Mar 3 | XteSC | STEP | Yuk taruda, Yesusdi Yahudi yala neng, Allah upu peteremami ati pumbon wekra kunmau taruda, buru kwaneamu ngebo ton akati pum kunmau.

Mark 3

Yesusdi buru kwaneamu ngebo kwetepu upu

1 Yuk taruda, Yesusdi Yahudi yala neng, Allah upu peteremami ati pumbon wekra kunmau taruda, buru kwaneamu ngebo ton akati pum kunmau. 2 Ataruda, Farisi nengdi, ‘Yesus mali kuptu pangeda, nundi, “Er konum mali kupmare,” peptepe,’ tenepidi, Yesus tep pio dipdongopra kalengmai. Kalengmaiya tep, Yesusdi nun Allah gispal dona tep, pel dona gum di beipye peingna tep, Sabat tumi deiki di, ‘Buru kwaneamu ngebo kwetepkur do?’ tenen, pio dipdongopra kalengmai. 3 Kalengmaipane, Yesusdi buru kwaneamu ngebo tep, pepu. “Abukmang neng dinmakenga, urasinai di tekroyo,” pepu. 4 Upepu taru, tekrou pangeda, Yesusdi sun Farisi neng tep asipetepu. “Musa sekeiamseu upuda, Sabat tumi deiki di ware keca kuptepe do? Nun kuptepe kecada, mali kupra kuna do, telep kupra kuna do? Tonda, ‘Nimi depnung’ tenen, lyepra derinada, telep do, nimi pona telep do?” pepra asipetepu. Upepra asipetepu dinin, sun Farisi nengda, upu pena gum di tali dimpepra bukmai.

5 Sun tali dimpepra dabukmaipane, yu tenepra, sun dipru pio gat weik kupka tep, Yesusdi, uo tenen, pio mali kange doupra, yu di asuru dipu dipra embeu. Ukupudi, buru kwaneamu ngebo tep, upepu. “Kanda buru bekrap karepneo,” pepu. Upepu pangeda, buru kwaneamu ngebodi, er buru bepekra karepupnen, adipapu er buru telep kupupa, buru tepra deipu. 6 Sun Yahudi yala neng, sun Allah gispal dona tep, beipye peingna tumi deiki di, Yesusdi angebo kwetepka tep, Farisi nengda, yu kupupa, ^{▼▼yu kupu ngeda – Allah er kangeda, ‘Allah gispal dona tep, beipye peingna tumi deiki nimi kwetena peda, tek sisi pel dona gum tep, ukumumnya deiki di ne si men yaninerume. Angeda, telep pua,’ tenerur dinin, sun Farisi nengdi, yu kupu ngeda, Musa sekeiamu upu akwamupane, sun pe kange dipapu teneraminge weika di tapakra peteremamya deiki di, yuk nesala sun nong deiki ikin keca weik derirami. Atep sun Farisi nengdi, “Nimi kwetena peda, pel utopu keca kurure,” pepra peterami. Atep, Yesusdi sun Farisi neng tep yu kupupa, wenepu.} ‘Yesus ware kupra popkamep do?’ tenen, upu sisingbenmai. Upu talerbenmaiyada, nimi ila deiyo ngebo Raja Herodes tep, kange deiami neng cap, Farisi neng cap, upu sisingbenmai.

Nimi denge pio weika di, ‘Yesus ware kupkur do?’ tenen, dombei upu

(Matius 12:15-16; Lukas 6:17-19)

7 Yesusdi buru kwaneamu ngebo konum kwetepu dingeda, Yesus cap, Yesusdi wepra dopropu neng cap, Galilea mokon pirman bei. Bei pangeda, Galilea tara neitamai kurami nesala denge pio weika di amenda diryai. 8 Sunda, Yesus er pel doramunge gekeramya tep, amutu-mutu dana-dana kurami nesala yumadi bulupra yai. Sun yai mutu sida, Yerusalem ati arum domyai kurami nesala cap, uda Yudea tara cap, Idumea tara cap, Yordan me goupra ortara cap, uda, Tirus mutu cap, Sidon mutu cap, amutu-mutu neitamai kurami nesala yumadi yai. 9 Yaipa, Yesusdi, ‘Nimi weik dekdanung’ tenen, er nyapu tep, “Metek gapung co ketenepra mokon deiki deipneso,” pepu.

