Mat 2 | XteSC | STEP | Yesus deiamu mutuda, Propinsi Yudea tara neitamai dinin, mutu sida, Betlehem mutu deipu. Yesus deipu taruda, amutu yuma ila nimi deiyo talepra kuramu ngebo, er sida Raja Herodes kuramu. Yesus konum deipu pangeda, kuru kupne keca, men di kael kepra embarami neng, keteng yakan tara di, ila mutu si Yerusalem mutu diryai.

Matthew 2

Kuru iku taruda, kuru ila kael nengdi, Yesus diryai upu

1 Yesus deiamu mutuda, Propinsi Yudea tara neitamai dinin, mutu sida, Betlehem mutu deipu. Yesus deipu taruda, amutu yuma ila nimi deiyo talepra kuramu ngebo, er sida Raja Herodes kuramu. Yesus konum deipu pangeda, kuru kupne keca, men di kael kepra embarami neng, keteng yakan tara di, ila mutu si Yerusalem mutu diryai. 2 Yaidi asipetepi. “Yahudi yala neng, sun ila nimi deiyo ngebo Raja, ukupu deipmar ngeboda, dan cei deipmarpa kurur do?” pepra asipetepi. Asipetepidi, “Keteng yakan tara di, angebo er akuru ikupa epmepudi, ‘Er si erepkamep’ tenen, kuru im neitamai yakanmau bisipu diramepudi, melipra yanmape,” pepi.

3 Upepi pangeda, yuk nengdi Herodes damai lap pepipa, Herodes gekepudi mali kange doupu. Tonda, Yerusalem mutu kurami neng peda, ‘Ware upu penmang do?’ tenen, sun yuma peda, mali kange doupi. 4 Herodesda, mali kange doupudi, Yahudi yala neng, sun Allah karena cap, er si eremna cap tep, akati pumbon pel dona deiyo neng cap, Allahdi, ‘Ukunkamrume, angeda men kunkamrume,’ peipupa, Musadi sekeiamu upu peteremna deiyo neng cap tep, Raja Herodesdi upupupa yai pangeda asipetepu. “Allah upu lap perami neng, nabi-nabi nengdi, nesala yuma lyepredi talenkamre ngebo Kristusda, ware mutu deipkamre perami do?” pepra asipetepu. 5 Asipetepupa, sundi “Yudea tara neitamai dinin, Betlehem mutu deipkamre, perami,” pepi. Ada, Allah upu lap peramu ngebo nabi Mikadi, aupu lap pepra sekra deiamseue. Er sekeiamseu upuda, adano.
6 ‘Allahdi Betlehem mutu tep pepu. “Yudea tara neitamai kapu mutu yumada, yambul mambul mutu dinin, Betlehem mutupuda, pio ila mambule. Ada, Betlehem mutu neitamai kunge nesala kan-kan di, ila nimi deiyo kepra kunkamre ngebo deipkamenge. Angeboda, domba bisam telep kupra peiramre ngebo utopu, Allah er nyapu Israel nesala tep, bicau teneprap, ‘Ukunkamrume’ peprap, pio talenkamre. Ange tep nengeda, Betlehem mutuda, ila mambul mutu kurure pepne,” Allahdi pepu.’ (Mika 5:2)

7 Sun kuru dipra yakarami nengdi, Herodes tep pepi.

Anengdi Herodes tep aupu pepipa, Herodesdi kuru dipra yakarami neng tep, upupupa yai pangeda, inipra asipetepu. “Sun epmarum kuruda, dan tumi di iku do?” pepra asipetepu. 8 Asipetepudi upu ton moupra deipu. ‘Betlehem mutu dirbenkameng’ tenen, aupu peipu. “Betlehem mutu bemumdi, ami eramumyane, konum epmumyopda, tamupra ne yana pepnemumpa, ne peda er tep, gispal dorbenkamne. Er si erepkamna tepa,” pepra, Raja Herodesdi mawa di peptapu.

9 Aupu pepupa, gekepiopda, sun akuru benamu bisipu diramidi melipra dombarami nengda ka di bei. Keteng yakan tara di ikmaupa, epmai kurupu er mepmaupa, sun amenda melipra banmaiyanen, Yesus deipmau ati, amnya bo deiki iku pangeda, sun peda akatipu bena weki. 10 Akuru akati amnya bo deiki iku pangeda, sun ila di kange deipi.

11 Ila di kange deipidi, akati wekra Maria cap, er mi Yesus cap epidi, ami er gispal dona tep, sun yumada, gutam tu dipra, genepdongoprapidi, gispal dopi. Tonda, Yesus er si eremai. Eremaidi, sun mambul keca, kin keca pumbon kiami keca teprapidi, kunumna weik keca Yesus tep karepi. Sundi Yesus karepi kecada, ake. Co pe konum kalapunge, er si kemenyan uku dongopmengepa, ‘Telep nintong pepkamre’ tenen, karepi. Akeca er sida, kemenyan. Tonda, kunumna weik keca emas ^{▼▼Emasda, gat keca dinin, kunumna weik keca kurure. Emas keca kael kemna tep, lap pena upu nomor 4 dirume.} karepi. Ton ngeda, kunumna weik co pe, telep nintong peramrenge, er sida mur cap, kikiman wisipra karepi. 12 Karepidi, mapmaipa, ken deiki Allahdi aneng tep upepu. “Sun tamupra ban taruda, Herodes er damai courbena bana gume. Yuk bisi di, sun pe mutu tamupra benkurume,” pepupa, gekepidi yuk bisi bei.

