Mat 16 | XteSC | STEP | Magadan mutu bena dakunmaipane, Farisi neng cap, Saduki neng cap, Yesus damai yai. Yesus damai yaidi, ‘Yesusda Allah er puto deiki di tek sisi apel dorur do, gum do?’ tenen, Yesus tep asipetepidi kupetepi. Sundi upepi. “‘Allahdi dokotepupa, er puto deiki di pel dorure,’ tenepkukepa tep, nimi men kupmanto keca cap, kunupsek pen pel cap, dopseo. Ange dopmempa epkepyopda, tek tenepketepe,” upepra asipetepidi, Yesus tep asipetepidi kupetepi.

Matthew 16

‘Yesusdi nimi men kupmanto keca, kunupsek pen pel dopsetue’ tenen, moropi upu

(Markus 8:11-21)

1 Magadan mutu bena dakunmaipane, Farisi neng cap, Saduki neng cap, Yesus damai yai. Yesus damai yaidi, ‘Yesusda Allah er puto deiki di tek sisi apel dorur do, gum do?’ tenen, Yesus tep asipetepidi kupetepi. Sundi upepi. “‘Allahdi dokotepupa, er puto deiki di pel dorure,’ tenepkukepa tep, nimi men kupmanto keca cap, kunupsek pen pel cap, dopseo. Ange dopmempa epkepyopda, tek tenepketepe,” upepra asipetepidi, Yesus tep asipetepidi kupetepi. 2 Yesus tep kupetepipa, Yesusdi tamupra pepu. “Sunda, sintara kepre taru im kalum kupredi, mutu siri-siri ke deipre pangeda, ‘Ambutumi dou mapkamare,’ tenepra perume. 3 Tonda, ipna taru im sukupredi, doua kunukyopda, ‘Atumi cap, ambutumi capda, mo denepredi mo cemkamare,’ perume. Mo cemna cap, dou mana cap tep nengeda, mutu urasin epmumdi kael kemrum dinin, ne kune keca cap, peteremne upu capda, ‘Deiyo ake’ tenen, pio tek sisi men kael kemrume.” Yesusdi pepu.

4 Yesusdi aneng tep, dabal kupupa, upu pepu, “Uo, ataru kurumu nengda, ‘Allah er puto deiki di tek sisi pel dorur do?’ tenenerume. Warya tep ‘Nimi men kupmanto kunupsek pen pel dopsetu’ tenen, asimpetenerumudi, kurpetenerum do? Tek sisi pepsene, ataru kurumu nesalada, mali-malipu kumumdi, Allah tapra yuk kecapu talepra kurum nesala cadi, sunda nimi domi nerapu tapra, tali nerapu nyangdaramengtopu kurume. Sundi, ‘Er Yesusda, Allahdi dokotepke tenepkuneruma’ tenen, nimi men kupmanto kunupsek pen pel dopnedi, peten men keipkusene. Allah upu lap peramu ngebo Yunusdi kuramu keca utopu keca kupkamasena tep, akonuma. Yuk mambul pel, nimi men kupmanto keca ton pel men dopkamsene.” Yesusdi sun Farisi neng cap, Saduki neng cap tep pepu. Upepudi adipapu aneng atapra, er nyapu cap, gapung co wekra bungbeidi, Galilea mokon deiki banmaiyanen, mokon pirman ortara bei.

Yesusdi er nyapu tep, “Sunda Farisi neng kunge keca epmumdi, adeiki di mali kuprum cadi, moupra kunkamrume,” pepu upu

5 Sun Galilea mokon, ‘Atara di, ortara benkup’ tenen, ketenepra sun benkui taruda, Yesus er nyapuda, sun jen keca roti kwaneng men kipidi, lupra bei. Lumdongona tep, roti kwaneng men kiprapidi, tali kange doupra, lupra gapung co deiki bukra bei. 6 Gapung co deiki bukra banmai taruda, Yesusdi er nyapu 12 neng tep pepu. “Farisi neng cap, Saduki neng cap, sun mali kunge kecada, metekanun lap pepmengepa, yuk neng gekepmenga deiki di, mali kun keca weik kununga cadi, roti kwaneng nena deiyo kecada, ^{▼▼Roti kwaneng nena utopu pepu upu deiyo nongda ake. Ada, ‘Sun Farisi nengdi, sun upu pengepa, meteka dipu gekepmumdi, sun pengetopu kupmumyopda, sun mali kupberum cadi, moupra kalekra dinkamrume. Sun upuda pio men gekenkamenge’ tenen, pepu.} roti bunda metekanunpu dongonung dinin, weika di embaramretopu kurure.

