Mal 2 | XteSC | STEP | Allahdi, er si eremna ati pumbon pel dona deiyo neng, sun imam-imam neng tep pepu. Nedi, “Ukupkurume,” pepra deipkusen upuda, ada sun imam neng tepapu pepsene.

Malachi 2

Allah er yu imam-imam neng sun nong deiki deipu upu

1 Allahdi, er si eremna ati pumbon pel dona deiyo neng, sun imam-imam neng tep pepu.

Nedi, “Ukupkurume,” pepra deipkusen upuda, ada sun imam neng tepapu pepsene. 2 Sun yumada, moupra gekepkunerume. Gekepmumdi, apeipkusen upu tep, mambul kange doupra, pio moupra talepmumdi kunkamrume. Ne cap, ne si cap tep, ‘Allah Yahwehda, pio mambule’ tenen, telep kupra gispal donkamnerume. Ne Allah Yahweh im deiki jen talen malaikat yuma, sun ila deiyo ngebo kununa cadi, nedi pepsen upuda, moupra gekenkurume. Sundi ne si erepra, gispal men donemum pangeda, nedi sun deiki mali pepra widongonkamsene.

Angepu gum dinin, tonda nedi sun tep, telep keca ton karesenun nge peda, mali pepra widongonkamsene. Ange yuma malingepu karepsenepa doronkamrume. Nedi sun tep, “Ukunkamrume, ange men kuprumnyopda, ikin keca karenkamsene,” peipsisi upu yumada, sundi, ‘Angeda mambule gum cadi, dakwapye’ tenen, tamneruma tep, tek sisi nedi sun tep, konum gonga kepra widongonmasene. Ukusenuna deiyoda, sundi ne peiamsi ngeda tapruma tep, widongosenune.

3 Sundi ne peiamsi upu men gekepneruma tep nengeda, tek sisi nedi sun derinkamrum nyapu, sun deikida wenepkamne. Tonda, sun yapi keca popra, uku dongoryakanemum keca, domba cap, kambing cap, sapi capda, akeca sun dei cap, deiplyu cap dopropnedi, imam-imam neng, sun aso deikipu lingdinkamsene. Ada, ‘Sun ali weik dangkameng’ tenen, kupkamsene. Ukupsene dingeda, sun nong dopra, mali keca tambamumpa, weik kuryaipu dubesenedi, donongbenkamsene.

4 Ukupsene pangeda, nedi sun tep, “Angeda kunkamrume, angeda men kunkamrume,” pepra deiamsisi ngeda, kael kepkamrume. Ada, ‘Uo, nundi, angeda mambul gume,’ tenepmepu dinin, ‘Tek sisi Allah Yahwehdi, aupu peipseua tep, nun mali kupmepu,’ tenenkamrume. Nedi, “Sun mali kurumu keca tapmumdi, teleppu kunkamrume. Gum dingeda, ila di wenepkamsene,” pepra deiamsisi upuda, nedi sun Lewi yala neng tep, “Angepu kunkamrume,” pepra, pedina upu peiamsi ngeda, ‘Sundi moupra talenkamenge’ tenen, peipsisi. Neda Allah Yahweh, im deiki jen talen malaikat yuma, sun deiyo ngebo kunedi pepsene. ^{▼▼Allah – Ibrani upu deiki di, Allah er si ada, ‘Yahweh Sebaot’ seki. Tonda, ayat 8, 12, 16 ton ‘Sebaot’ seki. Aupu ‘Sebaot’ deiyo ngeda, katuai dipu sekmupu.}

5 Nedi, sun Lewi yala nesala tep, pedina upu peiamsinge deiyoda, ada ‘Sun Lewi yala neng, apedina upu deiki di, sun yuma dumsisipu kumum dingeda, gam kunkamrume. Tonda, ne cap, sun cap kange deipdapedi, teleppu kikiman kunkamepe’ tenen, aupu pepra deiamsi. Tonda, “Sundi ne pedina upu talepra kunkamrum taruda, dumsisipu kumumdi, ne tep, kwar tenerumdi, gispal dopra, ‘Allahda ila mambule’ tenen, ne si eremkamnerume,” peiamsi. Aupu peiamsitopu, telep kun keca yuma kareramsisi. Ne cap, sun cap, telep kupra kikiman kuramepu.

6 Ataruda, sun Lewi yala nengdi peteremami keca peda, tek sisingepu peteremami. Nedi peramsi upupu peteremami. Tali upu ton pio men peteremami. Sun yumada, ne cap dukdopra kuramepudi, teleppu kurami. Tonda sun yumadi, yuk neng tep mok upu men peramidi, yuk nesala taleami keca yuma peda, upula men dororami. Tonda, sun mali kurami keca tamamidi, yuk neng tep, ‘Sun mali kurum keca tapso,’ peramya deiki di, nimi weika di, sun mali keca tamamidi, teleppu kurami. Ne teneramsi ngepu, dumsisi telep kupra kuramidi pel dorami.

