Mat 13 | XteSC | STEP | Atumi dipapu Yesusdi akati tapra beudi, Galilea mokon damai bena bukra peteremau.

Matthew 13

Yesusdi tenpu ngebo yal keca gwekbanmaua tep, pepu upu

(Markus 4:1-20; Lukas 8:4-15)

1 Atumi dipapu Yesusdi akati tapra beudi, Galilea mokon damai bena bukra peteremau. 2 Peteremaupane, er damai yana wekmai nengda, gung pio weike bulupra yanmaiya tep, Yesusda mokon deiki kupkupai, gapung co deiki bukmaudi, amokon pirman sisa tekra wekmai nesala tep, er upu peteremau. 3 Peteremau taru, domon upu ton weika di peteremau. Apeteremau domon upu neitamaida, aupu ton pepu.

4 Sun gekepso, tenpu tumi nimi tenpu ngebodi wa pepra, yal keca gwekbanmau. Er yal keca gwekbanmaupane, ton yal kecada, er gwekbanmau bisi neitamai sakmau. Saka kapmaupane, tali ma yaidi, yana ayal keca bupra jepropi. 5 Yal kecada, ton gwekbanmaupane, gel deiki dinin, mirin tu metekanun kwamngai saku. Sakudi dakupmaupane, mirin tu metekanunpu kwamngai cadi, menmena paku. 6 Paku dinino, yaten tuai telep kupra men kwerepmanto kupka tep, keteng yana dopupa, keteng bupu di, gelal sepra kolupropu.

7 Atarupu dinin, ton yal kecada, gwekbanmaupane, tepmeng kweiyong-kweiyong palpal neitamai di saku. Dakuamnganen, bolokmau dinin, tepmeng kweiyong-kweiyong erepropudi, aboloku keca koupdongopudi, wein kepdongopupa, nene peramu. Nene peramnga cadi, du men mouramu. 8 Angeda du men mouramu dinin, tenpu yal keca ton gwekbanmau ngeda, mirin tu telepai saku. Mirin tu deiki saku ngeda, bongopra nepu pangeda, du telep kupra mouramu. Yal keca tenpu-tenpu saku dinin, adu tenpu di bongopudi mouramngada, ton ngeda 30 moupu, ton ngeda 60 moupu, ton ngeda 100 moupu. Yesusdi pepu. 9 Yesusdi adomon upu pepu dingeda, aupu ton pepu. “Sun amul akwapserepa, ‘Aupu deiyo ake’ tenen, gekepmanto nesalada, gekenkurume,” pepu.

10 Aupu konum pepkopda, amenda Yesus er yuk kunmau taru, Yesus erdi wepra deipu neng, 12 nengdi, er damai yana asipetepi. “Naio, tali yuk nesala tep domon upu deiki di pememnyada, warya tep do?” pepra asipetepi. 11 Asipetepipa, Yesusdi tamupra pepu.

“Allahdi nesala weik lyepredi, sun dipru neitamai talenkamre,” pesene upuda, Allahdi peipneutopu, ne nyapu sun tep nong neitamainge yuma lap pesenune. Dinino, yuk tali nesala tep nengeda, ne upu moupra teka tenepra, men gekenenunga tep, anesala tep domon upu di, bol deikingepu penune. 12 Ware nesala do yuma, Allah upu gekena tep, Allahdi kael kemna deiyo keca kareprepa, moupra gekengedi, angeda tamna gum di, talepra kunge nesalada, Allahdi kael kemna deiyo keca weika di tapakra karerepa, weika di kael kepbankamenge. Dinino, ware neng do yuma, ‘Aupu ne songe,’ tenepra, amul deiki gekertamengedi, Allah upu men talepra kunge nesalada, sun men di yambula dipu kael kemaminge peda, gum kupkamre.

