Mar 13 | XteSC | STEP | Yesusdi aupu konum pepu dingeda, erdi wepra deiamu neng sun 12 neng cap, Yahudi yala nengdi Allah tep karerbarami ati pumbon di, bura tara bai taruda, Yesus er nyapu kankan tenpu ngebodi, akati domya dipterepudi, aupu pepu. “Naio, dipterepo. Akatida, ila pala lyom gel di domi. Akati-akati yuma domi ngeda, urasin pio telepe,” pepu.

Mark 13

Yesusdi akeca-keca yuma gum kupkamre taru damai kupyopda, Allahdi peten kemna tep kupkamre keca tep lap pepu upu

(Matius 24:1-51; Lukas 21:5-36)

1 Yesusdi aupu konum pepu dingeda, erdi wepra deiamu neng sun 12 neng cap, Yahudi yala nengdi Allah tep karerbarami ati pumbon di, bura tara bai taruda, Yesus er nyapu kankan tenpu ngebodi, akati domya dipterepudi, aupu pepu. “Naio, dipterepo. Akatida, ila pala lyom gel di domi. Akati-akati yuma domi ngeda, urasin pio telepe,” pepu. 2 Upepupa, Yesusdi aupu pepmau ngebo tep tamupra pepu. “Ila ati domi ngeda yuma dipetepo. Ila lyom gel pala di deipra welepidi, domi gel ati yumada, amendada yu neng yangedi uruptapmenge taruda, gel deiki tenpunge peda men tapkamenge. Ayuma urupra daktapmengedi, sikke buta utopu buktapkamenge,” pepu.

3 Upepu dingeda, akati tapra kwerepidi, banai ubeiyopda, Zaitun mutu ^{▼▼Zaitun mutu deiki, co du mouramre co, er sida zaitun, weik kouamipa, zaitun co du mouramnga cadi, amutu sida Zaitun mutu perami.} deiki welepra, abena bukidi, yanmai tarapu, Yahudi yala nengdi Allah tep karerbarami ati orkupmaupa, tamupra dinmai. Yuk neng cap tapakra men bukmaiya cadi, Allah karerbarami ati dinmai taru di, Peterus cap, Yakobus cap, Yohanes cap, Anderias cap, sun yumadi Yesus tep asipetepi. 4 “Nun naio, lap pepseo. Akatida, dan taru di daktapkameng do? Ware keca kuptua deiki di, ‘Akati daktapkamenga damai kupre,’ teneptepe do?” pepra asipetepi. 5 Asipetepipa, Yesusdi aupu tamupra pepu.

Sirya taruda, yuk neng weika di sun damai yangedi, mok upu pepsengepa, ‘Mankau di amok upu teka tenepnup’ tenen, pio kange moupra kunkamrume, pepsene. 6 Ada, nimi weik yangedi, ne si sipepmengedi, ukupra penkamenge. ‘Nimi lyemna tep, Mesias yankamre perami ngeboda, ne pua. Ne akonum yanman adano,’ penkamenga deiki di, nimi weik amok upu gekepmengedi, mangkau kange doupra, teka tenenkamenge. Amok neng upenkamsenga deiki di, sun dipru kange yuma gipra, yuk tara dubankamsenga tep, ‘Mankau di mok upu teka tenenup’ tenen, sun kange dipru moupra kunkamrume, pepsene.

7 Tonda, deiyo men kwapmarepapu, yuk nengdi tali-tali upu deiki di, aupu pepmengepa gekenkamrume. ‘Ton tara yala neng cap, ton tara yala neng cap podanmange,’ pepra lap pengepa gekenkamrume. Tonda, tek sisi konum podanmange taru dinkamrumnge cap, tali-tali upu di penkameng nge cap, yan pepmengepa, gekepmumyopda, kware men dangkamrume. Allahdi ‘Atopu keca kunkamre,’ konum teneramnga tep, ukunkamre dinin, ange yuma kupre taruda, ‘Tek sisi sirya gawal dangne taruda, kapul yanmare,’ tenenkamrume.

