Mat 11 | XteSC | STEP | Yesusdi ne upu dopra, ‘Peterep embankameng’ tenen, wepra deiamu neng, sun 12 neng tep, aupu yuma pepudi, konum peterepu dingeda, amutu tapra, Galilea tara neitamai ati arum doramyai yuma, er upu peterep embarami.

Matthew 11

Yesusdi Yohanes tep doproipu upu

(Lukas 7:18-35)

1 Yesusdi ne upu dopra, ‘Peterep embankameng’ tenen, wepra deiamu neng, sun 12 neng tep, aupu yuma pepudi, konum peterepu dingeda, amutu tapra, Galilea tara neitamai ati arum doramyai yuma, er upu peterep embarami. 2 Yesusdi peteremamunge cap, kuramunge capda, yuk neng tep lap peramipa, Yohanesdi gekepu. Ada, teka tenerami nesala me dongoramu ngebo dinin, Roma mutu deiyo ngebodi, wenemna ati pumbon dongopu ngebo, Yohanes Pembaptis, erdi Yesus kuramu keca gekepudi, er melimna neng tep, aupu pepu. “Sunda, Yesus damai bemumdi, aupuda asipeteprume. ‘Nabi-nabi nengdi, ‘Nesala ban-ban yuma neitamai di, nesala weik lyepredi, sun dipru talenkamre ngebo yankamre,’ peramsei ngeboda, kan konum do? Yuk ngebo ton amenda taru yankamser do?’ pepra, Yesus tep asipetep benkurume,” Yohanesdi pepu. 3 Upepupa, er melimna nengdi, Yesus damai bena asipetepipa, Yesusdi tamupra aneng tep pepu.

4 “Sun amul di gekemum keca cap, asuru di dimum keca cap, Yohanes damai jenek lap perbenkurume. 5 Bemumdi upepkamrume. ‘Asuru puamre nesala perengdiprepa, dinunge. Ai bungamenge nesala kweterepa, embanunge. Kot susu utopu susu jeramre nesala kweterepa kaingrure. Amul kiniamre nesala pakeiprepa gekenunge. Konum depmange nesala gam bungdirure. Tonda nimi lyemna tep, ‘Allah er kai telep upu tali kankan kunge nesala gekenkameng’ tenen, peteremrepa gekenunge.’ 6 Ware ngebo do yuma, ne kune keca epredi, gekepya deiki di, kange boktoprepa men tenimtopredi, ne men tapkamner ngeboda, teleppu kunkamre. Atep ne pepmasen upu dopra, Yohanes damai perberume,” Yesusdi, Yohanes er melimna neng tep pepu.

7 Upepupa, Yohanes er melimna neng gekepidi bei pangeda, Yesusdi er damai wekmai neng tep, aupu pepu.

Yohanesda, me gum tep nimi men kunung mutu neitamai kuramudi Yohanes peteremamupa, gekerbaramumada, ware keca ‘Epkamep’ tenen, dirbaramrum do? ‘Kumanya embaredi mutmuta longamrepa epkup’ tenen, dirbaramrum do? 8 Agum dingeda, ware keca ‘Epkup’ tenen, dirbaramrum do? ‘Tenpu ngebo pio telep opkal kenekra kurepa epkup’ tenen, dirbaramrum do? Gume, pio telep opkal kenengmenge nengda, ila nimi deiyo neng, Raja neng sun atipu kununge. 9 Gum dingeda, sundi, ‘Allah upu jenek pen ngebo, nabi epkup’ tenen, dirbaramrum do? Tek sisi pepsene. Ukupra tenepmum dingeda, Allah upu jenek pen ngebo nabi diramrume. Dinino, Yohanesda, yuk Allah upu jenek pena neng utopu men kurure. Sunda yambul mambul neng dinin, Yohanesda, ila mambul ngebo kurure.

10 Pumun di Allah upu lap peramu ngebo, nabi Maleakidi angebo Yohanes tep, upepu. ‘Ne upu kai pedin ngebo yankamre’ tenen, aupu sekamu. Allahdi peipupa, nabi Maleaki sekeiamu upuda ake.
‘Allahdi pepu. Ne upu kai pedin ngebo ^{▼▼upu kai pedin ngebo – Aupu deiyoda ake. Upu kai pedin ngebo pepkada, Yohanes tep pepu. Bisi ketenem dina pepu ngeda, ada Yesus upu gekenkameng nesaladi, sun mali kunge keca tapkamenge nge tep pepu. Tonda, bisi benkamre ngeboda, ada nimi Lyemna Deiyo Ngebo Yesus tep pepu.} menmena dokotepnepa, kai benamrepane, kan amenda benkamrume. Ne upu kai pedin ngebodi, kan benkamrum bisida, keteneipkamkere.’ Allahdi pepu. (Maleaki 3:1)

Maleaki sekeiamu upu dopra konum, pepsene. Yesusdi pepu.

