Mar 15 | XteSC | STEP | Jen talen nengdi, ‘Yesus balana popkamep’ tenen, dubeipa, Yahudi yala neng Allah karena tep, ila deiyo neng cap, Musa sekeiamu upu peteremna deiyo neng cap, Yahudi yala neng, yuk deiyo neng wisi neng cap, alukunda neitamai yumada, sun upu weika di talenmaiyanen bereku. Aupu talenmai nengda, sun Yahudi yala neng upu bongdina deiyo neng tep, Sandeheren neng perami. Aneng yuma upu weik talenmaidi berekre pangeda, “Ukutaruda, Yesus popkamepe. Ukupra popkamape,” tenepra penmai. Konum tenepi dingeda, Yesus ateng koupra, Yudea tara taleamu nimi deiyo ngebo, er si Pilatus damai dubei. Ada, ‘Pilatusdi Yesus tep upu bokeipredi, wenepkur’ tenen, dubena karepi.

Mark 15

Yesus dopra Pilatus damai dubeipa, upu talenmai upu

(Matius 27:11-26; Lukas 23:2-3, 18-25; Yohanes 18:29—19:16)

1 Jen talen nengdi, ‘Yesus balana popkamep’ tenen, dubeipa, Yahudi yala neng Allah karena tep, ila deiyo neng cap, Musa sekeiamu upu peteremna deiyo neng cap, Yahudi yala neng, yuk deiyo neng wisi neng cap, alukunda neitamai yumada, sun upu weika di talenmaiyanen bereku. Aupu talenmai nengda, sun Yahudi yala neng upu bongdina deiyo neng tep, Sandeheren neng perami. Aneng yuma upu weik talenmaidi berekre pangeda, “Ukutaruda, Yesus popkamepe. Ukupra popkamape,” tenepra penmai. Konum tenepi dingeda, Yesus ateng koupra, Yudea tara taleamu nimi deiyo ngebo, er si Pilatus ^{▼▼Pilatusda, Roma mutu ngebo kuramu. Yudea tara neitamaida, Israel nesala ton, Yahudi yala nesala kurami dinin, amutu yuma taleami ila deiyo nengda, Roma mutu neng kuramidi akeca yuma talerami. Anengdi Pilatus dopra deiamipa, erdi ila nimi deiyo ngebo kuramudi, Yudea tara taleamu.} damai dubei. Ada, ‘Pilatusdi Yesus tep upu bokeipredi, wenepkur’ tenen, dubena karepi.

2 Bena karepipa, Pilatusdi Yesus tep asipetepu. “Yahudi yala neng sun ila deiyo ngebo tep, Raja penge ngeboda, kan akonum kurum do?” pepra asipetepu. Asipetepupa, Yesusdi tamupra pepu. “Teka apepmaneremtopu kunune,” pepu. 3 Upepupa, Allah karena tep deiyo neng yumadi, ‘Pilatus gekepredi teka tenepkamar’ tenen, “Yesus er mali kure ngeda, ake-ake,” pepra weika di luludina upu weika di penmai.

4 Sun minina upu weika di penmaiya tep nengeda, Pilatusdi kange di ton cap, Yesus tep asipetepu. “AYahudi yala deiyo nengdi kan tep, ‘Er mali kure keca, ake-ake,’ pepra weika di penmakenga cadi, kan pedi upu tamupra pepmemdi, sun tep upu men sekarem do?” pepra asipetepu. 5 Asipetepu dinino, Yesusdi tamupra upu men penmaudi, dimpepnapu kunmaua tep, Pilatusdi, ‘Uo, er kware men kunmarada, ware kange doupmar di do?’ tenen, lolopu.

6 Uda, Yahudi yala neng Kaplemna Kailya Kalemna taru neitamai di, amutu taleami nengdi wenemna ati dongorami neng kan-kan dinin, nesala yumadi, ‘Angeboda loptapra karepseso,’ pepne ngebopu, amutu taleamu deiyo ngebo, Gubernurdi peipnepa, tenpu ngebopu wepra lortamami. 7 Ukuramya tep, orketeng tamun deikida, yuk nengdi, ‘Nun Yahudi yala nesala kunup mutu taleamsei neng, Roma mutu neng yuma popbisipkamep’ tenen, pirirtererdarami taruda, nimi tenpu, er sida Barabas, erdi nimi ton popu. Nimi popka tep, wenemna ati dongopipa, wenemna ati tupa kunmau. 8 Keteng tamun yuma Kaplemna Kailya Kalemna taru di, nimi tenpu-tenpu lortamamya cadi, nimi weika di Pilatus damai yaidi, “Nundi tenepmepe ngebo, tenpu ngebo loptapra karepseo,” pepra moropi.

