cap, Yesus cap, er nyasilip cap kikiman embarami. Anerapu yumadi, sun taleami keca deiki di, Yesus cap, erdi wepra deiamu neng cap, sun putapne kecada, kunupra kareami. 4 Yesusdi peteremaupane, er damai yana wekmai nengda, amutu-mutu dana-dana tara yumadi, gung pio weike bulupra yanmaipa, awekmai nesala tep, er upu peteremau. Apeteremau upu neitamai di, adomon upu ton pepu.

5 “Sun gekepso, tenpu tumi bon tenpu di wa pepra, yal keca gwekbanmau. Er yal keca gwekbanmaupane, ton yal kecada er dopbanmau bisi neitamai sakmau. Saka kapmaupane, yuk nengdi yanipipa, amenda taru tali ma yaidi bupra jepropi. 6 Ton yal kecada gwekbanmaupane, gel deiki di mirin tu metekanun kwamngai saku. Sakudi dakunmaupane, mirin tu metekanunpu kwamngai di, menmena paku. Paku dinino, yaten tuai telep kupra men kwerepka tep, keteng yana dopupa, keteng bupu di, gelal sepra kolupropu.

7 Atarupu dinin, ton yal kecada gwekbanmaupane, tepmeng kweiyong-kweiyong palpal neitamai di saku. Dakunmauanen, bolokmau dinin, tepmeng kweiyong-kweiyong erepropudi, aboloku keca koupdongopudi, wein kepdongopupa, nene peramu. Nene peramnga cadi, du men mouramu. 8 Angeda du men mouramu dinin, yal keca ton gwekbanmau ngeda, mirin tu telepai saku. Mirin tu deiki saku ngeda, bongopudi nepu pangeda, du mouramu. Yal keca tenpu-tenpu saku dinin, du mouramngada, denge pio weika di seratus moupu.” Yesusdi adomon upu pepu dingeda, aupu ton pepu. “Amul akwapmaserpane, aupu gekepmanto nengda, ‘Aupu nong neitamainge, deiyo ake’ tenen, moupra gekenkurume,” pepu.

9 Aupu konum pepkopda, amenda Yesus er yuk kunmaupane, Yesus er dopropu neng, 12 nengdi, asipetepi. “Naio, nunda aupu deiyo cap, nong neitamainge cap, men gekepmapa tep, moupra men kael kepmape. Domon upu deiki di pemem ngeda, deiyoda warya do? Nun men gekepmapa tepa,” pepra asipetepi.

10 Asipetepipa, Yesusdi tamupra pepu. “Neda, ‘Allahdi nesala weika di lyepredi, sun dipru talenkamre,’ pesene upuda, Allahdi peipneupa ne nyapu sun tep, nong neitamainge deiyo lap pesenune. Dinino, yuk tali neng tep nengeda, ne upu moupra men gekenenunga tep, domon upu di, bol deikingepu penune. Aneng tep domon upu deiki dipu penuna deiyoda pepkusene. Ada, Allah upu lap peramu ngebo nabi Yesayadi, ‘Nesala ukupkameng’ tenen, sekamutopu, ukutaru kunge nesala konum ukununga tep, sun gekenaida, domon upupu penune. Yesaya sekeiamu upuda ake.”
“Tali asuru dipu dininung dinin, ‘Deiyo ake,’ tenepra men kael kemnunge. Ne pene upuda, bol deikingepu amul di gekenung dinin, ‘Deiyo ake,’ tenepra men kael kemnunge. Tali gekertamnunge.” (Yesaya 6:9)

“Yesayadi sekamutopu konum pepsene. Pumun taru aupu sekamu dinin, ukutaru kunkameng nesala tep, ‘Ukunkamenge,’ konum teneamua tep, nedi aupu pepsene,” Yesusdi pepu.

11 Sunda ne nyapuda, yuk tali neng kunge utopu men kurum neng cadi, yal keca gwekembanmau ngebo, pepmanu upuda, deiyo lap pepkusene. Adomon upu pepmasenuada, nongda katuai lap pepkusene.

