Mar 2 | XteSC | STEP | Sun yuma dakuramyanen, Yesusdi Kapernaum ati arum domi mutu ka di tamupra beu pangeda, amutu neitamai kurami nengdi, ‘Yesus er pe mutu tamupra yanmare,’ pepipa, atara neng yuma gekepi.

Mark 2

Yesusdi, “Nimi tuai nesala mali kunge keca yuma gum kupra derina deiyo ngeboda, ne pua,” pepu upu

(Matius 9:2-8; Lukas 5:18-26)

1 Sun yuma dakuramyanen, Yesusdi Kapernaum ati arum domi mutu ka di tamupra beu pangeda, amutu neitamai kurami nengdi, ‘Yesus er pe mutu tamupra yanmare,’ pepipa, atara neng yuma gekepi. 2 Yesus wekra bungbeu atida, nimi pio weik bulupra wengbei. Ukupipa, akati go meteka ton pio men kupu. Ati buplan dam pe, bura tara pe go ton men kupu, yuma dekpepu. Ukupupa, Yesusdi aneng tep, Allah upu peteremau.

3 Peteremau taruda, nimi ton nong yuma meiyal semupa men embenmanto ngeboda, dumbari nengdi pela co deiki doupra baya duyai. 4 Nimi weik wekmaiya di, buplan dam dekpepmaua tep, Yesus damai men dubenmanto kupu. Ukupka tep, akati arum deiki welepidi, Yesus bukmau dumsisipu, arum sirikrapidi, pela co cap, angebo cap talepra, ati arum deiki di tapnenep banmaiyanen, Yesus peteremauai apu deipdongopi. 5 Sunda, ‘Yesusdi angebo kweteptue’ tenen, ukunmanga deiki di, Yesusda, ‘Ne tep tek sisi teka tenepmanenge,’ tenen, kael kepudi, angebo tep men kwetepu taru di, ameiyal semu ngebo tep pepu. “Ne mio, kan mali tenemem keca cap, mali kumem keca cap, konum kaukepmakendi, kan mali kumem keca yuma konum gum kupra deipmakene,” pepu.

6 Yesusdi aupu penmau taruda, Musa sekeiamu upu peteremna deiyo neng ton abuka gekenmaidi, sun kange neitamai di tenenmai. 7 ‘Angebodi aupu penmarada, warya tep do? Er penmar upu deiki di Allah si yanipmare. Allah er dipapu nun mali kupe keca gum kupra deriserura tep, ware ngebo ton cap apel doptu do? Pio gume. Yesus aupu penmara deiki di, “Neda, Allah utopu ngebo kunune,” penmara tep, erda pio mali ngebo kurure,’ tenepi. 8 Sun dipru neitamai di tenepinge yumada, Yesus er kange neitamai konum tenepudi kael kepka tep, erdi sun tep pepu. “Aupu yuma tep tenenmarumada, warya tep do?

9 Nedi, ameiyal semu ngebo tep, ‘Kan mali kumem keca yuma gum kupra deipkene,’ pepra kanam dipapu tali peptaptene do? Agum dingeda, pio tali dipapu angebo tep, ‘Kan tekromemdi, kan ason dopra benkurume,’ peptaptene do? Dinino, sunda, ‘Apelda tek sisi pel doptu do, tek sisi men pel doptu do?’ tenepneruma tep, menmenada angebo kweteipkune. Nedi, angebo tep, ‘Tekromemdi kan ason dopra beo,’ pepnyopda, sun adipapu kael kepkunerume. Ada, sundi ne tep, ‘Yesusda nimi tuai nesala mali kunge kecada, gum kupra derina deiyo ngebo, tek sisi kurure, tenepkuneruma’ tenen, angebo kweteipkune,” Yesusdi pepu.