Ukurura tep, sun Farisi neng cap, Saduki neng cap, sun roti kwaneng nena deiyo keca utopu ngeda, ‘Akeca di mali kweipserepa, mali kupnup’ tenen, pio kalekra dinkurume,” pepu. 7 Yesusdi roti kwaneng nena deiyo keca upu pepka tep, Yesus er nyapu gekepidi, aupu nong neitamainge moupra men tenepya tep, ‘Deiyo dan do?’ tenen, sun dipu upu taledanmai. Upu taledanmaidi, “Ada nun roti jen keca kipra men duyanmapa tep, aupu penmasere,” tenepidi aupu pepdai.

8 Sun upu talepdanmai ngeda, Yesus gekepudi, sun tep pepu. “Sundi, ‘Uo, roti jen keca men kipmapa tep, penmasere,’ penmarumada, warya tep do? Sun asuru dina cap, amul gekena cap deiki di, moupra men tenipmarumdi penmarum do? Sundi ne tep metekanunpu teka tenepmanerum neng akunmarume. Meteka dipu teka tenepneruma deiki di, ne pesene upu men gekepmanto neng kunmarum do? 9 Asuru cap, amul cap, akapmaser dinin, moupra men dirumudi, ne pene upu tep, ‘Deiyo ake’ tenen, men gekenerum do? Ne arup taru, nimi men kupmanto keca pel dopmasi ngeda, men teniprum di do? Denge weik 5.000 nesala wekmaipane, roti jen keca pamu baripu akapu dinin, nedi ajen keca yambul dinin topra karepsipa, konum jepipa boupka tep, kwal tapi ngeda yuma bulupra deipmarumdi ila alen di kipra deipmarum ngeda, tenena gum di konum luprorum do? Ila alen kipra deipmarum ngeda, ware kupra deipmarum do?” pepra, Yesusdi er nyapu tep asipetepu.

10 Upepu dingeda, Yesusdi tamupra ka di ton cap asipetepu. “Sunda nimi denge pio weik 4.000 neng wekmaipa, roti jen keca yoneitam baripu akupmau ngeda, nedi topra karepsipa, jepidi kwal tapi ngeda, alen pio weika di, kipra deiprum ngeda, tupa teneprum do? Ware kupra kipra deiprum do? Konum luprorum do?” pepra asipetepu.

11 Asipetepu dingeda, aupu ton pepu. “Ne kupsi keca yuma konum epneruma tep, ware keca deiyo tep, walwal kuserepa penmarum do? Sundi, ‘E, nun roti men denmapa cadi, Farisi neng sun roti kwaneng nena keca tep, mali kupserur tenen, moupra kalengdankamrume, penmasere,’ tenepmarumada, warya tep do? Tali jen keca roti kwaneng nena deiyo keca tep men pepsene. Angeda gume. Sun Farisi neng cap, Saduki neng capdi, sun mali kunge ngeda, roti kwaneng nena deiyo keca neramretopu kun keca tep aupu pepsene,” Yesusdi er nyapu tep pepu.

12 Aupu pepu pangeda, adeiki di er nyapu moupra kael kepi. Sundi utenepi. Uda, ukuda tenipmepe. Nesaladi roti dana tep, roti kwaneng nena deiyo keca meteka dipu dopra, roti bun neitamai dongopmengepa, weika di embanmaryanen, roti ila di neramretopu, sun Farisi neng cap, Saduki neng cap, kange dipru mali tenengedi, peteremsenung upu, ‘Meteknge peda gekeprumudi, sun kange tenenange yuma peda, mali kupsurur’ tenen, pepmasere. Ange tep nengeda, ‘Moupra kungedi, aneng sun upu men gekenkameng’ tenen, pepmasere. ‘Tali roti kwaneng nena deiyo keca tep men pepmasere’ tenen, moupra kael kepi.

