Mar 6 | XteSC | STEP | Yesus cap, er upu gekepra, er cap kikiman melipra embarami neng cap, Kapernaum mutu di tapra, tuai bisi mapbaramyanen, Yesus er pe mutu sisa, Nasaret mutu kwerepi.

Mark 6

Nasaret mutu kurami nesaladi, Yesus tep, ‘Nun song’ tenen, tapi upu

(Matius 13:54-58)

1 Yesus cap, er upu gekepra, er cap kikiman melipra embarami neng cap, Kapernaum mutu di tapra, tuai bisi mapbaramyanen, Yesus er pe mutu sisa, Nasaret mutu kwerepi. 2 Kwerepra beidi dakuramipane, Yahudi yala neng, sun pel dona gum di, beipye peingna tep, Sabat tumi, sun Allah si eremami tumi konum kupka tep, Yahudi yala nengdi Allah upu peteremami ati Yesus wekrapudi, Allah upu peteremau.

Peteremau taruda, er upu gekenmai nengdi lolomai. Lolomaidi upenmai, “Angeboda, er peteremaser upuda, dan mutu di kael kepu do? Ware keca di peteremamipa, ila kael kepudi peteremaser do? Ware kupra di kael keamnga deiki di nimi men kupmanto keca kunupsek pen pel dorur do?” pepra lolomai. 3 Tonda upepi. “Gume angeboda, nun mutu ngebo pua. Ada co cakra bekin dore ngebo, be? Teka de, Mariadi deipu mida, er akonum adano. Er weit yapuda, Yakobus cap, Yoses cap, Yudas cap, Simon cap, sun yuma akununge. Tonda, er weit nerapu peda, nun cap akunmape,” penmai. Upepidi, Yesus tep tulum kupupa, ‘Erda tali ngebo pua’ tenen, er tep dabal kupupa tapi.

4 Ukupi pangeda, Yesusdi akati wekmai neng yuma tep pepu. “Allah er upu cap, Allahdi amenda kupkamre keca cap tep lap penge nabi neng, yuk mutu bengopda, yuk nengdi sun upu gekepra, kange deipra gispal donung dinin, sun pe yala neng cap, sun pe ati neng cap, sun pe mutu neng capda, gispal men domengedi tamnunge,” pepu. 5 Yesus er mutu sisa nengdi, er tep dabal kupya tep, amutu neitamai yumada, nimi men kupmanto pel ton men doramu. Tenpu ngeda, pu jeramu nesala metekanun Yesus epudi, er buru sun nong deiki deipudi kwetepu. 6 Ukupu dinin, sun Nasaret mutu neitamai kurami neng yumadi, teka men tenepya tep, Yesusdi aneng tep, mambul kange doupudi, ‘Uo,’ tenepu.

Yesusdi, ‘Ne nyapu 12 neng peterep embenkameng’ tenen, dokotepu upu

(Matius 10:9-14; Lukas 9:1, 3-5)

7 Ukupipa, Yesusdi Nasaret mutu tapra, amutu-mutu yuma peterep embaramu. Apeterep embaramu taru neitamai di, erdi wepra deiamu neng, sun 12 neng tep, er damai yakana tep, kongpepupa yaiopda, butene-butene kepra, ‘Ne pel dorbenkameng’ tenen, yuk-yuk dopra dokotepu. Aneng dokotepu ngeda, ‘Isok-isok yuma bisbisa kapra enemkameng’ tenen, er puto sun nong deiki deipu. 8 Tonda ukunkamya tep, lap pepu upuda ake. “Amutu-mutu yuma embankamrum taruda, maca sisa doupra benkamrume. Tonda, sun alen doupmumdi, kwaneng cap, co bo cap kipra, men embankamrume. ‘Akeca-keca yumada, ware kupra doproptepe do?’ tenena deiki di, Allah upu peteremna pel yaproruma tep, akeca tenena gume. 9 Sun yantang yanipra emban keca, sepatu kepkamrum dinin, opkal butene kipra men embankamrume.” Yesusdi pepu.

