Mar 5 | XteSC | STEP | Ila mungna cap, kulman cap, konum dimpepkopda, mokon deikipu banmaiyanen, Galilea mokon ortara Gerasa mutu bei.

Mark 5

Tenpu ngebo er dipruai taleamu isokda, Yesusdi dopra dokotepu upu

(Matius 8:28-34; Lukas 8:26-39)

1 Ila mungna cap, kulman cap, konum dimpepkopda, mokon deikipu banmaiyanen, Galilea mokon ortara Gerasa mutu bei. 2 Bei dingeda, Yesusda gapung co deiki di tuai tengbeu. Tengbeupa, isok taleamu ngebo tenpu, nimi peirami gel imir neitamai di guprapudi, Yesus damai yau. 3 Nimi peirami gel imir damaipu kuramu taruda, yuk nengdi ateng kourtereramipane, ataruda puto weik kwamnga tep, angeboda nimidi talepra ateng men koupmanto kurami. Ada besi keca rantai tapu peda men koupmanto kuramipa, tali lupra embaramu. 4 Yuk nengdi ataru-ataru yuma, er buru cap, er yane capda, gat keca, er si rantai tapu di koupmanpane, er puto di bulukra doramu. Tonda, yuk besi keca di, er yane koupdongomi kecada, copra dopu.

Nimi-nimi yumadi taler peterami dinin, sun puto metekpu kwamnga tep, angeboda men talepmanto kurami. 5 Angeboda, lukunda pe, keteng komuni pe, nimi peirami gel imir damai cap, mutu buma dana-dana cap, pio embaramudi, ila upu pepra ngolongamudi, gel dopra er pe meneng nongpu sengdaramudi podaramu.

6 Yesus mokon pirman tengbeu taruda, isok taleamu ngebo karenai di epkopda, Yesus damai sepdaro yau. Yaudi, Yesus er gispal dona tep, gutam tu dipdongopudi giso talepdongopu. 7 Yesusdi angebo taleamu isok tep, “Isoke kanda angebo er dipruai talepmumada gupra beo,” penmau taruda, angebo er dipruai taleamu isokdi, Yesus tep ila upu di lapsipu. 8 “Kanda ware kupkamserema tep, yanmaserem do? Yesus kanda, Allah er puto weik kuredi, yuk puto keca cap, si eremenge keca cap yuma bisirur Allahda, Allah er Mi Sisa kurume. Allah er si deiki di, ne tep, ‘Weika di men popkamkene,’ pepkunerume,” pepra aisok ila upu di Yesus tep moropu.

9 Upepu pangeda, Yesusdi aisok tep asipetepu. “Kan si dano,” pepra asipetepu. 10 Upepra asipetepupa, isokdi tamupra pepu. “Nunda gung weika di angebo er dipruai wekmupka tep, nun si men nukmanto kurura cadi, nun si tep Legion pesenunge,” pepu. ^{▼▼Legion si pepyada, deiyo ake. Roma mutu jen talen neng, sun ila gung sida Legion perami. Tenpu Legion neitamaida, nimi nukra 6.000 neng kurami. Aisok yumada, gung pio denge weika di angebo er dipru wekya cadi, “Nun si Legion,” pepi.} Tonda, ‘Aisokdi nimi peirami gel imir damai di, bura tara dokotepserur’ tenen, ‘Nun tep yapseo. Enepra men dokotepserume,’ pepra, Yesus tep weika di moronmai.

11 Yesus tep moronmai taruda, nimidi peirami bisam, gung pio weike amutu asi taram damai tu jenmai. 12 Bisamdi tu jepra akunmaiya tep, aisok yumadi Yesus tep moronmai. “Angebo dipru pumbon di enepra dokotepsemempa, akunmang bisam nong pumbonpu wektepe,” pepra moronmai. 13 Moronmaipane, Yesusdi, “Telepe, sun tenepmarumtopu, kupso,” pepupa, adipapu isok taleamu ngebo dipruai di guprapidi, bisam nong pumbon wengbei. Wengbei pangeda, abisam gung weike, 2.000 bisam kunmaiya cadi, amutu ase taramai di sepra kwererbanmaidi, mokon pumbon wengdongonmai. Wengdongonmai pangeda, abisam yuma mokon jepu.