13 Anesala tep domon upu deiki dipu penunada, deiyo pepkusene. Ada,
‘Ne kune kecada, dininung dinin, ‘Deiyo ake,’ tenepra men kael kemnunge. Ne pene upuda, bol deikingepu amul deiki dipu gekenung dinin, ‘Deiyo ake’ tenen, moupra men gekenunge. Dabal tep, tali gekertamnunge.’ (Yesaya 6:9)

14 Sun ukunungada, Allah upu jenek peramu ngebo, nabi Yesayadi ‘Ukunkameng’ tenen, peramutopu kununge. Yesaya peramu upu adano.
‘Amul di tali gekertamkamrum dinin, nong neitamai deiyo ngeda, pio gekepra men kael kemkamrume. Asuru di bol deikingepu dinkamrum dinin, ‘Deiyo ake,’ tenepra, pio men kael kemkamrume. 15 Sun ukunkameng nengda, tali tep gume. Sun dipru song kurepa, gekena dabal tenepra kununge. Ukununga cadi, anesalada ne upu dabal-dabal di metekanunpu gekenunge. Sun dipru song kurepa, nesala asuru nira tara diramengtopu kupra kununge.
Ange yuma men kuramtenge teptoda, asuru di telep kupra diramtenge. Tonda amul di telep kupra gekeramtenge. Sun kange dipru neitamai di, ‘Aupu nong neitamai deiyo ngeda, ake’ tenen, telep kupra kael kemamtenge. Sun kange dipru telep kupra kael kemamtenge teptoda, sun mali kunge keca tapra, amnyo karikra, ne tara kepronetengepa, nedi sun tep telep kudiramtene.’ (Yesaya 6:9-10)

Yesayadi peramutopu anengda, ukununge pepsene. Yesusdi er nyapu tep pepu.

16 Yesus aupu pepu dingeda, aupu ton cap pepu. “Dinino, sun aneng kungetopu, sun ne nyapuda, ange men kunkamrume. Ne nyapu sunda, asuru di telep kupra dirume. Sun ukutaru kumumdi, ne done pel yuma dimum nesalada, sundi akeca-keca yuma, pio mambul keca diruma tep, sunda pio mambule. Atep, pio telep kange doupra kunkamrume. Sun amul di telep kupra gekenerume. Atep, sunda pio teleppu kange deipra kunkamrume.

17 Ne tek sisi pepsene. Allah upu jenek perami nabi-nabi neng weik cap, dumsisikra kurami neng weik cap, sun dimum kecada, pio putaramupa, ‘Uo ange eptepe,’ tenerami dinin, men dirami. Tonda, ne nyapu sun gekemum upuda, pumun taru kurami nesala pio putaramupa, ‘Uo ange gekeptepe,’ tenerami dinin, men gekerami. Atep, ukutaru sun telep kupra gekena cap, dina cap kumum neng sunda, mambul cadi, teleppu kange deipra kunkamrume. Allahdi telep kudinkamsere.” Yesusdi er nyapu sun 12 neng tep pepu.

18 Upepu dingeda, aupu ton dukdongopra pepu.

Sunda telep kupra gekenerum neng cadi, yal keca yamupra gwekembanmau ngebo, pepmanu upuda, deiyo lap pepkusene. Adomon upu pepmasenuada, nong neitamai ngeda, katuai lap pepkusene. 19 Uda, yal keca gwekbanmaupane, bisi neitamai sakmau ngeda, Allah upu peterepmengepa, yuk nesaladi, ‘Gekepkupe,’ tenepmenge dinin, moupra men gekepmengepane, Kain Jen Ngebo, mali kun keca deiyo ngebodi, adipapu sun dipru neitamai di, aupu dalupra dororure. Dororepa anesala teka men tenenunge.

20 Ton nesalada, yal keca gel deiki sakmautopu, Allah upu peterepmengepa gekepmengedi, teka tenepra kange deipra, adipapu aupu doronunge. 21 Doronung dinin, yal keca yaten tuai telep kupra men kwerepmanto kupmaupa, kolupka utopu, anesalada, Allah upu pio talepnurupra men dorongedi, menmena yamdongonunge. Ada, teka tenenge nesala tep, yuk nengdi yu kuprepa, ikin keca sun nong deiki derinunge. Tonda, yuk ikin keca yare pangeda, anesaladi mambul kange doupra, Allah upu gekeramenge ngeda, adipapu yamdongonunge.

22 Ton nesalada, Allah upu gekepra doronung dinin, yal keca tepmeng kweiyong-kweiyong palpal sakmaunge utopu kununge. Ada, tuai mutu neitamai di, ‘Akeca doproptenedi, telep kuptene do, yuk keca akapnetupa telep kuptene do?’ tenen, tenimtongedi kange boktopya deiki di, Allah upu tamdongonunge. Tonda, “Bunga weik doproptene teptoda, teleppu kuptene,” pepra, sundi sun pe tep, mok upu tali pertamdanunge. Tonda, akeca yala-yala yuma weik putarepa, ‘Ange ton kuptene. Akeca ton doproptene’ tenenga deiki di, dabal kuprepa Allah upu yuma tamdongonunge. Angeda, tepmeng kweiyong-kweiyong di aboloku keca koupdongopudi, wein kepdongopupa, nene peramutopu, tuai keca yala-yala yuma pio teneramenga deiki di, Allah upu gekeramenge ngeda, tapmengepa, du men mouredi, talipu kurure. Ada, telep kupra men gekengedi, Allah upu pio men dombanunga neng tep pepsene.

