Mar 4 | XteSC | STEP | Yuk taruda, Yesusdi Galilea mokon pirman er upu peteremau. Peteremaupa, er damai yana wekmaidi gekenmai nengda, gung pio weik bulupra yanmaiya tep, Yesusda mokon kupkupai, gapung co deiki bukmaudi, amokon pirmanai wekmai nesala tep, er upu peteremau.

Mark 4

Yesus ukupmanto upu deiki di, tenpu ngebodi yal keca gwekbanmaua tep, pepu upu

(Matius 13:1-23; Lukas 8:4-15)

1 Yuk taruda, Yesusdi Galilea mokon pirman er upu peteremau. Peteremaupa, er damai yana wekmaidi gekenmai nengda, gung pio weik bulupra yanmaiya tep, Yesusda mokon kupkupai, gapung co deiki bukmaudi, amokon pirmanai wekmai nesala tep, er upu peteremau. 2 Aupu yuma weika di peteremau. Apeteremau upu neitamai di, ‘Ila mambul keca kael kepkameng’ tenen, ukupmanto upu deiki di pepu.

3 Yesusdi awekmai neng tep upepu. “Sun yuma gekepso, tenpu tumi nimi tenpu di wa pepra, yal keca gwekbanmau. 4 Er yal keca dopra gwekbanmaupane, ton yal kecada er gwekbanmau bisai sakmau. Saka kupmaupane, tali ma yaidi bupra jepropi. 5 Ton yal kecada gwekbanmaupane, gel deiki di mirin tu metekanun kwamngai saku. Sakudi dakuamnganen, mirin tu metekanunpu kwamnga cadi, menmena paku. 6 Paku dinino, yaten tuai telep kupra men kwerepka tep, keteng yana dopupa, keteng bupu di, menmena gelal sepra kolupropu.

7 Atarupu dinin, ton yal kecada gwekbanmaupane, tepmeng kweiyong-kweiyong kan-kan neitamai di saka bolokmau dinin, tepmeng kweiyong-kweiyong kan-kan neitamai di saka bolokmau dinin, tepmeng kweiyong-kweiyong erepropudi, aboloku keca koupdongopudi, wein kepdongopupa, nene peramu. Nene peramnga cadi, du men mouramu. 8 Angeda men mouramu dinin, yal keca ton gwekbanmau ngeda, mirin tu telepai saku. Mirin tu deiki saku ngeda, bongopra nepudi, du mouramu. Yal keca du tenpu-tenpu saku dinin, du mouramngada, ton ngeda 30 moupu, ton ngeda 60 moupu, ton ngeda 100 moupu.”

9 Yesusdi ukupmanto upu pepu dingeda, aupu ton dukdongopra pepu. “Amul akwapmaserepa, aupu nong neitamainge gekepmanto nengda, moupra gekenkurume,” pepu. ^{▼▼Yesusdi, “Amul akwapmaser neng aupu nong neitamainge gekepmanto neng gekenkurume,” pepu ngeda, deiyo ake. Ada ton nengda, dipru gat neng kuramya cadi, ‘Yesus perur upu nun songe,’ tenerami dinin, ton nengda, dipru boun neng kuramya tep, Yesus peramu upu yuma kange deipra gekerami.}

10 Aupu yuma konum pepkopda, amenda taru Yesus er yuk kunmaupane, Yesusdi er wepra dopropu neng, 12 nengdi, er domon upu pepmaua tep, ‘Aupu nong dan do?’ tenen, asipetepi. 11 Asipetepipa, Yesusdi aneng tep, ukupmanto upu pepmaunge nongda, katuai lap pepu. Yesusdi upepu.

