Mat 15 | XteSC | STEP | Uda, Farisi neng cap, yuk Yahudi yala neng yuma capdi, sun jen keca tali lupra men jerami. Sunda, Musa sekamudi peiamutopu, ‘Dipru mali kupsurur’ tenen, buru me kupne dipapu jerami. Sun apu yapu, Yahudi yala sun deiyo neng kuramitopu, sun peda angepu talepra kurami. Ange yuma teneramya tep, tenpu taruda, Farisi neng cap, Allahdi, ‘Angeda ukunkamrume, angeda men kunkamrume,’ peipupa, Musadi sekeiamu upu peteremna deiyo neng cap, Yerusalem mutu neitamai dinin, Yesus kunmau mutu bulupra diryai. Dinmaipane, Yesus er upu gekepra dombarami nengda, sun jen jenmai.

Matthew 15

Yesusdi nimi dipru mali kuna tep, pepu upu

(Markus 7:1-23)

1 Uda, Farisi neng cap, yuk Yahudi yala neng yuma capdi, sun jen keca tali lupra men jerami. Sunda, Musa sekamudi peiamutopu, ‘Dipru mali kupsurur’ tenen, buru me kupne dipapu jerami. Sun apu yapu, Yahudi yala sun deiyo neng kuramitopu, sun peda angepu talepra kurami. Ange yuma teneramya tep, tenpu taruda, Farisi neng cap, Allahdi, ‘Angeda ukunkamrume, angeda men kunkamrume,’ peipupa, Musadi sekeiamu upu peteremna deiyo neng cap, Yerusalem mutu neitamai dinin, Yesus kunmau mutu bulupra diryai. Dinmaipane, Yesus er upu gekepra dombarami nengda, sun jen jenmai.

2 Sun jen jenmai taruda, Farisi nengdi, ‘Dipru mali kupsurur’ tenen, buru me kurami. Dinino, Farisi nengdi buru me kuramitopu, Yesus er nyapuda buru me men kupmaidi tali lupra jen jenmaiya tep, Farisi nengdi Yesus tep pepi. “Kan upu gekepra domembakenge nengda, nun apu yapudi mem upu peiamseiya utopu, men kununge. Sunda, buru me kuna gum di, tali lupra jenmange. Ukupra jenmanga deiki di, nun apu yapu peiamsei upu yuma tep yanipmangada, ware keca deiyo tep do?” pepi. 3 Upepi pangeda, Yesusdi tamupra pepu.

Sun Farisi nengda, Allah erdi “Angeda, ukunkamrume” pediramupa, sun Allah upu lap perami neng sekami upuda, konum taprume. Sunda, tali nimidi peteremenge upupu talepra kurum ngeda, warya tep do? Sunda Allah erdi, “Ukunkamrume” pediramu upuda taprumdi, ‘Nun apu yapu peteremaminge, aupupu talepra kunkamepe,’ tenemumdi kumum ngeda, lap pepkusene. 4 Ada, Allahdi peipupa, Musadi aupu sekeipu.
‘Sun nai yapu cap, sun nin yapu cap, gispal dopra pingpinga di makunkamrume. Ware ner do, ware ngebo do, sun nai yapu cap, sun nin yapu cap tep, mali upu pepmengopda, wenepra ponkamrume.’ Musadi peiamu. (Keluaran 20:12; 21:17)

5 Musadi upeiamu dinin, sun Farisi nengda uperume. Tenpu ngebodi er nai cap, er nin cap tep, “Akeca-keca yuma karepketene dinino, Allah er gispal dona tep karepkamne keca yumada melipra men karepkusene,” peptue. Upeptudi, er nai cap, er nin cap tep men kareramtu pangeda, sun Farisi nengda, “Angeda telepe, Allah tep karenada, ila mambul cadi, sun nin yapu cap, sun nai yapu cap tep, melipra karenada dakwaprume,” perume. 6 Aupu pemumnya deiki di, Allah upu yaniptapra kaukemrume. Sun apu yapu peteramipa gekeramrumnge di, peteremrumnya deikida, Allahdi pediramu upu yuma yaniptamrumdi, mali-malipu kurume. Yesusdi sun Farisi neng tep pepu. 7 Upepu dingeda, aupu ton pepu.

