Mat 18 | XteSC | STEP | Kapernaum mutu apu tup kunmai taruda, Yesus er nyapudi Yesus tep asipetepi. “Allahdi nesala weik lyepredi sun dipru talenkamre taruda, nun kan-kan di, ware ngebo tekredi, menmena nun ila deiyo ngebo kupredi talenkamser do?” pepra asipetepi.

Matthew 18

Yesusdi, “Ila mambul kupkameng neng ake,” pepu upu

(Markus 9:33-37; Lukas 9:46-48)

1 Kapernaum mutu apu tup kunmai taruda, Yesus er nyapudi Yesus tep asipetepi. “Allahdi nesala weik lyepredi sun dipru talenkamre taruda, nun kan-kan di, ware ngebo tekredi, menmena nun ila deiyo ngebo kupredi talenkamser do?” pepra asipetepi. 2 Upepra asipetepipa, Yesus sun bukmaiya kan-kan di, metek mi tenpu upupupa, yau pangeda, Yesusdi ametek mi dopra, tekra deipudi, aupu pepu.

3 Ne pio tek sisi pepsene. ‘Nun ila neng kupkamepe’ tenen, kange dipru eremarumada, tapkurume. Yambul nyapuda, sun kange dipru bouna di kungedi, du neng upu gekepra kuramengtopu, sun peda kange tamupra bouna di men kuprumyopda, Allahdi sun tep lyepra men talenkamsere. Lyepserepa im deiki pe men wengbenkamrume. 4 Ange tep nengeda, Allahdi nesala ban-ban yuma dakunge nesala neitamai di, nesala weik lyepredi, sun dipru talenkamre taruda, ametek mi utopu dipru bouna di kuramenge nesalada, Allahdi sun tep, menmena ila deiyo neng kepra deipkamre. 5 Tonda, ware ngebo do, ware ner do, ametek mi utopu nesala tep, bicau tenengedi, ne si deiki di telepe pepra, anesala tep makuramengopda, ada ne tep makunkamnenge. Yuk nesala tep makupmengopda, ada ne melimna utopu tep pepsene.

6 Dinino, ware neng do yuma, sun mali kuramenge keca tapmenga deiki di, atekmar mi utopu kupra dipru boun kunge nesaladi ne tep teka tenenenung dinin, sun mali nengdi mali kupra kungepa, sun aneng peda ange epmengedi, ‘Nun peda sun aneng kungetopu kupkupe’ tenen, mali kupmengopda, Allahdi sun mali kuna deiyo neng tep, menmena wenepra popkamre. Uda yuk nengdi menmena mali kuramya deiyo ngeboda, ila gel di er kum gerekra, laut mokon neitam dongoptengepa, mokon jepmemetu teptoda, ada wenemna kaname. Dinino, aneng utopu nengda, sun mali kunga deiki di, yuk neng tep, mali kudinunga cadi, Allah ila di aneng tep wenepkamrada, ila ikin weik kupkamre. Allahdi mali kudina deiyo nesala weika di wenepkamra tep pepsene.

7 Ware keca do, mali kudiserepa, Allah teka tenemum ngeda, tamkamrume. Tuai mutu neitamaida, mali kudisere kecada, akapkamra tep, uo tenepra kange mun kange doupra kunkamepe. Autopu kun kecada, pio tupa akunkamre dinino, amali kun keca kudirameng deiyo nengda, sun pio kange mun kange doupra kupkamenge. Yuk neng tep mali kudina deiyo nengda, Allahdi aneng tep ila di wenepkamra tep pepsene, Yesusdi pepu. Upepudi, aupu ton dukdongopra pepu.

8 Sun buru di talepra mali kuna do, sun yanedi yanipra bemumdi, mali kuna do, ukupra mali kupbamumyopda, amali kun keca talepmamum buru cap, yane capdi mali kunai bemumdi mali kupmamumnge capda, sekra tamkamrume. Telep ngeda, tenpu buru cap, tenpu yane cap akapserya deiki dipapu, pel dopra kunkamrume. Ada kanam pua. Dinino, buru butene cap, yane butene capdi mali keca tupa kupbamumyopda, Allah wenepseredi, men gum tapmanto uku jeryai pio dokotepkamsera cadi, angeda pio mambule. Angepuda tek sisi pio ikin kupkamsere.