“Allahdi nesala yuma talepra kunkamre kecada, pumun taru men lap peramu dinin, ukutaru sunda ne upu gekepra talenerum neng kuruma cadi, aupu neitamainge kael kemna deiyo keca konum karepsene. Ada Allah upu lap peramu ngebo, nabi Yesaya peiamutopu kurume.
12 ‘Sun asuru di, pio moupra dinkameng dinin, deiyo kecada telep kupra men tenenkamenge. Tonda, amul deiki di pio tupa gekenkameng dinin, nong neitamai ngeda, telep kupra men gekenkamenge. Allah upu gekepra men dombanung dinin, gekeptengetoda, sun dipru mali teneramenge cap, mali kuramenge keca cap tapra, amnyo karikrotenge teptoda, Allahdi sun mali keca yuma gum kupra deiptudi, lyeptue.’ Yesayadi sekamu. (Yesaya 8:16)

Yesayadi peramutopu, ‘Anengda, nun song’ tenen, Allah upu moupra men gekenunga tep, sun gekengaida jenek kupra men penedi, domon upu deikipu penune. Atep, Yesaya er sekeiamu upu pepmasene,” Yesusdi pepu. 13 Aupu pepu dingeda, Yesusdi er nyapu 12 neng tep pepu. “Nedi ukupmanto upu deiki, yal keca gwekbanmau upu pepmanu ngeda, nong neitamainge men gekepmarum do? Ukupmanto upu pepmanua men gekepmaruma tep, amenda taru domona upu deiki di penkamnenge peda, ware kupra gekenkamrum do? Atep nengeda, ne domon upu pepmanuada, nong katuai lap pepkusene,” pepu.

14 Yesusdi pepu, “Uda, yal keca gwekbanmaue penmanuada, Allah upu peteramenge nge tep, pepmanue. 15 Yal keca gwekbanmaupane, bisai sakmau pepmanu ngeda, ada Allah upu peteremangepa, gekenung nesala tep, pepmanue. Anesalada, Allah upu peterepmengepa, gekepmenge taruda, adipapu Kain Jen Ngebodi yana, sun gekenmange upu dalupra dororure. 16 Ton nesalada, yal keca gel deiki sakmautopu, Allah upu peterepmengepa, gekepmengedi kange deipra, adipapu doronunge. 17 Doronung dinin, yal keca yaten tuai telep kupra men kwerepmaudi, menmena kolupka utopu, anengda, Allah upu moupra gekena gum di, men dorongedi, menmena yamdongonunge. Ada, teka tenepmenga tep, yuk nengdi yu kuprepa, ikin keca sun nong deiki deirenge pangeda, anengdi menmena yamdongonunge.

18 Ton nesalada, Allah upu gekepra doronung dinin, yal keca tepmeng kweiyong-kweiyong kan-kan sakmaunge utopu kununge. 19 Ada, tuai mutu neitamai di, ‘Akeca kuptenya deiki di telep kuptene do?’ tenen, dipru butenemrepa tenimdana deiki di tamdongonunge. Tonda, ‘Bunga weika di doproptenetoda, teleppu kutene,’ pepra, sundi sun pe tep, tali pertamdanunge. Tonda, akeca-keca yala-yala yuma weik putarya deiki di Allah upu tamdongonunge. Ukungada, tepmeng kweiyong-kweiyong di aboloku telep yal keca koupdongopudi, wein kepdongopupa, nene peramutopu, akeca-keca yuma pio putarepa teneramenga deiki di luprongepa, Allah upu gekeramenge ngeda, du telep kupra men mourure. Ada, Allah er upu telep kupra men gekepmengedi, pio talepra men dombanunge.

20 Anengda ukunung dinin, yuk nesalada, yal keca gwekbanmaupane, mirin tuai sakmaupa pakra, du weika di moupudi ton ngeda 30, ton 60, ton 100 mouputopu, sunda, Allah upu moupra gekepmengedi, teka tenepra, pio kange deipra dororamenge nesalada, du weika di moupunge utopu, dumsisipu kungedi, Allah er pel weika di tupa donkamenge,” Yesusdi pepu

Yesusdi, “Ne upuda inimna gum di, katuai dipapu peteremkamrume,” pepu upu.