11 Yesusdi upepu dingeda, aupu ton dukdongopra pepu. “Ange tep nengeda, ne tek sisi pepsene. Pumun taru di dipra ukutaru yuma, kupyakange nerapu yumadi derirami nyapu yumada, yambul mambul kurami dinin, teka tenenge nesala dopra, me dongorur ngebo Yohanespuda, ila mambul ngebo kurure. Yuk neng yumada, er mambul weik kuramretopu neng ton men kununge. Dinino, nesala dopra me dongoramu ngebo Yohanes tep nengeda, Allah er kangeda, ‘Erda, yambul mambul ngebo,’ tenerure. Ada, ne nimi Lyemna Deiyo Ngebo tuai mutu kapul men yasi taru di, ne yakana tep, Yohanesdi ne kai pedin ngebo kurura tep, erda ila mambul ngebo kurure.

Upepmasen dinino, ukutaru dipra, dorkunkamre taru yumada, Allahdi nesala weik lyepredi, sun dipru talenkamre taru wekameng neng neitamaida, yuk nengdi anesala yuma tep, ‘Ila mambule,’ pio men tenenunge. ‘Anengda mambule,’ men tenenung dinino, ne tek sisi pepsene. Allah er kangeda, ‘Im deiki welepkameng nesala yumada, ila mambul nesala kununge. Yohanesda yambul mambul pua,’ tenerure. ‘Yohanesda, telep pel dorur dinin, erda yambul mambule,’ tenerure. ^{▼▼Yohanes yambul mambule – Ukutaruda, Yesus upu cap, Yesus kuramu keca cap deiki di, teka tenepmepyopda, Allah lyepseredi, nun dipru talenkamsere. Allah cap kikiman pio kunkameng nesala yumada, ila mambule. Allah er pelpu dinin, tuai mutu pel donge nesalada, nabi neng peda, yambul mambule. Dinin, Allahdi, ‘Im deiki dubenkamre nesalada, ila mambule,’ tenerure.} Deiyoda, tuai pel donge ngeda, yambul mambul dinin, im deiki welerbanada, ila mambul tep pepsene.” Yesusdi pepu.

12 Yohanes Pembaptis, Allah upu gonga kepra peterepu taru di dipra, ukutaru yumada, Allah teka tenena gum nengdi, Allah teka tenena neng tep, sun nong deiki ikin keca weik derinunge. Ukunungada, ‘Allahdi nesala weik lyepredi, sun dipru talenkamre taru men kupkamre’ tenen, kununge. Dinino, ukupmenga peda, Allah tep teka tenenge neng tupa weik kupbanmange. Tonda, weik ton cap kupbankamenge.

13 Musa sekeiamu upu cap, Allah upu jenek kupra, lap perami nengdi, pedirami upu yuma cap deiki di, ‘Allahdi amenda taru ukunkamre, ukunkamre,’ pepra pedirami. ^{▼▼pedirami upu – Nabi-nabi nengdi pedirami upu nong neitamai ngeda, ake. Ada, Allahdi nesala weik lyepredi, sun dipru talenkamre ngebo, Mesias yankamre taru cap, Yesusdi kunkamre keca cap tep, ‘Amenda taru Mesias ngebo yaredi ukunkamre’ tenen, pedirami. Sirya taru pedina ngeboda, Yohanes Pembaptis. Erdi peramu taru neitamaida, Mesias ngebo Yesusda, tek sisi yaue.} Sundi aupu pediramipanen siryada, Yohanes yau. 14 ‘Sun Allah upu jenek perami nengdi pedirami upu gekepra, teka teneptepe,’ tenepmum dingeda, apepkusen upu ton teka tenepkurume. Ada, nabi-nabi nengdi, ‘Amenda taru Elia utopu ngebo yankamre,’ pedirami ngeboda, ada nesala me dongoramu ngebo, er Yohanes tep, aupu pedirami. Elia utopu ngeboda, Yohanes tepa. ^{▼▼Maleaki 3:1} 15 Sun amul akwapmaserepa, ne pepmasen upu gekepmanto nesalada, ‘Aupu nong neitamainge, deiyo ace’ tenen, moupra gekenkurume. 16 Sun ton tenipetepso. Ataru kumum nengda, sun kumum keca utopu keca tep, ukupmanto upu pepkusene. Sunda, nesala jen keca bulupra deipmengedi, kunumamengaida, nyapu bupra bukmengedi, esu peramengtopu kurume. Ton nyapudi yuk nyapu tep, upenunge.

