Mat 20 | XteSC | STEP | Yesusdi er nyapu 12 neng tep pepu. Allahdi nesala ban-ban yuma dakunga neitamai di nesala weik lyepredi, sun dipru taleserya utopu keca tep, ukupmanto upu pepkusene. Tenpu wa deiyo ngebodi, ‘Ne anggur tapu du wa pel dopkuneng’ tenen, ipna taru nimi du dorbeudi, aupu pepu.

Matthew 20

Yesus domon upu deiki di, wa pena neng tep, pepu upu

1 Yesusdi er nyapu 12 neng tep pepu.

Allahdi nesala ban-ban yuma dakunga neitamai di nesala weik lyepredi, sun dipru taleserya utopu keca tep, ukupmanto upu pepkusene. Tenpu wa deiyo ngebodi, ‘Ne anggur tapu du wa pel dopkuneng’ tenen, ipna taru nimi du dorbeudi, aupu pepu. 2 “Atumi neitamaipu ne wa penmanemumpane, ipyopda, kunumna telep gel uang tenpu er sida derakma ^{▼▼Derakma perami ngeda, ada Yesus kuramu taruda tenpu tumi neitamai yuma, ipna taru di dipra idona taru pel dopbaramipane, atumi pel kunumna tep, idona taru karerami gel uang, er si derakma perami.} karepkamasene,” pepupa, sun anengdi, “Telepe,” pepra er wa pel dorbei. 3 Anengdi pel donmaipane, ipna keteng jam 9 kepupa, awa deiyo ngebodi, jen keca deipra kunumamya damai beu taruda, sun tali mesumpu embandarami neng antapudi, aupu pepu. 4 “Ne wa pel dorbenemum pangeda, sun pel dopmamumtopu, nedi kunumna telep keca karepkamasene,” pepupane, anengdi, “Telepe,” pepra, er wa pel dorbei. 5 Aneng yumadi er wa pel donmaipane, awa deiyo ngebodi ipna taru kupmaua utopu, keteng komuni jam 11 ipna keteng ton, sintara keteng jam 2 idona ton, utopu yuk tali tekra dakunmai neng tep pepra embenmau. “Ne wa pel dopnemum pangeda, pel dopmamumtopu kunumna telep keca karepkamasene,” pepmaupa, aneng yumadi yuk-yuk, er wa pel donmai.

6 Utopu ton idona taru jam 4 idona keteng deiki di, awa deiyo ngebo embanmaudi, yuk tali dakunmai neng antapudi aupu pepu. “Ware keca deiyo tep, acapu tekmarumdi, tenpu tumi yuma pel men donmarum do?” pepra asipetepu. 7 Asipetepupa, sun atali kunmai nengdi tamupra pepi. “Pel deiyo nengdi, ‘Nun pel dorbeso,’ pepra pel men karepmasenga tep, talipu kunmape,” pepi. Upepipa, awa deiyo ngebodi tamupra pepu. “Atep, sun peda, ne wa pel dopnemumpa kunumna telep keca karepkusene,” pepupa, sun aneng peda, er wa pel dorbei.

8 Aneng yumadi pel donmaipane, konum ipu pangeda, adeiyo ngebodi er melimna ngebo tep pepu. “Apel donmang nengda, sun pel kunumna tep, menenga keca karepkumem dingeda, amenda tapakra pel donmang nengdi gonga kepra, karepbanmamemyanen, ipna taru di gonga kepmangu neng bena gawal dakrume. Atep aneng tep upurberume,” pepu. 9 Upupupa, er wa pel donmai neng yai pangeda, idona keteng jam 4 idona gonga kepmai neng tep, gel uang er si derakma tenpu karepupa dopropi.

10 Karepbanmaupane, menmena gonga kepmai neng yaidi, utenepi. ‘Anengda pel yambula dipu pel donmangupane, gel uang telepnge tenpu karepupa dopropmanga cadi, nunda ipna taru di pel weik donmappa tep, gel uang weika di karepkusere,’ tenepi. Utenepi dinin, awa tu deiyo ngebo ipna taru di, ‘Ukupra karepkamasene,’ pepmautopu, atumi neitamai yuma pel dopmai neng peda, gel uang tenpupu karepu.