9 – 10 Allah tep karena deiyo nengdi utenepi. ‘Gume, yuk nengdi, sun Yesus er upu gekepmengedi, nun tapsenung,’ teneramidi, Yesus tep, ‘Nun songe,’ teneramidi kange erepra dipru wilimami. Sun dipru wilimami ngeda, Pilatus konum kael keamnga cadi, ‘Anengdi, “Yesus konum poipserume,” pepmanengada, deiyo ake,’ konum tenepu. Ange konum kael keamnga cadi, awekmai nengdi, “Tenpu ngebo loptapseo,” pepra, er damai mororyanmai neng tep asipetepu. “Yahudi yala neng, sun ila deiyo ngebo, ‘Raja penge ngebo Yesusda loptapsetu’ tenen, putanmaserpa, yan moropmanerum do?” pepra asipetepu.

11 Pilatusdi upepra asipetepu dinino, er damai nimi weike wekmaiya kankan, Allah karena deiyo nengdi, yuk neng tep pepi. “Sunda upenkamrume. ‘Barabas erpu loptapseo,’ pepra moropkamrume,” pepra upu talepidi konum pepra deipi. Upepra deipya deiki di, awekmai neng yumadi, “Barabas loptapseo,” penmai. 12 Upenmaipa, Pilatusdi tamupra pepu. “Ange tep nengeda, sundi Yahudi yala neng sun ila deiyo ngebo tep, Raja penge ngebo, Yesus tep, ne adipapu ware kupkun do?” pepra asipetepu. 13 Upepu pangeda, sun awekmai neng yuma, ila upu di dingpenmai. “Kandi peipmempa, jen talen nengdi angebo dopra sengdin co deiki deipra popkunge,” pepra upu ila di penmai.

14 Upenmaipa, Pilatusdi tamupra pepu. “Ware keca deiyo tep popkung do? Nun amutu taleramep nengda, deiyo men kwapmarepapu nimi tali lupra men ponupe. Atep, nundi, ‘Angeda ukunkamrume, angeda men kunkamrume,’ pepra derinup peraturan upuda, dan upu yaniserya tep popkung do?” pepu. Pilatusdi upepu dinino, sun awekmai neng yumadi, kange di ton cap upu ila di penmai. “Kandi peipmempa, sun jen talen nengdi sengdin co deiki deipra popkunge,” penmai.

15 Pilatus er kangeda, ‘Awekmai neng yuma tep, sun putapre keca nedi karepne pangeda, kange deipkamnenge,’ tenepudi, Barabas loptapupa, tali beu. Barabasda tali beu dinin, Yesuspuda, Pilatusdi er jen talen neng tep peipupa, Yesus dopra, nimi pon keca ^{▼▼Nimi pon keca pepi ngeda, ada sapi bol neitam tekra deiamna di, metek besi keca di asapi bol deiki getepra welerami. Akeca dopra mali kuramne neng, sun nong bol bali deiki bongoramipa, nimi bolda gwelyang singiramudi bongopra porami.} ponmai. Ponmaiyanen, yuk nengdi Yesus dopra ‘Yuk jen talen nengdi Yesus dopra, sengdin co deiki derirbenkung’ tenen, karepi.

Jen talen nengdi, Yesus tep, nalemai upu

(Matius 27:27-31)

16 Ajen talen nengdi Yesus dopra, Pilatus er ila ati pumbon dubei. Pilatus er ila nimi deiyo ngebo ati si tep, Praetorium perami ati dubei. Akati dubeiya deiyoda, ‘Nun kikiman jen talenup neng yuma yankung’ tenen, kongpepipa, aneng yuma bulupra yai. Ayai neng gung yumada, 600 neng yai. 17 Sun yai dingeda, ataruda Yesus nalepra autuna tep, ila nimi deiyo neng kunumna weik mirin opkal kemamenga utopu, Yesus er nong deiki aopkal dongopra deipi. Ukupidi, takke keca kwaneprapidi, Yesus er giso deiki dekdongopi.