Uda, Yal keca gwekbanmau ngeda, ada Allah upu peteremna tepa. 12 Gwekbanmaupane, bisi neitam sakmau ngeda, ‘Allah upu peterepmengepa, gekepkup,’ tenepmengepane, Kain Jen Ngebo mali kun keca deiyo ngebodi, adipapu sun dipru neitamai di aupu dalupra dororure. Dororepa teka men teneptengepa, Allahdi anesalada men lyemrure.

13 Ton nesalada, yal keca gel deiki sakmautopu, Allah upu peterepmengepa, gekepmengedi kange deipra teka tenepmengedi, adipapu doronunge. Teka tenepra doronung dinin, yal keca yaten tuai telep kupra men kwerepmaupa, kolupka utopu, anengda, Allah upu pio moupra men talepra dombangedi, menmena yamdongonunge. Ada, teka tenepmenga tep, yuk nengdi yu kuprepa, ikin keca sun nong deiki deriramenge pangeda, tonda yuk ikin keca yare pangeda, mambul kange doupra, adipapu Allah upu gekepmainge ngeda yamdongonunge.

14 Ton nesalada, Allah upu gekepra doronung dinin, yal keca tepmeng kweiyong-kweiyong palpal sakmaunge utopu kununge. Allah upu gekengedi, teka tenepra domembanung dinin, amendada sun dipru men wisirure. Co du men mouramretopu, telep kupra men kununge. Ada, tuai mutu neitamai di, ‘Akeca di telep kuptene do, akeca di telep kuptene do?’ tenen, tenimdana deiki di tamdongonunge. Tonda, “Bunga weik doproptene teptoda, teleppu kuptene,” pepra, sundi sun pe tep, mok upu pertamdanunge. Tonda, akeca-keca yala-yala weik putarepa, ‘Ukuptene, ange ton doproptene,’ tenenga deiki di, Allah upu tamdongonunge.

Ukungada, tepmeng kweiyong-kweiyong di aboloku keca koupdongopudi, wein kepdongopupa, nene peramutopu, akeca-keca yuma, pio teneramenga deiki di, Allah upu gekeramenge ngeda, tapmengepa du men mourure. Ada, telep kupra men gekengedi, Allah upu pio men dombanunge.

15 Anengda ukunung dinin, yuk nesalada, yal keca gwekbanmaupane, mirin tuai sakmaupa, du weika di moupudi, denge pio weika di seratus mouputopu, kununge. Sun dipru pio telep neng cadi, Allah upu gekepmengedi, teka tenepmengyopda, ikin keca akwaptu dinin, tamna gum dipapu, pio talepra kununge. Allah upu teka tenepra, kange deipra pio dororamenge nesalada, Allah er pel weika di donunge. Yesusdi er nyapu tep pepu.

Yesusdi, ‘Ne nyapuda, ne upu moupra gekepmengedi, pio talepra kunkameng’ tenen, weica tep, ukupmanto upu deiki di pepu upu

16 Yesusdi erdi wepra deiamu neng, sun 12 neng tep adomon upu pepu. “Sunda weica uprapmumdi ati pum dekarum ngeda, ada kau pumbon singidongonkamepe. Tonda ason dangapra, ‘Weica singidongonkamep’ tenen, upra yakarum do? Angeda gume. Weica upropmumdi dela taramai derirume. Ada dirin weik kuprepa, ‘Ati bo kwamre keca, katuai epkameng’ tenen, dela taramai derirume. Ne peda aweica utopu pel donedi, nimi dipru dirine keipra derinune. 17 Ada, Allahdi nesala yuma lyepredi talenkamre kecada, jenek kemna gum di iniamupa, nesala yuma moupra men kael kemnunge. Dinino, Allahdi akeca iniamupa, nesala moupra tenepra men kael kemenge keca yumada, katuai kupre pangeda, nesala yuma kael kepkamenge. Ada, upna dirin di ati bo kwamre keca katuai kuprepa diramengtopu, ne peteremne keca cap, kune keca cap deiki, Allahdi iniamupa nesala men tenerami ngeda, katuai kunkamre.