10 Upepu dingeda, aupu ton dukdongopra pepu. “Tenpu ati dopra kuramengai berumyopda, tenpu atipu wekra mapra kuramumyanen, yukai bankamrume. Ikati mapna, orati mapna, ukati mapna kemnedi sangdana gume. 11 Ware mutu do yuma, ati arum domengai berumyopda, amutu nengdi, ‘Telepe,’ pepra gispal men dopsengedi, sun upu men gekepsengopda, sun peda utopu kunkamrume. Amutu tu sun yantang palepmasere bentalda, meneng damai apu kilipra tapmumdi, amutupu tapra, yukai bankamrume. Ukunkamruma deiyoda ake. Ada, sun amutu nengdi, ‘Allah upu tapmapa kunumna tep, sun yan deiki palepmau bentalda kiliptapmasenge. Ukupmasengtopu, Allahdi nun nong wenepra tapkamsere, tenenkameng’ tenen, ukupkamrume,” Yesusdi pepu.

12 Yesusdi aupu pepupa, gekepi dingeda, ‘Nesala yuma sun dipru mali teneramenge nge cap, sun mali kuramenge nge cap tapmengedi, amnyo karikrongedi, teka tenenkameng’ tenen, Allah upu peterep embarami. 13 Sun aneng peterep embarami taruda, isok-isok weik taleramu nesala, sun dipru talerami isok enemami. Tonda, pu jeramu nesala weik, ‘Allah er puto deiki dipapu kwetenkamsere, tenenkamnunga’ tenen, minyak zaitun mokon dopra, anesala sun nong deiki likra deipnedi kweterami.

Raja Herodesdi peipupa, er jen talen nengdi, parang ya dopra Yohanes Pembaptis kum sektapi upu

(Matius 14:1-12; Lukas 9:7-9)

14 Yesus er nyapudi peterep embaramya tep, nesala weika di, Yesus er si gekerami. Nesala weike gekeramya tep, amutu ila nimi deiyo ngebo, Raja Herodes peda gekepu. Ton nesalada, Yesusdi nimi men kupmanto keca, kunupsek pen pel doramupa, nimidi diramya tep, sundi upepi. “Gume Yohanes Pembaptis konum deamu dinin, kange di tamupra gam bukroudi, nimi men kupmanto keca, kunupsek pen pel dorure, gam konum bukmara tep, ada Yohanes pua,” perami. 15 Yuk neng dingeda, Yesus tep, uperami. “Gume angeboda, Allah upu lap peramu ngebo, nabi Elia kurure,” perami. Uda, yuk nesala dingeda, “Angeboda, Elia gum dinin, Allahdi amenda taru kupkamu keca lap perami neng kuramitopu, er peda nabi ngebo utopu kurure,” perami.

16 Aneng-aneng yuma aupu yuk-yuk penmai dinin, Yesus er pel doramu ngeda, ila nimi deiyo ngebo Raja Herodes gekepudi, upepu. “Uo, nedi peipsipa, Yohanes Pembaptis ya kum sektapi ngeboda, Allahdi ka tamupra konum gam bukra deipu,” pepu.

17 Ada, Herodes er pedipapu upu peipupa, er jen talen nengdi Yohanes Pembaptis ateng koupra dubeidi, wenemna ati dongopi. Herodesdi akupunge deiyoda, Herodes er weit bo Pilipus tupa gam kunmaupapu, er ner Herodiasda, Raja Herodesdi dalupra dopropu. 18 Ukupra dopramnga tep, Yohanesdi Herodes tep upepra wenepu. “Kanda kan weit bo, er ner doprapmuma deiki di, Allahdi, ‘Ukuna meme,’ peamu upuda, konum yanipmareme,” pepra wenemamu. 19 Yohanesdi uperamnga tep, aner Herodiasdi, yu weik kupupa, ‘Yohanes poipnetue’ tenen, pio tupa teneramudi, tenimnapu kuramu.