‘Raja Herodesdi Yesus poprur’ tenen, Maria cap, Yusup capdi, Yesus dopra Mesir mutu duberei upu

13 Sun kuru dirami neng, Yesus derin ati konum tapra bei pangeda, ken deiki di Allah er im deiki pel don ngebo malaikatdi, Yusup tep aupu pepu. “Herodesdi, ‘Ami poprur’ tenen, bukromemdi ami cap, er nin cap dopra, Mesir mutu dubeo. Herodesdi, ‘Ami popkamne’ tenen, pio enkamra cadi, Mesir mutu bememdi, dakuramempane nedi upupkene pangeda, tamupra amutu yankamrume,” pepu. 14 Allahdi Yusup tep upepu pangeda, Yusup bukroudi, ami cap, er nin Maria cap doprap, alukunda neitamai dipapu, Mesir mutu bei.

15 Dabena kuramipane, Raja Herodes depu pangeda, tamupra sun pe mutu yai. Akupinge yumada, Allah upu lap peramu ngebo, nabi Hoseadi peramutopu kupi. Hosea peramu upuda adano.
‘Allahdi pepu. Mesir mutu neitamai di, ne mi tep upupsipa, tamupra yau.’ (Hosea 11:1)

16 Sun kuru dirami nengda, Herodes tali mawa di tali peptapu upu deiyoda, sun konum kael keamya tep, gekeptaprapidi, er damai tamupra men bei dinin, sun pe mutu bana tep, yuk bisi inipra bei. Konum bei dinin, amendada Herodes ange kael kepudi, er pio tulum kupu. Sun kuru dirami nengdi, Herodes tep, “Kuru ataru di iku,” pepipa, Raja Herodes gekepudi, sun pepitopu gonga kepra, adinen nukpetepudi, ‘Sal nyapu keteng tamun butene di sekrap, utara nyapu yuma popra gawal dakamne,’ tenepu. Utenepudi, yu weik kupupa, er jen talen neng tep upu peipu. “Betlehem mutu cap, adamai mutu yuma cap, sal nyapu, keteng tamun butene di sekrap utara kunge sal nyapu yuma poptapkurume,” pepupa gekepidi, erdi peiputopu, anyapu yuma poptapi.

17 Anyapu yuma popyada, tali gume. Allah upu lap peramu ngebo, nabi Yeremia peramutopu, kupu. Yeremia peramu upuda ake.
18 ‘Rama mutu neitamaida, ila di mali pena cap, engena cap, kunmangpa, gekepmape. Rahel, er nyapu depmangpa, ila di engenmare. Er kange dipru ila di sukunmara tep, men boun kuptue. Kange boun kunada, er songe. Ada er nyapu weike depropmanga tepa.’ (Yeremia 31:15)

Yusup cap, Maria cap, Yesus cap, sun yumada Nasaret mutu tamupra yai upu

19 Yusupda, Mesir mutu neitamai dakuramupane, Herodes konum depu pangeda, Allah er im deiki pel don ngebo malaikat, ken deiki Yusup tep peryau. 20 “Yusupo, ‘Ami poptepe’ tenen, piripterepi neng yumada konum depropya cadi, bukrapmemdi ami cap, er nin Maria cap, doprapmemdi, Israel mutu tamupra dubenkurume,” pepu. 21 Upepu pangeda, Yusup bukroudi, ami cap, er nin Maria cap, dopra duyareipa, sun pe Israel mutupu tamupra bena, sun amutupu dakurami.

22 Dakuramyanen, amenda taru Israel tara tamupra beu dinin, “Herodes depupa, er yo pununa tep, ukutaruda er mi Arkelausdi Yudea tara talerure,” pepipa gekepudi, ‘Angebo Arkelausdi popserur’ tenen, kware weik kupupa, ‘Yudea tara men benkune,’ tenepu. Tonda, ken mapka deiki Allahdi pepu. “Yesus poprura tep, kange moupo,” pepka tep, Yusup gekepudi, ‘Yudea tarada, ne bana gume. Dinin, Galilea tarapu tamupra benkune’ tenen, beu. 23 Galilea tara beu dingeda, tenpu mutu si Nasaret mutu bena kurami. Nasaret mutu bena kuramyada, sun Allah upu lap perami neng, nabi-nabi nengdi aupu perami. Ada, “Nimi Lyemna Ngeboda, ‘Nasaret mutu ngebo kurure,’ pepkamenge,” perami. Ange tep nengeda, Nasaret mutu bena kuramyai di, sun Allah upu lap perami neng lap peramitopu, Nasaret mutu bena kurami.