7 Ne teneramsi ngeda, ake. Sun imam-imam nengda, tek sisi sun pel dona dumsisingepu talepra kungedi, ila kael kemna keca yumada, aneng dipu yuk nesala tep, telep kupra peteremkamenge. Ware nesala do yuma, ‘Uo, ware kunkamep do?’ tenen, kange wang-wang pepre taruda, sun Lewi yala deiyo neng kori bena asipetepmengopda, ‘Sun imam-imam nengdi, telep upupu lap penkamenge,’ teneramsi. Ada mesum tep men pepsene.

Neda Allah Yahweh, akeca-keca yuma talepra, deiki tara erepra kunedi, im deiki jen talen malaikat yuma, sun ila deiyo ngebo kununa cadi, ne pene upu lap peipnepa, sun imam neng gekepmengedi, yuk tali dakunge nesala yuma tep, ‘Allah tenere keca ake, ake,’ pepra, ‘Lap pepra peteremkamenge’ tenen, aneng wepra deiamsisi. ‘Ukunkameng’ tenen, aneng wepra deiamsisi dinin, angeda men kurume.

8 Ne teneramsitopu gum dinino, ukutaruda, sun imam-imam nengda, nedi, ‘Ukunkamrume, abisi bankamrume,’ peipsisi ngeda, dumsisi bisi tapmumdi, mali kuna bisipu dombaruma deiki di, sundi yuk nesala tep, ‘Ukunkamrume,’ pepra peteremrum ngeda, telepnge ton men perume. Malingepu peteremruma deiki di, nesala yuma doupra, mali kuna bisipu dubamumpa, malipu kununge. Ukupruma deiki, nedi sun Lewi yala deiyo neng tep, pedina upu peiamsisidi, ‘Angeda kunkamrume, angeda men kunkamrume,’ peiamsi ngeda, pio moupra talepra men kumumdi, yanitamrume. Ne Allah Yahweh, im deiki jen talen malaikat yuma, sun deiyo ngebodi pepsene.

9 Atep sun peda, nedi Israel nesala tep, boun kange doupra peteremkamenge tenepra, sun nong deiki deipsisipane, sundi ne upu gekepra men kurume. Nedi sun tep ‘Telep bisipu moupra peteremkameng’ tenen, peipsisi dinin, sundi ne tep tamnemumdi, yuk nesala tep peteremrum taruda, gwaliprapmumdi tali yuk upupu tapakra peteremrume. Tonda, yuk nesala tep upu bongdin taruda, ‘Ne kabo ace, tonda angeboda ne songe,’ tenen, dumsisikrap upu men bongrume. ‘Telep tenepkamseng’ tenen, upu bongna taruda, gwalina upupu pemumdi dongdirume.

Ukuruma tep nengeda, nedi sun tep mali kupra deipsenepa, sun yuk Israel nesala yuma epsengedi, sun tep, ‘Uo, sun Lewi yala deiyo neng, imam-imamda, malipu kununge,’ pepsengopda, sunda mambul kange doupra ali dangkamrume. Allahdi sun Lewi yala deiyo neng tep pepu.

Israel nesaladi Allah peiamu upu yanipra, tapidi tali-tali dodaramipa pepu upu

10 Nabi Maleakidi Israel nesala tep pepu. Nun yuma nun nai boda tenpu men kurura tep do? Tonda, nun yumada tenpu Allah er dipapu men ketekepra deipseua tep do? Atep nengeda, nundi ware keca tep, Allahdi nun co puna neng sun deiki pedina upu pepra deiamudi, ‘Angepu talepra kunkamrume,’ peiamunge yanitamnup do? Ukupedi, nundi donup nerapuda, ‘Nun song,’ tenen, tali lupra tamnupe. Ukupmepya deiki di, pumun taru, ‘Aner dopnedi, pio kikiman kunkamepe,’ pepra pedina upu peipmepu ngeda, tamnupe.

11 Sun Yehuda yala nesala cap, Israel yala-yala nesala yuma cap, tonda Yerusalem mutu neitamai kurum nesala cap, sun yumadi mali weik kurume. Mali kumumnya deiki di, Allah Yahweh er si eremna ati tep, mali kudirume. Akatida, ‘Pio mambul ati,’ teneramnup dinin, sun mali kumumnya deiki di, akati tep pio mali kudirume. Sundi mali kumumnyada ake.

Ada, sun amutu kumum nengdi, isok sipu eremnung mutu nerapu dopdarume. Anerapu buru dimdamumnya deiki di, Allah Yahweh er si eremna ati pumbon neitamai konum mali kupra derirume. Atep Allahdi, ‘Angeda kunkamrume, angeda men kunkamrume,’ pepra pedina upu peiamu ngeda, konum yanitamrume.

12 Isok si eremnung nerapu dopdarum nengda, ‘Angeda mambule,’ tenena gum dipapu, Allah Yahweh akeca yuma talepra, ila puto kuredi, im deiki jen talen malaikat yuma, sun ila puto deiyo ngebo, er si eremna tep, yapi keca popra, uku dongoryakarume. Ukumumnyada, pio mali weik cadi, ne kangeda, ‘Allah Yahwehdi, sun akurumu nesala yuma wenepra poptapkamre,’ tenenune.

