Matthew 19

Nimi konum domi nerapu tamna tep, Yesusdi pepu upu

(Markus 10:1-12)

1Yesusdi aupu yuma konum pepu dingeda, Kapernaum mutu tapra bisi pio mapbaramyanen, Galilea tara tapra, Yordan me goupra ortara bisi mapbaramyane, Yudea tara bei. 2Bei dingeda, Yesus menmena banmaupane, er amnyo tara nesala weik amenda yakanmaipa, anesala sun pu jeramunge tep kwetenmau. 3Tenpu taruda, Farisi neng Yesus damai yaidi, ‘Yesusda mali upu pepkur do, gum do? Mali upu peptuopda, nundi, erda pio mali kurur ngebo peptepe’ tenen, mawa di asipetepidi Yesus tep pepi. “Musa sekeiamu upu deiki, tenpu ngebodi er domre ner tep, ‘Anerda tapkune,’ tenepredi, adipapu tali lupra taptu do? Ware kuna deiyo deiki di angebo er kange tenepretopu, adeiyo tep, ‘Ne nerda tapkune,’ tenepretopu, ange tep er domu ner taptuopda, angeda telep do, gum do? Musadi aupu sekra deipseu do, gum do?” upepra asipetepidi, Yesus tep pepi.

4Asipetepipa, Yesusdi ka tamupra aFarisi neng tep asipetepu. “Musa sekamseu upu yumada, pio men gekeramrum do? Aupu ton men nungamrum do? Apepkusen upu men kael keprum do? Aupuda ake.
‘Allahdi akeca-keca yuma ketekeiamu taruda, nimi cap, nerapu cap, ketekeipu.’ (Kejadian 1:27)

5Nimi cap, ner cap ketekepra deipu taruda, Allahdi aupu pepu.
‘Ange tep nengeda, tenpu ngebodi er nai cap, er nin cap tapra, er ner dopre taru di dipdongopra, ortaruda, er cap, er ner cap, sunpu kikiman kunkamrenge. Ukupra dukdongopra kikiman kurengedi, nong tenpu utopu kunkamrenge.’ (Kejadian 2:24)

6Ukunkamrenga tep nengeda, sun yuk-yuk men kurunge. Sun kange cap, nong cap, tenpu utopu kupra kunkamrenge. Ange tep nengeda, nedi pepsene. Nimi cap, ner cap dopdarengpa, Allahdi sun nong tenpu utopu kupra deipu ngeda, nimidi wilipra yuk-yuk bongdina pio meme. Nimidi domenge nerapu tamnungada, pio mali,” Yesusdi sun Farisi neng tep pepu.

7Upepupa, sundi tamupra pepi. “Kandi aupu pepmaserem dinin, ware keca deiyo tep, Musadi aupu sekeipseu do? Musadi sekeipseu upuda ake. Tenpu ngebodi, ‘Ne ner tapkun’ tenen, surat sekra er domu ner kareptuopda, aner taptudi aner tep, ‘Kanda beo,’ peptudi taptue. Aupuda, Musadi upepra sekeiamseue. Asekeiamseu upuda, ware keca deiyo tep sekeipseu do?” pepra, sun Farisi nengdi Yesus tep asipetepi.

8Upepi pangeda, Yesusdi ka tamupra sun Farisi neng tep pepu. “Sun apu yapu dipru balila kwamupa, Allah upu men gekeramidi, malipu kuramya tep, Musadi aupu pepra sekeiamu. Sun apu yapu neng mali kuramitopu, sun ukutaru kurumu nesala peda utopu kurume. Sun domrumu ner tamrum ngeda, Allahdi akeca-keca yuma ketekepra deiamupa, nimi cap, nerapu cap dodaramidi, dakurami taruda, ange men kurami dinin, sun ukutaru kurumu nesala dipapu kurume.” Yesusdi Farisi neng tep pepu.

9Upepudi aupu ton pepu. “Ne tek sisi pepsene. Ware ngebo do yuma, er dopu nerdi, yuk neng cap tali nyangdaramengopda, er akuramya deiki dipu aner taptue. Angeda yambul telepe. Dinino, yuk keca deiyo yuma akwaptua peda, yuk deiyo tep er ner tapredi, yuk ner dopropyopda, ada mali kurure. Ada, yuk nengdi ner tali-tali upula nyangdaramengtopu kurure. Konum domrumu nerapu tamnada, pio mali pepsene,” Yesusdi pepu.

