Mar 8 | XteSC | STEP | Amul kinina cap, upu lup kuna cap, kwamu ngebo kwetepudi, dakuramupane, Dekapolis tara neitamai nimi gung pio weik bulupra, Yesus damai wengyai. Wengyaidi, Yesus cap dakunmaipane, aneng sun jen gum tep, Yesus er upu gekepra kikiman dombarami neng tep, “Yaso,” pepupa yai pangeda, aupu peipu.

Mark 8

Yesusdi, anesala denge pio weik, 4.000 neng tep jen keca bokra karepu upu

(Matius 15:32-39; Markus 6:32-44; Matius 16:1-12)

1 Amul kinina cap, upu lup kuna cap, kwamu ngebo kwetepudi, dakuramupane, Dekapolis tara neitamai nimi gung pio weik bulupra, Yesus damai wengyai. Wengyaidi, Yesus cap dakunmaipane, aneng sun jen gum tep, Yesus er upu gekepra kikiman dombarami neng tep, “Yaso,” pepupa yai pangeda, aupu peipu. 2 “Akunmang nengda, sun jen kecada, metekanunpu kiami dinin, u weneri tumi mapmupka tep, konum jepropidi, jen bulungpu kunmange. 3 Nedi, ‘Sun jen putanmarepapu, sun mutu tamupra beso,’ pepnyopda, ton nengda karen mutu di yaiya tep, jen depmengedi bisai bukbuk banmanung tep, ‘Sun pe mutu tamupra dabeso,’ men pepkune,” pepu.

4 Yesusdi upepupa, erdi wepra deipu neng, er nyapu sun 12 nengdi tamupra pepi. “Nunda pio bura mutu neitamai kunmapa tep, sun jen keca rotida, dan mutu kunumbetepe do?” pepra asipetepi. 5 Upepipa, Yesusdi tamupra pepu. “Sun kipmarum jen keca roti, ware kupra kipmarum do?” pepra asipterepu. Asipetepupa, sundi, “Yoneitam bari roti kwaneng kipmape,” pepi. 6 Upepipa, Yesusdi abulupra wekmai neng yuma tep pepu. “Sun tu deiki bukso,” pepu dingeda, sun akipmai jen keca roti kwaneng yoneitam bari dopropudi, Allah tep “Telepe,” pepra moropkopda, roti topra, er nyapu karepupa, sundi bokra, awekmai neng yuma tep, karenmai. 7 Tonda mekina buteneto, wenerito kepra kipmainge ton karepi pangeda dopropudi, Allah tep, “Telepe,” pepra moropu dingeda, amekina sekra, er nyapu karepupa, awekmai neng bokra karenmai.

8 Karepipa, jenmaipane, konum boupkopda, kwal tapi. Jenmaiyanen, kwal tapi ngeda, Yesus er nyapudi bulupra, ila alen utopu keca, er si bakul alen di yoneitam bari kipipa, konum dinikopda deipi. 9 Nerapu cap, nyapu cap yumada men nuki dinin, nimipu nukipa, denge weik 4.000 neng jenmai. 10 Sun aneng konum jepi pangeda, Yesusdi aneng tep, “Telepe sun mutu tamupra berume,” pepudi, ka tamupra gapung co deiki wekra bukupa, Yesus cap, er nyapu 12 neng cap, mokon deiki banmaiyanen, Dalmanuta mutu bei.

11 Dalmanuta mutu bena dakunmaipane, Farisi neng ton Yesus damai yai. Yesus damai yaidi, ‘Yesusda Allah er puto deiki di tek sisi apel dorur do, gum do?’ tenen, Yesus tep asipidi kupetepi. Sundi upepi. “Allahdi dokotepkeupa, ‘Allah er puto deiki di pel dorure,’ tenepkukepa tep, nimi men kupmanto keca, kunupsek pen pel ton dopseo,” pepra asipetepidi piripterepi.

12 Piripterepipane, Yesus er dabal kange doupudi, “Uo, ataru kurumu nengda, ‘Allah er puto deiki di tek sisi pel dorur do?’ tenenemumdi, warya tep, ‘Nimi men kupmanto keca, kunupseng pen pel dopsetu’ tenen, asimpetenerum do? Tek sisi pepsene, ataru kumum neng tep, ‘Er Allahdi Yesus dokotepke, tenepkuneruma’ tenen, nedi nimi men kupmanto keca, kunupseng pen pel dopnedi, peten kemna keca men keipkusene,” pepu. 13 Upepudi adipapu aneng atapra, er nyapu cap gapung co pumbon wekra bungbeidi, mokon deiki banmaiyanen, mokon pirman ortara bei.

