Mat 14 | XteSC | STEP | Yesus er nyapudi peterep embaramipa nesala weika di, Yesus er si gekepra kael kemami. Nesala weik gekeramya tep, sundi lap peramipa, amutu taleamu nimi deiyo ngebo, Raja Herodes er peda aupu gekepu.

Matthew 14

Raja Herodesdi Yohanes Pembaptis tep, parang ya di, er kum sektapka tep, seku upu

(Markus 6:14-29)

1 Yesus er nyapudi peterep embaramipa nesala weika di, Yesus er si gekepra kael kemami. Nesala weik gekeramya tep, sundi lap peramipa, amutu taleamu nimi deiyo ngebo, Raja Herodes ^{▼▼Raja Herodesda, Roma mutu ngebo dinin, sun Roma mutu nengdi, Yahudi yala nesala kurami mutu yuma taleramya tep, Yesus kuramu mutu yumada, Roma mutu talerami pemerintah deiyo nengdi, ‘Herodesdi, amutu talepra kunkamre’ tenen, Herodes erepra deipi. Ukupra taleramipa, nimi deiyo ngebo Raja Herodes, Roma mutu neitamai dopra deipi. Atep, Herodesda, Roma mutu nimi deiyo ngebo talepra kuramu taru, aupu peraminge yuma peda gekepu.} er peda aupu gekepu. 2 Yesus er pel doramunge, Raja Herodes gekepudi, ange er moupra kael kemna gum cadi, walwal di upepu. “Uo, angeboda, nedi kum sektapsi ngebo Yohanes kurure. Yohanes Pembaptisda, ya di kum sektapsi ngebo, erpu konum gam bukroue. Atep, angeboda aputo deiki di nimi men kupmanto keca pel dorure,” tenepudi, walwal kupupa aupu pepu.

3 Raja Herodesdi Yohanes Pembaptis popunge deiyoda ake. Raja Herodes er pedipapu upu peipupa, er jen talen nengdi Yohanes Pembaptis ateng koupra dopra yaidi, wenemna ati dongopi. Herodesdi Yohanes dopra wenemna ati deipunge deiyoda, ake. Herodes er weit Pilipusdi domu ner Herodiasda, Raja Herodesdi dopromu. 4 Dopramnga tep, Yohanesdi Herodes tep uperamu. “Kanda kan weit er ner dopropmuma deiki, Allahdi ‘Yuk neng nerapu dona pio ukuna meme,’ pemu upuda, kandi yanipmareme,” Yohanesdi Herodes tep, peramu. 5 Yohanesdi uperamnga tep, Herodes tulum kupupa, erdi, ‘Yohanes poptene,’ teneramu dinin, Yohanes peramu upu gekerami nesaladi, ‘Yohanesda, Allah er upu lap pen ngebo kurure. Erda pio telep nabi ngebo,’ teneramya cadi, Herodesda, ‘Anesaladi derepnenung’ tenen, kware kupupa, ‘Yohanes popkamne, tenepsi ngeda, dakwapye,’ tenepudi, tapu.

6 Tapu dinin, Raja Herodes er deiami tumi konum damai kupkopda, ila kailya kalepra deipupa, er kayapu neng gung pio weik jeryai. Sun akalepmau keca jenmai taruda, Herodes er ner Herodias, er ner mi mut yana semaupa, sun aneng yumadi, kange deipra dinmai. 7 Herodesdi amut semau ner mi tep, kange deipudi, aner mi tep pepu upuda ake. “Kan putapkamker keca, ware keca do? Tek sisi, kan putapkamker kecapu moropnememnyopda, karepkukene,” pepu. Tonda, Herodesdi pepu. “Tali men pepmakene, kandi putapker keca pepnememnyopda, tek sisi karepkamakene,” pepra pedina upu deiki di pepu.

8 Upepra deipu pangeda, aner mi akati tapra, er nin kunmauai beu. Beudi, er nin Herodias tep asipetepu. “Nanino, Raja Herodesdi karepkamner keca tep, ware keca moropkaman do?” pepra asipetepu. Asipetepupa, Herodiasdi tamupra pepu. “Upepkurume. ‘Yohanes Pembaptis er ya kum sekra, er gisopu sekra, pala co lase deiki deipra karepnetume,’ pepra moropkurume,” pepu. Er nindi upepra deiaputopu, adipapu tamupra, aner mi Raja Herodes bukmauai bena moropudi upepu. “Yohanes Pembaptis er ya kum sektapmemdi, gisoda, co lase palange deiki di yakra deipra, ‘Ukutaru karepnetume’ tenen, putanmanere,” pepu.