17 “Uo, ‘Kange deipra mut penkamep’ tenen, bung-bung pena utopu keca penmap pane, sun dabale tep tapmaserumpa, nun cap mut men penmape. Utopu, nesala depmengepa, mut pengedi engeramengtopu, ‘Nun ton esu pepra engepkamepe’ tenen, mut pepra engenmapupa, sun dabale tep, tapmaserumpa, nun cap men engepmape. ‘Nundi ukupkupe,’ tenepmepe keca yumada, sun dabale tep, tamserume.” Anyapudi, sun kayapu tep penunge.

18 Anyapu dabale kurepa, tamamengtopu, sun peda utopu kurume. Atep, Yohanesda, jena telep keca, roti kwaneng cap, anggur me kange yawaramrenge cap, pio men jeramu dinin, sun teka tenena gum nengdi, er Yohanes tep, “Angeboda, isokdi er dipru talerepa kurure,” penunge.

19 Dinino, Yohanesdi ange kuramutopu, ne Yesusdi men kunune. Neda, Nimi Mi Sisa Utopu Ngebodi jena telep keca cap, anggur me kange yawaramrenge cap, jepra kunun dinin, sundi ne tep teka men tenenenung nengdi, “Angebo Yesusda, jen pio jerur ngebo kurure. Erda, kange yawaramne me pio jerur ngebo kurure. Atep, erda mali ngebo kurure. Tonda, angebo Yesusdi, ‘Amutu talena deiyo neng, Roma mutu nengdi dopropkameng’ tenen, pajak co bo bupra derirameng neng cap, mali-mali kunge neng cap, Yesus cap, aneng cap, kikiman kurure. Ange yuma kurura tep nengeda, pio mali kurure,” penenunge.

Ne tep teka tenena gum nengdi, aupu penenunge. Dinino, ne tek sisi pepsene. Ila kael nengdi telep kunge keca tep, yuk walwal nengdi, “Angeda tali,” penung dinin, amenda taruda, sun ila kael nengdi kunge keca nong konum kuprepa, katuai kupyopda, nimi yumadi, ‘E sunda telep kuramye,’ tenen, kael kemnunge. Ange utopu, teka tenena gum nengdi ne tep, “Erda malipu kurure,” pepra, mali upu penenung dinino, ne cap, amali kun nesala cap, kikiman kunmapyanen, amenda taruda, ne upu teka tenepmengedi, sun mali kun keca tapra, dumsisipu kungepa, epmumyopda, kael kepkamrume. Ne pel done keca nong kepre taru dipapu kael kepkamrume. Nedi anesala cap kikiman kunupada, telepe pua. Yesusdi pepu.

Yesusdi er tep teka tenena gum neng tep wenepu upu

(Lukas 10:13-15)

20 Yesusdi amutu-mutu yuma peterep embaramu taruda, nimi men kupmanto pel cap, kunupsek pen pel cap, weika di doramu dinin, amutu nesalada, sun mali kun keca tamna gum di, er tep teka men tenepi. Ange tep nengeda, er mambul pel doramupa dirami nesala tep, gonga kepra wenemau. Wenepudi, aupu pepu.

21 Sun Korasin mutu kumum neng cap, Betsaida mutu kumum neng cap, Allahdi wenepra popkamsera tep, sun bicaue. Sundi, ‘Uo,’ tenepra, mambul kange dounkamrume. Sun diramrumpa, sun mutu neitamai nimi men kupmanto keca, kunupsek pen pel cap, nimi men kupmanto keca pel cap doramsada, Tirus mutu cap, Sidon mutu cap, neitamai pel doramtenetoda, sun amutu butene kunge neng yumadi, mambul kange douramtengedi, sun mali kun keca tapra amnyo karikra, ne tep konum teka teneramnetenge. Dinin, amutu butene neitamaida, apel men doramsipa, akeca yuma men diramya tep, teka men tenepnei.