20 Ukuramu dinino, Yohanesda, Allahdi wepra deiamu ngebo telep ngebo cadi, dumsisipu kuramnga tep, Raja Herodes kael kepudi, kware kupupa, ‘Yuk nengdi Yohanes popnung’ tenen, upu sengdongoramu. Raja Herodesdi ukuramnga tep, er ner Herodiasdi Yohanes men popmanto kupu. Tonda, Yohanesdi upu peramupa, Raja Herodes gekeramu taru yumada, kange deipra gekepu dinin, ‘Ukupkun do, ukupkun do?’ teneramudi, kange tenimtonapu kuramnga cadi, ‘Teka angeda ukupkune,’ men tenepu. Ukuramu dinin, kware kupka tep, Yohanes men popu.

21 Sun yuma ukuramipane, Herodiasdi, ‘Yohanes poptepe,’ teneramutopu, Yohanes popkamai tumi konum kupu. Ada Raja Herodes er deiami tumi konum kupkopda, er amutara melipra pel dorami neng, ila neng cap, er jen talen neng, sun deiyo neng cap, uda Galilea tara kuramya deiyo neng cap, aneng yuma tep, ila kailya kalepra deipupa jeryai. 22 Sun akalepmau keca jenmai taruda, Herodias er ner mi mut yana sepmaupa, sun aneng yumadi, aner tep kange deipra dinmai. Herodes er kange deipka tep, aner mi tep pepu. “Ware keca do, kan putapkere kecada ne tep moropnememnyopda, tek sisi nedi kan tep karepkamkene,” pepu. 23 Tonda, Herodesdi aner tep upepu. “Aupuda tali men pepmakene, pio tek sisi karepkamkene. Ware keca do, ne talenun mutu yuma peda, moropnemem pangeda, ange neitamai bokra karepketene,” pepra deipu.

24 Upepra deipu pangeda, aner mi akati tapra, er nin Herodias kunmauai beu. Beudi er nin Herodias tep asipetepu. “Nanino, Herodes tep, ware keca moropkaman do?” pepra asipetepu. Asipetepupa, Herodiasdi tamupra pepu. “Yohanes Pembaptis er ya kum sektapmemdi, er gisopu karepnetume, pepra moropkurume,” pepu. 25 Er nindi upepupa, adipapu tamupra, Raja Herodes bukmauai, er aner midi mororbeudi aupu pepu. “Yohanes Pembaptis er ya kum sektapmemdi, er giso du yopu, bulukra pala keca deiki di yakra deipmemdi, karepnetume. ‘Yohanes er giso duda ukutarupu karepnetum’ tenen, putanmanere,” pepu.

26 Upepra moropu pangeda, Raja Herodesdi, ‘Uo angeda, ware kupkun do?’ tenen, mali kange doupu. Mali kange doupu dinin, erdi pedinmau upuda, er kailya jeryanmai neng yumadi, konum gekenmai atep, ‘Angeda nedi men karepkukene, men pepkune,’ tenepu. 27 Utenepka tep, Raja Herodesdi nimi podiramnya deiyo ngebo tep, pepu. “Yohanes er kum sektapra, er giso du yopu denerume,” peipupa beu.

28 Angebodi Yohanes wenemna ati deiamyai beudi, Yohanes ya kum sektaprapudi, pala keca deiki, er giso yakra deipudi, aner mi damai debeu. Debeudi karepupa, aner midi akeca dopra, er nin Herodias damai bena karepu. 29 Ange yuma konum kupyopda, yuk nengdi lap pepipa, Yohanes er upu gekepra melipra dombarami neng gekepidi yaiopda, Yohanes er nong doprapidi, nimi peirami gel imir bena peipi.

Yesusdi jen keca bokra karepupa, nimi denge weik 5.000 nesaladi jepya tep, pepu upu

(Matius 14:13-21; Lukas 9:10-17; Yohanes 6:5-13; Markus 8:2-9)

30 Yesusdi wepra deipupa, er upu dopra peterep embarami neng, sun Rasul neng yumadi, peterep embaramyanen, tamupra Yesus damai yaidi, sun peterep embaraminge cap, sun pel doraminge cap yumada, Yesus tep yana lap penmai. 31 Amendada, nesala yuma dana-dana tara di, sun kori, yanapna, benapna kemaipane, Yesus cap, er nyapu 12 neng capdi, pel pio weik donmaiya tep, ataruda jen keca jen taruda, go pio gum tep, jen keca men jepmai. Ukunmaiya tep, Yesusdi wepra deiamu neng tep, “Sun aneng dakunmangepane, ne cap, sun cap, nunpu nimi kuna gumai bena beipye peingbenkupe,” pepu. 32 Yesusdi upepka tep, sun yuk gapung co deiki wekra bukidi, ‘Nesala kuna gumai benkup’ tenen, Galilea mokon deiki banmai.