18 Ange tep nengeda, ne peteremsene upuda, tali amul deiki di men gekenkamrume. ‘Tali amul di gekertamnup do, moupra gekenup do?’ tenen, moupra tenenkamrume. Ne upu peteremsenepa gekerumudi, ‘Deiyo ake’ tenen, mouprumudi talepra kunkamrume. Ada tali tep gume. Allah upu gekena tep, Allahdi kael kemna deiyo keca kareserepa, moupra gekengedi, angepu tamna gum di, talepra kunge nengda, Allahdi kael kemna deiyo keca weika di tapakra karerepa, weika di kael kepbankamenge. Dinino, ware neng do yuma, dabale tep, amul deiki gekertamengedi, Allah upu men talepra kunge nengda, sun men di yambulpu kael keaminge peda, gum kupkamre,” Yesusdi pepu.

Yesusdi, “Nanin yapu utopu nesala cap, ne weit yapu utopu nesala capda ake,” pepu upu

(Matius 12:46-50; Markus 3:31-35)

19 Yesus er nin sisa cap, er weit yapu sisa capdi, ‘Yesus cap upu talepkup’ tenen, Yesus bukmau ati yai. Ati pirman tengyai dinin, nimi pio weike bulupmaiya tep, Yesus damai men yanmanto kupi. 20 Ukupipa, yuk nengdi, Yesus tep pepi. “Kan nin cap, kan weit yapu cap, ati pirman tara tengyanmangdi, ‘Yesus cap upu taleptepe’ tenen, enmakenge,” pepi. 21 Upepi pangeda, Yesusdi, “Nanin yapu cap, ne weit yapu capda, pepkusene. Ada, ware neng do yuma, Allah upu gekepmengedi, angepu talepra dombaramenge nengda, sunda, ne weit yapu cap, ne weit nerapu cap, nanin yapu cap utopu kununge,” pepu.

Yesusdi ila mungna cap, mo cap kupunge gum kupra deipu upu

(Matius 8:23-27; Markus 4:36-41; Yohanes 6:16-21)

22 Tenpu taruda, Yesusdi Galilea mokon pirman pio peteremaupane, erdi wepra deiamu neng, sun 12 neng tep pepu. “Nunda gapung co deiki bukrap, mokon deiki bepedi, ortara wengbenkupe,” pepu. Upepudi, gapung co deikipu bukmaupane, er nyapu 12 neng peda, er damaipu wengbeiyopda, sunpu mokon deiki banmai. 23 Sun banmaipane, Yesusdi mapmau. Mapmaupa, sun yuma banmaipane, ila mungna cap, kulman cap, mo cap kupudi, mokon ila di longteng-longteng penmaudi, me gapung co pumbon wekudi, mokon deipudi, ikin di gapung dopra, mokon pumbon wekronmanto kunmau.

24 Ange yuma kunmau taruda, Yesusda, mapmau. Yesus mapmaua tep, erdi wepra deiamu neng, sun 12 nengdi, “Bukroyo,” pepra bukeipi. Ukupidi, sundi Yesus tep pepi. “Naio, nun mokon jepmanto kunmaser ngeda, mambule kunmasera cadi, lyeipseo,” pepi. Upepipa, Yesus mapmaua bukra tekroudi, ila mungna mungmaua tep, “Ila mungna dimpepo,” pepu. Mokon longteng-longteng penmauada, “Mokon dimpepo,” pepu pangeda, pio dimpepu.

25 Ayuma konum dimpepu pangeda, Yesusdi wepra deiamu neng, sun 12 neng tep pepu. “Sun kapul ne tep teka men tenepmanuruma di, kware weik kupmaser do?” pepu. Upepupa, er nyapudi, uo tenen, lolopidi, ila kwar weik kupupa, asimdanmai. “Yesusda wareto ngebo kurur do? Ila mungna pe, mokon longteng-longteng peramrenge pe, er upu pepre pangeda, er peretopu gekepra kurure,” pepi.

