Mat 17 | XteSC | STEP | Aupu pepkopda, dakuramyanen, ue ngantan bari tumi konum mapyopda, Yesusdi weneri nengpu dopropupa, ila mutu dup welepi. Yesus cap mutu dup welepi neng sida, Peterus cap, Yakobus cap, er weit bo Yohanes cap, Yesus cap, sunpu amutu dup welepmaidi ibena kunmai.

Matthew 17

Yesus er urasin dirine weik kupu upu

(Lukas 9:28-36; Markus 9:2-13)

1 Aupu pepkopda, dakuramyanen, ue ngantan bari tumi konum mapyopda, Yesusdi weneri nengpu dopropupa, ila mutu dup welepi. Yesus cap mutu dup welepi neng sida, Peterus cap, Yakobus cap, er weit bo Yohanes cap, Yesus cap, sunpu amutu dup welepmaidi ibena kunmai. 2 Sun amutu dup welepi pangeda, er nyapudi adinmaipane, Yesusda er urasin yuk kupu. Yesus er urasin yuk kupudi, keteng deipredi pio teltel peramretopu dirin weik kupu. Er urasinda dirin weik kuputopu, er opkal kurupudi, dirine weik kupu. 3 Ukupupa, sun aweneri neng tekmaiya damai di, pumun kuramrei nengda, Elia cap, Musa cap, tengyareipa, Yesus cap, Musa cap, Elia cap, kikiman tekidi, upu talepmai. 4 Sun aupu talepmai tarupu, Peterusdi Yesus tep pepu. “Naio, nun akunmapaida, pio telep tep, nun weneri nengdi bura ati ton doptepe. Ton atida kan tep, ton atida Musa tep, ton atida nabi Elia tep doptepedi, acapu kutepe,” Peterusdi pepu.

5 Peterusdi aupu tup penmau taruda, sun amutu dup kunmaipane, dua di sun tekmai mutu yuma keproudi, yan singipupa, adua kan-kanda, Allahdi aupu pepu. “Akunmar ngeboda, ne Mi Sisa kurepa, er tep ne kange pio derinune. Sun yumada er upu pio moupra gekenkamrume,” Allahdi pepu. 6 Allahdi upepupa, Yesus er nyapu aweneri neng gekepidi, kware weik kupupa, genepdongopidi tuaipu amupra mapi. 7 Ukupi dinino, Yesus er buru di er nyapu sun nong deiki talepudi, upepu, “Sun kwar dangna meme. Sun yuma tekso,” Yesusdi pepu.

8 Yesusdi aupu pepupa, adipapu sun aweneri nengdi, sun tekmaiyai dana-dana dipetepi dinin, nimi yuk nengda, ton men epi. Elia cap, Musa cap men epi. Sun weneri neng cap, Yesus cap, sunpu akunmai. 9 Amutu dup di tamupra kwereryakanmai taruda, Yesusdi akupu keca yuma, ‘Yuk neng tep lap perbenung’ tenen, upu sekrou. “Neda Nimi Mi Sisa Utopu Ngebo popnengepa, depnedi gam buknyopda, amutu deiki kupmarpa epmarum ngeda, amenda taru lap perbenkamrum dinin, ukutaruda yuk nesala tep lap perbana gume,” pepra upu seku.

10 Amendada, sun anengdi Yesus tep asipetepi. “Allahdi, ‘Ukunkamrume, angeda men kunkamrume,’ peipupa, Musadi sekeiamseu upu peteremna deiyo nengdi, ‘Elia menmena yanamrepane, amenda sirya taruda, Allahdi dokotepkamre ngebo, nimi Lyemna Deiyo Ngebo, Mesias penung ngeboda, nabi Elia amenda yankamre,’ penge upuda, ware keca deiyo tep penung do?” pepra asipetepi. Asipetepipa Yesusdi tamupra pepu.

