Mar 11 | XteSC | STEP | Yeriko mutu tapra, ‘Yerusalem mutu benkamep’ tenen, Yesus cap, er nyapu cap, bisi mapbaramyanen, ati arum dorami sida, Betania cap, Betfage cap bisiprapidi, banmaiya, Yerusalem damai kwamu mutuda, Zaitun mutu dup welepi.

Mark 11

Yesusdi, Yerusalem mutu wengbeunge tep, pepu upu

(Matius 21:1-9; Lukas 19:29-38; Yohanes 12:12-15)

1 Yeriko mutu tapra, ‘Yerusalem mutu benkamep’ tenen, Yesus cap, er nyapu cap, bisi mapbaramyanen, ati arum dorami sida, Betania cap, Betfage cap bisiprapidi, banmaiya, Yerusalem damai kwamu mutuda, Zaitun mutu dup welepi. 2 Welepi dingeda, Yesusdi er nyapu butene neng tep pepu. “Ortara mutu bererumdi, ati arum doramengai ukupu wekrorerum taruda, keledai bisam meteknge gerekeipmanga eprerum dingeda, tapu gerekdongomenga lopra denererume. Ametek keledai bisamda, nimi ton kapul bukra men embaramenge nge, denkamnererume. 3 Ukuprerumpa, yuk neng epsengedi, ‘Warya tep kuprerum do?’ pepra asimsengopda, ka di tamupra upepkarerume. ‘Gume, nun nai Yesus putapmara tep, dubenemepa, akeledai bisam bali deiki di bukra emberyopda, sun pepu tamupra dokotepkamsere,’ pepkarurume,” Yesusdi abutene neng tep pepu.

4 Upepupa, ati arum domya neitamai bereidi, ati buplan damai metek keledai bisam gerekmaiya eprei. Epreidi bena lodoreipa, aca tekmai nengdi upepi. 5 “Ametek keledai bisam lodonmarurumada, warya tep do?” pepra asipetepi. 6 Asipetepipa, Yesusdi ‘Upepkamrume,’ pepmautopu peprei. Upepreiya tep, atekmai nengdi mankaukeproipa, sundi lopra berei.

7 – 8 Lopra dubanmareiyanen, Yesus damai bereipa, sun deiki kenekmai opkal kwiripra keledai bisam bali deiki yakra deipipa, Yesus adeiki bukupa dopra beu. Yesusda keledai bisam bali deiki bukra, Yerusalem mutu banmaupane, ton nengda, sun deiki kenengmai opkal kwiripra Yesus yanipra yakankamau bisiai yakra deipi. Ton nengda wa bunai di, co bata gakra bisi yaninai yakra deipbenmai. Akunmainge yumada, ‘Yesusda ila mambul ngebo yakanmare’ tenen, gispal dona tep kunmai.

9 Yesus banmauai mepra banmai neng cap, amenda yakanmai neng cap, ‘Yesusda nun ila nimi deiyo ngebo kunkamaser’ tenen, Allah upu lap perami neng menop di sekami upu dopra, aupu ila di pepbanmai. Pepbanmai upuda ake.
‘Allah erda pio telepe. Er si erepra gispal dopmepe. Allah er puto deiki di yankamar ngeboda, Allah ila di makurepa, teleppu kurure.’ (Mazmur 118:25)

Tonda, aupu ton penmai. 10 “Nun apu bo Daud tep, Allahdi, ‘Amutu yuma talepra kunkamreme,’ pepra deiamu ngeda, ukutaru konum gonga kepkura tep, Allahdi makuprepa, akeca yuma teleppu kunkamre. Ange tep nengeda, Allah kanda, im deiki kumemdi, ila puto kurum ngebo tep, nundi kan si erepmepe,” pepra Allah tep ila upu di gudinmai.

11 Yesusdi Yerusalem mutu bisi banmauanen, Yerusalem ati arum doramyai wekudi, sun Yahudi yala nengdi Allah tep karerbana cap, er si eremna cap, kurami ati ^{▼▼Allah tep karerbaramidi, er si eremami ati lap pen upuda, lap pena upu nomor 15 dinkurume.} bena wekrou. Wekudi, akeca-keca dipra embeu dinin, konum ipbanmaua tep, ka tamupra Betania mutupu beu.