Allah er upu lap peramu ngebo Yesayadi sun tep peiamseu ngeda, tek sisingepu peiamseu. Sunda tali upu peptapra, mali kumum neng cadi, Yesayadi sun mali kumumtopu kunge neng tep, sekra deiamu upuda apepkusene. Allahdi peipupa, nabi Yesayadi sekeiamu upu adano. 8 Allahdi pepu.
‘Anengda, sun tali pertamna upu deiki di, nong bol deikingepu ne tep gispal donenung dinin, sun kange dipru neitamai yumadi, tek sisi ne tep kange deipra men talenenunge. 9 Ne tep si eremnenge nengda, talipu kununge. Sun peteremenge upuda, ‘Angeda ukuna telepe, angeda ukuna meme,’ pepra peramenge upuda, nimi kange dipu peteremenge upupu peteremnunge, pepu.’ (Yesaya 29:13)

“Allahdi upeipupa, Yesayadi sekamu.” Yesusdi Yesaya pemu upu dopra, aneng tep pepu. 10 Yesusdi upepu dingeda, awekmai nesala yuma tep, aupu ton cap pepu. “Ne damai bulupra yaso,” pepupa bulupra yai pangeda, aupu pepu.

“Sun yuma ne upu moupra gekeprumudi, ‘Deiyo ake’ tenen, kael kepso. 11 Ware keca do yuma, nimi nong bura tara kure keca yumada, jemumpa, sipyal bisi di sun mundu pumbon wengserur dinin, adeiki di sun dipru mali men kudiserure. Ange gum dinino, sun kange dipru neitamai kure keca cap, mali tenemum keca capda, dipru neitamai tenemuma deiki di, mali kurume. Ukupra mali kumum keca deikida, sundi sun pe tepapu mali kudidarume.” Yesusdi Farisi neng aweka gekenmai atep pepu.

12 Upepupa, amenda taru, er nyapudi Yesus damai yaidi upepi, “Naio, apepmamum upu tep, Farisi neng yu kupmarpa, kan tep derenmakengada, kael kepmarem do?” pepra asipetepi. 13 Asipetepipa, Yesusdi tamupra adomon upu deiki di pepu.

“Ware keca do yuma, ne nai im deiki kure ngebo, erdi men kouamu yumada, yaten cap, nong cap, yuma kwenepropkamre. Ada tali paramre keca yuma tep kwenepropkamre. 14 Ada, ne nyapu sun tep pepsene. Sundi sun Farisi neng tep, tenena gume, sun dakwapye. Sun Farisi nengda, bisi peteremna deiyo neng utopu kunung dinin, tek sisada, asuru konum puamre neng utopu kununge. Tenpu taru asuru puamtu ngebodi, ton asuru puamtu ngebo tep, ‘Nedi kan buru talepra telep bisi dubenkukene,’ teneptudi, dopra banmaretengane, bisi neitamai ila bon kwamtuai bankapretengedi, sun butene neng kote sangretenge. Sun Farisi nengda, ne nyapu sisa men kununge. Sun Farisi nengda, asuru pun neng utopu kunung neng tep, dakwapye, pepsene.” Yesusdi er nyapu 12 neng tep pepu.

15 Upepupa, Peterusdi Yesus tep, moropu. “Naio, dipru mali kudiserura tep, domon upu deiki di pepmaserem ngeda, jenek kupra lap pepseo. Aupu nong neitamai ngeda, lap pepseo,” pepra moropu. 16 Asipetepupa, Yesusdi tamupra pepu.

“Sunda tupa walwal kupmaserpa asipetepmanerem do? Ne pepman ngeda moupra men kael kepmarum do? 17 Ne pepmasen upu deiyoda, adano. Ware keca do yuma, nun jepmepepa, nun mundu pumbon wekseredi, nun dipru mali men kudiserure. Nun jeramep kecada, dipru pumbon men wengserur dinin, mundu pumbonpu mapmaserya, dei lengtamnupe. Tali jen keca jenupa deiki di, Allah upu men yanitamnupe,” pepu.

Uda, Yesusdi aupu pepka deikida, “Jen keca yala-yala yuma jeramepya deiki di, dipru mali men kudiserure,” pepra lap pepseu.

