Mal 1 | XteSC | STEP | Allah Yahwehdi, Maleaki tep, ‘Israel yala nesala kungai perbenkurume,’ pepra deipu upuda ake. “Israel nesala tep amenda taru kange mun keca kupkamrenge cap, telep kupra kun keca cap tep, lap peipkenepa, kandi Israel nesala sun kunungai neitamai perbenkurume,” pepu.

Malachi 1

Israel nesala kuramya neitamai, Allah er si Yahwehdi, nabi Maleaki damai yanpeipu upu

1 Allah Yahwehdi, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} Maleaki tep, ‘Israel yala nesala kungai perbenkurume,’ pepra deipu upuda ake. “Israel nesala tep amenda taru kange mun keca kupkamrenge cap, telep kupra kun keca cap tep, lap peipkenepa, kandi Israel nesala sun kunungai neitamai perbenkurume,” pepu.

Allah Yahwehdi Yakub tep, bicau tenepu dinin, er weit bo Esau tep nengeda, ‘Ne songe,’ pepu upu

2 Allah Yahwehdi er nyapu Israel nesala yuma tep pepu.

“Nedi sun yuma tep bicau tenesenune. Dinino, sun Israel nesaladi tamupra, ne Allah tep upenerume. “Gume, Allah Yahweh kanda nun tep, ware keca kusememya deiki di, bicau tenepra melimserum do?” pepra asimpetenerume. Dinino, ne Allah Yahwehdi tamupra pepsene. Ada Esau erda, Yakub er weit bo kuramupane do? Nedi Yakub er tep, ila di bicau teneramsidi, weika di meliamsi do, gum do? Gume, weika di meliamsi.

3 Teka, Yakub tep bicau teneramsi dinin, er du bo Esau tep nengeda, yu teneramsidi, ‘Angeboda ne songe,’ tenepsi. Ayu teneramsa deiki di, Esau er kuramu mutu yumada, amutu deiki dakra konum mali kupra tapsi. Ukupra tapsi dingeda, nedi er kuramu mutu tu yumada, dopra tali bura tara gam kuramre keca, dumre kam utopu keca tep, katuai mutu kuramyaipu karepsipa, malipu kuramunga tep, nimidi er mutu neitamai telep kupra men kununge.” Allahdi pepu. Upepudi, aupu ton peipu.

4 Ukupsipane, Esau er tara neng, Edom mutu kunung nesaladi, “Gume, nun kuramepu mutuda, uruptapsei dinin, nun dipapu ka tamupra lepsisikra dopkamep ja,” pepra sisingdanunge. Upepra sisingdanunga cadi, sun anesaladi tamupra dopmenga peda, ne Allah Yahwehdi akeca-keca yuma talepra, deiki tara Ila Eremna Ngebo kunedi, im deiki jen talen malaikat, sun ila deiyo ngebo ^{▼▼Allah Yahweh – Ibrani upu deiki Allah er si tep seki ngeda, ‘Yahweh Sebaot’ seki. Angeda ayat 4, 6 dan 8 neitamai ton seki. ‘Aupu deiyoda betapra kael kepkurum’ tenen, nundi jenek kupra sekmepu. Ada, ‘Allah Yahweh akeca-keca yuma taleredi, im deiki jen talen malaikat, sun ila deiyo ngebo’. Ibrani upu deiyo ngeda akonuma.} kununa cadi, nedi ka tamupra sun mutu dopkameng nge yumada, uruptapkamne. Ukupnepa, yuk mutu nesala yumadi ange epmengedi, sun Edom yala neng kurami mutu tep nengeda, “Uo, amutuda, mali kun keca deiyo talepra kurami mutu,” penkamenge. Tonda, Edom nesala tep nengeda, “Uo, Allah Yahwehdi, sun Edom mutu kurami nesala tep, pio yu tenerure,” penkamenge.

5 Ange yuma ukupnepa, sun Israel nesala yuma, sun pe asuru epmumdi upepkamrume, “Uo, tek sisi, Allah Yahweh erda, ila puto di Israel nesala kunup mutu cap, yuk karen mutu neitamai yuma cap, ila mambul pel dorure. Nun men kunup mutu neitamai peda, erdi talepra, mambul pelpu dorure,” pepra penkamrume.

Allah Yahwehdi, er si eremna ati pumbon pel dona deiyo neng, sun imam-imam teppu, wenemna upu deiki di pepu upu

6 Ne Allah Yahweh, akeca-keca yuma talepra, im deiki jen talen malaikat yuma, sun ila deiyo ngebo kunune. Nedi, ne si eremna ati pumbon pel dona deiyo neng, sun imam-imam neng tep upepsene.