21 Yesusdi er nyapu 12 neng tep pepu.

Sunda weica uprapmumdi ati pumbon dekarum ngeda, ada ‘Kau pumbon singidongonkamepe,’ tenerum do? Tonda ‘Aweicada ason dangapra, singidongonkamep’ tenen, upra yakarum do? Angeda gume. Weica upropmumdi, dela taramaipu derinkamrume. 22 Dirin weik kuprepa, ati bo kwamre keca yuma, ‘Katuai dinkameng’ tenen, nesaladi upna upra katuai deriramengtopu, ne peda utopu pel donune. Ada, Allahdi nesala weika di lyepredi talenkamre kecada, pumun taru jenek kemna gum di iniamupa, nesala yuma moupra men kael kemami dinin, ukutaruda, nedi katuaipu lap pepra peteremnune. Tonda, nimi dipruai inimenge kecada, ne peteremnuna deiki di, katuai kupkamre.

Dinino, Allahdi akeca iniamupa, nesala moupra tenepra men kael kemenge keca yumada, katuai kuprepa nesala yuma kael kepkamenge. Ada, upna dirin di ati bo kwamre keca katuai kuprepa, diramengtopu, ne peteremne keca cap, kunenge keca cap deiki di, Allahdi iniamupa nesala men tenerami ngeda, katuai kunkamre. 23 Ange tep nengeda, ne peteremsene upuda, tali amul deiki di men gekenkamrume. Ware neng do yuma, ne pesene upu ‘Moupra kael keptene’ tenen, putapre ngeboda, ne pepmasen upuda pio moupra gekenkamrume.

24 Ne upu peteremsenepa gekerumudi, ‘Deiyo ake’ tenen, moupra talepmumdi kunkamrume. Ada tali tep gume. Sunda, ‘Aupu tek sisi kael kepkup’ tenen, pe deipra, kael kempetemumtopu, Allahdi kael kemna deiyo keca kareserepa, kael kemkamrume. Dinino, dabal tenerumudi, sun meteka dipu kael kemteremum pangeda, Allahdi kael kemna deiyo keca meteka dipu kareserepa, meteka dipu kael kemkamrume. Ton ngeda, ‘Pio kael kepkup’ tenen, sun weika di pe deipra, kael kemum pangeda, Allahdi kael kemna deiyo keca weika di melipra kareserepa, nong neitamainge yuma weika di kael kemkamrume.

25 Allah upu gekena tep, Allahdi kael kemna deiyo keca kareserepa, moupra gekengedi tamna gum di, angepu talepra kunge nengda, Allahdi kael kemna deiyo keca ton cap weika di tapakra kareserepa, weika di kael kepbankamenge. Dinino, ware neng do yuma, dabale tep, amul deiki gekertamengedi, Allah upu moupra men talepra kunge nengda, sun men di yambulpu kael keaminge peda, doproprepa gum kupkamre. Yesusdi pepu.

Yesus domon upu deiki di, yal keca pakra nepunge tep, pepu upu

26 Yesusdi er nyapu tep, “Sunda, ‘Allahdi nesala weike, sun dipru talepra kunkamrada, ukupra akurure, tenepkurum’ tenen, domon upu ton cap pepkusene,” pepu. Yesusdi pepu upuda, ake.

27 “Yal keca konum tu deiki sakamredi, lukunda pe, komuni pe, tu pumbonpu dakuamyanen, ayal kecada er yuk pakra nerure. Yal keca gwekamre ngeboda, mapmare taru pe, bukmare taru pe, pel ton men dorya peda, yal kecada er yuk pakra nerure. Yal keca gwengna deiyo ngebodi, yal keca pakra nepmaryada, ‘Deiyo ake’ tenen, men kael kemrur dinin, yal keca er yuk pakra welerure. 28 Telep tu deiki di yal keca telep kupra bongopredi, du weika di mouramre. Menmenada, du pakredi nong nepbaramyanen, jagung getepredi, moupyopda, du ketenemamre. 29 Du ketenepredi, konum wisipyopda, engrure. Ekyopda, awa deiyo ngebodi ya sekra dangrure. Ada, ekmarenge yuma dakra derin taru konum kupyopda, erdi ya sekra dangrure,” Yesusdi pepu.

