Mal 3 | XteSC | STEP | Allah Yahwehdi pepu. Sun yuma moupra dipetepso! ‘Ne upu lap perbenkamre’ tenen, nedi wepra deipnepa, yankamre ngeboda, ne bisi yadina tep doproipnepa, er menmena yaredi, ne bisi yapra keteneipkamnere. Konum keteneipnere pangeda, ne dato-dato di yankamne. Sundi enerum ngebo, ne Allah Yahwehda, ne si eremna ati bo neitamaipu yankamne. Tonda, sun kange deipmumdi, ‘Uo, Allah er pedina upu, nun damai lap peryankamre ngeboda, menmena yana peipsetue,’ tenerum ngeboda, tek sisi menmena peryankamsere. Neda Allah Yahweh, akeca-keca cap, im deiki jen talen malaikat yuma cap, sun ila deiyo ngebodi pepsena tep, tek sisi kupkamre.

Malachi 3

Allah Yahwehdi, nesala yuma wenepredi, upu bokeipkamre taru yankamra tep, pepu upu

1 Allah Yahwehdi pepu. Sun yuma moupra dipetepso! ‘Ne upu lap perbenkamre’ tenen, nedi wepra deipnepa, yankamre ngeboda, ne bisi yadina tep doproipnepa, er menmena yaredi, ne bisi yapra keteneipkamnere. Konum keteneipnere pangeda, ne dato-dato di yankamne. Sundi enerum ngebo, ne Allah Yahwehda, ne si eremna ati bo neitamaipu yankamne. Tonda, sun kange deipmumdi, ‘Uo, Allah er pedina upu, nun damai lap peryankamre ngeboda, menmena yana peipsetue,’ tenerum ngeboda, tek sisi menmena peryankamsere. Neda Allah Yahweh, akeca-keca cap, im deiki jen talen malaikat yuma cap, sun ila deiyo ngebodi pepsena tep, tek sisi kupkamre.

2 Dinino, neda Allah Yahweh yankamne tumida, ware ngebodi pio dimpepra tektudi, ne epnetu do? Ne yankamne tumida, gat keca uku dongona deiyo nengdi, uku dongopmengepa, mereng-mereng peredi, mali keca yuma jerorepa, telepngepu katuai kuramretopu, nedi mali kun keca yala-yala yuma, pio gum kupra deipkamne. Ukupmanto ngeda, sabun putonge ketkemna deiyo nengdi, ketekepra deipmengedi, dereng bapmare opkal, asabun di me kupmengepa, pio telep kupra lengamretopu, nedi malinge yuma gum kupra deipnepa, dumsisingepu tupa kupkamre.

3 Ne yankamne taruda, ^{▼▼taruda – Ton Allah upu buku neitamaida, ‘taruda’ perameng dinin, ton buku neitamaida, ‘tumida’, penunge. Nun yambula di walwal kuserure. Tenpu tumi deiki di, nesala yuma wenepra upu bokeipkamre do? Tenpu tumi gum dinin, tenpu taru neitamai di apel donkamre do? Acada Ibrani upu ikin kuserura cadi, yambul walwal kuserure.} mali kuramenge nesala cap, telep kuramenge nesala cap tep, upu bongdina tep yankamne. Neda upu bongdina deiyo ngebo kunune. Ukupmantoda, kunumna weik keca er si perak, uku dongopmengedi, moupra dinmangepane, ukudi mali kwamrenge yuma uku jeproredi, telepngepu katuai kuprepa, ange dopra betapra ketkemdiramengtopu, nedi mali keca yala-yala yuma, gum kupra deipnedi, telep kupra deipkamne. Malinge tapkamne. Telep ngeda, mawa deipkamne.

Ange utopu, kunumna pio weik keca emas do, perak do, mali kwamrepane, telep kemdiramengtopu, nedi sun Lewi yala neng, imam-iman neng yuma tep, yana upu bokeipnedi, telep kupra deipkamne. Ukupne pangeda, sun Lewi yala deiyo nengdi, kange di tamupra, ne Allah Yahweh tep, yapi keca popra kareryangedi, ne gispal dona tep uku dongonkamenge. Ukupmengepa, ne Allahdi kange deipkamsene. Nedi sun tep telep kupra deipnepa, ne tenenetopu kunkamenge.