14 Sundi ‘Galilea mokon, atara di, ortara benkup’ tenen, Yesus er nyapu sun benkui taruda, sun jen keca roti kwanengda luproidi, weike men kipi. Luproiya cadi, roti kwaneng tenpupu kiprapidi, tali kange doupra, lupra gapung co wekra bungbei. 15 Gapung co deiki bukra banmai taruda, Yesusdi er nyapu 12 neng tep pepu. “Farisi neng cap, Raja Herodes cap, sun mali kunge kecada, roti kwaneng nena deiyo keca ^{▼▼Roti kwaneng nena deiyo kecada, tek sisi akapmar dinin, aupu pepkada, domon upu tep pepu. Roti kwaneng nena deiyo keca, er nongda, ‘Nimidi mali kuramenge keca weik kupbarura’ tenena tep pepu. Roti kwaneng nena deiyo keca meteka dipu dongopmengepa, nepbaramnanen, amendada aroti kwaneng bun keca ila di nerure. Ange utopu, nimidi mali kun keca meteka dipu kupbaramengepane, amenda taruda, sun pe, kikiman kunge nesala peda, mali pio weik kupbankamenge. Atep, ‘Farisi nengdi, sun mali kunge keca deiki di, ne nyapu peda mali kupra deipnung’ tenen, pepu.} utopu kurura tep, pio kalekra dinkurume. Sun moupra kalekra dinkurume,” pepu. Ada, sun Farisi neng cap, Raja Herodes capdi, kange dipru mali tenepra kuramenge ngeda, ‘Ne nyapu gekepmengedi, sun peda mali kupnung’ tenen, Yesusdi er nyapu tep aupu pepu.

“Nesaladi roti dana tep, roti kwaneng nena deiyo keca meteka dipu dopra, roti bun neitamai dongopmengepa, weika di embanmaryanen, aroti kwaneng ila di neramretopu, sun Farisi neng cap, Raja Herodes cap, kange dipru mali teneramenge upu gekepmumdi, sun kange dipru tenenange pe mali kweipserura tep, moupra kumumdi, sun upu men gekenkamrume,” pepu.

Ada, Farisi neng cap, Raja Herodes capdi, Yesus er kuramunge cap, upu peteremamunge capda, ‘Allah er Mi Sisa kuredi apel dorure’ tenen, ‘Teka men tenenkamep,’ teneramidi, Yesus tep, “Nimidi men kupmanto keca, kunupsek pen pel dopsetum pangeda, teka tenepketepe,” perami. Utenepra peramya cadi, Yesusdi er nyapu tep, “Moupra kunkamrume,” pepu. Deiyoda, sun Farisi neng cap, Raja Herodes cap, sun tenepra kuramenge ngeda, roti kwaneng nena deiyo keca weika di embaramretopu, ‘Sun mali kun keca weik kupbarur’ tenen, pepu. 16 Yesusdi roti kwaneng nena keca upu pepka tep, Yesus er nyapu gekepidi, moupra men tenepya tep, ‘Deiyo dan do?’ tenen, upu taledanmai. Upu taledanmaidi, “Ada nun roti jen keca men kipmapa tep, penmaserae,” tenepidi pepi.

17 Sun upu talepmai ngeda, Yesus gekepudi, sun tep pepu. “Sundi, ‘Roti kwaneng jen keca men kipmapa tep, penmasere,’ tenen, penmarumada, warya tep do? Sun asuru dina cap, amul gekena cap, pio gum cadi, moupra men tenipmarumdi kunmarum do? Sun dipru gat kupmasera deiki di, men gekepmanto neng kunmarum do? 18 Asuru cap, amul cap akapmaser dinin, moupra men dimumdi men gekerum do? Ne kupmasi ngeda, nongeda men teniprum di do? 19 Denge pio weik 5.000 neng wekmaipane, jen keca roti kwaneng pamu bari toprapsidi, karepsi pangeda, sundi ila bakul alen di, jen kwal yumada bulupraprumdi, ware kupra alen di kipra deiprum do?” pepra, Yesusdi er nyapu tep upepra asipetepu. Asipupa, sundi tamupra, upepi. “Nundi amul di utara, ila 12 bakul alen di bulupra kipra deipmupke,” pepi.

