Mar 16 | XteSC | STEP | Sun yuma damapra kunmaiyanen, Sabat tumi konum kupkopda, Maria Magdalena cap, Yakobus er nin Maria cap, Salome cap, aweneri nerapu nintong telep keca, ‘Yesus er nong deiki dikra likeipkup’ tenen, doupra bei.

Mark 16

Yesus depmaupane, Allahdi gam bukra deipu upu

(Matius 28:1-8; Lukas 24:1-10)

1 Sun yuma damapra kunmaiyanen, Sabat tumi konum kupkopda, Maria Magdalena cap, Yakobus er nin Maria cap, Salome cap, aweneri nerapu nintong telep keca, ‘Yesus er nong deiki dikra likeipkup’ tenen, doupra bei. 2 Minggu tumi ipna kapul bereng tamupapu, aweneri nerapu Yesus peipmauai bena, ‘Er nong deiki nintong telep keca dikra likeipkup’ tenen, bisi banmai taruda, asipterepdanen banmai. 3 “Ware ngebodi Yesus peinai buplan deku gel gamuprap dokotepsetupa, Yesus er nong eptepe do?” pepra asipteredanen banmai.

4 Asipetepdaidi genepra banmai dinin, sun urasin erepra dindeipa, ila pala gelda konum gamuptapmaua epi. 5 Epidi, gel imir pumbon yana weki. Wekra dindeipa, dumsisi tarada kaber ngebo tenpu, pio kurun opkal kenekamu ngebo bukmaupa epidi, lukdana kware weik kupu.

6 Lukdana kware weik kupupa, angebodi anerapu tep pepu. “Sun lukdana cap, kwar dangna cap gume. Er aca men kunmare. Er konum gam bukmare. Er nong deipmanguaida dipterepso. Sundi ‘Eptepe’ tenen, enmarum ngeboda, aca pio men kunmare. 7 Aca men kunmar dinin, erdi wepra deiamu neng, sun 11 neng cap, tonda Peterus cap tep, aupu lap perbenkurume. ‘Yesusdi, “Ukupkamne,” peipseutopu, er menmena Galilea tara benmarepane, sun amenda bemumpa, er cap antaprumudi epdankamarume.’ Atep aupu pepra aupu kai perberume,” pepu. 8 Angebodi aupu peipu pangeda, aweneri nerapudi kange boktopupa, kware weik kupka tep, moropsemau. Gel imir pumbon di gupra, bura tara sepdaro bei. Er pepu upu yuma gekepra tenepidi, kware weik kupka tep, sundi yuk neng tep men pepi.

9 Uda, Minggu tumi ipna kapul bereng dongou taruda, Yesus dato-dato di, tenpu ner er sida Maria Magdalena, aner damai belepra tengyau. Yesus gam bukmaupa, yuk neng yumadi kapul men epmai taruda, menmena Maria Magdalena kori, Yesus dato-dato di tengyaupa epu. Aner Mariada, pumun taru yoneitam bari isokdi, er dipru neitamai taleamipa, ataru gum dinin, Yesus men di aisok konum enepra dokotemu. 10 Yesusdi Maria damai tengyaupa epu dingeda, Yesus cap melipra embarami neng kunmaiyai lap perbeu. Anengda, Yesus depmaunge tep, kange mun kange doupmaidi, mali pepra engenmai. Sun engenmaiyai Maria bena, erdi Yesus epmaunge tep lap pepu. 11 Mariadi, “Yesus konum gam bukmaupa nedi epmane,” pepu dinin, sundi apenmau upu gekepra teka men tenepi.

12 Yuk taru, Yesus er urasinda, yambul yuk kupudi, er wepra deiamu neng, butene neng bisi banmareiya neitamai, Yesus dato-dato di belepra tengyau. 13 Tengyaupa, sun konum epreidi, tamupra sun kayapu, sun 9 neng tep, bena lap pepreipane, gekepi dinin, sun butene nengdi pepreinge peda, teka men tenepi.

14 Dakunmaipane, yuk taruda, Yesusdi wepra deiamu neng, 11 neng jen jepra wekmai ati neitamaipu, Yesus dato-dato di belepra tengyau. Tengyaudi asebelas neng tep wenepu. Ada, Yesus kapul men popi taru, tupa gam kuramu taru di, ‘Ne depmanya tamupra gam bukamne,’ peramupa sun yambul metekapu teka teneramya cadi, er konum depu pangeda, sundi, ‘Gume, akonum depmara,’ tenepya tep wenepu. Ton ngeda, Yesus konum gam bukmaupa, epi neng, weika di lap pepmaipane, kika deipra, mankau kange doupidi, teka men tenepmainge tep wenepu. 15 Ataruda, Yesus erdi wepra deiamu neng, sun 11 neng tupa awekmaidi kunmai neng tep aupu pepu.

Sunda ban-ban yuma cap, mutu-mutu yuma cap, ne kai telep upu, nimi lyemna upu doupra peterep embaramumpa, ‘Mutu-mutu kunge nesala yuma aupu gekenkamenge’ tenen, peteremberume. 16 Peterem benamumpane, ware ner do, ware ngebo do yumadi, ne upu teka tenepmengepa, me dongopmumnyopda, Allahdi anesala lyemkamre. Dinino, ware neng do yuma, ne upu teka men tenepmengopda, Allahdi anesala tep, er damai dopra men deipkamre. Pio wenepredi, yuk karenai dokoteprepa, sun cap, er cap, kikiman pio men kunkamenge.

17 Ne tep teka tenepnenge nengda, yuk nengdi, ‘Allah er puto deiki dipu pel donunge, tenepkameng’ tenen, ne puto karepnepa, nimi men kupmanto keca kunkamengada ake. Nesala taleamre isokda, ne si deiki di enepra dokotenkamenge. Tonda, sun men kael keami upu dinin, Allah er Lek Sambaladi puto kareprepa, yuk mutu upu deiki di penkamenge. 18 Tonda, nimi pon bal sun buru deiki talenkameng dinin, men denkamenge. Tonda, nimi den me, er si racun jepmenga peda, pu jeprepa men denkamenge. Tonda, pu jen nesala, sun nong deiki buru deipra, Allah moropmengepa, Allahdi anesala kwetedirepa, anesala yuma kip kupmengedi, gam bungdongonkamenge. Yesusdi er nyapu 11 neng tep pepu.

19 Nun nai Yesusdi aupu pepu pangeda, er nyapu adinmaipapu, Allahdi Yesus er nong dopra dubeupa, im deiki welepu. Yesus im deiki welepu dingeda, ‘Allah cap akeca-keca yuma pio talepra kunkamnem’ tenen, Allah er buru dumsisi tara ^{▼▼Yesusdi, Allah er dumsisi buru damai bungbeuada, tali tep gume. Allah er dumsisi tara bukre ngeboda, Ila Nimi Deiyo Ngebo kurure. Yesusda akeca-keca yuma talepra kunkamra cadi, Allah er dumsisi tara bungbeu. (Markus 14:62, Mazmur 110:1).} bukudi im deiki tupa ikurure. 20 Yesus im deiki konum welepu pangeda, er upu gekepra domembarami nengdi, amutu-mutu yuma er kai telep upu doupra peterep embarami. Yuk nengdi, ‘Ada Allah upu tek sisi tenenkamenge’ tenen, sun peterep embarami taru yumada, Allah er puto weik kareamupa, nimi men kupmanto keca, kunupsek pen pel doramipa, dirami nengdi, ‘Sun pesenge upuda tek sisi Allah er upu pesenunge,’ tenerami.

Telepe, ne Markusdi acapu deipsene.