4 Sun konum telep kupra deipnepa, pumun taru Yehuda yala nesala cap, Yerusalem mutu kurami nesala cap, sundi ne Allah Yahweh tep, karen keca dopra yakaramidi, uku dongoramitopu, amenda taru peda, ne karena tep telep keca kareryakankamnenge. Ukupra karyakaramnenge pangeda, nedi sun tep kange derinkamsene. Atep, pumun taru Allah cap dukdongopra telep kuramitopu, amenda taru tamupra yanyopda, sun cap, ne cap, telep kupra kikiman kunkamepe.

5 Ne Allahdi sun kori yankamne taruda, tali tep gume. Sun wenepra upu bongdina tep yankamne. Tonda, ne menmena yankamne taruda, sun asuru kwa neng cap, tonda ner tali-tali nyangne neng cap, mok upu pena neng cap tep, ‘Sunda tek sisi mali kurume,’ pepra ila di wenepkamsene. Ange utopu, kankan kunge neng tep, ila ikin pel dimamengepa donung dinin, kunumna yambulpu karenung neng cap, solu nerapu cap, lyan nyapu cap tep, sun keca upula doronung neng cap, tonda nimi bo neng tep deiyo men kupmarepapu, mali upu sun deiki pengedi, kaukemnung neng cap yuma tep, ne yanedi, ‘Sun mali weik kurume,’ pepra wenepkamsene.

Deiyoda, sun amali-mali weik kunge nengdi, ne tep kware men kununge. Sundi ne si men eremnenunga tep, yanedi sun tep wenepra poptapkamne. Ne Allah Yahweh, im deiki jen talen malaikat yuma, sun ila deiyo ngebodi pepsen ngeda, tek sisi kupkamne, pepsene. Allahdi Israel nesala tep pepu.

Israel nesaladi weni keca cap, telep keca cap, Allah tep bokra men karyakaraminge tep, wenepu upu

6 Allahdi pepu. Neda Allah Yahweh, pio men gum kupmanto ngebo kunune. Pumun taru kuramsitopu, ukutaru pe, yuk taru peda, pio tep akunkamne. Ne si ton pio men gum dakamnere. Nedi pedina upu pepnyopda, pio men lupronune, pio tenenune. Atep nengeda, sun Yakubdi deiamsupa, deipdanen yakarum nesalada, mali weik kuruma tep, tali lupra wenepra, popra gawal dakamsetene dinin, angeda kapul men kupsisi.

7 Sun co puna neng kurami taru di dipdongopra, ataru-ataru neitamai yumada, nedi, ‘Ukunkamrume, angeda men kunkamrume,’ pepra deiamsisi upu yanipra tamrume. Nedi pesene upupu, talepra dukdongopra men dombarume. Atep nengeda, sun adipapu tamupra ne damai yankurume. Yamum pangeda, nedi tapsisi ngeda, ka tamupra sun tep diryakankamsene. Ne Allah Yahweh, akeca-keca yuma talepra, im deiki jen talen malaikat yuma, sun ila deiyo ngebodi pepsene. Dinino, sundi uperume, ‘Uo, nunda nun nai bo Allah, er damai di tapra, yukai men bendopmupka cadi, ware kupmepedi, tamupra Allah damai benkamep do?’ perume.

8 Ukupra penerum dinin, ukutaruda nedi tamupra, sun tep asipetepkusene. Nimidi Allah tep mok upu petamengedi, er mawa keca upula dona telep do? Angeda tek sisi mali dinin, sundi mok upu pemumdi, ne mawa keca upula doronerume. Ada, nedi, “Sun weni keca cap, telep keca cap bokra, ne gispal dona tep kareryakankamnerume,” pepra deiamsisi dinin, sundi mok upu perumdi, akeca yala-yala yuma upula doromumdi, ne damai men duyakanerume.