Tenpu ngebo, er dipruai taleamu isokda, Yesusdi enepra dokotepu upu

(Matius 8:28-34; Markus 5:1-20)

26 Ila mungna cap, kulman cap, konum dimpepkopda, mokon deikipu banmaiyanen, Galilea mokon ortara Gerasa mutu bei. 27 Bei pangeda, Yesusda gapung co deiki di tuai tengbeu. Tengbeupa, amutu ngebo tenpu, isokdi taleamu ngebo, nimi peirami gel imir neitamai di guprapudi, Yesus damai yau. Angeboda, nimi ati men kuramudi, tali nong banangapu kuramudi, nimi peiami gel imir pumbon kuramu.

28 Amutu kurami nesaladi, ‘Isok taleamu ngebo nun yanpopserur’ tenen, rantai tapu di, er buru cap, yane cap, ateng koupra deriramipa, aisok yuma taleamya puto deiki di, er nong met-met gapra, puto weik kuramupa, atapke bulungtamamu. Buluktapra, sepra nimi pio gumai baramu. 29 Yesus mokon pirman tengbeu taruda, isok taleamu ngebo Yesus epkopda, Yesus damai sepdaro yau. Yaudi, ila di ngolokrapudi, gutam tu dipdongopudi giso talepdongopu.

Yesusdi angebo taleamu isok tep, “Isoke kanda angebo er dipruai talepmuma tapra, gupra beo,” peprapudi, aupu penmau taruda, angebo er dipruai taleamu isokdi, ila upu di Yesus tep lapsipu. “Kanda ware kupkamaserema tep, nun dam yanmaserem do? Allah er puto weik kuredi, yuk allah-allah yuma bisiredi, akeca-keca deiki tara kurur Allahda, Yesus kanda Allah er Mi Sisa kurume. ‘Uo, weika di men popkuserem’ tenen, moropkepe,” pepra aisok ila upu di Yesus tep pepi.

30 Upepi pangeda, Yesusdi aisok tep asipetepu. “Kan si dano,” pepra asipetepu. Upepra asipetepupa, isok-isokdi ka tamupra pepi. “Nunda denge weik angebo er nong wekmupka tep, nun si men nukmanto kupseu. Nun si men nukmanto cadi, nun sida Legion ^{▼▼Legion penunga deiyoda ake. Legionda, ada jen talen neng gung ila weiknge tep, isok-isokdi, ‘Nun sida Legion,’ pepra si siperami. Aisokda, gung weik cadi, tenpu si men pepi dinin, Legionpu pepi.} pesenunge,” pepi. 31 Tonda, aisok yumadi, ‘Allahdi pio mali nesala cap, mali isok-isok yuma cap, dongopkamrai pumbon dokotepsurur’ tenen, Yesus tep weika di moronmai. Aupu pepra moropmai ngeda, ada Yesusdi aisok-isok tep, ‘Angebo dipru taleamumai di gupra beso,’ pepra deipmaua tep, moronmai.

32 Yesus tep moronmai taruda, nimidi peirami bisam, denge pio weike amutu asi taram damai tu jenmai. Bisamdi tu jepra akunmaiya tep, aisok-isok yumadi Yesus tep moronmai. “Kandi enepra dokotepsemempa, akunmang bisam nong pumbon ‘Wengbeso,’ pepseo. Ange pepsetumtoda, abisam nong wekra betepe,” pepra moronmai. 33 Moronmaipane, Yesusdi, “Telepe, angebo er dipru taleamrumai di gupra bura beso,” pepupnen, adipapu isok taleamu ngebo dipruai di guprapidi, bisam nong pumbon wengbei. Wengbei pangeda, abisam gung denge weike, amutu asai di sepra kwererbanmaidi, mokon pumbon wekroi. Wekroi pangeda, abisam yuma mokon jepu.

