Mat 1 | XteSC | STEP | Asekeipkusen buku neitamaida, Yesus Kristus er co puna neng si sekusene. Yesus Kristus er apu boda, Daud. Daud er apu boda, Abraham.

Matthew 1

Matiusdi, Yesus er apu yapu tep, pepu upu

(Lukas 3:23-38)

1 Asekeipkusen buku neitamaida, Yesus Kristus er co puna neng si sekusene. Yesus Kristus er apu boda, Daud. Daud er apu boda, Abraham. 2 Abraham er mida, Isak. Isak er mida, Yakub. Yakub er nyapuda, Yehuda cap, er du yapu cap, deiamu. 3 Yehuda er nyapu butene Peres cap, Sera cap, sun nin sida Tamar. Peres er mida, Hesron. Hesron er mida, Ram. 4 Ram er mida, Aminadab. Aminadab er mida, Nahason. Nahason er mida, Salmon. 5 Salmon er mida, Boas. Boas er ninda, Rahab. Boas er mida, Obed. Obed er ninda, Rut. Obed er mida, Isai. 6 Isai erdi deipu mida, Daud deipu. Daudda, Israel nesala sun ila nimi deiyo ngebo tep, Raja Daud perami. Daud er mida, Salomo. Salomo er nin sida, Batsyeba. Ada, Uria domu ner dinin, depu taruda, Daud solu dakudi, Salomo deipu. 7 Salomo er mida, Rehabeam. Rehabeam er mida, Abia. Abia er mida, Asa. 8 Asa er mida, Yosafat. Yosafat er mida, Yoram. Yoram er mida, Uzia. 9 Uzia er mida, Yotam. Yotam er mida, Ahas. Ahas er mida, Hiskia. 10 Hiskia er mida, Manase. Manase er mida, Amon. Amon er mida, Yosia. 11 Yosia er nyapuda, Yekonya cap, er weit yapu cap, deiamu.

Anyapu deiamu taruda, ada Babel mutu nengdi Israel nesala popbisipidi, ateng koupra Babel mutu dubenamidi, tali pelpu dimamipa apelpu dorami. (2 Raja-Raja 24:8-16) 12 Apelpu pio doramipane, keteng tamun denge 70 konum kupkopda, ton tara Israel nesalada, sun pe Israel mutu tamupra bei. Tonda, Yekonya er mi Sealtiel deipu. Sealtiel er mida, Zerubabel deipu. 13 Zerubabel er mida, Abihud. Abihud er mida, Elyakim. Elyakim er mida, Asor deipu. 14 Asor er mida, Sadok. Sadok er mida, Akim. Akim er mida, Eliud deipu. 15 Eliud er mida, Eleasar. Eleasar er mida, Matan. Matan er mida, Yakub deipu. 16 Yakub er mida, Yusup. Yusupda Maria dopu. Maria dopupa kikiman men maramrei taru neitamai dipapu, Maria mundu doamuanen, Mariadi Yesus deipu. Ada, ‘Nimi ban-ban yuma dakunge nesala neitamai di, nesala weike lyepredi, sun dipru pio talenkamre’ tenen, Allahdi wepra deiamu ngebo tep, Kristus penunge.

17 Ange tep nengeda, Abrahamdi deipupa, dadeipdanen baramyanen, Daud deipu. Dauddi deipupa dadeipdanen baramyanen bena deipi neng dengeda, 14 kupi. Tonda, Dauddi deipupa, dadeipdanen baramipane, Babel mutu nengdi, Israel nesala ateng koupra dubei taru peda, kange di ton cap dadeipdanen baramyanen dengeda, 14 ton kupi. Utopu, Israel nesaladi, Babel mutu tapra, sun pe mutu tamupra bei taru di, adi dipdongopra dadeipdanen baramyanen, Yesus Kristus ^{▼▼Kristus – Yunani nengdi, Kristus perami. Ibrani nengdi Mesias perami. Dinino, nunda asi butene penupe. Aupu butene deiyoda, ‘Nesala Lyemna Deiyo Ngebo kunkamre’ tenen, Allahdi weiamu ngebo tep penupe. Tonda lap pena upu nomor 3 dinkurume.} deipu taruda, dadeipdanen baramyanen dengeda, 14 ton kupi. Yesus Kristus derinada, ‘Allahdi wepra deiputopu, tuai nesala yuma lyepredi sun dipru talenkamre’ tenen, deiamu.