Peterusdi Yesus tep, “Kanda, Allahdi, ‘Nesala weik lyepkamre’ tenen, wepra deipkeu ngebo, Kristus kurume,” pepu upu

(Markus 8:27-29; Lukas 9:18-20)

13 Amutu tapra welepidi, bisi mapbaramyanen, Kaisarea Filipi mutu bei. Bei dingeda, Yesus cap, er nyapu 12 neng capdi amutu neitamai, upu talepmai taruda, aupu ton asipetepu. Yesusdi er nyapu tep asipetepu. “Yuk nengdi neda Nimi Mi Sisa Utopu Ngebo tep, ware ngebo tenenengedi, penenung do?” pepu. 14 Upepupa, sun yumadi tamupra pepi. Ton neng dingeda, “Yohanes Pembaptis” pekenunge. Ton neng dingeda, “Ada Allah upu lap peramu ngebo nabi Elia kurure,” pekenunge. Ton neng dingeda, “Allah er upu cap, erdi amenda taru kupkamre keca tep lap pena ngebo kurure,” pekenunge. Ton neng dingeda, “Angeboda, Allah upu lap peramu ngebo, nabi Yeremia depu dinin, ukutaru ka tamupra gam bukra dakurur darape,” pekenunge. Yesus er nyapudi, Yesus tep pepi.

15 Upepipa, Yesusdi er nyapu 12 neng tep tamupra asipterepu. “Aneng yumada, upenung dinino, sun ne wepra deipsisi nengda, ne tep, erda ware ngebo tenenerumudi penerum do?” pepra asipetepu. 16 Upepra asipetepupa, Simon Peterusdi tamupra pepu. “Naio Yesusda, ‘Nesala ban-ban yuma dakununga neitamai di, nimi weik lyepredi sun dipru talenkamre’ tenen, Allahdi wepra deiamkeu ngebo, Kristus kanpu kurume. Kanda, Allah er Mi Sisa Kristus kanpu kurume,” pepu. 17 Peterusdi upepupa, Yesusdi tamupra pepu.

“Apepmaneremada, nimidi peterepkeipa men pepmanereme. Ne nai Allah im deiki kurur ngebodi, jenek kupra peterepkeupa, kael kepmume. Atep ngeda Simono, kan nai Yonahdi deipkeu ngebo kanda, teleppu kunkamrume.

18 Peterus kanda, teka tenepnemumdi, arup taruda, ‘Kanda Allah er Mi Sisa Kristus kurume’ pepmanerema cadi, kanda mutu yangne gel utopu ngebo kurume. Nesaladi tu palipra mutu yangne gel deiki, ati ayumna ikra doramengtopu, ware neng do yuma, kan pepmanerema utopu teka tenepmenge nesalada, Allah er nyapu kepra deipnepa, sun kange dipru cap, sambala cap, puto kunkamenge. Puto weik kupra kungedi, weik kupbankamenge. Ne tep teka tenepnengedi, ne nyapu weik kupbankamenge nengda, dena deiyo isok-isok cap, sun deiyo ngebo Kain Jen Ngebo capdi, ne nyapu tep men bisinkamenge.