23 Anesala yuma ukunung dinin, yuk nesalada, yal keca yamupra gwekbanmaupane, mirin tu sakmaunge bongopra, du weika di moupu. Moupu ngeda, ton 30, ton 60, tonda denge weik 100 mouputopu kununge. Sunda, Allah upu gekepmengedi, teka tenen, kange deipra, pio dororameng nesalada, yal keca du weika di mouputopu, ne tep domyakanenge nengda, Allah er pel weika di donunge. Yesusdi er nyapu tep pepu.

Yesus domon upu deiki di, telep keca cap, tali paramre keca cap, bongopka tep, pepu upu

24 Aupu pepu dingeda, domon upu tenpu ton pepu.

Allahdi nesala ban-ban yuma kunga kan-kan di, nimi weik lyepredi sun dipru taleryada, apepkusen keca utopu kurure. Ada, wa pena deiyo ngebodi, wa peprap telep yal keca boloku. 25 Boloku dingeda, er cap, yuk neng cap, mapmai taruda, er tep song tenerami nengdi, er telep yal keca wa pepra bolokmauai, yuk tali paramre keca yana turukra bolokidi, yukai bei. 26 Sun ukupra dakuramipane, er boloku keca bongopudi, weleramnganen, kait popra muru kepudi, du moupu. Muru kepu pangeda, tali nengdi turukra bolokami keca weleramnganen, kait popra, muru kepudi, du moupra katuai kupu.

27 Atali paramre keca du moupudi, jenek kupu pangeda, awa deiyo ngebo, er wa pel melimna nengdi, er tep pepi. “Naio, tali bongopu kecada, dan tara di yau do? Kandi telep yal keca men kouamumpa, mali yal keca bongopu do?” pepi. 28 Upepipa, awa deiyo ngebodi tamupra pepu. “Angeda gume. Ne tep songe tenenenge nengdi bolokipa, bongopka,” pepu. Upepu pangeda, er melimna nengdi pepi. “Atep, nun bepedi atali paramre keca yuma kweneptapkup do?” pepi. 29 Upepipa, erdi tamupra pepu. “Gume, malinge kwenemum taruda, nedi telepnge koupsa cap, mangkau di kweneptaprum tep, ange yuma dakuamrepane wisipre tarupu, malinge yumada, kwenepkamepe. 30 Dakuamrepane, telepnge cap, malinge cap, wisiprepa, dakra kipkamep taru dipapu, ne melimna neng tep upepkamne, ‘Sunda tali paramre keca kweneprapmumdi, koupra uku dongopkamrume. Ukupmum dingeda, telepnge yuma bupra, ne jen keca derin ati deriryankamnerume.’ Upepkamane,” pepra, wa deiyo ngebodi pepu.

Yesusdi Galilea mokon damai bukmaudi, nesala weik bulupra wekmai neng tep adomon upu pepu.

Yesusdi, “Pio metek co du dinin, bongopredi ila co nerure,” pepu upu

(Markus 4:30-32; Lukas 13:18-21)