9 Tonda, sun asuru epmumdi, mali kupmumyopda, dana tara asuru du lukra tapkurume. Telep ngeda, tenpu asuru dipapu Allahdi nesala weik lyepredi sun dipru talenkamrai, im deiki wengbenkamrume. Ada kaname. Dinino, asuru butene dimumdi, mali tupa kupmumyopda, Allah wenepseredi, men tapmanto uku jeryai, uku jen ban dokotepkamserada, pio mambule. Angeda, tek sisi ikine. Atep ukuna gume pepsene. Yesusdi pepu. Upepudi, aupu ton cap pepu.

10 Sun yumadi, ametek mi dipru bouna di kuramretopu kunge nesala tep, ‘Anesalada, sun mambule gume, dakwapye,’ tenena gume. Allah teka tenepra, dipru boun kupra kuramenge nesalada, ‘Anesalada mambul gume, dakwapye,’ tenepruma tep, sun kange moupra kunkamrume. Anesalada, sun kalengna tep im deiki melimna neng, malaikat, ne nai Allah damai kununga cadi, ‘Anengda mambule gume,’ tenena meme. Anengda sun kalengna malaikatdi lap perbaramengepa, ‘Allah gekepredi, sun tep wenepserur’ tenen, pepmasena tepa, Yesusdi pepu.

Yesus domon upu deiki di, “Domba bisam tenpu ngeda tu pepke,” pepu upu

(Lukas 15:4-7)

11 Yesusdi aupu konum pepu dingeda, ukupmanto upu ton pepu. “Neda, Nimi Mi Sisa Utopu Ngebodi tu peramre keca utopu keca, ‘Epra lyepkamne’ tenen, yasi. Utenen yasa tep, ukupmanto upu ton pepkusene,” Yesusdi er nyapu tep pepu. 12 Upepu dingeda, aupu ton pepu. “Sun kangeda, ware tenepmarum do? Tenpu ngebo er domba bisam 100 kuramenge dinin, tenpu ton yukai daembaramyanen, tu pepyopda, domba bisam denge weik 99 domba bisamda, tupa akapmar dinin, abisam peina deiyo ngebodi, ‘Amutu neitamai di, ne domba wangapmanerdi, dimpepmar ngeda, dakwapye’ tenen, adeiyo ngebodi, kaukemdongorur do? Gume, er domba bisam deiyo ngebodi, ‘Ne domba bisam tu pepmanerada, men tapkune, epra embenkune’ tenen, epra embarure. 13 Er domba bisam 99 yukai men embanmangedi, tupa apu kunmange nge tep, yambul kange derirur dinin, tenpu domba bisam tu pepmarenge tep, epra embaredi, konum epyopda, pio ila di kange derirure. 14 Adomon upu pepmasentopu, sun nai Allah im deiki kurur ngebo er kangeda, ametek mi utopu, nimi tenpu ngebo pe ton, men tapkamne. Tenpu ngebo pe ton men tu penkamenge. Atenpu ngebo peda ton men tapkamne, ayumada lyepkamne. ‘Ne mi kunkamre’ tenen, putarepa pio teneserure. Allahdi tuai nesala yumada, ‘Nimi tenpu ton uku jen ban banada, ne dabale,’ tenerure.” Yesusdi erdi wepra deiamu 12 neng tep pepu.