11 Gel uang tenpu dopropi taruda, anengdi awa deiyo ngebo tep, tulum kange doupra er tep, “Pio mali kupmasere,” penmai. 12 Tonda, upenmai. “Idona taru dopropmamum nengda, keteng tenpupu pel donmangu dinin, gel uang er sida derakma, tenpu karepmarume. Nunda, atumi neitamai yuma ikin pel donmapupa, bupu pio weik kupmaseupane, pel donmapu. Nun cap, idona taru dopropmarum neng capda, pel kikiman utopu men donmapu dinin, kunumna telep gel uang, du tenpupu kikiman utopu karepmaseremada, telep gume. Nun kangeda, ange mali. Atep nengeda, ware deiyo tep, kikiman utopu tenpu gel uang karepmaserem do?” pepi.

13 Upepipa, adeiyo ngebodi tamupra pepu.

“Anengo, ne mali men kupmasene. Arup ipna taru di, tenpu tumi pel dopmepyopda, ila co bo tenpu dorona telepe, pepmanerum do, gum do? 14 Nedi ‘Ila co bo tenpu karepkamasene,’ pepmanutopu konum karepmasena cadi, sun pel dopmaruma tep, kunumna gel uang dopra berume. Ne kangeda, ‘Ne pel donkamneng’ tenen, ‘Idona sirya dopropmanu neng cap, ipna taru dopropmanu neng cap, utopu kupra gel uang tenpu karepkamane,’ tenepmanutopu konum karepmasena cadi, ne kange telepe.

15 Ne karepmasen gel uangda, ne gel uang cadi, ne kange tenepmanutopu kupra, konum karepmasene. Nedi tenenetopu kupsetene. Dinino, nedi ‘Pel weik dopmangu neng pe, metekanunpu pel dopmangu neng pe, gel uang amsepu tenpu karepkun’ tenen, tali lupra karepmana tep nengeda, sun tulum kupmaserpa deremanerum do? Pel weik dopmarum neng cap, pel meteka dipu dopmangu neng cap tep, kunumna telep keca utotopu karepmanua tep nengeda, warya tep denepnerum do?” pepra, awa deiyo ngebodi er pel don neng tep pepu. Yesusdi er nyapu tep domon upu deiki di aupu ton pepu.

16 Upepu dingeda, aupu nong ton cap lap pepu. “Arup ukupmanto upu pepmasentopu, ukutaru sun tuai nesaladi, ‘Uo anengda ila mambule,’ tenerum nesala ^{▼▼Mambul neng pepu ngeda aupu nongda, ake. Sirya taruda, Allah erdi teneamu nengpu erepra deiprepa, ila mambul neng kunkamenge. Tuai mutu nesaladi, ‘Anengda pio mambul,’ tenenge nengda, sirya taruda, Allahdi anesala dopra, amutara deiprepa, mambul gum neng kunkamenge. Dinin, ukutaruda, ‘Anengda mambul pio gume,’ tenenge nesalada, Allah er kange derirura cadi, ila di ereipkamre.} tep nengeda, sirya taruda, nedi anengda amu deipkamne. Angetopu, sundi, ‘Uo anesalada, mambul pio gum nesala kununge,’ tenen, kaukemrum nesala tep nengeda, Allahdi ereipredi, ila neng keipkamre ja. Allahdi sun pio erepra kunge neng tep, dopra amutarato kupra deipkamre. Ukutaru, yuk nengdi, ‘Sunda mambul gum nesala kununge,’ tenenge nesalada, Allahdi ereiprepa, mambul weik nesala kunkamenge.” Yesusdi pepu.

Yesusda mali nengdi popkamemei atep, pepu upu

(Markus 10:32-34; Lukas 18:31-33)

17 Amendada, Yerusalem mutu benkamiya tep, bisi banmai taruda, Yesus er mepra banmaupa, er nyapu 12 neng cap, yuk neng cap, amenda banmai. Banmai taruda, yuk neng ton amenda yakanmaipane, Yesusdi er nyapu 12 neng tep, “Ne damai yaso,” pepupa, yai pangeda, yu nengdi amenda taru er Yesus tep kupkamamei ngeda lap pepu.