31 Yesusdi ukupmanto upu pepu dingeda, aweka gekenmai neng tep, ukupmanto upu ton cap, dukdongopra pepu. “Allahdi nesala weik lyepredi, sun dipru talenkamrada, ‘Sun tenepra kael kepkurum’ tenen, ukupmanto upu ton pepkusene. Lyesa co du ^{▼▼Lyesa co du – Pumun taru seki buku neitamaida, lyesa du men seki. Akecada, sun mutu men kwamu. Sundi seki ngeda, pio metek du, betei du utopu keca tenepidi seki. Dinino, akeca kouamipa, ila co nepka cadi, sun Ketengban nesala moupra tenena tep nengeda, ukupmantonge tep, lyesa co du sekmepu. Deiyoda, du kecada, pio metek dinin, amenda taru nepbaramyanen, nepra tengamre coda, ila lyom co tengrura tep pepu. Allah upuda, metek utopu keca dinin, amendada nimi pio weika di teka tenepmengyopda, Allah er nyapudi, pel weik kupbankamenge. Ukupmenga deiki di, yuk nesala ton teka tenepmengopda, Allah er nyapu tapakmengedi, weik ton cap kupbankamenge.} pio metek dinin, ila neramretopu, Allahdi nesala weik lyepredi, sun dipru talenkamre ngeda, weik kupbankamre. 32 Lyesa co du, metek du di bolokmengepane, pakredi nepbaramyanen, nepra teru ila di kwakyopda, ateru deikida, ma yala-yala yuma, sun kalai tep, bungyangedi, manunge. Aco duda yambul du kurur dinin, adu bolongredi, acoda ila di nerure. Angetopu, Allahdi nesala weike lyepredi, sun dipru talenkamre ngeda, gonga kemna taruda, metekpu kurur dinin, pio weik kupbankamre.” Yesusdi pepu.

33 Aupu pepu ngeda, ‘Allahdi nesala weik lyepredi, sun dipru talenkamre ngeda, weik kupkamre ngeda, kael kepkameng’ tenen, ukupmanto upu ton pepu.

“Roti kwaneng nena deiyo kecada, er sida ragi, pio metek kecapu kurur dinin, akeca roti kwaneng bun deipmengepa, ila di neramretopu, Allahdi nesala weik lyepredi, sun dipru talenkamre ngeda, gonga kemre taruda, metekpu kurur dinin, amenda taruda pio weik kupbankamre ja. Dana-dana tara yumada, pio weik kupbankamre ja. Tenpu nerdi, ‘Roti kwaneng dapkun’ tenen, roti kwaneng telen deipmauai kan-kan di, roti kwaneng nena deiyo keca dopra, roti kwaneng bun neitamai dongopupa, akan-kan di daembanmauanen, roti kwanengda, ila di nepu. Ange ukuputopu, Allahdi nesala weik lyepredi, sun dipru taleprepa, utopu weik kupbankamre.” Yesusdi pepu.

34 Yesusdi aukupmanto upu peteremau taruda, ‘Aupu gekepkup’ tenen, abulupra tali wekmai nesala, sun gekena tep, ukupmanto upu cap, domona upu cap, weika di ton cap peteremau. ‘Nong neitamai ngeda, deiyo ake,’ pena gum di, domon upu deiki dipapu peteremau. Jenek kupra katuai di men peteremamu. 35 Domon upu deiki dipu peteremamu ngeda, Allah upu lap peramu ngebo, nabi ngebo peramutopu kupkamnga tep, peteremamu. Nabi Asafdi peramu upuda, adano.
‘Allahdi pepu. “Ne peteremkamne taruda, domon upu cap, ukupmanto upu cap deiki dipapu peteremkamne. Allahdi akeca-keca yuma ketekepra deipu taru, adi dipra aneitam taru yuma, Allahdi iniamu keca yumada, ukutaru jenek kupra katuaipu penkamne,” pepu.’ (Mazmur 78:2)

Aupuda, Mazmur upu neitamai nabi Asafdi peramu.

Yesusdi, “Telep keca cap, tali paramre keca cap, bongopu,” pepra domon upu Yesusdi aupu nong tep lap pepu

36 Yesusdi atali bulupra wekmai neng tep, adomon upu pepu dingeda, aneng acapu tapu di, er yuk ati wengbeu. Ati konum weku pangeda, erdi wepra deipu neng, sun 12 nengda, er damai yana asipetepi. “Naio, tenpu wa neitamai, telep keca cap, mali keca cap, wisipra bongopu pepmaum ngeda, nong neitamai ngeda, kandi lape pepseo,” pepra moropi. 37 Upepra asipetepi pangeda, Yesusdi er nyapu 12 neng tep lap pepu.

Telep yal keca bolokamnga deiyo ngeboda, ne Nimi Mi Sisa Utopu Ngebo, ne tepa. 38 Wa pepmanua nongda, tuai mutu ban-ban yuma tep pepmanue. Telep yal kecada, Allah konum lyepudi, sun dipru talerur nesala tep pepmanue. Mali yal keca bolokudi, paramu kecada, Mali Kun Keca Deiyo Ngebo, Kain Jen Ngebo, er upu gekepra pio mali kuramenge nesala tep pepmanue. 39 Wa deiyo ngebo tep, song tenepudi, mali yal keca boloku ngeboda, ada, Kain Jen Ngebo er tepa. Wa neitamai bolokami keca wisipupa kwenepidi, bulupra tenpai deipi taru pepmanunge nongda, sirya gawal dangne taru kupkamrenge tep pepmanue. Koun keca wisipunge bulupra tenpai deipinge nongda, ada ne im deiki pel donge neng, sun malaikatdi kupkamenga tep pepmanue.

