Luk 4:38-41 | XteSC | STEP | Atumi di Yahudi yala neng, sun Allah upu peteremami ati tapra beidi, Yesus cap, Simon cap, Simon er ati berei. Berei dingeda, aneng er ati wekmareipane, Simon er yamal ner nong bupu pu jeramnga tep, ‘Yesusdi kweteptue’ tenen, sun awekmai nengdi, adipapu Yesus tep moropi.

Luke 4:38-41

Yesusdi pu jeramu nesala kweteramu upu

(Matius 8:14-17; Markus 1:29-38)

38 Atumi di Yahudi yala neng, sun Allah upu peteremami ati tapra beidi, Yesus cap, Simon cap, Simon er ati berei. Berei dingeda, aneng er ati wekmareipane, Simon er yamal ner nong bupu pu jeramnga tep, ‘Yesusdi kweteptue’ tenen, sun awekmai nengdi, adipapu Yesus tep moropi. 39 Moropipa, Yesusdi aner mapmauai beudi, genepra dipetepudi, ‘Anong bupu pu gum kupkur’ tenen, “Nong bupuda, dimpepo,” pepu. Upepu pangeda, adipapu aner nong bupu pu jeramngada, dimpepupa, telep kupudi aner tekrapudi, aneng sun jen keca melipra karepu.

40 Atumipu dinin, keteng konum wekrou taruda, amutu nesaladi pu yala-yala yuma jeramu nesala dopra, Yesus damai duyanmaipa, er buru sun nong deiki deipudi, tenpu-tenpu di anesala yuma kwetepu. 41 Tonda, apu jeramu nesala kan-kan dinin, anesala sun dipru taleami isok-isok yuma gupra bei. Gupra bei dingeda, aisok yumadi aupu penmai. “Kanda Allah er Mi Sisa kurume,” penmai dinin, Yesusdi aupu sekrou. Ada, Yesusdi, aisok yuma, ‘Yesus erda nimi Lyemna Deiyo Ngebo, Mesias ^{▼▼Mesias perami ngeda, deiyo ake. Ada, Allahdi, ‘Nimi tuai nesala sun mali kunge keca gum kupra deipredi, lyepkamre’ tenen, wepra deiamu ngeboda, er si Mesias si perami. Tonda lap pena upu nomor 3 dinkurume.} Ngebo kurure,’ konum tenepmanenga tep, ‘Ataruda aupu men lap pepkuneng’ tenen, sun penmai upu sekrou. Aisok yumada, er Yesus konum kael keamya tep, ‘Ne katuai pepnenung’ tenen, ^{▼▼Katuai pena – Ataruda, Yesusdi, ‘Neda Mesias, nimi Lyemna Deiyo Ngebo kununada, katuai lap pen taru kapul men kupnera tep, ataru di gonga keap, aupu lap men penkamneng’ tenen, upu sekrou.} “Sun upu dimpepso,” pepupa, aisok yumadi upu men pepmanto kupi.