10 Upepudi, aupu ton cap pepu. “Ange tep nengeda, neda Nimi Mi Sisa Utopu Ngebo, ^{▼▼Nimi Mi Sisa Utopu Ngebo Yesusda, Allah er Mi Sisa kurur dinin, er tuai mutu yau taruda, nimi urasin utopu daudi, er kange tenena cap, er nong cap, er putaramu keca cap yumada, nun kurameptopu kuramu, dinino, mali keca tenpu peda men kuramu. Ukupra kuramunge tep nengeda, Nimi Mi Sisa Utopu Ngebo, penupe. Yesus er pedi, er pe teppu, “Neda, Nimi Mi Sisa Utopu Ngebo kunune,” peramu (Lukas 18:31). Erda, nimi tuai nesala yuma tep, nimi Lyemna Deiyo Ngebo kurura tep, er pedi, er tepapu aupu pepu. Tonda lap pena upu nomor 22 dirume.} ne puto deiki di, ‘Tuai nesala sun mali kunge keca yuma gum kupra deipsetue,’ tenepkuneruma tep, nedi ameiyal semu ngebo tep aupu pepkune,” pepu. 11 Upepudi, ameiyal semu ngebo tep aupu pepu. “Kanda, tekromemdi kan ason dopra, kan ati tamupra berume pepkene,” pepu. 12 Upepu pangeda, adipapu ameiyal semu ngebo tekrapudi, er ason dopra, awekmai neng yuma sun adinmaipapu, ati pum di gupra bura beu. Yesus ukupka deiki di awekmai neng yuma, uo tenepra lolomaidi, Allah er si eremai. Tonda, “Akupmar keca utopu keca ton men diramupunge kupmare,” pepra mali penmai.

Yesusdi ‘Angebo ne pel donkamner’ tenen, tenpu ngebo er si Lewi dopropu upu

(Matius 9:9-13; Lukas 5:27-32)

13 Yesus Kapernaum mutu tapu di, ka di tamupra, Galilea mokon damai banmau. Abanmau taruda, nimi denge pio weika di bulupra, er damai yaipa, Yesusdi aneng tep aupu peteremau. Peterepu dingeda, ka di banmauanen, er banmau bisi damaida, Alpeus er mi Lewi ton epu. 14 Roma mutu nengdi amutu yuma taleramya tep, amutu nengdi sun Roma mutu ila nimi deiyo neng tep co bo bulupra karerami. Lewida, Roma mutu neng karena tep, amutu nengdi co bo bulupra kareramipa, akati deriramnga ati, akati pum bukmaupane, Yesus yaudi epu. Epudi, Lewi tep, “Kanda ne melipra domyaneo,” pepupa, erdi adipapu tekrapudi, Yesus melipra dombeu. 15 Banmareiyanen, Lewi er ati sisa wekroreidi, sun cap, Yesus erdi wepra dopropu neng cap, amutu taleami neng, Roma mutu neng tep, co bo bulupra karerami neng ton cap weika di weki. Tonda, amutu kurami nengdi, ‘Anengda, mali-mali kununge,’ tenerami neng cap, tapakra wekidi, kikiman jen jenmai. Akurami neng, utopu mali kurami nengda, ‘Yesus er upu gekepkamep’ tenen, Yesus cap domembaramya tep, Lewi er ati wekra kikiman jen jenmai.

16 Jenmaipane, Musa sekeiamu upu peteremami neng, Farisi ^{▼▼Farisi nengda, Yahudi yala nesala, sun deiyo neng kuramidi, agama pel dona deiyo neng kurami. Tonda Allah upu ila kael neng kuramidi aupu peteremami dinin, Yesus tep teka men tenerami. Tonda lap pena upu nomor 10 dinkurume.} nengda, co bo bulupra derirami neng cap, mali-mali kurami neng cap, Yesus cap, kikiman jen jenmaiya epi dingeda, Yesus er melimna neng tep asipetepi. “Yesusda, co bo bulupra derirami neng cap, mali-mali kunge neng cap, kikiman jenmarada, warya tep do?” pepra wenepi. 17 Upepra wenepipa, Yesus aupu gekepudi, aneng tep domon upu ton pepu. “Pu jenmarepane, ange tenena gum di, tali kange doupra kunge nengda, ‘Dokter kwetena ngebo dan do?’ tenen, men enunge. Agum dinin, pu jenmare nengpu, ‘Jenada nun songe,’ tenepmengedi, dokter kwetena ngebo tep putaprepa, ‘Uo, nun ton melipsetu ngeboda dan do?’ tenen, anesaladi kwetena ngebo dokter tep enunge.

Ange utopu, yambul kwiryepu kuramenge dinin, sun dipru neitamai mali keca akwapmarepapu, ange tenena gum di, ‘Nunda telep neng kunupe,’ tenengedi, kunge nesala tep nengeda, nedi ‘Ato neng dopra lyepkamne’ tenen, men yasi. Dinino, sun mali kuramengedi, ‘Uo, angeda mali kunupe. Ware ngebodi melipsetu do?’ tenengedi, mali kange doupra kunge nesalada, ‘Anesala dopra, lyepkamne’ tenen, yasi,” Yesusdi pepu.