40 Sun wa pel don nengdi, tali paramu keca, mali keca kweneprapidi, koupra uku dongopitopu, ne Yesusdi nesala ban-ban yuma tep, upu bokeipkamne taruda, nimi yuma tep, yuk-yuk bokra deipkamne taru tep pepmanue. Teka tenena gum di, malipu kunge nesalada, bokrapnedi, wenepra uku jen ban donokamna tep pepne. 41 Ada, ne Nimi Mi Sisa Utopu Ngebodi, ne im deiki pel don neng malaikat dokotepnepa, Allahdi talerepa, mutu ban-ban yumada kunkameng nesala, sun kan-kan di, mali kunge nesala cap, mali kuna deiyo keca cap yumada, wepra dopropkamenge. 42 Ange yuma ukupra dopropmengedi, amali kunge nesala cap, mali keca yuma cap dopra, uku jen ban dokotepkamenge. Dokotepmengepa, uku jenkamre taruda, anesaladi kange mun kange doupra, ila di engenkamenge.

43 Ange konum kupmenge pangeda, Allahdi talerepa, pio dumsisipu kunge nesalada, Allah cap, im deiki kunkamenge. Ketenge deipredi, dirine weik kuramretopu, dumsisipu kunge nesalada, im deiki kunkameng taruda, Allahdi anesala taleprepa, im deiki kunkameng mutu neitamaida, sunda ila mambul nesala cadi, pio telep-telep kupra kunkamenge. Atep, sun amul akwapserepa, aupu gekepmanto kurum nengda, ne pepmasen upu moupra gekepkurume. Yesusdi pepu.

Domona upu di, tenpu ngebo tali kunmankapudi, kunumna weik keca epudi dopropka tep, pepu upu

44 Aupu pepu dingeda, adomon upu ton cap pepu.

“Allahdi nesala weike lyepredi, sun dipru taleserenge, utopu kecada, pepkusene. ‘Mali nengdi nun ila kunumna weik mambul keca upula dopropsenung’ tenen, ton nengdi tu palipra, sun mambul bung keca iniamipane, tenpu ngebo tali mankau embandenkapudi, iniami keca epu. Epudi, ‘Yuk nengdi, amambul keca dopropnung’ tenen, erdi akeca dopra, ka di tamupra moupra inipu. Inipudi, utenepu. ‘Awa tu kunupnyopda, akunumna weik keca awa neitamai, tu palipra inipra deipmanu keca peda doproptene,’ tenepudi, er men di taleamu keca yuma kunuprapudi kipra, awa taleamya deiyo neng damai beudi, aco bo deiki di awa tu kunupu.” Yesusdi pepu. Tonda, aupu pepu dingeda, aupu utopunge ton pepu.

45 “Tenpu kunumna deiyo ngebodi, ila kunumna weik keca, pate utopu keca, er sida mutiara tep, ‘Amutiara kunupkun’ tenen, pio epembanmau. 46 Epembanmauanen, pio ila telepnge epu. Epudi akeca pio putapupa, ‘Akunumna weik keca mutiara kunupkun’ tenen, er men di taleamu keca yuma dopra, yuk neng damai kunuprapudi, erdi epmau keca, ila kunumna weik mutiara kunupu.” Yesusdi adomon upu pepu.

Domona upu di, mekina yangna tep pepu upu

47 Yesusdi adomon upu pepu.

Allahdi nesala weik lyepredi, sun dipru talenkamrenge, utopu kecada, domon upu di pepkusene. Tenpu taruda, nimidi, ‘Mekina dopropkup’ tenen, mekina yangne keca mokon neitamai dongopipa, mekina yala-yala yuma weika di weki. 48 Weika di wekipa, konum dekpepkopda, amekina yangamya deiyo nengdi, mekina yangne keca erepra doprapidi, mokon pirmanai bena deipi. Deipidi, mekina yuma dipetepidi, mekina weprapidi, mekina telepnge dopra, mekina kin keca pumbon dongopi. Dinin, mali mekinada, bura tara taliyai tarapu donoki.