22 Dinino, ne tek sisi pepsene, sun amutu kurum nesalada, ne mambul pel donepa, akeca-keca yuma dirum neng cadi, sirya taru Allahdi nesala yuma tep bokra deipredi, nesala yuma wenepkamre taruda, Tirus mutu neng cap, Sidon mutu neng capda, yambula dipu wenepkamre. Dinino, ataru kumum nesala yumada, sundi ne tep, ‘Angeboda nun songe,’ tenepra, tamnerum nengpuda, pio ila di wenepkamsere. 23 Sun Kapernaum mutu neitamai kumum nesalada, ‘Nun telep neng cadi, Allahdi erepra im deiki deipserepa, im deikipu kunkamepe,’ tenedanmarum do? Gume, Allahdi wenepra uku jen ban donokserepa, uku di jepra gawal dakamsere. Sun Kapernaum mutu nengda, sun diramrumpa, sun mutu neitamai kuramsidi, nimi men kupmanto keca, mambul pel doramsi dinin, teka men tenenerume. Dinino, amambul pelda, Sodom mutu neitamai doramtenepa, diramtenge teptoda, Sodom mutu kurami nesaladi, “Uo, nun tek sisi mali kunupe,” peptengedi, sun mali mali opkal kenengamtengedi, uku sikke neitamai bukmatengedi, sun mali keca tamamtenge.’ ^{▼▼tamamtenge – Yunani upu deiki di, upepra seki. Ada Israel yala nesaladi mambul kange doupra kurami keca tep pepu dinin, aupu pepunge deiyoda, ake. Ada, ‘Sun mali kunange yuma tamamtengedi, ne tep teka teneamnetenge’ tenena tep, aupu pepu. Dinino, teka men tenepya tep, Allahdi anesala konum wenepra poptapupa, sun gum kupye. Sun kael kemna tep, nundi aupu deiyo, nong neitamai ngepu acapu sekmepu.} ne tep teka teneramnetengepa, gam tupa kuramtenge.

24 Ange tep nengeda, ne tek sisi pepsene. Allahdi nesala yuma, sun mali kurami keca tep, upu bokra deipredi wenepkamre taruda, Sodom mutu kurami nesalada, mali weik kurami dinin, Allahdi anesala tep yambula dipu wenepkamre. Dinino, sun ataru kurumu nesalapuda, nedi nimi men kupmanto keca cap, kunupsek pen pel cap, mambul pel weika di doramsipa, diramrum dinin, tupa men teka teneneruma tep, Allahdi ila ikin keca deipseredi, ila yu di wenepra poptapkamsere. Yesusdi sun Kapernaum mutu nesala tep pepu.

Yesusdi, “Ne kune kecada kael kepnerume,” pepu upu

(Lukas 10:21-22)

25 Yesusdi aupu yuma konum pepu dingeda, er nai Allah tep moronmaua deiki di, aupu ton pepu. “Ne nai, kanda im deiki cap, tuai mutu yuma cap, talepmumdi, akeca yuma deiki tara ila deiyo ngebo kuruma cadi, nedi kan tep, ‘Telepe,’ pepra, kan si erepra moropkene. Tonda, kandi pesemem upu deiyo neitamai ngeda, ‘Kael kemna kanam neng cap, ila kael kemna neng capdi, kael kepkameng’ tenen, kandi aupu deiyonge inimrum dinin, metek nyapu utopu kungedi, dipru bouna di amu kepra kunge neng tep, deiyo neitamai ngeda, jenek kupra lap peserume. 26 Teka ne nai, kandi ukumem ngeda, ‘Ukupkamne,’ tenemumtopu kuruma tep, akeca di kan dipru kange derikerure. Atep telepe pepkene,” pepra, Yesus Allah moronmaua deiki di, aupu pepu.

27 Allah moropu dingeda, er upu gekenmai neng tep aupu pepu.

Ne nai Allahdi, ‘Ne mi Yesusda, akeca-keca yuma talepra kuna deiyo ngebo kunkamre’ tenen, konum karepneue. Nesala yuma tenpu ngebo peda, Allah er Mi Sisadi, kange dipru neitamai tenerur kecada, nimidi men kael keptenge. Allah er Mi Sisa kange dipru neitamai kure keca yumada, Allah er dipapu kael kemrure. Nesala yuma tenpu ngebo ton, ne nai Allah, er kange dipru neitamai tenerur kecada, men kael keptenge. Ne nai Allah, er kange dipru neitamai kure kecada, tuai nesaladi ton, men kael kemnung dinin, ne er Mi Sisa puda, ne kael kemnune. Tonda, ‘Nedi peterepnepa, ne nai kure keca kael kepkameng’ tenen, wepra deipsi nengpu, ne nai Allahdi tenerur keca yuma kael keptenge. 28 Sun kange mun kange doupra kurum nesala cap, nong beipye kusere nesala cap, ikin kange doupra kumum nesala cap, sundi kange mun kuserur keca yuma, ne nong deiki deipnemumdi, moropnemum pangeda, nedi melimsenepa, ikin kange douna gum di, telep kupra deipsenepa, kange deipra kunkamrume.

29 Neda dipru kange eremna gum, bouna di kunun ngebo cadi, ne pesene upu cap, ne kune keca yuma cap, gekepra kael kepmum dingeda, ne kunetopu sun peda, bouna di kunkamrume. Ukupra kumum pangeda, sun kange mun kusere keca yuma, pio gum kupserepa, telep kangepu doupra kunkamrume. 30 Nedi, ‘Ukupkameng’ tenen, pesene upu cap, nedi pesenepa, pel donkamrumnge yuma capda, kanampu cadi, ne tep teka tenepra domyakankamnerume. Yesusdi pepu.