9 Upepra moropu pangeda, Raja Herodesdi, ‘Uo angeda, ware kupkun do?’ tenen, mali kange doupu. Mali kange doupu dinin, erdi pedinmau upuda, er kailya jeryanmai neng yumadi, konum gekenmai atep, ‘Angeda tapkune, men pepkune,’ tenepu. 10 Utenepka tep, Raja Herodesdi nimi podina deiyo ngebo tep, pepu. “Yohanes er kum ya sekra, er giso denerume,” peipupa beu. 11 Angebodi Yohanes wenemna ati deiamyai beudi, Yohanes kum ya sektapra, co lase palange deiki, er giso yakra deipudi, aner mi damai doupra beu. Debeudi karepupa, aner midi akeca dopra, er nin Herodias bena karepu. 12 Ange yuma konum kupupa, yuk nengdi lap pepipa, Yohanes er upu gekepra melipra dombarami neng gekepra yaidi, Yohanes er nong dopra nimi peirami gel imir bena peipi.

Yesusdi jen keca bokra karepupa, 5.000 nesaladi jepya tep, pepu upu

(Markus 6:32-44; Lukas 9:10-17; Yohanes 6:1-13)

13 Yohanes nimi me dongoramu ngebo popya tep, yuk nengdi Yesus damai ben pepipa, gekepudi bicau kupupa, ‘Neda nesala kuna gum mutu beipye peingbenkune,’ tenepudi gapung co deiki wekra bukudi, Galilea mokon deiki beu. Er cap, er nyapu sun 12 neng cap, sun yuk banmai dinino, mokon deiki bankoi taruda, yuk neng gekepidi, ‘Nun cap kikiman antapdankamap’ tenen, ati dam yuk-yuk, dana-dana kurami neng yumadi, mokon pirman bisi sepdaro banmaidi, Yesus benkouai bei. 14 Yesus cap, er nyapu cap, gapung co lukra derirbeidi, Yesus tuai kwerepkopda, amutu neitamai nesala gung pio weik wekmaiya bena epu. Epudi, awekmai nesala tep, Yesusdi bicau tenepu. Anesaladi, pu jeramu nesala dopra yainge yumada, Yesusdi kwetepu.

15 Ataru tupa nimi kwetena cap, peteremna cap, kunmaupane, keteng dakdongopkou taruda, Yesus er wepra deipu neng, 12 neng, er upu gekepra melipra embarami nengdi, Yesus damai peryai. “Naio, nesala gumai kunmapa cadi, keteng konum wekronkura tep, abulupmang nesala tep, ‘Sun dabeso,’ pepra dokotepmempa, amutu neitamaida ati yuk-yuk marbetengedi, sun jen keca kunupra jeptenge,” pepra peryai. 16 Upepi dinin, Yesusdi er nyapu 12 neng tep pepu. “Sun anesalada yuk mutu bana gume. Sun ne nyapu dipu anesala sun jen keca karepkurume,” pepu. 17 Upepu pangeda, sun 12 nengdi tamupra Yesus tep pepi. “Gume naio, nun jen keca roti kwaneng pamu cap, mekina butene cap, apu kwapmasera tep, yuk jen keca ton men kunumbepyopda, anesala pio weik cadi, akwapser ngeda yambulanunpu kupmasera tep, angepu men kareptepe,” pepi.

18 Upepipa, Yesusdi, “Akwapser ngepu ne damai doupra yaso,” pepu. 19 Upepu pangeda, Yesusdi peipupa, er nyapudi agung weik wekmai nesala tep pepi. “Sun gung yuk-yuk, betei deiki yuk-yuk bokra bukso,” pepi.

Konum buki pangeda, Yesusdi er nyapu, aroti kwaneng pamu bari cap, amekina butene cap, karepkamai ngeda dopra, im deiki dipetepu. Dipetepudi, Allah tep, “Telepe,” pepudi, aroti kwanengda toprapudi, ‘Ne nyapu 12 nengdi, abukmang nesala tep bokra karepkung’ tenen, karepu. Tonda, amekina butene sekra er nyapu karepupa, abukmai nesala tep, aroti kwaneng cap, amekina cap, bokra karepbanmai.

20 Er nyapudi abukmai nesala tep, akeca bokra karepbanmaipa, dopra jenmaiyanen, konum boupkopda, kwal tapi ngeda, dopda-dopda peprapidi, doupra tenpai deipi. Yesus er nyapu 12 nengdi bulupra kipra deipmai ngeda, alen utopu keca, er sida bakul ilange, 12 deiamya di kipra deipi. 21 Aroti cap, mekina cap, jenmai nengda, nerapu nyapu men nuki dinin, nimi yopu nuki ngeda, denge pio weik 5.000 kupu. Abukra jenmai nengda nimi yopu nuki.