10Upepupa, Yesus er nyapudi er tep upepi. “Uo, nerapudi yuk neng cap, tali nyangdana deiki dipapu, ner tamnada yambul telepe, pepmaseremada, nun ikin kupsere. Atep, nun kangeda, ner donada, dakwapye, nerapu men donkamepe. Kaberpu kunkamepe. Angeda telepe pua,” pepi. 11Upepipa, Yesusdi tamupra pepu.

“Sundi, ‘Ner dodana dakwapye. Kaberpu kunkamepe,’ pepmanerum upuda, nimi yuma gekepmengedi, pio men kuptenge. Aupu tali peptaptenge dinin, tek sisi kaberpu men kutenge. Allahdi, ‘Kaber kunkameng’ tenen, ton neng wepra deipredi, er puto aneng tep karepyopda, anengpuda, aupu moupra gekeptengedi ner dona gum dipapu kaber nengpu kutenge.

12Ner men domenge nengda, yala weneri kununge. Tenpu ngeda, sun nin yapudi deipmenge taru dipapu, sun bolop men kupupa, sun ner dona tep pio men putare nengda, ner pio men donunge. Deiyo butene ngeda, ton nengda, sun deiyo nengdi, sun amutara kunge melimna neng tep, ‘Mambul pelpu donkamenga cadi, nerapu men donkamenge’ tenen, aneng sun bolop sengtamamenge nengda, sun adipapu ner men dodanunge.

Deiyo weneri ngeda, ton nengda utenenunge. ‘Ner dopmepedi, anerapu sun putan keca tepapu pio tenenapu kupe dingeda, nun nai Allah er pelda, pio telep kupra men doptepe cadi, Allahdi lyepseredi, nun dipru taleserepa, nundi er pelpu tenepra kupedi, apelpu donkamep’ tenen, nerapu men dodanunge. Sun pedipapu, ‘Nunda kaber nengpu kunkamepe,’ tenedangedi, nerapu men donunge. Apepmasen neng do, yuk neng do, Allahdi, ‘Sun kaber nengpu kungedi, ne pelpu donkamneng’ tenen, er puto karepre nengpu, aupu gekepra kungedi, ner men donkamenge. Tali nengda, ange men kuptenge.” Yesusdi er nyapu 12 neng tep pepu.

‘Allahdi metek nyapu telep kupra deipkamre’ tenen, Yesusdi Allah moropu upu

(Markus 10:13-16; Lukas 18:15-17)

13Yuk taruda, nesala weika di, ‘Nun nyapu, sun nong deikida, Yesus er buruda, nun nyapu sun nong deiki deipredi, telep kupra deipkamre’ tenen, anyapu sun nai yapu cap, sun nin yapu capdi, sun metek nyapu weika di dopra, Yesus damai duyakanmai. Duyakanmaipa, Yesusdi wepra deipupa, er upu gekepra melipra embarami nengdi, anyapu sun nai yapu cap, sun nin yapu cap tep, “Sun nyapu dopra, nun nai Yesus damai dekanmarumada, yapso,” pepra upu sengmai. 14Upepra upu sengmaipa, Yesus epu dingeda, er nyapu tep derepu. Derepudi, aupu pepu, “Metek nyapu dopra, ne damai duyakanmangada, telepe pua. Nyapuda, ne damai yakana telepe pua. Sun anyapu ne damai duyakanmanga tep upu sengmarumada, meme. Allah lyepredi, sun dipru taleprepa, Allah er nyapu kunkameng nesalada, ametek nyapu kungetopu, dipru boun kunge nesalapu, Allah er nyapu kunkamenge. Anyapudi kange bongtona gum dipapu, ne tep tali lupra teka tenepnengedi, bouna di kungetopu men kunge nesalada, ne tep teka men teneptenge. Atep, ‘Metek nyapuda Yesus damai men yankung’ tenen, ‘Upu sengnada yapso,’ pepsene.” Yesusdi er nyapu 12 neng tep pepu. 15Yesusdi akunmai neng yuma tep aupu pepudi, awengyakanmai nyapu tep ‘Allahdi anyapu tep, telep kupra deipkamre’ tenen, Yesus er buru sun nong deiki deipudi, Allah moronmau. Ukupu dingeda, amutu tapra, ‘Yukai benkun’ tenen, banmau.