18 “Nun yuma Yerusalem mutu welepmepe pangeda, neda Nimi Mi Sisa Utopu Ngebo napra benengepa, Allah er si eremna ati pumbon pel dona ila deiyo neng cap, Musa sekeiamu upu peteremna deiyo neng capdi, ‘Angebo poipserume,’ pepra moropmengedi, Yahudi yala gum neng, amutu talena deiyo neng tep karepkamanenge. 19 Karepnenge pangeda, nong bol deiki naleprap nyek-nyek pena cap, silong tuluna cap, balana nong deiki pona cap, ukupnengedi ne nong dopra, sengdin co deiki di popkamnenge. Popnengopda, depmanyanen, u weneri tumi kupkamre. ^{▼▼u weneri tumi – Sun Yunani nesaladi nungamitopu, hari Jumat lukunda cap, hari Sabtu yuma cap, hari Minggu ipna cap konum kupupa, ‘Ada weneri tumi utopu konum kupre,’ teneramya tep, aupu pepu.} U weneri tumi konum kupyopda, Allahdi tamupra gam bukra deipkamnere,” Yesusdi pepu.

Yakobus cap, Yohanes cap, sun nindi Yesus tep moropu upu

(Markus 10:35-45)

20 Yesusdi upu pepupa, Zebedeus er nyapu butene Yakobus cap, Yohanes cap, sun nin cap, Yesus damai yaidi, anerdi, ‘Gisal dopkun’ tenen, gutam tu dipdongopra, Yesus tep moropu. 21 Moropupa, Yesusdi pepu. “Ware keca putapmakerpa mororyanmanerem do?” pepu. Upepupa, anerdi upepu. “Ne naio, ne putapmanerpa moropkuken kecada, kandi karepkamsereme,” pepra moropu. Tonda, upepu, “Akeca-keca yuma talepra kumemdi, ila nimi deiyo ngebo kunkamremaida, ne nyapu butene dopra, ton ngebo kan tebalal tara, ton ngebo kan dumsisi tara deipmemdi, nimi deiyo neng kupra deipmempa, ila mambulai kan cap bukretenge do?” pepra moropu.

22 Moropupa, Yesusdi aner, er nyapu butene, Yohanes cap, Yakobus cap tep, tamupra pepu. “Sun asipterepmanerum kecada, deiyo moupra men tenipmarume. Ne nong deiki ikin keca weik deipnengepa, ^{▼▼ikin keca weik deipnengepa – Yunani upu seki ngeda, katuai di men seki. Yesusdi, domon upu deiki dipu, ‘Ne me mau dopra jenkamne kecada, sun peda utopu jepretum do?’ pepu. Upepu dinin, ‘me jepkamne’ pepu ngeda, er depkamunge tep pepu. Atep, nunda, nong neitamainge, jenek kupra sekmepu.} ne donkamnetopu, sun peda utopu akange mun keca dopretum do? Tonda, ne nong popnengepa depkamnetopu, sun peda utopu depretum do?” pepu. Yesusdi upepupa, sun butene nengdi tamupra peprei. “Kan donmamemnya depkamremtopu, nun peda utopu kupteneme,” peprei.

23 Upepreipa, Yesusdi tamupra pepu. “Ne nong deiki ikin keca deipkamnenge nge cap, ne donkamnenge cap, depkamne cap, yumada, amenda taru sun peda utopu kupkamrerum dinino, ne tuai mutu tamupra yanedi, akeca-keca yuma talenkamne taru, ne tebalal tara cap, dumsisi tara cap bukra ila deiyo neng kuna tep nengeda, nedi ange men karepsetene. Nedi sun nimi deiyo neng kuna tep, men dopra deipsetene. Ne dana-dana tara deiyo neng kepra bungyankameng nengda, ne nai Allahdi teneamudi ketenepra weamu nengpu, amenda taru aneng wepra deipre pangeda, ne damai bungyankamrenge,” Yesusdi pepu.

24 Yakobus cap, Yohanes cap, sun nindi moropu keca, Yesus er nyapu, sun 10 neng gekepidi, abutene neng sun nindi moropu upu tep, tulum kupupa dereprei. 25 Derepipa, Yesusdi er nyapu 12 neng yuma tep bupra, kange di bupra wisipra deipudi aupu pepu. “Sun yuma gekepneso. Sun Yahudi yala gum nengdi, ‘Nun deiyo neng ake,’ tenenge nengda, adeiyo nengdi sun amutara kunge nesala tep, yu kuprepa anesala yanipmengedi, sun nong deiki ikin keca weik derinunge. Tonda, sun ila-ila nengdi deiki tara kungedi, sun amutara nesala tep, kange mun keca sun nong deiki deipmengedi, tali upu peptapra upula doronunge. 26 Sun Yahudi yala gum nesala, sun deiyo nengda ukunung dinino, ne nyapu sunda ange utopu pio men kunkamrume. Sun ne nyapuda ukunkamrume. Sun awekmarum neng neitamai di, ware ngebo do, ‘Neda telep deiyo ngebo kunkamne’ tenen, deiyo ngebo utopu kunkamre ngeboda, er kayapu sun amngai bukredi, sun kange mun kupre keca tep, makunkamre.