8 Tonda, sirya taru kunkamre ngeda, ton ila mutu nengdi, yuk ila mutu neng tep, bena podankamenge. Ada negara peramenge nesaladi podankamenga tep pepsene. Tonda, ton tara ila nimi deiyo ngebodi talerur nesala cap, yuk tara ila nimi deiyo ngebodi talerur nesala cap podankamenge. Ukuramengepane, mutu yuk-yuk weika di longkamre. Tonda, wa pepra kouramenge keca yuma peda, nong men kupre pangeda, jen keca pio putanapu kunkamre. Apepmasen keca yuma kael kemna tep, ukupmanto ngeda, nerapu mi deipkunge taru mi deiyo pu jenmaryanen, mi deriramengtopu, ne lap penmasen keca yuma konum kupyopda, ‘Sirya gawal dangne taru konum damai kunmasere,’ tenenkamrume.

9 Ange tep nengeda, akeca-keca yuma kupkamre ngeda, moupra dimumdi, tenenkamrume. Yu nengdi, sun tep, ‘Upu bongdina deiyo nengdi wenepra popkameng’ tenen, ateng koupra karerbankamsenge. Tonda, Yahudi yala nengdi, Allah upu peteremnung ati neitamai di, sun tep ateng koupra dubesenge pangeda, ne tep teka tenenerum nesala sun wenemna tep, balana weika di bongopra ponkamsenge. Ne tep teka tenepmaneruma tep, ‘Anengdi popkameng’ tenen, ila nimi deiyo neng, Gubernur neng cap, ila nimi deiyo Raja neng cap, sun damai dubesengepa, ne si deiki di pel domum ngeda, jenek kupra lap pepmumpa, adeiyo nengdi ne tep gekenkamenge.

10 Akeca-keca yuma, sirya gawal dangne taru kapul men kupkamre taruda, ne kai telep upu, nimi lyemna upuda, dopra mutu sirik, im sirik peterembankamenge. Peterepmengepa, ban-ban yuma kunge nesaladi, ne upu konum gekepmengopda, sirya gawal dangne taru konum damai kupkamra cadi, ne tamupra yankamne.

11 Ware taru do yuma, teka tenena gum nengdi, ne tep teka tenenerum nesala yuma tep, ateng kouprapsengedi, upu bongdina deiyo neng damai dubesengopda, upu kapul pepkumum taruda, ‘Uo, ware upu pepkup do?’ tenen, ikin kange men dounkamrume. Allah er Lek Sambala sun cap kuserura cadi, ataruda erdi sun dipru neitamai peipkamser upupu penkamrume. Ada, Allah er Lek Sambala puto karepserya deiki di penkamruma tep pepsene.

12 Sun tenpu weitapsilip dinin, ‘Adeiyo nengdi nun weitapsilip wenepra popkameng’ tenen, napra ateng koupmengedi dubenkamenge. Utopu ton, sun nai yapudi, sun pe nyapupu napra, ateng koupmengedi dubenkamenge. Ange utopu, sun pe nyapudi, sun nin yapu cap, sun nai yapu cap tep, ‘Nundi sun upu men gekenkamepe,’ pepra, yuk neng tep, ‘Nun nai yapu cap, nun nin yapu cap poipseso,’ pengopda, ponkamenge.

13 Ne tep teka teneneruma tep, yuk teka tenena gum nesala yumadi, sun tep ‘Anesalada nun songe,’ tenepra, mali upu pepra sun nong deiki derinkamsenge. Dinino, ware ngebo do yuma, ne tep tamna gum di, teka tenepredi, pio dimpepra kuramre ngebo tep, mali nengdi popmenga peda, Allahdi angebo tep tek sisi lyepkamre. Lyepredi, im deiki dubenkamre. Yesusdi er wepra deiamu neng, sun weneri neng tep pepu.