Isomka ngebo tenpu Yesus damai yaupa pepu upu

(Markus 10:17-30; Lukas 18:18-30)

16Yesusdi anyapu tep, Allah konum moropkopda, er gonga baupane, isomka ngebo tenpu Yesus damai beudi, Yesus tep asipetepu. “Naio, kanda, peteremna telep ngebo kuruma cadi, ware telep pel doptenepa, Allah lyepnetua deiki di, bol koptapra pio gam kuna deiyo keca doproptene do?” pepra asipetepu. 17Asipetepupa, Yesusdi tamupra pepu. “Kandi, ‘Ware telep pel doptene do?’ pepmanerema deiyoda, warya tep aupu pepmaremdi asipetepmanerem do? Tuai ban-ban yuma kunge nesalada, tenpu ngebo peda, telep neng ton men kununge. Tek sisi telep kurur ngeboda, Allah er tenpu kurure. ‘Bol koptapra pio gam kuna deiyo keca doproptene’ tenen, putapkeryopda, Allahdi, ‘Ukunkamrume, angeda men kunkamrume,’ peipupa, Musadi sekeiamu mem upu kwapu ngeda, aupu yuma moupra gekepmemdi, pio dumsisipu kunkamrume,” pepu.

18Yesusdi upepupa, aisomka ngebodi tamupra pepu. “Allahdi peipupa, Musadi sekeipseu upu neitamaida, dan upu gekepra kunkamne do? Aupu penmaneremada lap pepneo,” pepra asipetepu. Yesusdi aisomka ngebo tep aupu pepu. “Allahdi peipupa Musadi mem upu sekeiamu ngeda ake.
‘Nimi tali portamna cap, upula ner tali nyangdana cap, yuk nesala sun keca upula dorona cap, yuk neng tep minina upu pena cap, ayumada, pio men kunkamrume.’ (Keluaran 20:12-16)
19‘Tonda, sun nai yapu cap, sun nin yapu cap tep, bicau tenepra gispal dopra makunkamrume. Tonda, kan pedi kan pe putan keca tep, bicau tenepdamemdi, telep kupra kumemtopu, kandi yuk nesala tep bicau tenepra makudankamrume.’ (Ulangan 5:16-20)

Aupuda, Musa sekeiamu upu pepmakene,” Yesusdi pepu.

20Upepupa, isomka ngebodi tamupra pepu. “Naio, kan pepmanerem upuda, ne yambul taru di gekeramsidi kuramsa cadi, ware keca ton kupkamne do? Musadi sekeipseu upu ton tamamsi ngeda, akupmar do?” pepu. 21Upepupa, Yesusdi angebo tep aupu pepu. “Atep, ‘Dumsisipu kutene’ tenen, tek sisi putapkeryopda, nedi pepkuken kecada, ukupkurume. Ada, kan taleamum keca yuma, yuk neng damai co bo benkunupmemdi, tali kankan kunge nesala, akeca-keca yuma men talenge nesala tep, aco bo karepkamrume. Kan taleamum keca kunupra kankan kunge nesala konum karepmem pangeda, Allahdi pio telep keca im deiki deiamkere ngeda, amenda ben dopropkamreme. Kankan nesala konum karepmem dingeda, ne upu gekepra domyankamnerume.” Yesusdi aisomka ngebo tep pepu. 22Yesusdi aupu pepu pangeda, isomka ngebo yupropudi, mali kange doupra, genepdongopra beu. Angeboda, akeca-keca weika di taleamu ngebo cadi, ‘Aupu pepner ngeda, men kuptene’ tenen, mali kange doupra genepdongopra beu. 23Beu pangeda, Yesusdi er nyapu tep, aupu pepu. “Ne tek sisi pepsene. Allahdi nesala weike lyepredi, sun kange dipru talenkamre nesala tep, erdi peprepa, er amngai bukra kunkamenge. Dinino, aupuda sun isomka nesalada, ikin kuprepa, kange mun kange doupra gekenunge. Kanam dipu ne upu gekepra teka men teneptenge. Ikin dipapu Allah er nyapu kunkamenge. Deiyoda, isomka nengdi, ‘Nun bungada, nun mawa’ tenen, sun talenge keca deiki, sun kange derinunga tep pepsene.” Yesusdi pepu.