Yesus deiprei taru tep seku upu

18 Yesus Kristus derin taru kupu kecada adano. Yusupdi, ‘Maria dopkamne’ tenen, mun konum peramu dinin, kapul men domudi, kikiman men kunmarei dipapu, Maria mundu doupu. Maria mundu doupkada, Allah er Lek Sambaladi puto karepka deiki di mundu doupu. 19 Yusupda, Musa sekeiamu upu gekepra pio dumsisipu kuramnga cadi, nimi yumadi, ‘Anerda mali ner tenepnung’ tenen, ‘Nimi gekenai aner tamna tep, nedi lap men pepkune. Aner tep iniptapkamane,’ tenepu. 20 Utenepu dinin, Yusup akeca tep, dipru ikin kange doupra tupa mapmau taruda, Allah er im deiki pel don ngebo malaikatdi, Yusup er kene mapka deiki di yana lap pepu.

“Daud er yala nengdi deipkeu ngebo, Yusupo, Maria er mundu doupkada, nimidi guma. Allah er Lek Sambala puto deiki di mundu doupke.

Ange tep nengeda, kan kwar dangna gume. Maria tali lupra dopkamreme. 21 Mariadi sal mi deipkamre. Deipyopda, er si Yesus penkamrume. Yesus pepkamruma deiyoda, ‘Erda Nimi Lyemna Ngebo kurure’ tenena tep penkamrume. Allah er nyapu yuma sun mali kunge keca cap, mali tenenge keca cap tep, ‘Allahdi wenepra poprur’ tenen, Yesusdi akeca yuma gum kupra deipredi, nesala weika di lyepkamra tep, ami er si Yesus ^{▼▼Yesus – Yunani nengdi, Yesus perami dinin, Ibrani nengdi asi tep Yosua penunge. Asida, butene dinin, er deiyoda tenpu. Ada, ‘Allah Yahwehdi nimi lyemserure’ tenen, asi penunge.} penkamrume.” Malaikatdi Yusup tep pepu.

22 Uda, Maria nimi dona gum dipapu, Allah er Lek Sambala puto deiki di mundu doupkada, Allahdi peipupa, er upu lap peramu ngebo nabi ^{▼▼Nabi, Allah er upu lap pena nengda, Allahdi ‘Nimi gekepkameng’ tenen, erdi wepra deiamu neng tep, er upu lap pepu pangeda, anengdi, yuk nesala yuma tep lap perbarami. Anengda nabi neng penupe. Nabi neng, sun lap pena upuda, nomor 25 dirume.} Yesayadi pediramutopu kupkamua tep, kupu. 23 Yesayadi pediramu upuda ake.
‘Nimi dona gum kaber nerdi, mundu douamya sal mi deipkamre. Deipre pangeda, er sida, Imanuel penkamenge. Imanuel penkamenga deiyoda, ‘Allah cap, nun cap, tonpa dipru dukdongopra kunup ngebo’ tenen, penkamenge.’ (Yesaya 7:14)

24 Malaikatdi aupu peipupa gekepudi, Yusup buku dingeda, amalaikatdi, “Ukupkurume,” peipmautopu, Yusupdi Maria dopupa, sun kikiman kuramrei. 25 Yusupdi Maria domu dinin, aner cap uruna kuna gum dipapu, Allah er Sambala puto deiki dipapu Maria mundu dopudi, sal mi deipu. Sal mi deipu pangeda, Yusupdi, “Ami er sida Yesus,” pepu.