14 Abisam peinmai nesaladi, akupmaunge yuma epidi nimi ati arum doramya neitamai cap, bisai cap, lap pepra embanmaipa, nimi weik gekepidi, ‘Akupmaunge epkamep’ tenen, Yesus damai diryai. 15 Yesus damai diryaidi, isok gung weike taleamipane, Yesusdi kweteipu ngebo, kange deipra opkal kepra bukmaupa epi. Epidi, kware kupupa, uo tenen, lolomai.

16 Men di akunmaiya epi nengdi, ukupu yanmai neng tep, angebo isok taleamipane, Yesusdi kweteipunge cap, bisam nong wekipa, mokon pumbon wekroinge cap, ayuma dukdongopra lap pepi. 17 Lap pepipa, aneng yuma gekepi dingeda, kware weik kupupa, ‘Yesusda nun mutu yuma tapra, yukai bendoptue’ tenen, Yesus tep moronmai. 18 Yesus ka di tamupra gapung co deiki bungbenkou taruda, isok taleamipane, Yesusdi kweteipu ngebodi, ‘Ne cap beteneme’ tenen, Yesus tep moropu. 19 Upepra moropu dinin, Yesusdi angebo tep pepu. “Gume, ka tamupra bemepedi, kan mutu neng cap, kan ati neng cap tep, Allahdi bicau tenepra pel weik dopmaker kecada, lap perbenkurume,” pepu. 20 Yesusdi upepu pangeda, angebodi Dekapolis mutu, ada 10 kota ati-ati doramya neitamai di, aupu yuma lap pepembaramupa, atara nesala yuma gekeramidi lolomami.

Yesusdi, yapi embaramu ner cap, depmau ner mi cap, kwetepu upu

(Matius 9:18-26; Lukas 8:41-56)

21 Yesus benmau bisipu, ka tamupra gapung co deiki yaudi, Galilea mokon atara yau. Yaupa, nimi gung weika di, Galilea mokon pirman, er damai bulupra kunmai. 22 Sun yuma Yesus cap akunmaipane, tenpu ngebo er si Yairus yau. Yairusda, Yahudi yala neng Allah upu peteremami ati, akati sun deiyo neng weik kurami dinin, er ton kuramu. Yairus yaudi, Yesus epu dingeda, ‘Yesus tep gispal dopkun’ tenen, Yesus yan damai gutam tu dipdongopudi, Yesus tep weika di moronmau. 23 “Naio, ne ner mi konum depmanto kunmanera tep, kandi er nong deiki yana kan buru deiptumdi kweteptume,” pepra moronmau.

24 Moronmaua tep, Yesus cap banmareipa, abulupra wekmai neng yuma cap, kikiman banmaidi, Yesus damai dana-dana yuma dekpepmaidi banmai. 25 Abanmai neng kan-kan neitamai di, pu jeramupa, keteng tamun 12 deiki di, er lang bon bisi yapi embaramu ner ton cap kikiman banmai. 26 Anerda, ‘Sun nimi kwetena nengdi kwetepnetenge’ tenen, kwetena neng damai weik embaramupane, sun kweteptereramya deiki di, pu weik ton cap tapakra jeramu. Akweteraminge tep, aner er taleamu keca yuma kareamupa, gum kupu dinin, men kwetepmanto kupupa, ikin pu ton cap tapakra tupa jeramu.

27 – 28 Anerda, Yesus pel doramunge gekepka tep, erdi utenepu. ‘Yesusda puto weik ngebo kurura cadi, er opkal tali beptenepa, kwetepnetue,’ tenepu. Utenepka tep, abanmai neng neitamai anerdi, Yesus er amnyo tara tengyaudi, er deiki kepmau opkal bepu. 29 Yesus er opkal bepu pangeda, adipapu aner er lang bon bisi yapi pio embaramu ngeda, dimpepupa, anerdi, ‘Ne ikin weik kuramneu kecada konum gum kupnere,’ tenepra kael kepu.

