Mar 7 | XteSC | STEP | Uda, Farisi neng cap, Musa sengamu upu peteremna deiyo neng cap, yuk Yahudi yala neng yuma capdi, sun jen keca tali lupra men jerami. Sunda, sun apu yapudi, sun kange dipapu tapakra peteremamitopu, ‘Buru me kunada, mem keca utopu,’ tenemya tep, ‘Ange pio men taptepe,’ tenerami. Ada ‘Allah derepserur’ tenen, buru me kupne dipapu jen jerami. Sun apu yapu Yahudi yala neng dinin, sun deiyo neng tapakra peteremamidi, kuramitopu, sun peda angepu talepra kurami.

Mark 7

Yesusdi, “Nesala dipru neitamai mali keca tupa kwapka deiki di, mali kununge,” pepu upu

(Matius 15:1-20)

1 Uda, Farisi neng cap, Musa sengamu upu peteremna deiyo neng cap, yuk Yahudi yala neng yuma capdi, sun jen keca tali lupra men jerami. ^{▼▼jen tali lupra men jerami – Yuk upu deiki sekami Allah upu buku Markusda, ayat-ayat 1-4 seki dinin, nundi, ‘Ketengban neng yumadi moupra tenepmengedi, telep kupra kael kepkameng’ tenen, ayatda 3 dinin, 4 dinin, 2 dinin, siryada 1 sekmepu. Aupuda tenpu dinin, posisi puda yuk sekmupu.} Sunda, sun apu yapudi, sun kange dipapu tapakra peteremamitopu, ‘Buru me kunada, mem keca utopu,’ tenemya tep, ‘Ange pio men taptepe,’ tenerami. Ada ‘Allah derepserur’ tenen, buru me kupne dipapu jen jerami. Sun apu yapu Yahudi yala neng dinin, sun deiyo neng tapakra peteremamidi, kuramitopu, sun peda angepu talepra kurami. 2 Tonda, jen keca deipra kunumamyai bena kunmananen, sun ati tamupra yakarami taruda, sun apu yapudi, peteremamidi peiamitopu, ‘Allah derepserur’ tenen, buru me kupne dipu jen jerami. Ange utopu ton, me mau cap, gamne mau cap, me gwepra dingne mau, cerek cap, amau me kuna tep, pel weik doramidi, sun apu yapudi kurami ngeda, mem keca utopu keca weika di ton cap talepra kurami.

3 Ange yuma teneramya tep, yuk taruda, Farisi neng cap, Allahdi ‘Ukunkamrume, ange ton men kunkamrume,’ pepra deipupa, Musadi sekeiamu upu peteremna deiyo neng cap, Yerusalem mutu di Yesus kunmauai bulupra diryai. 4 Dinmaipane, Yesus er upu gekepra dombarami nengdi jen jenmai. Sun jen jenmai taruda, Farisi nengdi, ‘Dipru mali kupserur’ tenen, buru me kuramitopu, Yesus er nyapu peda buru me men kupmai dipapu, tali lupra jenmaiya tep, Farisi nengdi Yesus tep pepi.

5 “Kan upu gekepra domembakenge nengda, nun apu yapu ^{▼▼Yahudi yala neng, sun apu yapu tep, lap pena upu nomor 20 dirume.} peiamseiya utopu, men kungedi buru me kuna gum dipapu, tali lupra jenmangada, warya tep do?” pepra wenepi. 6 Upepi pangeda, Yesusdi tamupra pepu. “Pumun taru Yesayadi sun tep peiamseu ngeda, tek sisi peipseu. Sunda dipru neitamaida mali kun keca tupa akwapserpapu, nong bol deikipu, ‘Telep neng tenenkamseng’ tenen, telep upu pertamrum dinin, tek sisi sun mali kurum neng tep, Yesayadi sekra deiamu upuda pepkusene.” Ada ake.
‘Anengda, sun tali pertamna upu deiki di, ne tep gispal donenung dinin, sun kange dipru neitamaida, tek sisi ne tep pio kange deipra men talenenunge. 7 Ne si eremnenge nengda, talipu kununge. Sun peteremenge ngeda, nimi kange dipu tenemenge upupu peteremnunge.’ Yesayadi sekamu. (Yesaya 29:13)

Yesusdi Yesaya pemu upu dopra, aneng tep pepu. Upepudi aupu ton cap pepu.