Sun tenipetepso. Sun kaele, ware nesala do, sun nyapudi sun nai yapu tep, gispal donunge. Utopu, ila neng amutara kungedi, ati pumbon tali pel donge nesalada, sun deiyo neng tep gispal donunge. Neda, sun nai bo Allah Yahweh kunune. Tonda, sun ila deiyo ngebo kunune. Atep nengeda, ware keca tep, sundi ne tep gispal men donerum do? Neda ila mambul ngebo kunun dinin, sundi ne tep, kwar men kuserur do? Tek sisi sundi ne cap, ne si cap tep, mali penerume. Dinino, ange pepsenepa, sun dipapu tamupra uperume, “Nunda ware keca kunupa deiki di, kan si tep mali penup do?” pepra asimpetenerume.

7 Nedi pepsene. Sundi ne si eremna tep, gam keca popmumdi, akeca dopra ne karena tep, ne si eremna ati damai gel taplakra deiprumai, adeiki uku dongorum dinin, ware keca deiyo tep, gam keca malingepu doupra, ne damai duyakaramumdi, ne tep karenerum do? Ukurumnya deiki di, ne si tep mali penerumdi, yaninerume. Dinino, sundi ne tep, asimnerume. “Ada ware kunupa deiki di, ‘Allah erda mambul ngebo guma,’ tenepra, kan si tep yanikenup do?” pepra asimnerume. Nedi tamupra pepsene.

Gume, ada menop taru dinedi sun tep, “Gam keca pio telepngepu karenkamnerume,” pepra deiamsisi dinin, sundi gam keca nong malingepu doupra, ne si eremna tep ketenepra deipyapu duyakanerume. Ukurumnya deiki di, ne si yaninerumdi, ‘E, Allah er cap, er karena tep gel taplakra deipmupkai capda, mambule gume,’ tenerumdi, mali kurume, pepsene. Allahdi pepu.

8 Menop taruda, ‘Gam keca nong pio telepngepu popra, ne kareryakankamnerume,’ pepra deiamsisi dinin, sundi ange tapra, ne karena tep, doupra deriryakanerum gam kecada, nong malingepu. Ada, asuru puamrenge cap, pu jenange cap, yo mali kuamrenge cap, doupra karyakanerumu ngeda, telepnge karenerum do? Gume, malingepu kareneruma cadi, pio mali kurume.

Apepmasentopu keca dopra, sun deiyo ngebo Gubernur kori doupra betumdi, kareptum pangeda, erdi, ‘E, telepnge duyanmanenga tep, tek sisi gispal donmanenge’ tenen, kange deipra telepe pepsetu do? Gume ange men kupmanto. Ne Allah Yahweh, akeca-keca yuma talepra, im deiki jen talen malaikat yuma, sun ila deiyo ngebo kunedi, pepsene. ^{▼▼Yahweh – Akayat cap, 11 cap neitamaida, Ibrani upu deiki di, Allah er si tep, ‘Yahweh Sebaot’ seki. Aupu ‘Sebaot’ kael kemna tep, aupu deiyo neitamainge katuai dipu sekmepu.}

9 Akeca dopra yarumu dingeda, sundi ne karena deiyo neng, imam-imam tep, ‘Ukutaruda nun mali kunup keca daemna tep, duyanmap keca deiki di, Allah moropsemumpa, nun mali kunup keca lyepropseredi kaukepkusere,’ pepra, ila upu di peptumpa, ne Allah tep moropnetenga peda, ne Allahdi gekepra men lyepropkamsene. Sundi mali kecapu doupra, ne damai duyakarumdi, kareneruma tep nengeda, ware keca deiyo tep, kange deipsetene do? Gume, sundi malipu kuruma cadi, kange men deipkamsene.

10 Ange tep nengeda, ne Allah Yahweh akeca-keca yuma talepra, im deiki jen talen malaikat yuma, sun deiyo ngebo kunedi pepsene. Telep ngeda, sun kan-kan neitamai, tenpu ngebo, mambul kange douptudi, ne si eremna ati buplanda, dekdongoptupa, ne kange deiptene. Ada mesum tep gume. Agat buplan dekdongoptu pangeda, sundi gam keca malinge doupra, ne karena tep uku men dongopmanto kupsetu. Dinino, ne karena tep, pio malingepu kareryakaneruma tep, nedi kange men deipsene. Sun tep ne dabal kunerure. Tonda, sundi malinge kareryakanerum kecada, pio men doropkamne.