49 Anengdi mekina yuma wepra dipterepidi, ton ngeda dopropidi, mawa deipi. Ton ngeda malinge cadi, dopra bura donokitopu, Allahdi sirya gawal dakamre taruda, utopu kupkamre. Ada, er im deiki pel don neng malaikatdi, nesala ban-ban yuma bokra deipmengedi, “Malipu kunge nesala ake, teleppu kunge nesalada ake,” pepmengedi, bokra yuk-yuk deipkamenge. 50 Ukupmengedi, mali kun nesalada, uku jen ban donokmengepa, ukudi jenmarepa, anesalada, kange mun kange doupra, ila di engenkamenge. 51 Atep, Allahdi nesala weik lyepredi, sun dipru talenkamre taruda, ange utopu kurure pepmasen upuda, gekepmanerum do? Yesus erdi wepra deiamu neng, er nyapu sun 12 neng tep pepu.

Upepupa, sundi, “Nun konum gekepmepe,” pepi. 52 Upepipa, Yesusdi pepu. “Ange tep nengeda, ukupmantoda, tenpu ati deiyo ngebodi, er mawa keca derirur ati pumbonda, pumun taru di deiamu keca pe, ukupu deipmare keca pe, dopra katuai deipredi, pel doramretopu, sunda, Musa sekeiamu upu peteremna deiyo neng peda, utopu kunkamenge. Ada, ‘Allah taleseredi kure keca ake,’ pepra, pesene upu kael keprumdi, ne nyapu kupmumyopda, pumun perami upu cap, ne ukupu pesene upu cap dukdongopra peteremkamrume,” Yesusdi pepu.

Yesusdi, “Allah upu jenek pen ngebo, nabi ngeboda, er pe mutu nengdi er tep, gispal men donunge,” pepu upu

(Markus 6:1-6)

53 Yesusdi adomon upu yuma konum pepu dingeda, amutu tapra, yuk mutu baramu taruda, tuai bisi baramudi mapbaramu. 54 Sun bisi mapbaramyanen, Yesus er mutu sisa, Nasaret mutu kwerepi. Kwerepra beidi, Nasaret mutu neitamai dakuramipane, Yahudi yala neng, sun Allah upu peteremna ati, Yesus wekrapudi, Allah upu peteremau. Peteremau taruda, pio telep kupra peteremaua tep, er upu gekenmai nengdi lolomai. Lolomaidi upenmai, “Angeboda, er peteremau upuda, dan mutu di kael kepu do? Ware ila kael kemna keca di peterepmemeipa, ila kaele kepudi, telep kupra peterenmaser do? Ware mutu di nimi men kupmanto keca, mambul pel dona tep, puto deiyo keca karepmemeipa apel donmar do?” pepra lolomai.

55 “Angeboda, nun mutu ngebo Yusup erdi deipu mi be? Angeboda, co cakra bekin dore ngebopu kurure. Teka de, nun ka ner Mariadi deipu mida, er akonum akunmar adano. Er weit yapuda, Yakobus cap, Yoses cap, Yudas cap, Simon cap, sun yumada amutu kununge. 56 Tonda, er weit nerapu peda, nun cap akunmape. Angeboda, nun konum kael kepmupka cadi, dan mutu kael kepudi yana peteremaser do?” penmai.

57 Upepidi, Yesus tep tulum kupupa, ‘Angeboda nun songe. Er tep nun dabale,’ tenepidi Yesus tapi. Ukupi pangeda, Yesusdi akati wekmai neng yuma tep pepu. “Allahdi amenda kupkamre keca lap penge neng, nabi nengdi, sun pe mutu tapra, yuk karen mutu bengopda, yuk nengdi sun upu gekepra, kange deipra gispal donunge. Dinino, nabi nengdi, sun pe yala neng cap, sun ati neng cap, sun mutu neng capdi, gispal dopra gudina gum di tamdongonunge,” Yesusdi pepu.

58 Yesus er mutu sisa kunge nengdi, er tep dabal kupka tep nengeda, amutu neitamai yumada, kunupsek pen pel cap, nimidi men kupmanto keca cap, weika di men pel dopmanto kupu. Metekanunpu pel doramu. Ukupu ngeda, Nasaret mutu neitamai kurami nesala yuma, sun teka men tenepya tep, Yesusdi er pe mutu neitamai nimi men kupmanto keca, kunupsek pen pel weika di men doramu.