8 Sun Farisi nengda, Allah erdi, “Ukunkamrume,” pediramu upuda konum taprumdi, nimi kange dipapu tenepra peteremenge ngepu talepra kurume. 9 Sunda Allah erdi, “Ukunkamrume, ange ton men kunkamrume,” pepra pediramu mem upu, yanipmumdi, sun apu yapu peteremamingepu, ‘Angepu talepra kunkupe,’ tenemumdi kumum ngeda, lap pepkusene. 10 Ada, Musadi peputopu,
‘Sun nai yapu cap, sun nin yapu cap, gispal dopra pingpinga di makunkamrume. Ware ner do, ware ngebo do, sun nai yapu cap, sun nin yapu cap tep, mali upu pepmengopda, wenepra ponkamrume.’ Musadi peiamu. (Keluaran 20:12; 21:17)

11 Musadi aupu peiamseu dinin, sundi tapakra peteremumnya deiki di, yuk neng gekepmengopda, sun mali kunge kecada pepkusene. Ada, tenpu ngebodi er nai cap, er nin cap tep, “Akeca-keca yuma melipra karepketene dinino, akecada Allah gispal dona tep karepkamna cadi, akeca yumada men karepkusene,” peptudi, er nai er nin tep men kareramtu pangeda, sun Farisi nengdi, “Angeda telepe, sun nai, sun nin ton cap men makunkamrume,” perume. “Allah gispal dona tep karenada, ila mambul cadi, sun nin yapu cap, nai yapu cap melipra karenada, dakwapye,” pepra peteremrume.

12 Aupu perumnya deiki di, Allah upu yanirtamrume. Ange utopu keca ton weika di kurume. 13 Sun apu yapu peteraminge gekeramrumdi, ‘Aupuda konuma’ tenen, angepu peteremumnya deiki di, Allah erdi pediramu upu yuma yaniptapra, mali-mali kurume. Yesusdi Farisi neng tep pepu.

14 Yesusdi upepu dingeda, awekmai neng yuma tep, “Ne damai bulupra yaso,” pepupa bulupra yai pangeda, aupu pepu.

Sun yuma ne upu gekepmumdi, kael kepso. Sun Farisi neng peteremrumnya deiki di, “Buru me men kupmepyopda, Allah er upu yaniptapmepedi, Allah tep mali kunupe,” pepra, peteremrum dinino, aupu perum ngeda gume, pepsene. 15 – 16 Ware keca do yuma, nimi bol deiki kurur keca cap, bura tara kure keca yuma cap, jemumpa, sipyal pumbon wekseredi, mundu pumbon marbaserur dinin, adeiki di sun dipruai mali men kudiserure. Ange gum dinino, sun dipru kange neitamai di tenepra, mali kumum keca cap, tenemum keca cap deiki di, mali kudiserure. Yesusdi aweka gekenmai neng tep pepu.

17 Aupu pepudi, sun awekmai nengda, acapu tapra banmauanen, yuk mutu beuopda, ati wekrou. Wekroupa, er nyapu 12 nengdi, yuk mutu di pepmau upuda, ‘Deiyo ake’ tenen, men kael kepmaiya di ton cap asipetepi. 18 Asipetepipa, Yesusdi tamupra pepu. “Sunda tupa walwal kupmaserpa asipetepmanerum do? Ne pepman ngeda, moupra men kael keprum do? Ware keca do yuma, bura tara kuramre jepmepepa, nun mundu pumbon wekseryopda ange deiki di, nun dipru mali men kudiserure. 19 Nun jeramep kecada, dipru pumbon pio men wengserur dinin, mundu pumbon kepu mapmaserya, deipu lengtamnupe,” Yesusdi pepu.

Uda, Yesus aupu pepka deiki di, “Jen keca yala-yala yuma jeramepya deiki di, dipru mali men kudiserure. Tonda, jen keca yala-yala yuma peda, jepmepyopda, adeiki di Allah er upu men yanitamnupe. Angeda gum dinin, nun dipru neitamai mali tenepe keca cap, katuai di tek sisi mali kupe keca cap, adeiki dipapu, Allah er upu yanitamnupe. Yuk ton gume,” pepra lap pepseu.

20 – 21 Yesus pepu upuda, ton cap dukdongopra pepu. “Bura tara kuramre keca di nun nong pumbon wekserepa, mali men kudiserure. Ange gum dinino, nimi dipru neitamai mali tenenge keca deiki dipapu, dipru mali kudiserure. Nimi dipru neitamai di beleramre kecada, ake.

Ada mali tenena cap, upula dona cap, nimi pona cap, sun pe domenge ner tapra, yuk ner dorona cap, ner tali-tali nyangna cap, tonda, 22 ‘Bunga weik doproptenedi isomka kuptene’ tenena cap, yuk neng tep mali-mali pedina cap, mok upu pena cap, dumdana cap, si lelim pena cap, yuk neng tep, ton nengdi sun kunge keca ‘Ne ton kuptene’ tenena cap, minina upu pena cap, ‘Ne telep ngebo tenepkamneng’ tenen, gemena cap, uda, Allah cap, Allah er kure keca yuma cap, pio tenena gum di, tali kange doupra, tuai kecapu tenena cap, ange yumada pio mali. 23 Amali kunge keca yumada, dipru neitamai dipu weleprepa, mali kupmengopda, Allah upu yanipmengepa, dipru mali kudiserure,” pepra, Yesusdi er nyapu 12 neng tep lap pepu.