20 Upepipa, Yesusdi tamupra ka di ton cap asipetepu. “Denge weik 4.000 nimi wekmaipa jen keca roti kwaneng yoneitam baringe topra karepsipa, jepidi tapi ngeda, ila alen utopu keca, bakul alen di ware kupra kipra deiprum do?” pepra asipetepu. Asipetepupa, sundi tamupra, “Yoneitam bari bakul alen di bulupra kipra deipmupke,” pepi. 21 Upepipa, Yesusdi pepu, “Atep nengeda, ‘Allah er puto deiki dipu apel yuma dorure’ tenen, tupa men tenepmanerumdi, moupra men kael kepmarum do?” Yesusdi pepu.

Betsaida mutu di, asuru pun ngebo kwetepu upu

22 Ataruda, mokon deikipu upu pepbanmaiyanen, Betsaida mutu bei. Bei pangeda, amutu nengdi asuru puamu ngeboda, ‘Yesus er buru taleptudi kweteptu’ tenen, Yesus er damai duyaidi moropi. 23 Moropipa, Yesusdi angebopu buru talepdara, ati arum doramyaida tapra, bura tara beu. Beu dingeda, Yesusdi asuru puamu ngebo, er asuru bam bol deikida Yesus er silong tuleipu. Tuleipkopda, Yesusdi angebo nong deiki buru talepkopda, asipetepu. “Akeca-keca yuma epmarem do?” pepra asipetepu. 24 Asipetepupa, asuru puamu ngebodi, er asuru lapra dipetepudi pepu. “Nimi nongda epman dinino, kumanya yaredi, co bo longamretopu kunmangpa epmane,” pepu.

25 Upepu pangeda, Yesus ka di ton cap, angebo asuru deiki buru butene di deipu. Deipupa, adipapu angebo er asuru menmena telep kupupa, laproudi, akeca-keca yuma cap, nimi cap yumada, telep kupra dinmau. 26 Yesus angebo kwetepu dingeda, aupu ton pepu. “Ka di tamupra kan pe ati benkurum dinin, ila ati arum domidi nimi weik mutuda, lap men perbenkurume,” pepu.

Peterusdi Yesus tep, moupra kael kepudi lap pepu upu

(Matius 16:13-16; Lukas 9:18-20)

27 Amutu tapra welepidi, bisi mapbaramyanen, mutu si Kaisarea Filipi mutu bei. Bei dingeda, Yesus cap, er nyapu 12 neng capdi, amutu neitamai ati arum doramyai yuma peterep embarami. Amutu bisi mapembarami taruda, Yesusdi er nyapu tep asipetepu. “Yuk nengdi ne tep ware ngebo tenepra penenung do?” pepu. 28 Upepupa, sun yumadi tamupra pepi. “Ton nengda, ‘Yohanes Pembaptis kurure,’ pekenunge, ton neng dingeda, ‘Ada Allah upu lap peramu ngebo, nabi Elia kurure,’ pekenunge, ton neng dingeda, ‘Allah erdi dortaru kupkamre keca tep, lap pena deiyo ngebo nabi kurure,’ pekenunge,” pepi. 29 Upepipa, Yesusdi sun tep tamupra asipterepu. “Sunda, ne tep, ware ngebo tenenerumudi penerum do?” pepra asipetepu. Asipetepupa, Peterusdi tamupra pepu. “Gume naio, ‘Nesala ban-ban yuma neitamai, nesala weika di lyepredi sun dipru talenkamre’ tenen, Allahdi wepra deiamkeu ngebo, Mesias ^{▼▼Mesias – Yunani nengdi, Kristus perami. Ibrani nengdi Mesias perami. Dinino, nunda asi butene penupe. Aupu butene deiyoda, ‘Nesala Lyemna Deiyo Ngebo kunkamre’ tenen, Allahdi weiamu ngebo tep penupe. Tonda lap pena upu nomor 3 dinkurume.} pekenge ngebo, kanda Kristus kurume,” pepu. 30 Peterusdi upepupa, Yesusdi sun yuma tep pepu. “Angeda, yuk neng tep katuai men lap perbenkamrume. Angeda kapula,” pepra aupu moupra deipu.