11 “Sundi, ‘Nabi Elia menmena yanamredi, akeca-keca yuma lepsikra ketenepra derinkamre,’ penungada tek sisi penunge. 12 Dinino, ne tek sisi pepsene. Ukutaruda, nabi Elia kuramnga utopu ngebo konum yaue. Menop taru di, ‘Elia yankamre,’ peramyada, Yohanes yankamua tep perami. Uperamitopu, Yohanes konum yau dinin, ukutaru kunge nesalada, men kael kepi. Men kael kepya tep, Allah upu lap perami neng, sun nabi nengdi, Allah upu deiki sekamitopu, ukutaruda amutu kunga deiyo nengdi angebo Yohanes tep, ‘Poptepe,’ tenepra putaramnga utopu konum kupi. Angebo, er tep kupitopu, ne peda, Nimi Mi Sisa Utopu Ngebo ikin keca ne nong deiki deipnengepa, dounmanepane, sundi tapkamnenge,” Yesusdi pepu. 13 Upepu pangeda, er nyapudi, ‘E, nabi Elia utopu ngebo pepmarada, Yohanesdi teka tenerami nesala dopra me dongoramu ngebo tep, penmasera’ tenen, kael kepi.

Yesusdi isok taleamu mi kwetepu upu

(Markus 9:14-28; Lukas 9:37-42)

14 Sun welepmai mutu deiki di kwerepidi, mutu amnge tapra benmai neng kunmaiya damai yai. Yai dingeda, Yesus er nyapu topnebari (9) neng ukunmaipa tapra benmai neng cap, yuk neng cap, kunmaipane yai. 15 Atekmai neng kankan tenpu ngebo Yesus damai yaudi, er tep, ‘Gisal dopkun’ tenen, gutam tu dipdongoprapudi, aupu pepu. “Naio, ne mida isok taleamnga deiki di, pio kange mun kange doupra dounmare. Isok taleryare taru yumada, isok puto di dopra, tu deiki taprepa, ule weike talungrure. Tonda, isok taleamudi, ‘Uku pumbon cap, mokon pumbon cap, dongopra popkaman’ tenen, dongopembarure. 16 Ukurura tep, ‘Kan nyapudi, aisok enepkameng’ tenen, moropman dinin, sundi aisok men enepmanto kupmange,” pepra, Isok taleamu mi er naidi Yesus tep pepu.

17 Upepupa, Yesus aupu gekepudi, atekmai neng yuma tep dabal kupupa, aupu pepu. “Sun ataru kumum nesalada, teka men tenenerum nesala cadi, pio mali kurume. Ne dabale tep, ‘Ware kuprap taru di sun damai tupa kunkamne do?’ Tonda, ‘Telep kunkameng do?’ tenen, tamna gum di ware kuprap taru di pio dinapu kunkamsen do? Atep, isok taleamu mida, dopra ne damai duyarume,” Yesusdi pepu. 18 Yesusdi upepka tep, anengdi ami dopra, Yesus damai duyai. Duyai pangeda, ami taleamu isok tep, Yesusdi pepu. “Ami dipruai talepmuma tapmemdi, gupra beo,” pepra enepu pangeda, ataru dipapu aisok ami dipruai di gupra beu. Beu pangeda, ami teleppu kupu.

19 Amendada, Yesus cap, er nyapu 12 neng cap, sun yuk ati pum wekroi taruda, er nyapudi asipetepi. “Naio, ami taleamu isokda, nundi men enepmanto kupmapada, deiyo ware keca tep do?” pepra asipetepi. 20 – 21 Asipetepipa, Yesus tamupra pepu. “Sundi aisok men enepmanto kupmarumada, ne tep teka tenenerumada, pio metekpu kapseua tepa. Sumi du pio metek kecapu dinin, sundi ne tep teka tenepmanerum ngeda, ametek keca sumi du utopu teka tenepnetumtoda, sundi ormutu tep, ‘Kan pedipapu erepra, aca di ortara derirbeo,’ peptumpa, amutu er pedipapu erepra, ortara deribetue. Apepmasentopu kuptum paneda, ‘Akeca-keca yuma kupkup’ tenen, moroptumopda, ukuptue. Teka tenepnetumdi, moropnerumnyopda, men kupmanto kecada, ikin men kupsetue. Sundi moroprumtopu kuptue.” Yesusdi er nyapu 12 neng tep pepu.