14 Upepudi aupu ton dukdongopra pepu. Allahdi, ‘Ne pio songe,’ tenepredi, ^{▼▼“Allahdi er pio song,” pepkada, Allah cap, er pel dore keca yuma cap, er tep teka tenenge nesala yuma cap tep, ‘Ange yuma bisbisa kapnedi, gum kupra deipkamne,’ tenepredi, yan tekamre ngebo tep pepu. Tonda, lap pena upu nomor 48 dirume.} “Angeboda, aca men tengyatue,” pepra upu sekamngaipu, ‘Allah cap, er kure keca yuma cap bisipkamne,’ tenerur ngebodi yana tekre pangeda, Allah er gispal dona tep karerbarameng atida, Allahdi pio tapkamre. Allahdi er tep karerbarameng ati pio tapra bere taruda, sun Yudea tara kunkamrum nengdi, Yudea tara di tapra, adipapu sepdaro mutu damaipu bankamrume. Yesusdi pepu.

(Ne Lukasdi pepsene. Abuku sekami upu perum nengda ‘Deiyo ake’ tenen, moupra gekepterepso.) Yesusdi aupu ton pepu.

15 Ange kupkamre taruda, sun ati pum ^{▼▼ati pum – Pumun taru seki buku neitamaida, ‘ati pum’ men seki. Yesusdi, ‘Sun ati arum deiki kunkamrume neng,’ pepupa, angepu seki. Aseki ngeda, Yudea mutuda, mo meteka dipu cemrur mutu cadi, sun gel ati arumda, gat keca di ban kepra domi. Ban kepra domidi, sun ati arum deiki weleramidi, beipye peingami. Tonda, keana tep marami.} men kunkamrum nengda, ati pum tapmamum keca tamupra men dorbenkamrume. 16 Ataruda, sun wa pena pel donkamrum nengda, sun opkal deikinge kwiripra, ati deipmamum ngeda, tamupra ati pum men dorbenkamrume. Adipapu akeca yuma tapra, mutu damai sepdaro benkamrume. 17 Ataru mundu tupa douamenge nerapu cap, mi moum dinimamenge nerapu cap, anerapuda adipapu sepdaro bura tara mutu men benmanto tep, pio kange mun kange doupra, ikin weik kunkamre. 18 Kapi deipre taru mo weik cemamrepa, karen mutu men benmanto kuramretopu, sirya taru yankamre ikin kecada, ‘Bul li do, kapi deipre taru do, akeca yarepa, nun men benmanto kupnup’ tenen, Allah er teppu moronkamrume.

19 Apepmasen upu deiyoda ake. Allahdi akeca-keca yuma ketekeiamu taru di dipra, ukutaru pe, yuk taru pe, ikin keca weik kupyakaramu ngeda, yambulapu kuramu. Dinino, amenda akeca-keca yuma sirya gawal dakamre taruda, pio ila ikin keca weik kupkamre. 20 Sirya taru ikin kunkamre taruda, Allahdi, ‘Ikin keca weika di deipne pangeda, tuai nesala yuma depnung’ tenen, Allahdi ikin keca meteka dipu karenkamsere. Deiyoda, Allahdi ikin keca derinkamre taru, meteka dipu men deiptu teptoda, tuai nesala kan-kan, tenpu ngebo peda ton men gam kuptue. Nesala yuma depra gawal daktenge.

Dinino, Allahdi, ‘Tuai mutu nesala kan-kan di, ton nesala nedi konum wepra deiamsa tep, anesalada ne nyapu pio gam kunkamenge,’ teneamu. Uteneamnga tep, Allahdi, ‘Ikin keca deipkamre taru weika di deipne pangeda, ne wepra deiamsi nesala, ne mawa nesala yuma depnung’ tenen, ‘Sirya gawal dakurya tep, ikin keca weik kunkamre taruda, meteka dipu derinkamne,’ konum teneamu.