Yesusdi, mali neng tep, Yerusalem mutu neitamai Allah si eremna ati pumbon di, bura dokotepu upu

(Matius 21:12-22; Lukas 19:45-47; Yohanes 2:13-16)

12 Beupa, Yesus cap er nyapu cap, tonpa mapmaiya bereku pangeda, Betania mutu di tapra, banmai taruda, Yesus jen putapu. 13 Jen putapka tep, kwarang co du mouramretopu co, er sida ara co tekamupa, karenai di epudi, aco damai bena epyopda, bo weik douamnga tep, ‘Du ton moupu do?’ tenen, dirbeu. Dipetepudi, aco du moun li taru gum tep, bopu douramupa epu. 14 Bopu douamnga cadi, Yesusdi aco tep pepu. “Aketeng tamun, aketeng tamun yuma, du pio men moupmempa, nimidi du ton dakra men jenkamkenge,” pepu. Aco tep pepu upuda, er nyapu gekepi. 15 Gekepidi, sun yuma banmaiyanen, Yerusalem mutu weki dingeda, Yesusda Yahudi yala nengdi Allah er si eremna cap, karerbana cap kurami ati dam bura tara tengbeu.

Tengbeudi, Yahudi yala neng, ‘Nun mali kunup kecada, Allahdi gum kupra deipseredi lyemkamser’ tenen, gam keca popra Allah tep kareraminge, yapi keca kunumna neng tep, Yesusdi wenepra bura enepkotepu. Tonda, yuk karen mutu nengdi, sun pe mutu co bo dopra duyanmaipa, Yerusalem mutu neng co bo di dengdanmai neng yuma tep, sun co lase tamupra yamuptapra embeu. Tonda, ‘Allah tep karenkamenge’ tenen, yal ma utopu ma kunumai neng, sun bukmai keca yuma tamuptapra embeu.

16 Tonda, ukunmauanen, yu weik kupupa, Yahudi yala nengdi Allah tep mororami ati dinin, Yahudi yala gum nengda, akati men wekmanto kuramya cadi, akati dam Allah mororamyai, ‘Kunumna keca deiyo nengdi tali kunumna keca dopra, akati damai embenung’ tenen, Yesusdi abisi sengmau. 17 Ukunmau taruda, akunmai neng tep, aupu yuma peteremau. “Allahdi peipupa, nabi Yesayadi sekeiamu upuda, tupa men tenerum do? Aupuda adano.”
‘Allahdi, “Ne si eremna ati tep, nesala ban-ban yumadi, ‘Akatida Allah er si eremengedi moronung ati adano,’ penkamenge,” pepu.’ (Yesaya 56:7)

Tonda, Yesusdi aupu pepu. “Allahdi peipupa nabi Yesayadi apepmasen upu sekeiamu dinin, ukutaru kurum neng sunda, upula nengdi upula dopra inimameng ati kuramengtopu, akati peda konum mali kupra deipmarume,” Yesusdi pepu.

18 Upenmau pangeda, Allah si eremna ati pumbon pel dona deiyo neng cap, Musadi sekeiamu mem upu peteremna deiyo neng cap, gekenmaiya cadi, yu kupupa, ‘Angebo popkupe,’ tenepidi, ‘Ware kupra poptepe do?’ tenen, upu sisingbei. Yesus er upu penmau taruda, tali awekmai neng yuma gekenmaidi, ‘Uo, Yesusdi peteremre upuda, pio telepe’ tenen, mambul kange doupmaidi, Yesus tep kange deipmai ngeda, adeiyo neng yumadi epmaiya cadi, Yesus tep sun kware kupu.

19 Yesus akunmaupa, akunmaiyanen, konum ipropu pangeda, Yesus cap, er wepra deiamu neng, sun 12 neng cap, Yerusalem mutu ati doramyai di tapra, bura tara bei.

Ara co kolupmaupa epi upu

(Matius 21:19-22)

20 Bura tara bena mapmaiya berekupa, ‘Ka tamupra Yerusalem mutu benkup’ tenen, bisi banmai taruda, ambutumi bisi baidi epmai kwarang coda, ton cap epi. Epidi aco damai bena dipterepidi, aco bo cap, nong cap, yaten cap yuma, Yesusdi, “Bopu doupmuma tep, kolupo,” pepra wenepmaua deiki di aco bo cap, nonge cap, yaten cap yumada, konum kolupmau ngeda epi. 21 Epidi, Peterusda Yesusdi pepmau upu gekepmaua cadi, tenepudi Yesus tep pepu. “Naio, aco dipterepo. ‘Du men moumemnya tep, nimidi du daka men jenkamkenge,’ pepmaum coda, konum kolupmare,” pepu. 22 Upepupa, Yesusdi tamupra pepu.

Sunda Allah tep pio teka tenenkamrume. 23 Sun moupra gekepso. Ware ngebo do yuma, kange dipru bongtona gum di, “Nedi moropne kecada, Allahdi tek sisi kupkamnere,” pepra, Allah tep pio teka teneptuopda, ormutu tep, “Kan pedi erepra, laut mokon neitamai derirbeo,” peptuopda, amutu er pedi erepra, laut mokon neitamai dokotepdankamre. 24 Ange tep nengeda, ne tek sisi pepsene. Allah moromum taru di, akeca-keca yuma tep moromum kecada, ‘Akeca tek sisi konum karenkamanere,’ tenepra, teka tenena deiki di moropmumyopda, Allahdi akeca tek sisi karenkamsere.