30 Yesus opkal bepmau taruda, adipapu Yesusdi, ‘Ne kweteramne putoda, yuk nesala sakrore’ tenen, kael kepu.

Utenepkopda, Yesusdi tamupra, ayakanmai nesala yuma dipra embanmau. Dipra embanmaudi asipetepu. “Ware ner, ware ngebodi ne opkal bepmaner do?” pepra asipetepu. 31 Asipetepupa, er upu gekepra, er cap embarami nengdi tamupra pepi. “Nesala weike kan damai dekpepmakengpa epmarem dinin, ‘Ware ner, ware ngebodi ne opkal bepmaner do?’ pepra asipetepmaseremada, warya tep do?” pepi. 32 Upepi dinino, Yesusdi, ‘Ware ngebodi ne opkal bepmaner do?’ tenen, tupa dipro embanmau.

33 Dipro embanmaupane, anerda Yesus kwetepmaunge konum kael kepmaua cadi, ‘Mambul pel dopmanere’ tenen, kware kupupa, mali kange douprapudi, Yesus er gispal dona tep, er yan damai gutam yana tu dipdongopudi, anerdi er kupmaunge yuma Yesus tep lap pepu. 34 Anerdi ange yuma lap pepupa, Yesusdi tamupra aner tep pepu. “Ne ka nero, kan teka tenepmanerema deiki di konum kwetepmakene. Kan kange mun kwamkeu ngeda konum kweteipmakena tep, kange deipra teleppu benkurume,” pepu.

35 Yesusdi aupu tupa penmau taruda, Yairus er ati damai dinin, yuk nengdi, Allah upu peteremami ati deiyo ngebo, Yairus tep kai yai. Kai yaidi, Yairus tep pepi. “Kan ner mida konum depmakera cadi, apeteremna ngebo tep, upu ton cap men penkurume. Dakwapye,” pepi. 36 Anengdi aupu pepipa, Yesus gekepu dinin, kaukeproudi, Yairus tep pepu. “Ikin kange doupra tenimtona gume. Ne tep teka tenepra tali kange doupra kunkurume,” pepu. 37 Upepudi, ayakanmai neng yuma tep, ‘Sun cap yanung’ tenen, upu sekdongopupa, sun acapu kunmai taruda, Yesus cap, Peterus cap, Yakobus cap, Yakobus er weit bo Yohanes cap, sunpu Yairus ati bei.

38 Yairus er ati konum beiyopda, akati damai kunmai neng, sun ila di engena cap, ngolokra mali pena cap, ila upu pepra koudana cap kunmaipa, Yesusdi epu. 39 Epudi, akati wekrouopda, mali penmaidi, koudanmai neng tep pepu. “Sun ila di mali penmarumdi, ngolokra koudanmarumada, warya tep do? Aner mida men depmare. Tali mapmare,” pepu.

40 Upepu dinin, awekmai nengdi Yesus tep autunmai. Autunmaipane, aweka engenmai neng yuma tep, Yesusdi bura tara konum dokotepkopda, aner mi er nai cap, er nin cap, Yesus cap, weneri neng er melipra barami neng cap, sunpu aner mi depmaupa deipmai ati weki. 41 Wekipa, Yesusdi aner mi buru talepudi, amutu perami upu deiki di pepu. “Talita-koum,” pepu. Upepu upu deiyoda ake. “Aner mio tekroyo pepmakene,” pepu. 42 Yesusdi upepupa, adipapu aner tekrapudi, keteng tamun 12 ner mi cadi, er yuk embanmau. Embanmau pangeda, akati wekmai neng yumadi, mambul kange doupra lolomai. 43 Anengdi yuk neng gekenai tep, ‘Lap perbenung’ tenen, “Akupman ngeda, lap men perbenkamrume,” pepra, Yesus erda upu puto di sekdongopu. ^{▼▼Upu sekdongopu ngeda, Yesusdi, ‘Aner mi kwetepmanada, lap perbenung’ tenen, upu sekunge deiyoda ake. Ada, “Neda nimi Lyemna Deiyo Ngebo kunune,” pepra, ‘Jenek kupra lap penkamne taruda, kapul men kupmare’ tenen, aupu pepra deipu.} Tonda, ‘Aner mi jen keca karepkununga’ tenen, upu peipupa, aner mi tep jen karepi.