Yesusdi, “Yuk teka tenena nesaladi sun tep mali kupsengopda, kaukemkamrume,” pepu upu

15 Yesusdi pepu. “Teka tenenge nesala, sun cap kikiman kurumu nengdi, sun tep mali kupsengopda, yuk neng cap gume, sun pedipapu sun mali kupmaseng neng damaipu bemumdi, ‘Kao mali kupmanerum ngeda, ake,’ pepra, mali kupmasenge keca tep, lap perbenkurume. Mali kupra deipmaser ngebo gekepseredi, ‘Telepe,’ pepseryopda, kange deipdarumdi, kikiman denepra amsepu kunkamrume. 16 Dinino, men gekepredi, ‘Telepe,’ men pepseryopda, sun kayapu tenpu ngebo do, butene neng do, dopra kikiman bemumdi, mali kudipseu ngebo er damai bena, upu ton cap talepkurume. Yuk neng cap upu talerbenkamrumnge deiyoda, ada, Allah upu neitamai sekeiamseitopu, ‘Nimi butene neng do, nimi weneri neng do, angeboda, tek sisi mali kupke’ tenen, kael keptengedi peptengopda, aupu gekepkamrume. ‘Tenpu ngebo dipu pepseryopda, sun pio men gekenkamrume,’ pepra sekeiamseitopu kunkamrum tenen, pepsene,” Yesusdi pepu. ^{▼▼Ulangan 19:15}

17 “Sun cap, yuk neng buteneto, wenerito cap, bena mali kudina deiyo ngebo tep upu peprumupane, angebodi pio men gekepseryopda, sun mutupu dinin, Allah teka tenenge nesala, yuk nesala sun gekena tep, sun damai bena aupu jenek perbenkamrume. Gekepmengedi, aneng yumadi mali kupsere ngebo tep, pepmenge upu ton men gekepseryopda, sundi angebo tep, utenenkamrume. ‘Angeboda, tek sisi Allah teka tenena gum nesala, sun kurameng utopu kurure’ tenen, tamkamrume. Tonda, amutu talenga deiyo neng karena tep, ‘Pajak co bo dorona deiyo neng, sun mali kuramengtopu, nun tep mali kudina deiyo ngebo, er ton utopu kurure,’ tenenkamrume. Ukupra tenemumdi, amali kudina deiyo ngebo cap kikiman men kunkamrume,” Yesusdi pepu.

18 Upepudi, aupu ton dukdongopra pepu.

“Lumdongona gume, ne tep teka tenenerum nesala, sun tuai mutu kumum taruda, ‘Ukunada telepe,’ pemum ngeda, sun nai Allah im deiki kurur ngebo peda, ‘Angeda telepe,’ penkamre. Tonda, sun tuai nengdi, ‘Ukunada mali,’ tenemum ngeda, sun nai bo Allah im deiki kurur ngebo peda, ‘Angeda pio mali,’ tenerure. 19 – 20 Dan mutu do yuma, ne tep teka tenepnemumdi, ne si deiki di bulupmum pangeda, ne peda sun kunkamrumaipu kikiman kunkamne. Ne cap tonpa kunkamepe. Tonpa kunkamepa tep, sun Allah moronkumum taruda, nimi butene neng kange tenpu tenepra, moropmum pangeda, ne nai Allah im deiki kurur ngebo gekepseredi, sun moropmarumutopu makunkamsere.” Yesusdi wepra deiamu 12 neng tep pepu.

Tenpu ngebo, er mali kupmemeu ngebo tep, men kaukepudi, tamupra wenepka tep pepu upu

21 Yesusdi aupu pepupa, Peterusdi, Yesus tep asipetepu. “Naio, yuk teka tenena ngebo dinin, ne tep mali kupneryopda, ue ware kuprap taru di kaukepkamne do? Ue tenpu taru di dipra, yoneitam bari kaukepkamne do?” pepra asipetepu. 22 Asipetepupa, Yesusdi tamupra pepu. “Kandi, ‘Ue yoneitam bari tarupu angebo kaukepnedi, tapkamne,’ tenena gume. Kan kabo teka tenena ngebodi mali kupkerepane, kaukepkamrem ngeda, ue denge yumada, ue denge yoneitam dinin, kange di ton cap yoneitam nukra, ada ue taru yuma 77 kali deiki di kaukemkamrume. Ada, mali kupsenge keca tep, tamna gum di, pio kaukemnapu kunkamrume,” Yesusdi pepu. 23 Yesus upepudi aupu ton pepu.