Allah gispal dona tep, jen jena gum di, si tepra Allah mororami keca tep pepi upu

(Matius 9:14-17; Lukas 5:33-38)

18 Yohanes Pembaptis erdi peteremamu upu gekeramidi, melipra embarami neng cap, sun Farisi neng capdi, sun mali kuramne keca tep, ‘Allah moropkup’ tenen, jen jena gum di, si tepra Allah moronmai. Sun ukupra moronmaiya tep, yuk nengda, Yesus damai yaidi asipetepi. “Yohanes er upu gekengedi melipra embange neng cap, Farisi neng, sun upu pepnepa gekepra embange neng cap, aneng yumadi, Allah gispal dona tep, jen jena gum di, si tepra Allah moronunge. Sun anengda ukunung dinin, kan nyapuda, warya tep akungetopu men kunung do?” pepra asipetepidi wenepi.

19 Asipetepidi, wenepi pangeda, Yesusdi aneng tep tamupra domona upu pepu. “Ner don ngebo dopkure taruda, er kayapu cap, er melimna neng capda, kalemna keca kalepra kikiman men jenung do? Gume, sun kabo ner don taruda, kange deipmanunga cadi, kalepra kikiman jenunge. Ange utopu, neda ner dona deiyo ngebo utopu kununa tep, ne nyapuda kange mun kurepa, jen si tepra men kununge. 20 Dinino, yu nengdi ne yana talepra gipdaro benkamneng taruda, ne nyapu sun kange ikin kuprepa, jen jena gum di, si tepra kunkamenge,” Yesusdi ayana asimai neng tep pepu.

21 Aupu pepu dingeda, Yesusdi, Allah upu sekeiaminge tupa teleppu kurur dinin, ne peteremne keca cap, ne kune keca cap deiki di, ‘Kange tenena ukupunge kael kemkameng’ tenen, aupu pepu. Tonda, sun Farisi nengda, sun apu yapudi sun pe kange di teneraminge cap, Allah upu cap tali wisipra peteremamipa, gekerami mali upuda, ‘Mali tenenkameng’ tenen, Yesusdi awekmai neng yuma tep, ukupmanto upu butene pepu. Yesusdi pepu upuda ake.

“Opkal pumun nge bon dakre pangeda, ukupu opkal me men kuramenge nge di, bon dakamnyai deipra men winunge. Pumun opkal bon dakamyai, ukupu opkal palepra wiptenge dinin, me kupra ketengai deipmengepa, kalapredi, ukupu opkal metek kupre pangeda, awipmangai, weika di ton cap gwelenkamre. Ukupu opkal di pumun opkal bon dakamyai deipra winada mali,” Yesusdi pepu.

22 Tonda adomon upu ton pepu. “Ange utopu, nesaladi domba bol dopra, potong lyektapmengedi, dana-dana tara yuma wipmengopda, apumbonda anggur me gwepra dikdongopra derinunge. Ukununga tep, nimidi ukupu purupra gwerameng anggur meda, pumun taru keteneipi domba bol pumbon dikdongopra men derinunge. Ukupu anggur me gwepra, pumun domba bol pumbon dikdongoptenge dinin, ukupu anggur me puto di neprepa, domba bol bongopredi, me embarure. Bongopredi embaryopda, anggur me cap, domba bol cap, mali kupredi gum kurure. Ange tep nengeda, ukupu anggur meda gwepra, ukupu domba bol pumbonpu dikdongonunge.” Yesusdi pepu.

Aupu pepkada, sun Farisi neng, sun apu yapudi sun pe kange di tenepinge cap, Allah upu cap tali wisipra peteremamipa, gekeramidi, ‘Sun Farisi nengdi peteremami upuda, mali tenenkameng’ tenen, Yesusdi awekmai neng yuma tep, aupu ukupmanto upu butene pepu.