24Yesusdi akupmantonge upu ton pepu. “Ila unta bisamda, opkal wirameng yumbi bon wengnada kaname. Dinino, Allahdi sun kange cap, dipru cap, talepredi peiprepa, er nyapu kunkameng keca yumada, isomka nengdi aupu gekepra men dombetenge. Ikin kange doupra kunga deiki dipu, Allah er nyapu kepmengedi, im deiki benkamenge. Kanam dipapu teka men teneptenge,” Yesusdi pepu.

25Upepu pangeda, Yesus er nyapu aupu gekepidi uo tenepra lolopi. Lolopidi sun pepu asimdanmai. “Aupu pepmasera tep nengeda, Allahdi wareto nesala lyepkamre do?” pepra asimdanmai. 26Asimdanmaipa, Yesusdi tamupra pepu. “Nimi puto cap, nimidi kunge keca cap, adeiki di nimi men lyepdatenge. Dinino, nimidi men kupmanto keca yumada, Allah er dingeda, kanam dipapu apel dorure. Allah er dipapu mali nesala pe, telep nesala peda, kanam dipu lyemrure. Akeca-keca yuma, Allah er puto deiki di, kanam dipapu pel dorure. Allahda ikin men kuptua tep, Allahdi lyepkamre nesalada, kanam dipapu lyepkamre. Ikine men kuptue.” Yesusdi pepu.

27Upepupa, Peterusdi tamupra pepu. “Naio, kan melimna tep, nun taleamupu keca yuma tapmupudi, kan upu gekepra domyakakenupe. Ukunupa tep nengeda, Allahdi wareto menenga keca kareserepa dopropkamep do?” pepra asipetepu. 28Asipetepupa, Yesusdi er nyapu tep pepu.

Ne tek sisi pepsene. Neda, Nimi Mi Sisa Utopu Ngebodi akeca-keca yuma ukupunge ketekepra deipkamne taruda, akeca yumada, ne talepnedi ila nimi deiyo ngebo kupra, Raja kunkamne. Ila deiyo ngebo kupne dingeda, ne pio telep bungna keca, ila dirine kure keca deiki buknedi, akeca-keca yuma talepra deiki tara kunkamne. Ataruda, nedi wepra deipsisi neng, ne upu gekepra pio domyakanerumu neng sun tep, akeca-keca weik karepsenepa, sun peda ange talepra ila deiyo neng kunkamrume. Ukupmum taruda, sun peda bungna telep keca 12 deiki bukmumdi, Israel nesala yala 12 kunge nesala yumada, sun ila deiyo neng kumumdi, Israel yala nesala kan-kan di, ‘Telep kunge neng ake, mali kunge neng ake,’ pepra, sun upu bongdina deiyo neng kunkamrume.

29Tonda, ware ngebo do, ware ner do? Nimi yala-yala yumadi, ne nong cap, ne upu peteremna cap tep, sun taleramenge keca tapmengedi, ne amnyo tara domyakankamneng nesala yumada, sundi tamenge keca utopu kecada, denge pio weik doronkamenge.

Ada, ataru neitamaipu doronkamenge. Ada, sun kuramenge mutu cap, sun ati cap, sun weit yapu cap, sun du yapu cap, sun nin, sun nai yapu cap, sun pe nyapu cap, sun wa bun cap, ayuma tamamenga tep nengeda, ataru neitamaipu akeca utopu keca, denge weik doronkamenge. Tonda, amenda yankamre taruda, pio gam kuna deiyo keca dopropmengedi, bol koptapra pio gam kunkamenge. 30Dinino, ukutaru ila nimi deiyo neng kepra erepra kuramenge ila nengda, amenda taruda Allahdi anesala dopra, amu kepra deipkamre. Utopu, ukutaru amngai kunge nesalada, Allahdi anesala dopra erepra deipredi, ila nimi deiyo neng kepra deipkamre. Yesusdi er nyapu tep pepu.