10 Akupu ngeda, pu jeramu nesala weika di konum kweteramnga tep, ataruda pu jeramu nesaladi, ‘Yesus er nong ton taleptepepa, kwetepsetue’ tenen, denge weika di bulupra wengyaidi, nimi weik tep, meneng deiki yanidanmaidi dengdanmai. 11 Ataruda, nesala taleamne isokdi yana, Yesus epyopda, isokdi sun taleami nesala tu deiki dopra siptapnepa, ila di ngolokidi, Yesus tep aupu pepi. “Kanda Allah er Mi Sisa kurume,” pepi. 12 Upepi dinino, Yesusdi aisok-isok yuma tep, “Ne kunun nge yuma tep sundi, yuk neng gekenai pio men lap perbenkamrume,” pepra ila di aisok yuma tep upu sekrou.

Yesusdi er nyapu 12 neng tep, wepra deipu upu

(Matius 10:2-4; Lukas 6:14-16; Rasul 1:13)

13 Yesusdi tenpu mutu dup welepudi, ‘Anengpu sundi ne pel donkamenge,’ tenemu nengpu kongpepupa, bulupra amutu dup bena welepi. 14 ‘Anengdi Allah upu dopra peterembenkameng’ tenen, awelepi neng kan-kan di, 12 neng wepra deipu. Wepra deipu nengda, ‘Ne cap, sun cap, kikiman dukdongopra kuramepyanen, nedi aneng dopra yuk mutu dokotepnepa, ne upu dopra mutu dana-dana peterembenkameng’ tenen, wepra deipu. 15 Tonda, ‘Nesala dipru neitamai taleami isok yuma dopra, dokotepkameng’ tenen, er puto weika di aneng tep karepu. 16 Yesusdi wepra deipu 12 neng sun sida, ake. Tenpu ngeboda, Simon perami dinin, amenda taruda, Yesusdi angebo tep si punupra Peterus si pepra karepu.

17 Ton ngeboda, Zebedeus er nyapu butene Yohanes cap, er weit Yakobus cap dinin, Yesusdi aneng tep, Yahudi upu deiki di, ‘Boanerges,’ peramu. Boanerges pepunge deiyoda, ada sun upu deikida, kulman er nyapu tep, pepu. Ada, kulman ila di perenglang peramra utopu, aneng butene upu ila di peramrei atep, abutene nengdi, tenimterena gum di upu puto di pererung neng tep peramu. 18 Tonda yuk neng wepu ngeda, Anderias cap, Pilipus cap, Bartolomeus cap, Matius cap, Tomas cap, Alpeus er mi Yakobus cap, Tadeus cap, Simon perami ngebo dinin, er si ton Patriot perami ngebo cap, wepra deipu. 19 Tonda, Yudas Iskariot erda, Yesus popkamaiya tep, nambenkamu ngebo wepra deipu. Amul dam di dutara neng 12 yumada, Yesusdi wepra deipu.

Musa sekeiamu upu peteremna deiyo nengdi, “Isok sun deiyo ngebo er si Belesebuldi Yesus talerure,” pepi upu

(Matius 12:25-29; Lukas 11:17-22)

20 Yesusdi adua belas (12) neng konum wepra deipkopda, aneng yuma bulupra tenpu ati wengbei. Wengbei taruda, nimi denge pio weika di bulupra sun damai yaidi, meneng deiki darapdana dekdanmaiya tep, Yesus cap, er nyapu cap, pel weik donmaiya tep, sun jen men jepmanto kupi. 21 Ukunmai taruda, Yesus er nai, er nin sisa cap, er weit yapu sisa cap gekepidi, ‘Yesusda mutana ngebo utopu kunmara tep, er talepkamep’ tenen, yai. 22 Tonda, Musa sekeiamseu upu peteremna deiyo neng, Yerusalem mutu kurami dinin, Galilea mutu kwereryaidi, yuk neng tep aupu penmai. “Isok yuma sun ila deiyo ngebo er si Kain Jen Ngebo, er si Belesebul, erdi Yesus talerepa pel dorure. Isok yuma sun deiyo ngebo Belesebul puto deiki di, Yesusda isok-isok yuma enepra dokoterure,” penmai. 23 Aupu penmaiya tep, Yesusdi aneng kongpepupa, yai pangeda, Yesus domon upu deiki di pepu.

Kain Jen Ngebodi er nyapu sisa tep, ware kupra enepra dokoteptu do? Sunda tali upu penmarume. Isok-isok enepra dokotenunada, Allah er Lek Sambala er puto deiki dipapu enepra dokotenune. Ware pel do yuma, Kain Jen Ngebo er puto deiki di men pel donune. Atep ukupmanto upu deiki di ton pepkusene.