33 Sun aneng gonga kepra banmai dinino, sun sakotepra, mokon deiki banmai taru di epi neng cadi, men di epdanami neng tep, konum kael kepidi, ‘Aneng cap antapdankamep’ tenen, mokon pirman bisi sepdaro banmai. Abanmai neng cap, dana-dana mutu di yakanmai neng cap yumada, Yesus men benapu taru di, sun menmena bena wekmaipa, Yesus amenda yau. 34 Gapung co lukra derirbeidi, Yesus tuai kwerepkopda, nimi denge pio weik wekmai nengda epu. Epudi, awekmai nengda, nimidi peiramenge dombada, sun apu bo meneng damai men kuryopda, ‘Ortara benkun do, atara benkun do?’ tenen, kange wang-wang perepa, tenimtoramengtopu, anesala peda ukunmai. Uda, anesalada, ‘Ware ngebodi telep upu peterepsetupa, dumsisipu kunkamep do?’ tenen, tenimtona cap, koudana cap kunmaiya tep, Yesusdi aneng tep bicau tenepudi, aupu yala-yala weik peteremau.

35 Peteremaupane, keteng wekrouopda, Yesus er upu gekeramidi, melipra embarami nengdi, Yesus er damai peryai. 36 “Naio, nesala gumai kunmapa cadi, keteng konum wekroryopda konum ipkura tep, abulupmang neng dokotepmempane, amutu neitamai ati yuk-yuk ati marbetengedi, sun jen keca kunuptenge,” peryai. 37 Upepi dinin, Yesusdi er nyapu 12 neng tep pepu. “Sun dipu aneng sun jen keca karepkurume,” pepu.

Upepu pangeda, sundi tamupra Yesus tep pepi. “Gume naio, tenpu ngeboda, ware ban bari di pel doramtuanen, er pel kunumna co bo doproptua peda, awekmang neng, sun jen tep kunumnada, aco bo deikipu ngeda yuma gum kuptue. Angeda co bo pio weik cadi, nundi sun teppu, ‘Jen keca rotida, kunupra karepkamep’ tenen, pepmaserem do?” pepi.

38 Upepipa, Yesusdi tamupra pepu. “Jen keca roti akwapmarenge yumada, ‘Ware kuprap do?’ tenen, dipra emberume,” pepu. Yesus upepupa, dipra embanmaiyanen, konum epyopda, ka tamupra Yesus damai yaidi, upepi. “Roti kwaneng jen keca pamu bari (5) cap, mekina butene (2) cap kupmare,” pepi. 39 Upepipane, Yesusdi peipupa, er nyapudi nimi denge pio weik wekmai neng tep pepi. “Sun gung yuk-yuk bulupra betei deiki bokra bukso,” pepi.

40 Upepipa, awekmai nengdi bokra buki ngeda, ton tara denge weik 50 neng buki. Ton tarada, denge weik 100 neng buki. Aneng yuma utopu kupi. 41 Konum buki pangeda, Yesus er nyapudi, roti pamu bari cap, mekina butene cap karepkamai ngeda doprapudi, im deiki dipetepudi, Allah tep “Telepe,” pepudi, aroti kwanengda toprapudi, er nyapu tep karepu. Er nyapu 12 nengdi, ‘Abukmai neng tep karepkununga’ tenen, karepu. Tonda, amekina butene sekra, er nyapu karepupa, abukmai neng tep, aroti kwaneng cap, amekina cap bokra karenmai.