Yesus domon upu deiki di, pio metek co du dinin, ila di nepunge tep, pepu upu

(Matius 13:31-32; Lukas 13:18-19)

30 “Allahdi nesala weike, sun dipru talepredi kunkamre ngeda, ‘Betapra tenepkurum’ tenen, ukupmanto upu ton pepkusene,” Yesusdi pepu. 31 “Lyesa co du metek dinin, aco ila di nepredi weik kuramretopu, Allahdi nesala weike, sun dipru talenkamrada, pio weik kupbankamre. ^{▼▼Metek co du pepu domon upu nongda ake. Ada, Allahdi nesala weik sun dipru talenkamrada, gonga kemna taruda weik men kurur dinin, nimi tenpu-tenpu di, teka tenepbangopda, amenda taru teka tenenge nesalada, gung weik kupbankamenge. Tonda nimi ukupu teka tenepmenge taruda, sun kunge keca yambulanun ton urasin yuk kurura cadi, yuk nesala men dinunge. Dinino, amendada sun tenenge keca cap, sun kunge keca cap, pio yuk kuprepa, dumsisipu kupmengopda, nesala yuma epkamenge.} 32 Lyesa coda metek du di bolokmengepa, pakredi nepbaramyanen, ila di nepyopda, teru kwakrepa, ateru deikida, ma yala-yala yuma, sun kalai tep, bungyangedi manunge. Yuk coda metek dinin, acoda ila co nerure. Ange utopu, sundi ne upu dopra peteremrumupane, yuk neng ton metekanun teka tenenkameng dinin, anengdi ton, ban-ban yuma dapeterep embaramengepane, nesala weika di ton cap teka tenepmengedi, weik kupbankamenge,” Yesusdi pepu.

33 Aukupmanto upu peputopu, Yesusdi peteremamu taruda, domona upu weika di ton cap peterep embaramu. Sundi aupu gekepmanto kuramitopu, aupupu peterep baramu. 34 Nesala yuma tep nengeda, Yesusdi peteremamu taru yumada, domona upu deiki ton peteremamu dinin, erdi wepra deiamu neng, 12 neng cap, sun yuk kurami taruda, apeteremamunge yumada, jenek kupra lap pepra nong neitamainge peda peteremamu.

Mo cap, kulman cap, mungna cap kupupa, Yesus er nyapu kware kupu upu

(Matius 8:18, 23-27; Lukas 8:22-25)

35 Ataruda, Yesusdi Galilea mokon pirman pio peteremaupane, keteng wekrou pangeda, Yesusdi wepra deipu neng, er nyapu 12 neng tep pepu. “Nunda gapung co deiki bukra, mokon deiki bepedi, ortara mutu wengbenkupe,” pepu. 36 Upepudi, er abukra peteremau gapung co deikipu bukmaupane, er nyapu 12 neng peda, er damaipu wengbeiyopda, amokon pirman wekmai neng atapra, Yesus cap, er nyapu cap sunpu mokon deiki banmai. Tonda, yuk gapung co ton cap kikiman mokon deiki banmai.

37 Sun amokon deiki banmai taruda, pio banmaipane, ila mungna cap, kulman cap, mo cap pio weik kupudi, mokon ila di longteng-longteng penmaudi gapung co pumbon me wekupa, ikin di gapung dopra, mokon pumbon wekronmanto kunmau. 38 Ange yuma kunmau taruda, Yesusda, er nyapu bukmaiya amnyo tara, mana boun keca deiki giso erepra deiya mapmau. Yesus mapmaua tep, er nyapu 12 nengdi pepi. “Naio bukroyo,” pepra bukeipi. Ukupidi, sundi Yesus tep pepi. “Naio, nun mokon jepmanto kunmasere ngeda, mambul men tenepmaserem do?” pepi.

39 Upepipa, Yesus mapmaua bukra tekroudi, ila mungna mungmaunge cap, mokon ila di longteng-longteng penmaunge cap tep, “Dim pepo,” pepupa, adipapu pio dimpepu. 40 Akunmaunge yuma konum dimpepu pangeda, Yesusdi er nyapu 12 neng tep pepu. “Sun kwar weik kunmaserada, warya tep do? Sundi ne tep kapul teka men tenepmaneruma di do?” pepu. 41 Sun ila kwar weik kupupa, sun pepu asimdanmai. “Uo, Yesusda wareto ngebo kurur do? Mungna pe, mokon pe, er pepmar upu gekepmardi dimpepmare,” pepi.