22 Yesus cap, er nyapu cap, amutu tapra, Galilea tara neitamai embanmai. Ton ataru neitamai di aupu pepu. “Neda Nimi Mi Sisa Utopu Ngeboda, popkamnenge. Ada, tenpu ngebodi, ‘Yu neng damai Yesus popkameng’ tenen, nimidi dudopra yarepa, sun yu nengdi ne dopra popkamnenge. 23 Popnengopda, depmanyanen, u weneri tumi konum kupyopda, ^{▼▼u weneri tumi – Sun Yahudi yala nesaladi nungamitopu, Yesus popipa Jumat tumi lukunda cap, Sabtu tumi yuma cap, Minggu tumi ipna cap, nukipa, ‘Ue weneri tumi konum kuprepa gam bukamre,’ perami.} tamupra gam bukamne,” Yesusdi er nyapu tep lap penmau. Lap penmaupa, Yesus er nyapu 12 neng gekepidi, ‘Uo nun nai Yesus popkamemenge’ tenen, bicau kupupa, kange mun kange doupi.

Yesusdi, nimi deiyo neng pajak co bo karena tep, pepu upu

24 Yesus cap, er nyapu cap, amutu tapra bisi mapbaramyanen, Kapernaum mutu bei pangeda, Yahudi yala neng sun Allah tep karerbarami ati wengbana tep, pajak co bo dorona deiyo neng, Peterus er damai yaidi asipetepi. “Kan peteremna deiyo ngebo Yesusdi, Allah karena cap, er si eremna cap tep, akati wengna tep, kunumna pajak co bo karerur do, men karerur do? Ada, Allah si eremna ati talena deiyo nengdi, ‘Akati wengna tep, pajak co bo karepso,’ pesenge taruda, Yesusdi karerur do, gum do?” pepra asipetepi.

25 Asipetepipa, Peterusdi tamupra pepu. “Gume, sundi pesenge taruda karerure,” pepupa, aneng gekepidi, bei. Beipa, Peterusdi Yesus kunmau ati weku. Weku pangeda, adipapu Yesus er adipapu Simon tep pepu. “Simono kanda ware keca tenepmarem do? Ban-ban yuma ila nimi deiyo nengdi, pajak co bo dororamenge ngeda, sun pe nyapudi karengepa doronung do? Sun yuk tali neng dipu karengepa doronung do?” pepra asipetepu.

26 Yesusdi aupu pepra asipetepupa, Peterusdi tamupra pepu. “Gume sun pe nyapudi men karenunge, yuk tali neng dipu karengepa doronunge,” pepu. Upepupa, Yesusdi, “Tek sisi pepreme. Ila nimi deiyo ngebo er nyapu sisa sun dipu pajak co bo men karenunge. Ange tep nengeda, Allah er Mi Sisa ne cap, uda sun ne nyapu cap, Allah karena ati wengna tep dororameng co bo, nundi men karepmepyopda, ange peda telepe pua. 27 Dinino, aco bo dorona deiyo nengdi, nun tep mali tenepsenung tenena tep, kanda Galilea mokon pirman bememdi, mekina youna keca dopra, mokon pumbon dokotepmempa, mekina tenpu youpre pangeda, amekina banakra dimempa, derakma gel uang tenpu ^{▼▼Derakma gel uang perami ngeda, ukuprap. Derakmada, kunumna weik gel uang si tep perami. Tenpu keteng komuni pel donmanpane ipnopda, atumi yuma pel donman kunumna tep, derakma tenpu karerami. Tenpu ngebo tep, Allah si eremna ati pumbon wengbana tep nengeda, metek gel uang er si derakma butene karerami. Amekina sipyal pumbon akapkamre ngeda, derakma dumbari utopunge kupmara cadi, Yesus cap, Peterus cap dukdongopra sun tep karena utopunge tep pepu.} akapyopda, dopropkurume. Agel uangda, Allah er si eremna ati deiyo neng tep, dopra karerbenkurume. Ada, nun butene akati wengbana tep karenkamanem kunumna gel uangda, akonuma.” Yesusdi pepu.