11 Sun Israel nesaladi, ne si tep, ‘Erda mambul gume,’ tenenerum dinin, yuk karen mutu nesala, ban-ban yuma kunung nesaladi, ne tepapu, ‘Uo, Allahda, ila mambul weik ngebo’ tenen, ne si tep gispal dongedi, ne si eremnenunge. Ada ipna taru di dipra dukdongopra, lukunda neitamai peda, ne si erepra gispal donenunge. Ukunge ngeda, dan mutu do yuma, nesala ban-ban yumadi ne si eremna tep, nintong telep keca uku dongopmengedi, gispal donenunge. Tonda, sun mali kun keca daemna tep, gam keca pio telepngepu popra, kareryakanenunge. Ne Allah Yahweh akeca-keca yuma talepra, im deiki jen talen malaikat yuma, sun deiyo kurur ngebodi pepsene.

12 Dinino, sun Israel nesaladi ne tep mali kupra derinerume. Ada ne si eremna tep karen keca, sun imam-imam nengdi keteneiprumudi, akeca-keca yuma, malingepu dopra deriryakarumaida, ‘Nun si eremnup Allahda, er karena tep uku dongonupaida, pio mambule gume,’ tenepneruma deiki di, mali kuprume. Tonda, sundi gam keca keteneprumunge dinin, malingepu dopra, ne tep kareryakarumnya deiki di, ‘Allah er karena tep gel taplakra deipmepunge, mesba peda, mambule gume,’ tenerumdi, akeca tep pio mali kupra derirume.

13 Sundi perum upuda ake. ‘Uo, nundi akeca yuma doupra, karer yakaramepupa dabal kuserure. Allah Yahweh tep, er si eremna cap, er amutara kuna cap, er upu moupra gekena capda, ikin kuserura cadi, nun dabale,’ perume. Tonda, nedi sun tep, ‘Ukunkamrume, angeda men kunkamrume. Malinge ake, telepnge ake,’ pepra deiamsisi upu tep, sundi, ‘Gume, angeda ikin dipu gekepra dombanupa cadi, nun dabale,’ tenerumdi, aupu yuma tamrume.

Ne Allah Yahweh, akeca-keca yuma talepra, im deiki jen talen malaikat yuma, sun deiyo kurur ngebodi pepsene. Nedi pepsene, sun ton tenipetepso. Sundi, ne karena tep, nong mali gam keca dopra, kareryakanerum ngeda, telep do, mali do? Ada, gam kure keca upula dopropmumnge cap, yo gwalin nge cap, pu jeramrenge cap doupra, ne tep karyakanerume. Ukumum dinin, sundi tenemumnyada, ‘Angeda Allah Yahwehdi doroserurdi, kange deipkamsere,’ tenerum do? Ne Allah Yahwehdi pepsene. Sun mali kurum keca daemna tep, ato mali gam kun keca doproptenedi, sun mali kurum keca kaukepnedi, lyepropsetene do? Gume, ada men kupmanto.

14 Ange tep nengeda, sundi ne si eremna tep, yapi kecada bol mali douramenge nge popra duyangedi, ‘Nunda Allah Yahweh er si eremna tep, jem domba pio telepnge karepmepe,’ pepra mok upu penung nengda, Allah Yahwehdi sun aneng tep, ‘Mali kununge’ tenen, widongoserepa, ikin weik keca sun damai yarepa, malipu kunkamenge.

Ada mesum tep gume. Ne Allah Yahweh, ^{▼▼Allah – Akayat neitamaida, Ibrani upu deiki di, Allah er pe si sisa, ‘Yahweh’ cap, tonda, ‘Adonay’ cap, tonda ‘Sebaot’ cap, pepra sekya cadi, sun kael kemna tep, nundi aupu weneri deiyo ngeda, konum jenek kupra sekmupu.} tali ngebo men kunune. Neda akeca-keca yuma cap, tuai nesala ban-ban yuma cap talepra, sun ila deiyo ngebo kununa cadi, neda tek sisi pio ila mambul ngebo, Raja kunune. Ne sida, Allah Yahweh, akeca-keca yuma talepra, im deiki jen talen malaikat yuma, sun ila deiyo ngebo kunune. Ne Allah yuk nimi deiyo neng yuma, deiki tara Ila Eremna Ngebo kununa cadi, ukunepa yuk yala nesala ban-ban yumadi, ne tepapu si eremnenungdi, gispal donenunge. Allahdi pepu.