Yesus mokon deiki yanipra beu upu

(Markus 6:45-56; Yohanes 6:15-21)

22 Animi weik 5.000 neng, sun jen keca karepipa jepi pangeda, adipapu Yesusdi er nyapu 12 neng tep, pepu. “Sunda menmena gapung co di mokon deiki banmarumyanen, mokon ortara benkarume. Neda, awekmang nesala tep, ‘Telepe daberume,’ pepnedi yankuna,” pepu. 23 Upepupa, er nyapu mokon deiki konum baipane, awekmai nesala tep, “Telepe, daberume,” pepra, amutu tapra, Yesusdi er yuk, ‘Allah moropkun’ tenen, amutu deiki welepu. Yesus Allah moronapu kunmaupane, konum ipmanto kupu pangeda, Yesus er yuk amutu deiki kunmau taruda, er nyapu gapung co deiki di bukra, Galilea mokon deiki bisi neitamai banmai.

24 Sun ‘Ortara benkamep’ tenen, mokon pirman tapra, karen mokon numnuma neitam bei taruda, urasin ortara deiya banmai. Banmai dinino, urasin deiya banmai tara di, ila mungna yaupa, co lase puto di bungmai dinino, urasin deipra banmai tara, men benmanto kupi. 25 Sun amokon deiki tupa banmaipane, berekamarya tep, tulek bisi yaramrenge kupu taruda, Yesus mokon deiki yanipra, er nyapu banmaiyai damai beu. 26 Banmauanen, sun damai beu pangeda, sundi Yesus er mokon deiki yanipra yakanmaua epi. Epidi, ‘Ada isok do, nimi sambala yakanmar do?’ tenen, sun lukdaidi kwar weik kupu. Kwar weik kupupa, sundi, “Ada depi neng sambala yanmaser adano,” pepra ila di ngoloki. 27 Ngolongi pangeda, adipapu Yesusdi pepu. “Sun kwar dangna yapso. Ne akunmane. Atep, kwar kuna gum di, dimpepra bankurume,” pepu.

28 Upepu pangeda, Peterusdi Yesus tep pepu. “Naio, kan tek sisi akumemnyopda, ‘Mokon deiki yayo,’ pepnetumpa, nedi mokon deiki yanipra kan damai yankune,” pepu. 29 Peterusdi upepupa, Yesus tamupra, “Telepe kanda yarume,” pepu. Upepu pangeda, Peterus ‘Yesus damai benkun’ tenen, gapung co deiki kwerepudi, mokon deiki yanipra banmau. 30 Mokon deiki yanipra banmau taruda, ila mungna mungmaupa epudi, kware weik kupupa, mokon neitamai wekudi, mokon jepbaupane, Peterusdi Yesus tep, “Uo, naio, ne makupra dopropneo,” pepra moropu. 31 Moropupa, Yesus adipapu Peterus er buru talepra dopdaropudi, upepu. “Kandi, ‘Ukuptene do, gum do?’ tenen, kange bongtonmakerada, ware keca deiyo tep do? Kanda, ne tep metekanunpu teka tenepmanerema deiki di, mokon jepmanto kupmakere,” pepu.

32 Upepu dingeda, Yesus cap, Peterus cap, gapung co welepra bungberei. Gapung co welepra, sun aneng cap bungberei pangeda, ila mungna mungmauada dimpepu. 33 Dim pepkopda, Yesus er nyapu 12 nengdi, ‘Uo’ tenen, mambul kange doupidi, er si eremna tep, aupu pepi. “Kanda, tek sisi Allah er Mi Sisa kurume,” pepi. 34 Gapung co deiki di bukra mokon deiki banmaiyanen, mokon pirman ortara Genesaret mutu beiyopda, gapung co bena lukra deipi.

35 Lukra deipidi, gapung co deiki di tuai kwerepi taruda, adipapu sun men di epdanami neng akunmaiya di, Yesus er nong kael kepidi, ‘Yesus adano,’ tenepi. Utenepi dingeda, amutu neitamai dana-dana tara kurami nesala yuma, kai perbanmaipa, amutu neitamai kurami nesala yuma, gekenmaidi, pu yala-yala yuma jeramu nesala dopra, Yesus damai duyakanmaipa, kwetenmau. 36 Ange utopu ton, Yesus embaramngai yumada, pu jeramne nesala yuma dopra derirbaramipa, anesaladi Yesus tep, “Pu jeramre nesaladi, kan kenengamrem opkal kupkupai bepketenge do?” pepra mororami. Mororamidi, er opkal kupkupai berami nesala yumada, pu kwetediramu.