18 Ukupi dingeda, Yesus er nalepra autuna tep, ila di aupu penmai. “Naio, Telepe. Yahudi yala neng, sun ila nimi deiyo ngebo Raja kurume,” pepra nalemai. 19 Nalemai taruda, co balana doprapidi, er giso deiki bongonapu kunmai. Bongonapu kunmaidi, er nong deiki silong tulunmai. Tonda, ‘Nimidi ila deiyo neng tep gispal doramengtopu, kupmepedi, nyek-nyek penkamap’ tenen, gutam tu dipdongopra tekrapna bukapna kemai.

20 Ataru yuma ukunmaidi, Yesus tep weika di nalepra autunmaiyanen, arup taru er nong deiki dongopra deipmai mirin opkalda, kwiripra tapidi, er pe opkalpu, ka di dongopra deipi. Ukupidi, ‘Sengdin co deiki deipra popkup’ tenen, Yesus dopra bura dubei.

Yesus sengdin co deiki deipra popi upu

(Matius 27:33-44; Lukas 23:33-43; Yohanes 19:17-24)

21 Yesus sengdin co deiki deipkamaiya tep, bisi banmai taruda, tenpu ngebo er si Simon Kirene mutu ngebo bura kunmauane, bisi neitamai yakaupane, antapi. Simon er nyapuda, Aleksander cap, tonda Rufus cap deiamu. Jen talen nengdi Yesus dubanmaipa, Simon cap antapdai dingeda, Yesus er sengdin co ikin tep, puto di, “Kan adipapu asengdin co topra beo,” pepra dipipa, Simondi aco topra beu. 22 Simon topra banmaupa, bisi banmaiyanen, mutu si Golgota mutu bei. Golgota ^{▼▼Golgota – Sun Yahudi nesala perami upu deiki di, aupu Golgota peramyada, er deiyoda, nimi giso yo utopu kwamu mutu tep perami. Ada, amutu er urasinda, nimi giso yo yambulanun utopu kupka cadi, amutu urasin tep, Golgota si perami.} perami ngeda, ada amutu urasinda, nimi giso yo utopu kwamu mutu tep, asi si perami. 23 Golgota mutu deiki bei dingeda, Yesus sengdin co deiki deipkoi atep, anggur me kange yawaramamrenge cap, ‘Pu jeprur’ tenen, sengdongon obat sida mur cap, tapakra Yesus karepterepi dinin, Yesusdi ame men jepu.

24 Men jepu pangeda, sengdin co tu deiki deipra, Yesus er nong aco deiki alipra deipidi, buru dana-dana deipra paku daki. Tonda, er yan tenpai wisipra deipidi paku daki. ^{▼▼paku daki – Sun Roma ila nimi deiyo nengdi peiamipa, jen talen nengdi mali kupne neng porami ngeda, ila mambule. Ila paku dopra, sun buru gap-gapai cap, yan asuru damai cap, co deiki deipidi paku daki. Aco erepra deipipa, mali neng menmena men depyopda, ‘Menmena depkameng’ tenen, sun kalyo yo copi. Ada, ‘Sun yan puto deiki di bepekra bengedi, pio gam kupnung’ tenen, kalyo yo comami. Yambul mali nengda, sengdin co deiki men porami dinin, pio mali nengpu akeca deiki di porami. Atep nengeda, nun kaele, Yesus tep, ‘Angebo pio mali ngebo,’ tenepidi, er dopra sengdin co deiki popi.} Ukupi dingeda, Yesus er nong sengdin co deiki deipmai coda, tu palipmaiya pumbon erepra dokotepi. Yesus er dongoramu opkal kwiriptapmai ngeda, ‘Ware ngebo dopropkamre do?’ tenen, sun esu pen keca, er si undi deiki di esu penmananen, konum kupne ngebopu, Yesus er opkal dopropu. 25 Yesus sengdin co deiki deipyada, nesala bura baramenge ketengto, ipna toupne keteng, jam sembilan konum kupupa, sengdin co deiki deipi. 26 Nimidi, “Yesus er mali kuramunge deiyoda ake,” pepra, co lase deiki surat sekra deipidi, aco laseda Yesus er giso deiki tara deipi. Surat seki ngeda, adano. ‘Yahudi yala neng sun ila nimi deiyo ngebo Raja ake,’ sekra deipi.