24 Tenpu mutu neitamai kuramenge neng podange pangeda, tenpu ngebodi ware kupra taleptu do? Tenpaipu men kutenge, yuk-yuk bendoptenge. 25 Tonda ange utopu, tenpu bukam ati kuramtenge neng podatenge pangeda, ware kupra kikiman kuptenge do? Konum yuk-yuk bendoptenge. 26 Apepman nge utopu, Kain Jen Ngebo cap, er nyapu sisa isok cap, podatengopda, sun puto pio men kuptue. Tonda, Kain Jen Ngebo er puto gum kuptue. Ange tep nengeda, isok enepra dokotenunada, Kain Jen Ngebo er puto deiki di men pel donune. Ange gum dinino, Allah er Lek Sambala er puto deiki dipapu isok enepra dokotenune. 27 Sun pepmarum ngeda pio men kupmanto.

Ware neng do yumada, bon tenpu er ati wekra, ‘Er keca upula dopropkup’ tenen, er ati wektenge dinin, ila puto ngebo menmena talepra, ateng men kouptengopda, er keca upula men doproptenge. Akati ila puto ngebo menmena ateng kouptenge teptoda, er keca upula dopra betenge. Gum dingeda, gume. Ange utopu, Kain Jen Ngebo erda, ila puto ngebo utopu kurura cadi, ila puto ngebo ton men yatudi, ateng men kouproptuopda, Kain Jen Ngebodi er mawa keca, anesala men doproptue. Yesusdi aneng tep pepu.

28 Yesusdi aupu ton cap pepu. “Sunda moupra gekepso. Aupuda pio tek sisi mambul upu pepkusene. Nimi yuma, sun mali teneramenge keca cap, mali kuramenge keca cap, uda Allah upu tep, yanipra peramenge upu cap, ayumada, taptengopda, Allahdi sun mali kun keca yuma gum kupra deipredi kaukepkamsere. 29 Dinino, ware neng do yumada, sun yumadi Allah er Lek Sambala tep, yanipra peramenge upuda, Allahdi ange gum kupra men deipkamre. Tonda, angeda pio men kaukepkamsere. Aupu penge ngeda, men lyepmanto keca kununge. Ange utopu, neda, Allah er Lek Sambala puto deiki dipapu pel donun dinin, sundi ne tep, ‘Erda Kain Jen Ngebo puto deiki di pel dorure,’ peneruma tep, Allahdi akeca men kaukemkamsere. Ange pio tenenkamsera cadi, amendada sun tep wenepra poptapkamsere,” Yesusdi pepu. 30 Yesusdi aupu peramngada, Musa sekeiamu upu peteremna deiyo nengdi, “Yesusda, Kain Jen Ngebo talepka puto deiki di pel dorure,” penmaiya tep, pepu.

Yesusdi, “Nanin utopu nerapu cap, ne weit yapu utopu neng capda, sun akonuma,” pepu upu

(Matius 12:46-50; Lukas 8:19-21)

31 Yesus er nin sisa cap, er weit yapu sisa capdi, ‘Yesusda mutana ngebo utopu kunmara tep, dopra benkamep’ tenen, Yesus bukmau ati yai. Ati pirman tengyaidi, ‘Yuk nengdi Yesus bena peipkununga’ tenen, peipi. 32 Yesus neitamai bukmaupa, yuk nesala yuma weika di bukra ongomgenem pepmai nengdi, Yesus tep pepi. “Kan nin cap, kan weit yapu cap, ati pirman tara tengyanmangdi enmakenge,” pepi.

33 Upepi pangeda, Yesusdi, ‘Ne pepne upuda, sun moupra tenenkameng’ tenen, aneng tep asipetepu. “Nanin yapu cap, ne weit yapu capda, ware neng do?” pepra asipetepu. 34 Upepu dingeda, Yesusdi er damai bukra ongomgenem pepmai neng tep, tamupra asuru dana-dana dipterepudi, aupu pepu. “Nanin yapu cap, ne weit yapu capda, sun konum akurume. 35 Ware neng do yuma, Allahdi, ‘Ukunkamenge,’ teneretopu pel doramenge nesala yumada, ne weit yapu cap, ne weit nerapu cap, nanin yapu cap utopu nesala kununge,” Yesusdi pepu.