21 Ataru neitamai di ton nengda, mok upu deiki di ‘Nesala weik lyepredi talenkamre, penung ngeboda, ne Kristus konum yanmane,’ peryakankamenge. Ton nengdi, ‘Nun kayapu nengo, diryaso. Kristus konum yanmardi, nun damai akunmare,’ penkamenge. Ton nengdi, ‘Gume, Kristus yanmar dinin, ormutupu kunmara cadi, dirbenkupe,’ penkamenge. Mok upu deiki di aupu peryakankamseng dinin, ne nyapu sunda, amok nengdi penge upu gekepra, teka men tenenkamrume.

22 ‘Aneng tep, teka men tenenkamrume,’ pepmasenada, mesum tep men pepsene. Deiyoda ake. Amenda taru yakankameng nengda, ton nengdi, ‘Nunda Kristus kunupe,’ penkamenge. Ton nengdi, ‘Gume, Allah er upu cap, amenda kupkamre keca cap tep, lap pena deiyo neng nabi kunupe,’ pepra mok penkamenge. Anengda, ‘Sun yuk nengdi, nun mambul pel donmapepa epsengedi, teka tenepra domyankamsenunga’ tenen, isok puto deiki di nimi men kupmanto keca, kunupsek pen pel donkamenge.

Ton anengda, ‘Apel domepepa yuk neng epsengedi, uo, anengda tek sisi Allah er puto deiki dipu apel donunge, tenenkamsenunga’ tenen, mambul pel ton donkamenge. Apel-apel yuma donkameng ngeda, ada Allah er men di wepra deiamu nengda, ‘Allah er tapra, nunpu domyakankamsenunga’ tenen, yana pel donkamenge. Sun mok upu pen nengdi, ukunkameng dinino, Allah wepra deiamu nesala yumada, amok upu teka men tenenkamenge. Anesalada Allah er mawa nesala kununga cadi, mok keca cap, mok upu cap tep, teka men tenenkamenge.

23 Apepmasen keca yuma kunkamra tep, sun pio kange moupra kurumudi, ketenem dinkamrume. Akeca yuma kapul men kupmare taru di, menmena taru kupkamre keca konum lap pepmasene, Yesusdi pepu.

24 Aikin taru neitamai dinin, apepmasen kange mun keca konum kupyopda, “Akeca kupkamre,” pepra, Allah er upu lap peramu ngebo, nabi Yesayadi sekeiamu upu utopu kupkamre. Atep, nabi Yesaya sekeiamu upu deiki pepkusene. Ada,
‘Ketengda kunukamre. Tonda, ware dirin gum kupkamre. 25 Tonda, kuru yumada, im deiki di tuai sangkamre. Utopu, im deiki kure keca yuma long-long pepredi embendankamre.’ (Yesaya 13:10)

Aupuda, nabi Yesayadi sekeiamu upu pepsene. Yesusdi pepu. Upepudi, aupu ton cap pepu.

26 Im deiki kapu keca konum kupre pangeda, neda Nimi Mi Sisa Utopu Ngebo ^{▼▼Nimi Mi Sisa Utopu Ngebo – Sun nabi nengdi, pumun taru Nimi Mi Sisa Utopu Ngebo perami ngeda, ada Allahdi wepra deiamupa, tuai nesala lyemna tep yankamre ngebo tep perami. Nabi Danieldi aupu peramu. Angeboda, Yesus kurure. Ada, tuai nesala nong utopu daredi, yankamua tep, Nimi Mi Sisa Utopu Ngebo perami.} ila puto cap, dirine cap, urasin telep kuna cap, ayuma deiki di dua kankan yanepa, nesala ban-ban yumadi epkamnenge. 27 Ne yankamne taruda, ne im deiki melimna neng, malaikat dokotepnepane, im sirik, mutu sirik dana-dana yuma, Allahdi, ‘Ne mawa nesala kunkameng’ tenen, wepra deiamupa, im sirik, mutu sirik dana-dana dakunge neng yuma bulupra deriryakankamenge. 28 Ange tep nengeda, kapi co kait poramrenge teneprumdi kael kemkamrume. Kapi co kait popyopda, kapi taru tep, ‘Mo cemkamre,’ tenerume.