27 Yesus sengdin co deiki deipmaiyaida, upula dopra mali kuramrei neng butene, ton ngebo dumsisi tara, ton ngebo tebalal tara, yuk sengdin co deiki dana-dana deipi. 28 Upula doramrei neng dana-dana tara deipmaiya deiki di, Allah er upu lap peramu ngebo nabi Yesaya sekeiamu domon upu deiki di Mesias ngebo tep pepu ngeda, nong tek sisi konum kupke. Nabi Yesayadi Mesias ngebo tep peamu upuda ake.
‘Angebo cap, nimi upu yanitamna neng cap, wisipra deipkamenge.’ Yesayadi pepu (Yesaya 53:12)

29 Yesus sengdin co deiki deipmaiya damai embanmai nengdi, Yesus tep mali upu penmameidi, ‘Walito popmamenge’ tenen, buru du palcopra kael sunmai. Kael sunmaidi aupu penmai. 30 “Uda, konum popmakenga adano. Kanda, ‘Allah er si eremna cap, er gispal dona tep karebarameng atida, uruptapmanyanen, u weneri tumi konum kupyopda, yuknge ton punupra dopkamne,’ peramuma tep, ukutaru sengdin co deiki lyepdamemdi, tuai busuko,” penmai. Upepra ila upu di nalemai.

31 Tali aembanmai neng penmaitopu, Allah tep karena deiyo neng cap, Musadi sekeiamu upu peteremna deiyo neng cap, sun aneng yumadi, Yesus tep, nyek-nyek penmaidi autunmai. Sun pedanmai upuda ake. “Yesusdi yuk neng tep makupra lyemamu dinin, erdi er pe tep, men lyepdanmare. Ange men kuptue. 32 Nesala ban-ban yuma kan-kan, nimi weik lyepredi sun dipru talenkamre ngebo, Mesias penge ngeboda, Yesus er kuramtu teptoda, sengdin co deiki lyepdatudi, tuai busuktupa, eptepe. Ange eptepetoda, angebo tep ngeda teka teneptepe. Erda Yahudi yala neng, nun ila nimi deiyo ngebo Raja kuramtu teptoda, kwereptupa eptepedi, teka teneptepe,” upepra nalenmai.

Sun aneng yuma nalemaitopu, Yesus damai dana-dana tara sengdin co deiki deipmai neng butene di, Yesus tep mali upu weika di penmamemerei.

Yesus depu upu

(Matius 27:45-56; Lukas 23:44-49)

33 Ipna toupne keteng deiki di, Yesus sengdin co deiki deipmaipa, dakupmaupane, keteng dukduk jam dua belas konum kupupa, amutu yuma ipudi kunuku. 34 Ipudi kunukmauanen, keteng weneri ton konum kupkopda, sintara jam tiga konum kupupa, Yesus ila upu di pepra ngoloku. Er upu deiki di pepu ngeda adano. “Eloi, Eloi lama sabaktani,” pepu. Apepu upu, Aramaik mutu nesaladi penge upu deiyoda ake. Ada, “Ne nai Allah, ne nai Allah, warya tep kaukemnememdi tapmanerem do?” pepra ngoloku. 35 Aupu pepmau taruda, ameneng dam tekmai neng neitamaida, ton neng gekepidi, “Uda, sun gekepso. Yesusdi nabi Elia si pepra upupmare,” pepi.

36 Yesus aupu pepupa, tenpu ngebo sepdaro beudi, me tudon keca co balana di lyumupra, ‘Anggur me suminmin nge Yesus jepkur’ tenen, me burupra Yesus sipyal damai karepterepu. Karepterepudi aupu pepu. “Akeca-keca yuma kurpetena gume. Dakwapye. Allah upu jenek peramu ngebo, ‘Nabi Eliadi sengdin co deiki di dopropkur do?’ tenen, dinkupe,” pepu. Uda, Yesusdi “Eloi, Eloi,” pepmau upuda, angebo moupra men gekepmaua cadi, aupu pepu.