Allahdi nesala weik lyepredi, sun dipru talenkamsera utopu keca tep, ukupmanto upu pepkusene. Aupuda, ake. Tenpu mutu ila nimi deiyo ngebodi, er pel don neng ke dopropi co boda, ‘Adipapu aco bo tamupra karepnengepa gawal dakune,’ tenepu taruda, er pel don neng kongpepupa, yai pangeda, gonga kepu. 24 Gonga kepu taruda, er melimna nengdi, tenpu ngebo dopra er damai duyai. Angeboda, er deiyo ngebo co bo denge pio weike dopramu ngebo er damai duyai. 25 Er co bo ke dopramu ngeboda, tamupra men karepmanto kupka tep, animi deiyo ngebodi angebo tep upepu. “Angebo er pe cap, er ner cap, er nyapu cap, er keca yuma cap dopra, yuk neng damai kunupmumdi, aco boda, angebo kepu tep dopramneu co bo tep, yo punupra karepkamnerume,” pepu. 26 Upepupa, aco bo dopramu ngebodi, gutam tu dipdongoprapudi ila di moropu. “Naio yapmanemempane, amendada ne dopramsi co bo yuma punupra karepkamken ja,” pepra moropu.

27 Upepra moropu pangeda, animi deiyo ngebodi er tep, bicau tenepudi, ‘Dakwapye,’ tenepra er dopramu co bo tep kaukepu. Kaukepudi, “Ne tep tamupra karena gume, tali lupra dabeo,” pepupa, beu.

28 Co bo weik dopramu ngebo beu dinin, er cap kikiman pel doramrei ngeboda, angebo er co bo pio yambulanunpu ke dopramnga tep, er kum talepnurupra long-long pepu dingeda, yu bikrapudi, aupu pepu. “Kandi ke dopramnemum co boda, adipapu karepneo,” pepu. 29 Upepupa, er cap pel doramrei ngebodi, gutam tu dipdongoprap ila di moropu. “Uo ne kabo, yapmanemempane, amendada, nedi ke tep dopramkesi co bo yumada, punupra karepkamaken ja,” pepu. 30 Upendeupa, angeboda er kapdi penmau upu gekena gum dipapu, yuk neng tep peipupa, angebo doprapidi, wenemna ati dongopidi pepi. “Kanda acapu kuramemyanen, kandi ke tep dopramum co boda, ange yuma tamupra karepmemdi gawal konum dakmemnyopda, loptapkamkepe. Gum dingeda, wenemna ati pumbonpu, apio kunkamrume,” pepi.

31 Yuk pel don nengdi, ukupinge epidi bicau kupupa, sun deiyo ngebo er damai lap perbei. 32 Bena lap pepipa, adeiyo ngebodi, er co bo weik ke tep dopramu ngebo tep, upupupa yau pangeda, angebo tep pepu. “Kandi ne co bo weike ke dopramnemum dinin, ila di moropnemuma tep, kaukepkesidi, ‘Aco boda, tamupra men karepkamnerume, dakwapye,’ pepkesi. 33 Nedi kan tep bicau tenepra kaukeamkesitopu, kan co bo ke dopramkeu ngebo tep, utopu kaukepmatum dinin, bicau tenepra men kaukepmumada, telep kupmum do?” pepu.

34 Upepudi, adeiyo ngeboda, pio tulum kupupa, er co bo ke tep dopramu ngebo dopra, wenemna ati deiyo neng karepupa, anengdi er nong dopra wenemna ati dongopi. Dongopipa, “Akuramyanen, ange yuma konum gawal dakra konum tamupra karepre pangeda, loptapmepepa, betue. Gum dingeda gume,” pepra deipi. Yesusdi er nyapu tep pepu.

35 Aupu pepu dingeda, aupu ton cap, dukdongopra pepu. “Ukupmanto upu apepmasentopu, sun kayapu nengdi mali kupsengepa, men kaukepmum pangeda, ne nai Allah im deiki kurur ngebo peda, erdi sun mali kumum keca tep, ‘Dakwapye’ tenen, kau men kepseredi, gum kupra men derinkamsere.” Yesusdi pepu.