13 Tonda yuk mali kun keca ton akurume. Ada, Allah Yahweh er karen keca deriryakana tep, gel taplakra ketenepyai duyakamomdi, mali kange doupra, asi me deiki di engemumdi uperume. “Uo, ware keca tep, Allah Yahweh er tep karepmap kecada, kange deipra men doropmaser do? Ware deiyo tep, nun nai bo Allahda, nun moronup keca gekepra men kareserur do?” pepra engerume.

14 Tonda sundi, “Nun nai Allah warya tep tapseu do?” pepra engerume. Ukurumnya deiki di, asi me sangseredi, Allah karena tep betapra deipyai mali kudirure. Adeiki sundi Allah Yahweh karena tep, yapi keca popra, uku dongorum ngeda, mali kudirume. Allahdi konum tapseua deiyoda, lap pepkusene.

Ada mesum tep gume. Sun kaber taru di, Israel nerapu buru diprumdi, domrum taruda, Allah Yahwehdi epseudi kael keamu. Sun cap, anerapu capdi, ‘Gume, nundi pio kikiman kunkamepa cadi, men tapdankamepe,’ pepra, pedina upu peamrum ngeda, Allahdi konum gekeramseu.

Sun domrum Israel nerapuda, teleppu kuramidi, yuk neng cap kikiman upu sisikra men kuramidi, sun tep men tamamsei dinin, sun nimi dipapu, anerapu tali lupra tamamrumdi, yuk nerapu cap kikiman marume. Tonda, ‘Yuk mutu nerapu ton doptepe,’ tenen, sun menmena dopdaramrum nerapu tamrumdi, mali weik kuruma tep pepsene.

15 Sun ton betapra men kael keamrum do? Allah Yahwehdi, nimi cap, ner cap, dopdarum taruda, nong tenpu utopu men kepra deriserur do? Deiyoda, nimi pe nerapu pe dopdamum taruda, aner cap dukdongopra, nong tenpu kemdiserure. Tek sisa sun nong cap, kange dipru cap, sambala capda, Allah erngepu kurure.

Ange tep nengeda, Allahdi sun yuma tep uteneserure. ‘Gume sun yumadi, sun Allah cap nong tenpu dukdongopra kupedi, telep kupra nyapu deipmengedi, ne pene upu moupra peteremengepa, sun nyapu yuma gekengedi, talenkamenge,’ teneserure. Atep nengeda, sun pepu pio moupra kael kepdamumdi, ‘Ne dopsi ner tapnun’ tenen, kalengdankamrume. Sun kaber taru di dorum nerapu, tamna gum dipapu, sun cap pio kikiman kunkamrume.

16 Angeda, mesum tep men pepsene. Ada, Allahdi, aupu peipseu. Sun menmena domrum nerapu tamrumu ngeda, ne Allahdi yu kunerure. Ada Allah Yahweh, Israel nesala pio kalekra melimrur ngebo, sun deiyo ngebo Allahdi peipseua tep, angeda ila mambule pepsene. Allah Yahweh, im deiki jen talen malaikat yuma, sun ila deiyo ngebodi peipseu.

Ukupmantoda, nimidi, ton neng poptapmengedi, adepmange neng, sun yapi bapmare opkal dopra kenekmengopda, pio mali kurure. Ada, bicau tenena gum nesaladi, ange utopu keca kununge. Atep, sun domrum nerapu tapmumnyopda, ada ayu kunange utopu kurume. Ukuna meme.

Atep nengeda, sun yumadi, sun pe tep, ‘Nun domepu nerapu deiyo men kuapmarepapu, tali tapmepedi, yuk nerapu dopmepyopda, Allahdi yu tenepserur’ tenen, pio moupra kalengdankamrume. Menmena domrum nerapu tamna meme. Aupu yumada, Allah Yahweh, akeca-keca yuma talepra, im deiki jen talen malaikat yuma cap, sun ila deiyo ngebodi pepsere. Ne Maleakidi lap pepsene.

“Allah Yahwehdi upu bukeipkamre taruda, konum dam kupre,” pepu upu

17 Tonda, ne nabi Maleakidi aupu pepsene. Sun mali kurumu dipapu, Allah er damai upu pemum ngeda, ‘Ne pio dabale,’ teneserure. Uteneserur dinin, sun, mali kumum dipapu, Allah Yahweh tep tamupra asimpeterume. “Nunda ware keca kupmepya deiki di, Allah tep dabal kemdinup do?” Atep ne Maleakidi lap pepkusene. Sundi, Allah tep dabal kemdirum ngeda, ake. Ada, sundi uperume. “Mali kunung nesala yuma tep nengeda, Allah erdi telep pua teneserure. Tonda, dumsisi teleppu kurur Allahda, dan cei kurur do?” pepra asimpeterume. Ukurumnya deiki di, Allah tep dabal kemdirume. Maleakidi Israel nesala tep pepu.