Yesusdi er amenda popkaminge tep, lap pepu upu

(Matius 16:21-28; Lukas 9:22-27)

31 Yesusdi apepmau upu tep, moupra deipudi, er nong deiki ikin keca deipkaminge cap, kange mun keca kupkamunge cap tep, er nyapu 12 neng tep, gonga kepra peteremaudi pepu. “Neda Nimi Mi Sisa Utopu Ngebo kunune. Sun Yahudi yala neng sun deiyo neng cap, Allah karena tep deiyo neng cap, Musa sekeiamu upu peteremna deiyo neng cap, aneng yumadi ne tep tapnengedi, popkamnenge. Popnengepa depmanepane, peipnengopda, u weneri tumi konum kuprepaneda, ^{▼▼weneri tumi – Sun Yahudi yala nengdi, nungamitopu, ada Jumat lukunda cap, Sabtu lukunda cap, adinenda, Minggu tumi ipna taru konum berekrepa, ‘U weneri tumi konum kupre’ teneramidi perami. Sunda ange utopu nungamya cadi, “Ue weneri tumi,” perami.} ka di tamupra, Allahdi gam bukra deipkamnere,” Yesusdi pepu.

32 Aupu pepu ngeda, katuai di penmaupane, Peterusdi Yesus talepra yukai dubeudi, apenmau upu tep, wenepudi upu sekrou. 33 Peterus cap, Yesus cap yukai bereidi, Peterusdi upu sekroupa, Yesus tamupra, er upu gekepra dombarami neng tabenaprei atep, sun damai diudi, Peterus tep wenepra pepu. Peterus tep pepu. “Kanda ne amnyo tara keproyo. Ne men dinkukene. Kanda Kain Jen Ngebo utopu kunmareme. Allahdi putaprepa, tenerur keca gum dinin, tali nengdi putaprepa teneramengtopu, tenepmaremdi penmareme,” Yesusdi Peterus tep upepra wenepu.

34 Upepudi, er upu gekepra dombarami neng cap, abulupra wekmai neng yuma cap tep, “Ne damai yaso,” pepra aupu ton penmau. “Ware ner do, ware ngebo do yuma, ne domyakankamneng nengda, sun pe keca tepapu, ‘Ange mambule,’ men tenenkamenge. Sun popkameng nengdi, sengdin co dopra baramengtopu, sun pe gam kun kecapu men tenenkamenge. Yesus teka tenepmenga deiki yuk nengdi popmengopda, ‘Ada mambule,’ men tenenkamenge. Ne upupu gekepra domyakankamnenge. 35 Ange tep nengeda, ware ner do, ware ngebo do, sunda, ‘Nun gam kuna nun mawa,’ tenepra kuramenge nesalada, amenda depkamenge. Dinino, ne tep teka teneramenga deiki di, depkameng nesala cap, ne upu dopra peteremenga deiki di, popkameng nesala cap yumada, Allahdi sun tep ka di tamupra gam bukra deiprepa, pio tep gam kunkamenge.”

36 “Tenpu ngebodi, akeca-keca yala weik taleamtuane, deptudi, uku jen ban betuopda, er ataleamtu keca yumadi lyepmemetu do? Gume, akeca yumadi telep men kweipmemetue. 37 Sunda gam kuna deiyo kecada, wareto keca deiki di kunupra doproptum do? Gume, gam kuna deiyo kecada, pio men kunupmanto keca tepa. 38 Ukutaru kunge neng yumada, ukununge. Nimidi er pe domre ner tapra, yuk ner upula nyangamengtopu, ne tep teka tenena gum di, ne tep tapramnengedi yuk keca tep epra, domembangedi, pio mali-malipu kununge.

Ukununga tep, sun peda, sun aneng kankan kurumudi, ne nong cap, ne upu cap tep, ‘Yuk nengdi nun popsenung’ tenen, sun kware tep ali kupserepa, ne tep tapnemumnyopda, ne Nimi Mi Sisa Utopu Ngebodi amenda sirya taruda, sun pe tapkamsene. Ada, ne nai er urasin pio telep kuredi, dirine weik kurya utopu, ne peda utopu kupnyopda, Allahdi ketekepra deipupa, im deiki kunge neng, malaikat cap, wisipropmepyopda, tuai yankamep taru tep pepsene.” Yesusdi awekmai neng yuma tep pepu.