Tek sisi angeda men pepnetum dinino, sundi ne tep uperume. “Gume, akeca-keca yumada, ‘Allahdi kareserure’ tenen, weni keca cap, telep karen keca cap, neitamai bokra Allah karena tep, dan taru di upula doramepu do? Dan taru di mok upu peramkepu do?” pepra asimpetenerume. Dinino, ne tek sisi pepsene. Ne kaele, sun Israel nesaladi mok upu perumdi, ne gispal dona tep karena telep kecada, ne damai men kareryakanerume. Sun dipapu upula dororume.

9 Ukumumnya deiki di, sun amutu neitamai kumum nesala yumadi, ne tep mok upu petamneruma tep, nedi, ‘Sun yuma mali kun kecapu doropkameng’ tenen, wipdongopsisipa, ukutaruda sun talerum keca cap, kurumu keca cap, sun mutu cap yuma, malipu kurepa, ikinpu kurume.

10 Menop taru di peiamsisitopu, kange di ton cap pepsene. Ange tep nengeda, sun talepra kumum keca ton akapsere pangeda, ‘Akeca bokra, ukupra-ukupra karenkamnerume,’ peipsisitopu, weni keca cap, gam keca cap, telep karen keca cap, bokra doprapmumdi, ne Allah si eremna ati doupra kareryakankamnerume. Ukumumpa, ne si eremna ati bo pumbonda, jen keca weik kupkamre. Men suktalenkamre. Nedi sun tep, ‘Ukupra karenkamnerume,’ pepra deiamsisitopu, kunemumnya deiki di, sun jen keca yumada, pio weik kupkamsere. Men gum kupkamsere.

Ne Allah Yahweh tep, ton yana petepneso. Sundi ne pepmasentopu kupnemum pangeda, nedi im deiki jen keca yakan bisi buplan paktapnepa, sun damai jen keca cap, yuk telepnge cap, pio weik kuprepa, sundi men dopropmanto kunkamsere. Sundi, ‘Tek do, telel do,’ tenena gume. Piripeteprumupa, epkamrume. Akeca yala-yala yuma weika di karenkamsene. Ne Allah Yahweh, im deiki jen talen malaikat yuma, sun ila deiyo ngebodi pepsena tep, tek sisi apepmasentopu kupkamre.

11 Tonda, nedi sun jen keca koumumnge, bo yuma jere keca cap, nong mali kudirur keca tep, upu seknepa, ton cap men jenkamsere. Tonda, nong mali men kunkamre. Teleppu kunkamre. Tonda anggur tapu yuma peda, telep kupra bongopredi, bo telep kupra doupredi, du weika di mounkamsere. Ne Allah Yahweh, im deiki jen talen malaikat yuma, sun ila deiyo ngebodi pepsena tep, tek sisi apepmasentopu kupkamre.

12 Ukupsenepa, sun kunkamrum mutu kure keca yuma, pio telep kupkamre. Tonda, sun kunkamrum mutu neitamai peda, tu telep kupra deipkamsene. Ukupne pangeda, yuk karen mutu kunge nesala ban-ban yuma epsengedi, ‘Uo, sunda telep kange doupra pingpinga di kununge,’ penkamsenge. Ne Allah Yahweh, akeca-keca yuma cap, im deiki jen talen malaikat yuma capda, sun ila deiyo ngebodi pepsena tep, tek sisi apepmasentopu kupkamre.

13 Allah Yahwehdi pepu.

“Telep kuipkamsene,” pepsen dinino, tek sisi sundi ne tep, mali upu weik penerume. Dinino, sundi upemum dipapu tamupra upenerume. “Gume, nundi Allah kan damaida, ware mali upu pekenup do?” pepra asimpetenerume.

14 Atep nengeda, sundi ne tep mali penerum ngeda, pepkusene. Ada, sundi uperume. “Nundi Allah er si eremnup ngeda, deiyo gum dinin, tali tepapu eremnupe,” penerume. Tonda, “Allah erda akeca-keca yuma talepra, im deiki jen talen malaikat yuma, sun ila deiyo ngebo kurur dinin, erdi nun tep, ‘Ukunkamrume, angeda men kunkamrume,’ pedisere upuda, dombanup dinin, ukupmepya deiki di, ware telep keca ton doronup do? Talipu kunupa cadi, angeda nun dabale,” penerume.