Fenisia nerdi teka tenepu upu

(Matius 15:21-28)

24 Yesusda, Genesaret mutu tapra welerbaramnganen, Tirus mutu damai beu. Beu dingeda, amutu neitamai kunge nengdi, ‘Ne epnengedi kael kepnenung’ tenen, inipra ati wekrou. Utenen inipra ati wekrou dinin, amutu yau taruda, men inipmanto kupka tep, sun amutu nengdi kael kepi. 25 Kael kepidi, “Ukuda Yesus ayare,” pepra lap perbeipa, tenpu ner ton gekepudi, Yesus damai yau. 26 Anerda, Yahudi yala gum ner kuramu. Erda, Siria tara neitamai dinin, Fenisia mutu nengdi deiami ner kuramu. Er ner mi dipru neitamai isokdi taleamnga tep, ‘Ne ner mi talerur isokda, Yesusdi dopra dokotepmemetue’ tenen, Yesus tep mororyau.

27 Mororyau pangeda, Yesusdi aner tep domona upu deiki di pepu.

“Kanda Yahudi yala gum ner tep, aupu pepkukene. Allahdi dopra deipneuada, ‘Yahudi yala neng peterepnepa, menmena gekepkameng’ tenen, yasi. Atep, kan ner mi kweteipkenyopda, ada nyapu jenmange keca dalupra, tali kam karemengtopu kupnun tep, ange men kupkuken do? Nyapu sun kwaneng kapul men jepmangepapu, akwaneng dalupra kam damai donada, mali tepa. Telep ngeda, menmena nyapu jenmanganen, konum bouprepa, bun paupaupra tapmenge ngeda, kam karena telepe,” pepra Yesusdi domon upu pepu.

28 Yesusdi upepupa, anerdi adipapu tamupra, Yesus tep pepu. “Naio, tek pepmanerem dinino, ne ner mi kweteipnetumtoda, nyapu jenmanga damai embanmare kamdi, bun paupaupropa tapmenge ngeda tali kamdi bupra jerura utopu tenepne,” pepu. 29 Anerdi upepu pangeda, Yesusdi tamupra pepu. “Kan konum tenipmaremdi, telep kupra pepmanerema tep, kan ner mi talerur isokda konum bendopre. Ukutaru kan ati tamupra kange deipra benkurume,” Yesusdi pepu. 30 Anerdi ka di tamupra banmauanen, er ati beuopda, er ner mi taleamu isokda, konum bendopka tep, er ner mida dimpepra, asonaipu mapmaupa epu.

Yesusdi amul kinina cap, upu lup cap, kwamu ngebo tep, kwetepudi telep kupra deipu upu

(Matius 15:29-31)

31 Yesusda amutu akunmauanen, Tirus mutu tapra, Sidon mutu welepudi, ati arum domyai beu. Sidon mutu mapudi baramnganen, bisi damapbaramnganen, ka tamupra Dekapolis tara kwererbeu. (Dekapolis tara ati arum doramyada, morokyo di dutara (10) kota dorami.) 32 Amutu tara neitamaida, tenpu taru di, amul kinina cap, upu lup kuna cap kwamu ngebo tenpu, Yesus damai dopra deriryai. Dopra deriryaidi, ‘Yesus er buru angebo nong deiki deipredi, kwetepkur’ tenen, weika di moronmai.

33 Yesusdi aneng atapra, angebo er tenpu dopra, yukai dubeu. Dubeudi, Yesus er buru di, angebo amul pumbon dana-dana kinipdongopu. Kinipdongopu dingeda, Yesus er buru du deiki, ul tulupra deipudi, angebo er lyemu deiki buru du deipu. 34 Ukupu dingeda, im deiki erepra dipterepudi, isin welepupa, isin sapu pepu. Isin kapkopda, Yesus er mutu upu deiki di angebo tep pepu. “Efata,” pepu. Aupu pepka deiyoda ake. ‘Amul pakroyo,’ pepu. Ada, ‘Angebo er amul pakrepa, upu gekena cap, pena cap kepkure’ tenen, pepu.

35 Yesus aupu pepupa, adipapu angebo er amul pakudi, lyemu telep kupupa, adipapu gonga kepudi upu telep kupra penmau. 36 Upu telep kupra penmaupane, Yesusdi awekmai neng yuma tep, “Akupman keca yumada, men lap perbenkurume,” pepra upu sekrou. Upepra upu sekrou dinino, awekmai nengdi yuk neng damai lap perbanapu kunmaipa, Yesusdi, “Tupa-tupa lap perbana gume,” pepra upu sengmau. ^{▼▼lap perbana gume – Yesusdi ‘Ne kune keca tep, men lap perbenkurume,’ pepka deiyoda, ake. Ada, ‘Neda Allah er Mi Sisa kununada, jenek kupra lap pena taru kapula,’ tenepka tep aupu sekrou.} 37 Upu sengmaupunen, sun aneng weika di ton cap, lap perbanmai. Aupu perbanmai, “Uo, amul kiniamre neng pe amul pangdirure. Upu lup kwamre neng pe, telep kupra deiprepa upu penunge. Er pel dorenge yumada, teleppu kurure,” pepra lap perbarami.