19 Tonda, nesaladi, ati dopmengedi, buplan potokeiamengaida, ‘Nesala wekronkung’ tenen, er ati deiyo ngebodi buplan pangne keca kunci dopra, buplan pakeiprepa wengamengtopu, nedi Peterus kanda, buplan pangna deiyo ngebo keipkene. Ada, ‘Allahdi nesala ban-ban yuma dakunge nesala neitamai di, nimi weik lyepredi, sun dipru talenkamseraida, nesala yala-yala yuma wektenge’ tenen, nedi kan tep kunci utopu ngeda, deiyo keca konum karepkene. Ada, kandi ne upu peterepmempa aupu gekepmengedi, teka tenepmenga deiki di, nesala pio weik ne kununai im deiki wengyankamenge. Kandi ‘Ukuna meme,’ pepra upu sengkamrem upuda, im deiki peda, Allahdi aupu utopu penkamre ngeda, ato upu konum sengrure. Ange utopu, kandi ‘Ukuna telepe,’ penkamrem upuda, im deiki peda, Allahdi utopu ‘Ukuna telepe,’ pepra konum perure.” Yesusdi Peterus tep pepu.

20 Upepu dingeda, Yesusdi sun yuma tep aupu pepu. “Neda, nesala ban-ban yuma dakunge nesala neitamai di, nimi weik lyepnedi sun dipru talenkamne. Neda ila deiyo ngebo, nimi Lyemna Deiyo Ngebo, Mesias ^{▼▼Mesias – Ton Allah upu bukuda Mesias sengnunge. Ton bukuda Kristus penunge. Aupu deiyoda tenpu dinin, Ibrani upu penge nengdi Mesias penunge. Yunani upu penge nengdi, Kristus penunge.} perameng ngebo, ne akunune. Dinino, ukutaruda yuk neng tep, aupu menmena men perbenkurume,” pepra Yesusdi er nyapu tep aupu pepudi moupra deipu.

Yesusdi er amenda popkaminge tep, lap pepu upu

(Markus 8:31—9:1; Lukas 9:22-27)

21 Yesusdi arup taru pepmau upu tep moupra deipudi, er nong deiki ikin keca deipkaminge cap, kange mun keca kupkamunge cap, er nyapu 12 neng tep, gonga kepra peteremaudi aupu pepu. “Neda Nimi Mi Sisa Utopu Ngebo kunune. ^{▼▼Nimi Mi Sisa Utopu Ngebo pepu ngeda, ada im deiki ngebo kuramu dinin, tuai nesala lyemna tep yau taruda, nimi nong kuprapudi, tali tuai neng urasin utopu daudi tuai yau. Nimi urasin utopu kupra yaua tep, aupu pepu.} Neda Yerusalem mutu benyopda, sun Yahudi yala neng sun deiyo neng cap, Allah karena tep deiyo neng cap, Allahdi ‘Ukupkamrume, ange men kupkamrume,’ peiamupa, Musadi sekeipseu mem upu peteremna deiyo neng cap, aneng yumadi ne tep, ‘Nun song’ tenen, tapnengedi, ikin keca weik ne nong deiki deipnengedi popkamnenge. Popnengepa, depkamne. Depmanyanen, peipnengopda, u weneri tumi ^{▼▼ue weneri tumi – Sun Yahudi yala nengdi, nungamitopu, ada pamu bari tumi (Jumat) lukunda cap, ngantan bari tumi (Sabtu) lukunda cap, adinen, Minggu tumi ipna bereng tamne taruda, ‘U weneri tumi konum kupre’ teneramidi perami. Sundi ange utopu nungamya cadi, Yesusdi, ‘Ue weneri tumi kuprepa, ka di tamupra Allahdi gam bukra deipkamnere,’ pepu.} di, ka di tamupra Allahdi gam bukra deipkamnere,” pepu.

22 Aupu pepu ngeda, katuai di penmaupane, Peterusdi Yesus talepdarop yukai beudi, apenmau upu tep upu sekrou. “Naio, angeda pio gume. ‘Ukupra kupnengedi, popkamnenge,’ pepmaserem upuda, pio men kupkamkenge,” pepu. Ada Peterusdi Yesus tep aupu pepra wenepudi, upu sekrou. 23 Peterus cap, Yesus cap, yukai bereidi, Peterusdi upu sekroupa, Yesusdi tamupra, Peterus tep pepu.