25 Tonda, Allah tep moronkamrum taru yumada, sun tep mali kupsenge nengda, sun mali kupsenge keca tepapu, mali kange tupa tenepmumyopda, adipapu tenimtona gum di, sun mali kupsenge neng tep, kaukemkamrume. Kaukepmum pangeda, sun nai Allah im deiki kure ngebodi, sun mali kumum keca yuma peda, kaukemkamsere. 26 Dinino, yuk nengdi sun mali kweipsenge keca tep, men kaukepmumdi tupa tenemumyopda, Allah er peda, sun mali kumum keca tepapu pio tenenapu kuredi men kaukemkamsere. Yesusdi pepu.

Yahudi yala deiyo nengdi, Yesus tep, “Ware keca puto deiki di pel dorum do?” pepra, wenepi upu

(Matius 21:23-37; Lukas 20:1-8)

27 Yesus cap, er nyapu sun 12 neng cap, bisi yakanmaiyanen, Yerusalem mutu ati arum doramyai wekidi, Yahudi yala nengdi Allah er si eremna tep, gam keca popra karerbarami ati dam bei. Allah tep karerbarami ati dam dinin, Yahudi yala gum nengdi wekra Allah tep mororamyaipu, bei. ^{▼▼Yahudi yala gum nesala wekmantoai – Sun Yahudi yala gum nesala yumada, Yahudi yala nesala sun Allah tep karerami ati meneng damai cap, akati pumbon cap, men wekmanto kurami. Atep, ‘Allah tep gispal dopra moropkamepe,’ tenerami nesala, yuk mutu nesala yumada, tali bura tara, akati dam urasin tara bulupra Allah tep mororami. Tonda lap pena upu nomor 15 dirume.} Beipa, Allah karena tep, er si eremna ati pumbon pel dona deiyo neng cap, Musa sekeiamu mem upu peteremna deiyo neng cap, Yahudi yala deiyo neng yuk neng cap, Yesus damai yaidi, ‘Wenepkamep’ tenen, asipetepi. 28 “Ware ngebodi upu deiyo keca karepkeupa, ambutumi yapi keca kunumangu neng enepra bura tara enepdokotepmarem do?” pepra asipetepra wenepi.

29 Asipetepidi wenepipa, Yesusdi tamupra aneng tep asipetepu. “Tenpu keca tep sun ton asipetepkusene. Asipetepsenepane, tamupra pepnemumnyopda, ne pel donya deiyo keca karepneu ngeboda, ‘Er si ake,’ pepra lap pepkusene. Sundi tamupra men pepnemumyopda, ne peda sundi asipetepmanerum ngeda, men lap pepkusene. 30 Yohanesdi teka tenena nesala me dongoramu ngeda, Allahdi peiamupa kuramu do? Tali nimidi peiamipa, teka tenena nesala dopra me dongoramu do? Sundi tamupra lap pepneso,” Yesusdi pepu.

31 Upepupa, aYahudi yala deiyo nengdi, ‘Ware upu pepkup do?’ tenen, upu talepdai. Upu talepdaidi upepdai. Yohanesdi teka tenena nesala dopra me dongoramu ngeda, ‘Allahdi peiamupa kuramnga, pepmepyopda, Yesusdi nun wenepserure,’ tenepi. ‘Ange tep nengeda, Yohanes peramu upu tep, teka men teneramrum ngeda, deiyo warya tep do, pepra wenepserure,’ tenepi. 32 Dinino, ‘Yohanesdi pel doramunge deiyoda, nimi dia,’ pepmepyopda, awekmang neng yuma gekepsengedi, yu kuprepa ila di derepsenunge, pepdai. Aupu pepdai ngeda, ada amutu neitamai kurami neng yumadi, ‘Yohanesda, tek sisi Allah upu jenek pena ngebo, nabi kuramu,’ teneramya tep, Yahudi yala deiyo nengdi kwardangmai.

33 Kware kupka tep, adeiyo nengdi, ‘Inipkup’ tenen, Yesus tep tamupra tali upu peptapi. Sundi upepi. “Yohanesdi teka tenerami nesala dopra me dongoramunge deiyoda, nun walwal,” pepra mok upu peptapi. Upepipa, Yesusdi tamupra aneng tep pepu. “Uda sundi ne tep, ‘Nun walwale,’ pepmaneruma tep, ne pel done keca deiyo upu peipneu ngeboda, er sida men sipeipkusene,” pepu.