34 Abisam peinmai nesala epidi, akupmaunge yuma tep, nimi ati arum domyai neitamai cap, bisai cap, lap pepembanmaipa, nimi weik gekepidi, ‘Akupmaunge epkamep’ tenen, Yesus damai diryai. 35 Yesus damai diryaidi, isok denge weike taleamipane, Yesusdi kweteipu ngebo, kange deipra opkal kepra bukmaupa epi. Epidi, kware kupu. 36 Men di akunmaiya epi nengdi, ukupu yanmai neng tep, angebo isok taleamipane, Yesusdi kweteipunge cap, bisam nong wekipa, mokon pumbon wekroinge cap, ayuma dukdongopra lap pepi. 37 Lap pepipa, aneng yuma gekepi dingeda, kware pio weike kupka tep, ‘Yesusda nun Gerasa mutu yuma atapra, yukai bendoptue’ tenen, Yesus tep moronmai. Ukuprap moronmaiya tep, Yesus ka di tamupra gapung co deiki bukra yukai beu.

38 Beu dinin, gapung co deiki bungbenkou taruda, isok taleamipane, Yesusdi kweteipu ngebodi, ‘Ne cap betenemnye’ tenen, Yesus tep moropu. 39 Upepra moropu dinin, Yesusdi angebo tep pepu. “Gume, ka di tamupra kan pe mutu neng cap, kan ati neng cap tep, Allahdi bicau tenepmakerdi, pel weike dopmaker kecada, lap perbenkurume,” pepu. Yesusdi upepu pangeda, angebodi er mutu tamupra beudi, akati-akati neitamai di aupu lap pepembaramupa, anesala yuma gekerami.

Yesusdi, tenpu ner, lang bon bisi yapi embaramu ner cap, depmau ner mi cap, kwetepu upu

(Matius 9:18-26; Markus 5:22-43)

40 Yesus benmau bisipu, gapung co deiki ka tamupra yaudi, Galilea mokon atara yau. Yaupa, nimi gung weika di, ‘Yesus tamupra yankamar’ tenen, konum bulupra dinmaiya tep, er yakanmau bisi damai bulupra kunmai. 41 Sun yuma Yesus cap akunmaipane, tenpu ngebo er si Yarius yau. Yariusda, Yahudi yala neng Allah upu peteremami ati, akati sun deiyo neng weik kurami dinin, er ton kuramu. Yarius yaudi, Yesus epu dingeda, ‘Yesus tep gispal dopkun’ tenen, Yesus yan damai gutam dipdongopra, Yesus tep, “Uo naio, nati yankurume,” pepra weika di moronmau. 42 “Ne ner mi konum depmanto kunmanera tep, kandi nati yamem dingeda, ne ner mi kwetepnetume,” pepra moronmau. Angebo er ner mida, keteng tamun 12 konum nepu. Moronmaua tep, Yesus cap banmareipa, abulupra wekmai neng yuma cap, kikiman banmaidi, Yesus damai dana-dana yuma dekpepmaidi banmai.

43 Abanmai neng kan-kan neitamai di, pu jeramupa, keteng tamun 12 deiki di, er lang bon bisi yapi embaramu ner kikiman banmai. Anerda, ‘Sundi kwetepnetenge’ tenen, kwetena neng damai weik embaramupane, sun men kwetepmanto kwamipa, pu tupa jeramu. 44 Yesus pel doramunge gekepka tep, erdi utenepu. ‘Yesus er opkal tali beptenetoda, kwetepnetue,’ tenepu. Utenepka tep, abanmai neng neitamai di, Yesus er amnyo tara tengyaudi, Yesus er deiki kepmau opkalda bepu. Yesus er opkal bepu pangeda, adipapu er pu jeramupa, er yapi embaramngada, dimpepupa, telep kupu.

45 Yesus opkal bepmau taruda, bepupnen, adipapu Yesusdi, tamupra, ayakanmai nesala yuma dipra enbanmaudi asipetepu. “Ware ner, ware ngebodi ne opkal bepmaner do?” pepra asipetepu. Asipetepupa, er cap embarami neng yumadi, “Nundi gume,” penmai. Upenmaipa, Peterusdi Yesus tep upepu. “Nesala weike kan damai dekpepmakenga cadi, ware kuprap di, ‘Ware ner, ware ngebodi er opkal bepmamer do?’ tenen, kael keptepe do?” pepra asipetepu. 46 Upepu dinino, Yesusdi tamupra pepu. “Gume, ne kaele, nimi do, ner do, tenpu ngebodi bepmanerpa, ne puto er nong deiki benmare,” pepu.