18 Upepu dingeda, aupu ton pepu. “Bura tara kuramre keca di nun nong pumbon wekserya deiki di, nun dipru mali men kudiserure. Ange gum dinino, nimi dipru neitamai mali tenenup kecada, ‘Akupmar kecada kange di dopropkune,’ tenepmepya deiki di, mali kupmepyopda, akunupa deiki di, dipru mali kudiserure. Jen keca jenupa deiki di, dipru neitamai mali men kudiserur dinin, sun dipru neitamai mali tenepmumdi, mali kumumnya deiki dipapu, Allah er upu yanirume. Sun mali kumum keca deiki, sun pe tepapu dipru mali kudidarume. 19 Nimi dipru neitamai di mali kange deipra yu weleramre kecada, ake. Mali tenena cap, nimi pona cap, sun nimi dodana nesala taprapmengedi, yuk neng ner dalum dona cap, ner tali-tali nyangna cap, upula dona cap, yuk neng tep mali-mali upu pepra minina upu pena cap, mok upu pena cap, ayumada, sun dipru neitamai mali kuna deiyo keca akapserya deiki di mali kudidarume. 20 Amali tenemum keca yumada, dipru neitamai yu tenenange weleprepa, mali kupmumyopda, dipru mali kudiserure. Buri me kuna gum dipapu, jen keca tali lupra jepmumyopda, dipru mali men kudiserure,” pepu. Yesusdi er nyapu 12 neng tep lap pepu.

Kanaan mutu nerdi teka tenepu upu

(Markus 7:24-30)

21 Yesusda, Genesaret mutu tapra welerbaramnganen, Tirus mutu cap, Sidon mutu damai beu. 22 Amutu neitamai Kanaan tara kuramu ner, Israel yala gum nerda, Yesus damai yau. Er ner mi dipru neitamaida, isokdi taleamnga tep, utenepu. ‘Ne ner mi taleamu isokda, Yesusdi dopra aisok enepra bura dokoteptu’ tenen, Yesus er damai mororyau. Mororyaudi aupu pepu. “Naio, kanda nun deiyo ngebo kurume. Kanda, Daud yala ngebodi ^{▼▼Daud yala ngebo – Aupu pepkada, ‘Ada pumun taru, Allahdi ‘Nimi lyepkamre,’ tenen, wepra deiamu ngebo, Yesus akonum yanmasera,’ tenen, pepu.} deipkeu ngebodi, ne tep bicau tenepra melipnetume. Ne ner mi isok taleamnga deiki di, pio ikin kupupa, kange mun kange dourura cadi, kandi ne ner mi kwetepnetume,” pepra moropu. 23 Upepra moropu dinin, Yesusdi aner tep, upu tenpu pe men pepu. Dimpepnapu kupu. Ukupupa, anerdi pio moronapu kunmaua tep, Yesus er nyapudi Yesus tep pepi. “Anerda, moronapu kunkamasera tep, ‘Bendopo,’ pepmempa, berye,” pepi.

24 Upepipa, Yesusdi tamupra sun tep pepu. “Anerda, Israel yala gum ner dinin, ne naidi dokotepneuada, Israel yala gum nesala damai embana tep, gume. Israel nesala dinin, domba bisam peiramre ngebo men kurepa, domba bisam tali embaramengtopu, ‘Kange wang-wang perepa kunge nesala, Israel nesala lyepkamre’ tenen, ne naidi dokotepneue,” Yesusdi pepu.

25 Upepupa, anerdi Yesus er damai yaudi, ‘Gisal dopkun’ tenen, gutam tu dipdongopra moropu. “Naio, kanda Daud yala ngebodi deipkei ngebo, kandi bicau tenepra melipneo,” pepra, ila di moropu. 26 Anerda, Israel yala gum nerdi moropupa, Yesusdi aner tep adomon upu deiki di pepu. “Nyapu kwaneng men jepmangepapu, sun kwaneng dalupra kam damai donada mali. Telep ngeda, nyapu konum sun jen keca jepra, konum gawal dakmengopda, kam karepmengepa, kamdi jena telepe,” pepu. 27 Yesusdi upepupnen, adipapu tamupra, anerdi Yesus tep pepu. “Naio, tek pepmanerem dinino, nyapu jenmangai embanmare kamdi, bun paupaupra tapmenge ngeda, tali lupra jerure,” pepu. ^{▼▼pepu – Yesusdi pepu ngeda, ada “Neda ‘Israel yala nesala menmena lyepkamne. Yunani nesalada, amenda tarupu lyepkamne’ tenen, yasi,” pepu. Anerdi kam tep pepunge deiyoda ake. Ada, ‘Neda, mambul gum ner dinin, Yesusda, tek sisi nimi Lyemna Deiyo Ngebo kuredi, pio puto weik ngebo kurura cadi, metekanunpu melipnetuopda, pio teleppu kunkamne,’ teka tenepudi pepka cadi, Yesusdi aner tep melipu.} 28 Anerdi upepu pangeda, Yesusdi tamupra pepu. “Kandi ne tep weika di teka tenepmanerema tep, kan moropmaneremtopu, kan ner mi taleamu isokda konum enepnepa bendopre. Atep, ukutaru kan ner mi teleppu kunmare,” Yesusdi pepu. Yesus aupu peputopu, adipapu, aner er ner mi taleamu isok bendopupa, teleppu kupu.