“Peterus kanda yukai beo. Ne men dinkukene. Allahdi tenemneutopu, konum peipneupa, ‘Ukupkamne,’ tenepsi keca, kandi napmanerema cadi, kanda ukutaru Kain Jen Ngebo utopu kunmanereme. Allahdi putarepa, tenerur keca gum dinin, tali nengdi putarepa teneramengtopu, tenepmaremdi aupu penmanereme,” Yesusdi Peterus tep pepu. 24 Upepudi, er upu gekepra dombarami neng cap, abulupra wekmai neng yuma cap tep, “Ne damai yaso,” pepudi aupu ton penmau.

Ware ner do, ware ngebo do, ne tep teka tenepnengedi, ne domyakankamneng nengda, sun pe keca tepapu, ‘Ange mambule,’ men tenenkamenge. Sun weneprapmengedi popmengepa depkameng nengpu, sengdin co dopra tali lupra baramengtopu, sun pe gam kun keca tepapu men tenenkamenge. Ukupra tenenunge. ‘Konuma, sun anengdi poptapkamnengada telepe pua, ne gam kunmanada mambule gume,’ tenengetopu, ne nyapu peda, ‘Yu nengdi popkamneng do?’ tenena gum di, sun pe gam kun keca cap, sun pe putare keca tepapu, men tenenkamenge. Yesus tep, teka teneramenga tep, yuk nengdi popkungopda, ‘Ada mambule,’ men tenenkamenge. Ne upupu gekepra domyakankamnenge. 25 Ange tep nengeda, ware ner do, ware ngebo do, ne tep teka tenepnengepa, yuk nengdi, “Popkupe,” pepmengepa, kware kurepa, ‘Nun gam kuna cap, nun pe tep putasere keca cap, angepu mambule. Ne mawapu kunkamne,’ tenepra tamnenge nesalada, amenda taru Allahdi wenepredi poprepa, depmengopda, kange di ton cap tamupra, gam bukra deiprepa men gam bukamenge.

Dinino, ne tep teka tenenenunga tep, adeiki di, yuk nengdi popmengepa depkameng nesala cap, ada ne upu dopra peterepmengepane, atep ngeda popkameng nesalada, sun nong depkameng dinin, sun sambalada, ne cap kikiman pio gam kunkamepe. Allahdi anesala ka di tamupra gam bukra deiprepa, anesalada gam pio kunkamenge. 26 Tenpu ngebodi, akeca-keca yala weik taleamtudi, ne Yesus tep teka men teneramnetu dinin, talipu deptudi uku jen ban betuopda, ataleamtu keca yuma akwapkamre dinin, er sambala pe depkamra tep, er taleamtu keca deiki di lyepmemetu do? Er taleamtu keca di, er tep ka di tamupra telep kupra deipmemetu do? Ada, pio gume. Akeca yumadi telep kupra men deipmemetue. Sun gam kuna deiyo keca cap, sun sambala capda, wareto keca deiki di kunupra doproptum do? Gume, pio gam kunada, men kunupmanto keca tepa.

27 Ada, tali tep gume. Neda Nimi Mi Sisa Utopu Ngebo, ne nai er urasin pio telep kuredi, dirine weik kurya utopu, ne peda utopu kupnyopda, Allahdi ketekepra deipupa, im deiki kunge neng, malaikat cap, wisipropmepyopda, tuai yankamepe. Yankamep taruda, tuai nesala yuma wenepra upu bokeipkamne. Ware nesala do yuma, sun kuramenge nge utopu, nedi moupra dipetepra nuknedi upu bokeipkamne. Ada mali kun nesala tep wenepra popkamne. Telep kun nesala menenga keca karepkamne. Yesusdi awekmai neng tep pepu. 28 Upepu dingeda, aupu ton pepu. “Ne tek sisi upu pepsene. Sun mening damai atekmarum neng kan-kanda, ton nengda, ‘Allahdi nesala ban-ban yuma dakunga neitamai di, nimi pio weik lyepredi, er puto deiki sun dipru talenkamre’ tenen, neda Nimi Mi Sisa Utopu Ngebo yankamne taru kapul men kupre taruda, men depkamenge. Sun anesalada akupkamre keca sun anengdi epkamenge.” Yesusdi awekmai nesala tep pepu.