47 Upepupa, anerda Yesus kwetepmaunge konum kael kepmaua cadi, ‘Mambul pel dopmanerada men iniptene’ tenen, mali kange doua, Yesus yan damai gutam yana dipdongopudi, anerdi kupmaunge yuma cap, Yesusdi kwetepmaunge cap, anesala gekenmaiyai di katuai lap pepu. 48 Anerdi ange yuma lap pepupa, Yesusdi tamupra aner tep pepu. “Ne ka nero, kan teka tenepmanerema deiki di kwetepmakene. Kan kange mun kwamkeu ngeda, konum kweteipmakena tep, teleppu kange deipra benkurume,” pepu.

49 Yesusdi aupu tup penmau taruda, Yarius er ati kuramu ngebodi, Allah upu peteremna ati deiyo ngebo, Yarius tep kai yau. Kai yaudi, Yarius tep pepu. “Kan ner mi konum depmakera tep, apeteremna ngebo Yesus tep, upu ton cap men penkurume. Dakwapye,” pepu. 50 Angebodi aupu pepupa, Yesus gekepu dinin, ‘Dapepdarye’ tenen, kaukeproudi Yarius tep pepu. “Er penmar upu tep, gekepmemdi ikin kange doupra, kwar dangna cap, tenimtona cap gume. Kan ner mi men depmare. Kware men kunkurum dinin, teka tenepra tali kange doupra kunememnyopda, nedi kan ner mi kweteipkamakene,” pepu.

51 Upepudi, sun yuma, ‘Yarius ati benkup’ tenen, banmaiyanen, Yarius ati bei. Beiyopda, ayakanmai neng yuma, ‘Sun cap yanung’ tenen, upu sekdongopupa, sun acapu kunmai pangeda, Yesus cap, Peterus cap, Yakobus cap, er weit Yohanes cap uda, aner mi er nai Yarius cap, er nin cap, sunpu Yarius ati pumbon weki. Yuk neng cap akati men weki. 52 Yarius er ati konum wekroi taruda, akati damai kunmai neng, sun ila di engena cap, ila di ngolokra malye pena cap, kunmaipa, Yesusdi epu. Epudi, akati mali penmaidi, koudanmai neng tep pepu. “Sun ila di mali penmarumdi, ngolokra koudanmarumada, yaprume. Sun dimpepso. Aner mida men depmare. Tali mapmare,” pepu. 53 Upepu dinin, akunmai nengdi, aner mi konum depmauada, konum kael kepmaiya cadi, Yesus tep autunmai.

54 Autunmai dinin, Yesusdi aner mi buru talepudi, aupu pepu. “Ne ner mio tekroyo pepmakene,” pepu. 55 Yesusdi upepupnen, adipapu adepmau ner sambala bendopmauanen, ka di tamupra er pe nongaipu, yan wekudi gam buku. Wekupa gam bukra deipu pangeda, aner mi tekrou. Ukupupa, Yesusdi pepu. “Aner mi er jen karepso,” pepu.

56 Yesusdi aner mi kwetepu pangeda, aner mi er nin cap, er nai cap, uo tenepra lolomarei. Dinino, Yesusdi aneng butene tep, “Akupmare ngeda, yuk nesala tep lap pepra embana gume,” pepra upu sekrou. ^{▼▼Lap pena gume – Yesusdi, “Aner mi kwetepman ngeda, yuk neng tep lap perbana gume,” pepunge deiyoda, ake. Ada, ‘Nimi yumadi, ne Yesusda nimi Lyemna Deiyo Ngebo, Mesias akunune, tenepnengedi, kael kepnenung’ tenen, pepu. Er lap pen taru kapula cadi, apu pepu.}