Yesusdi nesala denge weik, 4.000 nesala tep, jen keca karepu upu

(Markus 7:31-37; Markus 8:1-10)

29 Yesusdi amutu tapra embaramnganen tapra, Galilea mokon pirman tara beu. Dakuramnganen, yuk tumida, metek mutu buma deiki welepra beu. Amutu deiki welepupa, amutu neitamai kurami dinin, dana-dana tara kurami nesala bulupra gung weika di Yesus damai wengyai. 30 Amutu nesala yuma gung weika di bulupra yai taruda, sun tara nesala, ai bungne nesala cap, asuru puna nesala cap, meiyal seramu nesala cap, upu lup nesala cap, uda, pu yala-yala jeramu nesala cap, ‘Yesusdi kwetepkuser’ tenen, sun kayapu nengdi, apu jeramu nesala dopra Yesus damai deriryakanmai. Deriryakanmaipa, Yesusdi apu jeramu nesala yuma kwetedinmau.

31 Yesusdi kwetedinmaupa, sun upu lup nengdi upu telep kupra penmainge cap, tonda sun meiyal seramu neng cap, ai bungne neng cap, telep kupra embanmainge cap, tonda, asuru pun neng telep kupra laipnepa dinmainge cap, amutu neitamai wekmai nesala sun dinmaidi, lolomai. Ada, awekmai nesala yumadi, Yesus erdi nimi kwetenmaunge epmaidi, lolomai. Lolomaidi, “Sun Israel nesala talepra, puto di melimrur Allahda, er pio telepe,” pepra er si eremai.

32 Ukuprapidi, Yesus damai dakunmaipane, ue weneri tumi konum kupu pangeda, anesala sun jen keca pio gum tep, Yesusdi er upu gekepra er cap, kikiman melipra embarami neng tep, “Yaso,” pepupa, yai pangeda, aupu peipu. “Akunmang nesalada, ne bicau tenenune. Sun jen keca metekanun duyanmai dinin, u weneri tumi mapmupka cadi, sun jen keca yuma konum jepra gawal dakmangdi, jen bulungnapu kunmange. Jen putanmarepane, ‘Sun mutu tamupra beso,’ pepnyopda, ton nesalada karen mutu di yaiya tep, jen men jepmengedi bengopda, ‘Bisai bukbenung’ tenen, ‘Sunda beso,’ men pepkune,” pepu.

33 Yesusdi upepupa, er nyapu 12 nengdi tamupra pepi. “Nunda pio bura mutu neitamai kunmapa tep, nimi pio weik kunmanga cadi, sun jen keca karena tep nengeda, dan mutu kunumbetepe do?” pepi. 34 Upepipa, Yesusdi tamupra pepu. “Sun akapmaser jen keca rotida, ware kupra akapmaser do?” pepra asipterepu. Asipetepupa, sundi tamupra pepi. “Rotida, yoneitam baripu akapmasere. Tonda, metek mekinada, buteneto wenerito angepu akapmasere,” pepi.

35 Upepipa, Yesusdi abulupra wekmai nesala yuma tep pepu. “Sun tu deiki bukso,” pepupa, tu deiki buki. 36 Sun buki pangeda, akapmau jen keca roti kwaneng yoneitam bari cap, metek mekina cap, dopropudi, Allah tep, “Telepe,” pepra moropkopda, aroti kwaneng cap, amekina cap topra, er nyapu karepupa, sundi bokra, awekmai nesala yuma tep, bokra karepi. 37 Karepipa anesala yuma jepipa, konum boupkopda, kwal deipi. Jenmaiyanen kwal deipra tapi ngeda, Yesus er nyapudi bulupra, ila bakul alen di yoneitam bari di kipipa, konum dinikopda deipi.

38 Atumida, abulupmai nesala kan-kan di, nerapu cap, nyapu cap yumada, men nuki dinin, nimi yopu nukya, denge pio weik 4.000 neng jenmai. 39 Sun anesaladi konum jepi pangeda, Yesusdi anesala tep, “Telepe sun mutu tamupra berume,” pepupa, bei. Upepupa bei taru, Yesus erda, ka tamupra gapung co deiki wekra buku. Bukupa, Yesus cap, er nyapu 12 neng cap, agapung co wekmaidi, Galilea mokon deiki banmaiyanen, yuk mutu er si Magadan mutu bei.