Mal 4 | XteSC | STEP | Allah Yahweh akeca-keca yuma talepra, im deiki jen talen malaikat yuma, sun ila deiyo ngebodi pepu. Tek sisi, ne tenepsi tumi konum kupre pangeda, mali kunung nesala cap, dipru eremna deiki di, sal nong-nong kamnung nesala cap yuma, nedi wenepra poptapkamne. Ukupmantoda, kolupredi kel-kel peramre keca, uku deipmengepa, menmena uku bu dingpepra jeramretopu, sun amali kunge nesala yuma wenepnedi, poptapra gawal dakamne. Ataruda, sun amali kunung nesalada, gawal ton men tapkamre. Ila uku jeredi, co deiyo cap, teru cap, yaten yuma cap, jeprorepa gum kuramretopu, sun amali kunge nesala yuma wenepnedi, popra gawal dakamne. Ataruda, sun amali kunung nesalada gawal ton men tapkamne. Ukupkamne taruda, sun yala nesala yuma peda, pio gum kupkamenge. Atep, doryankamre taruda, amali kunge nesala, sun yala nengdi, nyapu ton deipra men punuptenge. Sun yala yuma gum kupkamre.

Malachi 4

Allah Yahweh, erdi nesala yuma tep, upu bokeipredi wenepkamre tumi tep, pepu upu

1 Allah Yahweh akeca-keca yuma talepra, im deiki jen talen malaikat yuma, sun ila deiyo ngebodi pepu. Tek sisi, ne tenepsi tumi konum kupre pangeda, mali kunung nesala cap, dipru eremna deiki di, sal nong-nong kamnung nesala cap yuma, nedi wenepra poptapkamne. Ukupmantoda, kolupredi kel-kel peramre keca, uku deipmengepa, menmena uku bu dingpepra jeramretopu, sun amali kunge nesala yuma wenepnedi, poptapra gawal dakamne. Ataruda, ^{▼▼ataru – Ton Allah upu buku Alkitab neitamaida, ‘Tenpu tumi’ tenen, ‘tumi’ sengnunge. Ton Alkitab neitamaida, ‘Tenpu tumi gum dinin, waktu yambul weik kupkamre’ tenen, ‘taru’ sengnunge. Dinino, Ibrani upuda, yambul ikin cadi, nun yuma yambul walwalpu kunupe.} sun amali kunung nesalada, gawal ton men tapkamre. Ila uku jeredi, co deiyo cap, teru cap, yaten yuma cap, jeprorepa gum kuramretopu, sun amali kunge nesala yuma wenepnedi, popra gawal dakamne.

Ataruda, sun amali kunung nesalada gawal ton men tapkamne. Ukupkamne taruda, sun yala nesala yuma peda, pio gum kupkamenge. Atep, doryankamre taruda, amali kunge nesala, sun yala nengdi, nyapu ton deipra men punuptenge. Sun yala yuma gum kupkamre.

2 Dinino, sundi ne tep, ‘Allah erda ila mambule’ tenepra, ne si eremnerumdi, ne peiamsi upupu, moupra talepmumdi kurum nesala yuma tep, ne putoda sun deiki deipsenedi, lyepropkamsene. Lyepropsenya deiki di, sun ikin kusere keca cap, pu jesere deiyo keca cap yumada, gum kupkamsere. Ukupmantoda, keteng deiprepa, akeca-keca yuma katuai kuramretopu, amenda taru sun mutu ban-ban neitamai yumada, pio dumsisi kuna tep deiyo kecada, weika di kupbankamre. Ukupre pangeda, yuk mutu nesala yuma epsengedi, ‘E, anesalada tek sisi dumsisipu kununge’ tenen, kael kepkamsenge. Ukupmantoda, sapi bisam mi beilya pumbon dongomengepane, abeilya pumbon di gupra, bura tara beredi, ila kange deriramretopu, amenda taru sun peda utopu kupmumdi, kange derinkamrume.

3 Ukupkamsen taruda, nedi tenepsitopu, tek sisi kupkamne. Adeiki nedi sun mali kunung nesala yuma, popra gawal dakamne. Sun amali kuna nesala yuma popra tapnepa, sun aneng deikida, tu but deiki yanipra baramrumtopu kupra, sun nong deiki di yanipra bankamrume. Neda Allah Yahweh, im deiki jen talen malaikat yuma, sun ila deiyo ngebodi pepsena cadi, apepmasentopu ange yuma tek sisi kupkamre.

4 Atep nengeda, ne amutara kuramudi, ne pel doramu ngebo Musa erda, ne cap Sinai mutu deiki antapnemudi, nedi er tep, ‘Israel nesalada, ange ukunkamenge, angeda men kunkamenge,’ pepra deiamsipa, sekamudi peramseu ngeda, moupra tenepmumdi, angepu talepra kunkamrume. Ada, ne nyapu sun Israel nesala yala-yala yuma tep peiamsi upu pepsene.

5 Dinino, apepkusen upu moupra gekepmumdi, ‘Dan taru kupkamre do?’ tenen, dinapu kunkamrume. Ada, ‘Ila kange mun keca kupkamre’ tenen, ketenepra deipsi tumi, ne Allah Yahwehdi nesala yuma tep, upu bokeipnedi, mali kunge neng wenepkamsen tumi kapul men kupre taruda, menmena nedi, ne upu lap pena ngebo nabi Elia wepra deipnepa, sun damai adipapu yankamre.

6 Nabi Elia yare pangeda, sun nai yapu yuma cap, sun nyapu yuma cap, antapra deipserepa, sun yuma tenpu kange doupra, telep kupra kikiman kunkamenge. Ada, sun tenpu kange men doupmamumpapu, ‘Uo, Allah yaredi, nun kunup mutu neitamai di yana, mali kunup nesala wenemna tep, nun yuma popra, gum kupra deipseredi, nun yuma cap, nun mutu tu cap tep nengeda, mali pepra widongoserur’ tenen, kange moupra kunkamrume. ‘Ukupsenuna’ tenen, nedi er angebo nabi Elia dopra deipnepa, sun yuma antapra derina tep, menmena yankamre. Allahdi Israel nesala tep pepu.