42 Er nyapudi abukmai neng tep, akeca bokra karenmaiyanen, karepipa doprapidi jenmaipane, konum boupkopda, kwal tapmai ngeda, dopda-dopda peprapidi, dopra tenpai deipi. 43 Yesus er nyapu 12 nengdi bulupra kipra deipmai ngeda, ila alen utopu keca, er sida bakul ilange, 12 deiamya cadi kipra deipi. 44 Aroti cap, mekina cap, jenmai nengda, nerapu cap, nyapu cap men nuki dinin, denge weik 5.000 nimi jenmaidi kunmai. Abukmai nengda nimipu nuki.

Yesus erda mokon deiki yan yanipra beu upu

(Matius 14:22-36; Yohanes 6:15-21)

45 Animi weik 5.000 neng, sun jen keca karepipa jepi pangeda, adipapu Yesusdi er nyapu 12 neng tep pepu. “Sunda menmena gapung co deiki bukra mokon deiki banmarumyanen, ortara Betsaida mutu benkamarume. Neda, awekmang neng tep, ‘Telepe sun daberume,’ pepnedi yankamane,” pepu. 46 Upepupa, er nyapu mokon deiki konum beipane, awekmai neng tep, telepe pepra, amutu tapra, er yuk, ‘Allah moropkun’ tenen, mutu deiki beu. 47 Yesus Allah moronapu kunmaupane, konum ipbanmau taruda, Yesus er yukai kunmaupane, er nyapuda mokon neitamai banmai. Sunda, ‘Ortara mutu benkamep’ tenen, urasin deiya banmai dinino, urasin deiya banmai tara di, ila puto mungna yaupa, co lase puto di bungmaipane, adinor men benmanto kupi.

48 Sun amokon deiki tup banmaipane, Yesus mutu deiki di sun ikin kupu ngeda epudi, berekamarya tep, tulek bisi yanamrenge kepu taruda, Yesus mokon deiki yanipra sun kunmaiyai beu. 49 Banmauanen, sun damai bisipra benmanto kupu taruda, sundi Yesus er mokon deiki embanmaua epi. 50 Epidi, ‘Ada isok embanmar do?’ tenen, sun lukdaidi kwar weik kupupa, ila di ngoloki. Ngolongi pangeda, adipapu Yesusdi, “Ne akunmana tep, sun kwar dangna yapso,” peprapudi, “Sun kwar dangna gum di, dimpepra bankurume,” pepu.

51 Upepu dingeda, Yesus gapung co welepra bungbeu. Gapung co welepra, sun aneng cap bungbeu pangeda, ila mungna mungmauada dimpepu. Dim pepkopda, Yesus er nyapu 12 nengdi, ‘Uo’ tenen, mambul kange doupi. 52 Sun dabal tep, tali kange doupra men kael kepmaiya di, Yesusdi mekina cap, roti kwaneng cap bokra, nesala karepmau ngeda, moupra men tenepi. Ada, ‘Yesusda puto pio weik ngebo cadi, akeca-keca yuma kanam dipapu pel dorure,’ moupra men tenepi. Ange tep, Yesus mokon deiki yanipra yanmaunge cap, mungna dimpepmaunge cap tep, sun mambul kange doupmaidi lolomai.

53 Gapung co di mokon deiki banmaiyanen, mokon pirman ortara Genesaret mutu beiyopda, ‘Me puto di gapung co yukai berur’ tenen, ikin keca tapu gerekdongopra, mokon pumbon dongopi. 54 Dongopidi, gapung co deiki di tuai kwerepi taruda, adipapu sun men di epdanami neng akunmaiya di, Yesus er nong kael kepidi, ‘Yesus adano,’ tenepi. 55 Utenepi dingeda, mambul kange doupra, amutu neitamai yuma sepdaro kai perbanmaipa, amutu neitamai kurami nesala yuma, “Yesus amutu embanmare,” pepnepa gekeramidi, pu jeramu nesala, pela co deiki di dopra, er embanmanai apu yana deipembarami.

56 Utopu ton, Yesus embaramngai yumada, uda ati arum doramyai pe, dodin ati pe, wa pen damai pe, nimi bulupra upu taleramyai pe yumada, pu jeramne nesala yuma dopra derirbarami. Derirbaramidi, Yesus tep, “Kan opkal kupkupai bepketepe do?” pepra mororami. Mororamidi, er opkal kupkupai berami nesala yumada, pu kwetediramu.