27 Tonda, ware ngebo do, ‘Neda du ngebo utopu, mambul weik ngebo kunkamne,’ tenepre ngeboda, yuk nesala yuma tep, sun amutara pel dopredi, sun tali melimna ngebo ^{▼▼tali pel melimna ngebo Co bo deiki kunumami nesalada, isomka nengdi, pio kankan kunge nesala tep, co bo deiki di kunuamipa, akankan kunge nesaladi sun isomka nesala tep, sun pel talipu pel dorami. Tonda, lap pena upuda, nomor 36 dirume.} utopu kunkamre. 28 Ne kunetopu, sun peda, ukunkamrume. Ne peda Nimi Mi Sisa Utopu Ngebodi, ne pe putan keca tep, ‘Nesala yuma makunkamneng’ tenen, men yasi. Nedi tuai nesala yuma, sun putapre keca tep, ‘Makunkamne’ tenen, yasi. Ne kunetopu, sun ne nyapu peda utopu kunkamrume. Neda nesala yuma sun dipruai di, mali teneramenge keca cap, mali kuramenge keca cap tep, ‘Allahdi sun wenepra poprur’ tenen, ne popnengepa depkamna deiki di sekronkamne. Ukupnyopda, ada nimi giso karena utopu kupkamne. Allahdi tuai nesala yuma wenepra poptu dinin, sun yo pununa tep, ne depkamne.” Yesusdi pepu.

Yesusdi asuru puamu neng butene neng kwetepu upu

(Markus 10:46-52; Lukas 18:35-43)

29 Yesus upepupa, sun yuma amutu tapra, bisi mapbaramyanen, Yeriko mutu bisipra ati arum doramyai tapra, Yesus cap, yuk nesala gung weika di tapakra banmai. 30 Banmaipane, asuru puamu neng sun banmai bisai pirman bukmarei. Sun abukmarei ngeda, yuk nengdi, “Yesus yakanmare,” pepra lap pepipa gekepreidi, ila upu di penmarei. “Yesuso, kanda Daud yala nengdi deipkei ngebo cadi, bicau tenepsememdi, nun butene neng tep makupseo,” pepra moronmarei. 31 Upepra moronmareipane, awekmai neng weika di, “Upena yapreso,” pepra upu seki. Upu seki dinino, sun asuru puamu nengdi, ‘Yesus gekepkuser’ tenen, ila di ton cap, “Kanda Daud yala nengdi deipkei ngebo ^{▼▼Daud yala ngebo peprei dinin, aupu deiyoda, ake. Ada ‘Tuai nesala Lyemna Deiyo Ngeboda, Daud er yala nesaladi deipkamenge,’ teneramya tep, aupu peprei.} bicau tenepra makupseo,” pepra ila di moronmarei.

32 Moronmareipa, Yesus aupu gekepudi banmauanen, abutene neng damai bentekudi, asuru puamu neng abukmarei atep, aupu pepu. “Sunda, ‘Ware kupra deipsetu’ tenen, putapserpa, moropmanererum do?” pepu. Upepupa, asuru puamu neng sun butene di tamupra peprei. 33 “Naio, nun asuru pupseupa, ‘Nun asuru di akeca-keca yuma telep kupra diramteneme’ tenen, pio putaserepa, nun du bo Yesus kan tep moropkeneme,” peprei. 34 Upepreipa, Yesusdi sun abutene neng tep bicau tenepudi, er buru di sun asuru damai talepudi kwetepu. Yesusdi sun asuru talepupnen, ataru dipapu, sun asuru telep kupupa, akeca-keca yuma telep kupra epreidi, Yesus bisi banmaupa, sun butene nengdi amenda dombereidi, Yesus cap kikiman melipra embanmarei.