Yesusdi, “Allah gispal dona tep, pel dona gum di, beipye peingna tumi deiki kun kecada, ‘Ange telepe, ange mali,’ pena deiyo ngeboda, ne pua,” pepu upu

(Matius 12:1-14; Lukas 6:1-11)

23 Tenpu tumida, Yesus cap, er nyapu cap, yuk neng jagung wa peiamya neitamai embanmai. Ataruda, sun jen putapupa, er nyapudi jagung dakra embek jepbanmai. Sun wai dam embanmai tumida, tali tumi gum dinin, sun Yahudi yala nesala yuma, Allah er gispal dona tep, pel dona gum dipapu, beipye peingna tumi deiki di, Yesus cap, er nyapu cap embanmaidi, jagung embek dakra jenmai. 24 Sun jagung jepbanmai tumida, ada Yahudi yala nengdi Allah gispal dona tep, beipye peingami tumi di jepembanmai. Yakung embek dakra jepbanmaipa, Farisi neng epidi, ‘Wenepkup’ tenen, Yesus tep asipetepi. “Kan nyapudi jagung embek dakra jenmangada, ^{▼▼Yakung embek dakra jenmai ngeda, Allah er kangeda, ‘Angeda tek sisi pel dona gum tep, telepe pua,’ teneramu. Dinin, sun Farisi nengdi, Musa sekeiamu upu akamupane, sun pedipapu teneraminge weika di tapakra peteremamya deiki di, yuk nesala sun nong deiki ikin keca weik derirami. Atep Farisi nengdi, “Yakung du dakra embek jena peda, pel utopu kurure,” perami.} warya tep do? Musa sekeiamu upu neitamaida, ‘Allah gispal dona tep, beipye peingne tumi, Sabat tumida, wai dam kirbana meme,’ pepra sekeiamseue. Musadi upepra sekeiamseu dinin, kan nyapudi jagung embek dakra jenmangada, pel doramengtopu kunmanga cadi, ukunmanga deiki di, Allah upu yaniptapmange. Akunmange ngeda, warya tep do?” pepra, Farisi nengdi asipetepra wenepi.

25 Upepra wenepipa, Yesusdi tamupra Farisi neng tep aupu pepu. “Ne nyapu, sun akunmanga utopu, Allah upu buku Samuel neitamai kwamu ngeda, peramrum dinin, moupra men kael keprum do? Pumun taru kuramu ngebo Raja Daud cap, er melipra kikiman embarami neng cap, jen pio putapupa, kupi ngeda, buku neitamai peramrum dinin, konum luprorum do? 26 Sun kupi kecada, ake. Allah karena pel tep ila deiyo ngebo, ^{▼▼Allah karena deiyo neng, Allah er si eremna ati pumbon pel dorami. Sun ila deiyo ngeboLap pena upu nomor 14 dinkurume.} Abiyatar kuramu taru neitamai, Yahudi yala nengdi, ‘Nun pel doramepyanen, doronup kecada, tek sisi Allahdi kareserepa doronupe. Angeda pio tenenkamep’ tenen, jen keca roti 12 dapra, Allah karena tep, ke ati opkal bol dopra deiami ati neitamai derirami. Aroti kwanengda, Musadi upepra sekeiamutopu, Allah karena deiyo neng dipu jerami. Yuk neng ton men jerami.

Aroti kwanengda, mem keca tep, yuk tali nengda men jerami. Jen keca rotida, Allah karena ati pumbon dapra deipmaipa, Daud jen putapupa, dopra jepu. Tonda, er cap kikiman embanmai neng tep, bokra karepupa, sun ton jepi. Daud cap, er melimna neng cap, roti dopra jepi ngeda, Allahdi aneng tep, ‘Mali kupmange,’ men tenepu. ‘Angeda telepe pua,’ tenepu.” Yesusdi Farisi neng tep pepu.

27 Yesusdi Farisi neng tep, aupu konum pepu dingeda, aupu ton cap pepu. “Allahdi nimi beipye peingna tep, Sabat tumi wepra deiamu ngeda, ada nesala yuma sun beipye peikmengedi, sun kange tenenange cap, sun dipru cap, sun nong cap, ‘Telep kupra kupkamenge’ tenen, Sabat tumi wepra deiamu. ‘Nimi ikin kunkamre’ tenen, Sabat tumi men wepra deiamu. Ada nimi dipru kwa dimna tep, Sabat tumi wepra deiamu.

28 Ange tep nengeda, neda Nimi Mi Sisa Utopu Ngebo kununa cadi, Sabat tumi deiki kun kecada, ‘Ange telepe, ange mali’ tenen, bokra derina deiyo ngebo ne pua, nedi pepmasene.” Yesusdi pepu.