29 Ange teneramrumtopu, alap pepmasen keca yuma epmum dingeda, ‘Sirya gawal dakamre taru konum damai kupre,’ tenepkamrume. Ati buplan damai, tengyangedi peten-peten pepmengepa, sundi, ‘E ne kabo nati damai konum yanmare,’ teneramrumtopu, apepmasen keca konum kupyopda, ‘Sirya gawal dakamre taru konum dam kupre,’ tenepkamrume. 30 Ne tek sisi pepsene. Ataru kumum neng kapul men depmamumpapu, alap pepmasen keca yuma kupkamre. 31 Im deiki kapu keca cap, tuai kapu keca cap, ayumada gum kupkamre dinino, ne upuda tenpunge peda ton men gum kupkamre. Aupu pepmasentopu, tek sisi nong kunkamre. Yesusdi aupu pepu.

Yesusdi, “Ne tuai mutu tamupra yankamne taru, ‘Atumi ake, atanggal ake,’ tenepra sun men kael keptume,” pepu upu

32 Yesus upepu dingeda, aupu ton cap pepu.

Ware neng do yuma, ‘Yesus tamupra yankamre tumida, atumi yankamre, atumi neitamaida ipna yankamre, sintara yankamre’ tenen, men kael kepmanto kununga cadi, jenek men peptenge. Allah er im deiki pel don neng, malaikat peda men kael keami. Atep, sun malaikat peda men peptenge. Tonda Allah er Mi Sisa, ne Yesus peda men kael keamsi. Ne nai Allah er dipu kaele. Er dipapu, ‘Ataru ake,’ teneramutopu tamupra yankamne. 33 Ne yankamne taruda, men kael kemruma tep, ‘Nun tupa mali kunup taru neitamai, nun nai bo menmena yaredi wenepserur’ tenen, sun kange pio moupra kunkamrume. Tonda mankau kunmamumpa, ‘Dato-dato di yarur’ tenen, ‘Dan taru yankamser do?’ tenen, pio ketenepra dinapu kunkamrume. 34 Ne yankamne taruda, ‘Sun walwal kupserur’ tenen, ukupmanto upu nukeipkusene.

Ati deiyo ngebo tenpu di, yuk mutu benkure taruda, er pel don neng tep, “Pel ukupra donkamrume,” pepra bokra deipredi, tenpu ngebo tep, “‘Ne nai bo menmena yankamre’ tenen, buplan dam moupra kaleka dinkamnerume,” perure.

35 Uperamretopu, ne peda, sun tep pepsene. Akati pel don neng sun deiyo ngebo, ‘Aila ati talerur ngebo tamupra yankamre’ tenen, men tenimamengetopu, sun peda, ne tuai mutu tamupra yankamne taru men kael kepruma cadi, ‘Nun deiyo ngebo Yesus dan taru yankamre do?’ tenen, ketenepra dinapu kunkamrume. 36 ‘Ayam gapuramre taru do, bereng dongon taru do, idona taru do, pio lukunda neitamai yankamre do?’ pio men teneruma cadi, kange pio moupra kumumdi, ketenepra dinapu kunkamrume. Tali kange doupra, kunmankap mapmamumpa, ne dato-dato di yanuna tep, pio ketenepra dinapu kunkamrume. 37 Aupu apepmasentopu, nesala ban-ban yuma tep, utopu pepsene. Pio kange moupra ketenepra dinapu kunkamrume, pepsene. Yesusdi er nyapu tep pepu.