37 Ukupupnen, Yesus ila di ngolokra, mali pepudi, adipapu depu. 38 Yesus depu pangeda, adipapu Allah tep karerbarami ati, er si eremami ati neitamai, ‘Tali nesaladi Pio Telep Lek Ati pumbon neitamaida tali nesala yuma men wengkamenge’ tenen, bisi buplan damai wilipra kapkwetemi lyom opkalda, er pedipapu meiki tara di gwelepra dana-dana kepropu. ^{▼▼Alyom opkal dana-dana kepropu ngeda, Allah si eremami ati pumbon neitamai kapkwetemya deiyoda ake. Ada, Allah tep karena deiyo neng, sun ila deiyo ngebo er tenpu dipapu apio telep lek ati neitamai wektue. APio Telep Lek Ati pumbonda, Allah akurura cadi, ‘Tali yuk neng yumada, akati pio men wektenge’ teneramya tep ukurami. Dinino, Yesus sengdin co deiki nun yo pununa tep depka deiki di, ukutaruda nun teka tenenup neng yuma tep, Yesus lyepseua deiki di, Allah damai tali lupra yatepe. ‘Angeda, kael kepkameng’ tenen, Yesus depu taruda, Allahdi alyom opkal kapkwetemi ngeda, meiki tara di gwelepra dana-dana kepropupa, aPio Telep Lek Ati neitamai kwamu keca yuma katuai kupu.} 39 Jen talen neng denge weik, 100 neng taleamu ngebo tenpu, Yesus sengdin co deiki deipmaiya iritara teka dinmaua cadi, Yesus ila di ngolokudi, depu taru kupu keca yuma epudi, aupu pepu. “Uo, angeboda, tek sisi Allah er Mi Sisa kuramnge,” pepu.

40 Yesus sengdin co deiki popmai taruda, nerapu ton yambul karenai di tekra dinmai. Akupu keca yuma dinmai nerapu sun sida ake. Ada, Magdalena mutu ner, er si Maria cap, kaber kuramrei neng Yakobus cap, Yoses cap sun nin er si Maria cap, ton ner er sida Salome cap, kunmaidi dinmai. 41 Anerapu yumada, Yesus Galilea tara embaramu taruda, er cap melipra embaramidi, er putapne keca jen do, ware keca do yuma, sundi makupra kareramidi pel kikiman dorami. Yuk nerapu weike ton cap, Yesus Yerusalem mutu welepu taruda, sun cap welepmaiya cadi, sun yuma akunmaidi dinmai.

Yesus depupa, er nong dopra peirbei upu

(Matius 27:57-61; Lukas 23:50-56; Yohanes 19:38-42)

42 Yahudi yala nengdi Allah si eremna tep, ‘Pel dona gum dipapu, beipye peikra, Sabat tumi deiki Allah er sipu eremkamep’ tenen, beipye peingami tumi kupkamaua tep, sun ketenem dirami tumi konum kupu. 43 Ketenepra derin tumi konum kupka cadi, ambutumi men pel dopmanto tumi tep, ipropupa, tenpu ngebo er sida Yusup Arimatea mutu ngebo, kwar dangna gum, balila deiprapnedi, ‘Pilatus damai bena moropnepa, Yesus er nong karepkuner’ tenen, Pilatus tep mororbeu. Yusup Arimatea ngeboda, Yahudi yala neng, sun upu bongdina deiyo ngebo ton kuramudi, Sandeheren neng cap kikiman pel dopra kurami. Yusupda, Sandeheren ngebo kuramu dinin, er peda, ‘Allahdi nesala ban-ban yuma kunga neitamai di nesala weik lyepredi, sun dipru talenkamsere taru tek sisi yankamre’ tenen, Yesus tep teka tenepra ketenepra diramu ngebo kuramu.

44 Yahudi yala nengda, nimi depnopda, gel imir pumbon peirami. Sun yuma ukuramya tep, Yusupda, ‘Pilatusdi, Yesus er nong dopra karepnerepa, gel imir pumbon peirbenkun’ tenen, moropu pangeda, Pilatusdi, ‘E, Yesusda menmena konum depmau darape,’ tenepudi lukdau. Lukdaudi, jen talen neng denge 100 neng taleamu ngebo, ‘Epterepredi jenek pepra lap pepkuner’ tenen, kongpepudi, Yesus sengdin co deiki deipmaiyaipu dirbeu. 45 Pilatusdi angebo kongpepupa, angebodi Yesus sengdin co deiki deipmaiya damai bena dipetepudi, “Tek sisi Yesus konum depmaue,” pepupa, Pilatus gekepu dingeda, Yusup tep, “Telepe Yesus er nong dopra dapeirbeo,” pepu.

46 Pilatusdi upepka tep, Yusupda telep boun opkal kunupudi, Yesus nong sengdin co deiki di dopra, aboun opkal di getepra, gel kumuamya pumbon dongopu. Dongopudi, gel imir buplanda, yuk ila pala gel gamup banmauanen, buplan dekdongopu. 47 Yusupdi Yesus er nong dongopra peipmauaida, Maria Magdalena cap, Yoses er nin Maria cap, sundi ton eprei.