Tonda, sun yumadi, ‘Nunda er peipseu upu talepra kunkamepe’ tenen, kurpetereramepu dinin, ka di ton mali kupmepe dingeda, Allah er damai tep, “Uo, nunda mali kunup neng cadi, kaukepsememdi, lyepropseo,” pepra, “Er damaipu bena loptapmepedi, er amutarapu kunada, deiyo ware keca tep kunkamep do? Ange yumada, nun dabale,” pepra mali penerume.

15 Tonda upenerume. “Nun pe asuru di konum dinupe. Ada, sun dipru eremna deiki di karye popra, gemenung nesala pepeda, ikin keca ton, sun nong deiki men yakarure. Telepepu kungedi, telep kange doupra pingping dipapu kununge. Tonda, sun mali kunung neng yuma peda, kunumna weik keca dorongedi, ila isomka neng kununge.”

Tonda, mali kungedi, “Mali kun kecapu kupedi, Allah tep gopetepkupe,” perume. ‘Allahdi nun tep wenepra men popkamsere,’ tenengedi, “Kika deipra, mali-malipu kunge nengda, tupa teleppu kununge. Allahdi sun tep men porepa, ikin keca sun damai men yakarure. Atep, aneng mali kungetopu, nun peda utopu kunkamepe,” penerume. Allahdi Israel nesala tep upepra wenepu.

Allahdi, “Sirya taruda, bicaue tenepra, Israel nesala lyepropkamsene,” pepu upu

16 Allahdi Israel nesala tep, ila di wenepupa, Israel nesala kankan, sundi Allah tep, tupa kwar kuprepa, teka tenepra kurami nesaladi, bupra upu sisingmaidi, upu pedanmaipa, Allah er si Yahwehdi, sun pedanmai upu gekepu. Sun tupa teka tenena nesala cap, sun kayapu teka tenena nesala capdi, amambul upu buku dopra seki. Ada, ‘Nun nai bo Allah Yahweh tep, tupa teka tenepra, er tep kware kunup nesalada, nun si abuku neitamai sengkamepe.

Tonda, Allah tep kange deipra kupedi, tupa-tupa tenepra er sipu eremnup nesalada, nun si abuku neitamai sengkamepe. Ange sekmepedi, lumdongona gum, pio tupa tenenapu kunkamepe. Tonda Allahdi, ange epredi, tupa tenenkamsere,’ tenepidi, nimi si abuku neitamai seki.

17 Ukupi pangeda, Allah Yahweh akeca yuma talepra, im deiki jen talen malaikat yuma, sun ila deiyo ngebodi epudi aupu pepu. “Sundi ne si tupa eremnenung nesala yumada, ne nyapu sisa, ne mawa nesala kunkamenge. Tonda, ne tenepsi tumi konum kupyopda, nesala yuma tep, upu bokeipnedi wenepkamne. Ataruda, sun anesalapuda, ne nyapu sisa, ne dipru nesala kunkamenge. Ada, nedi sun tep tupa bicau tenenkamne.

Ukupmantoda, er nyapu deiamre ngeboda, tenpu midi, ‘Ne nai bo’ tenen, er pepmare upu gekepra melimamre mida, er nai bodi, ‘Ne dipru mi,’ tenepra melimamretopu, ne tep tupa teka tenenenung nesala tep, utopu tenepra kunkamsene. Ada, ne tep teka tenepra, ne si eremnenung nesala tep bicau tenen, lyepropkamne. Sun wenepra men poptapkamne.

18 Ange yuma konum kupnepa, ne nyapu sun yumadi epmumdi, kael kepkamrume. Ada, sun teleppu kunung nengda, sun urasin katuai kuprepa, epra kael kepkamrume. Ange utopu, mali kecapu talepra kunung neng peda, sun urasin katuai kuprepa, epra kael kepkamrume. Ada ne si eremnengedi, ne amutara kungedi, ne pelpu donung neng cap, tonda ne si men eremnenung neng cap tep, nedi upu bokeipkamsen tarupu, epra kael kepkamrume. Ne Allah Yahwehdi pepsene.” Allahdi pepu.