Mat 21 | XteSC | STEP | Yeriko mutu tapra, ‘Yerusalem mutu benkamep’ tenen, Yesus cap, er nyapu cap, bisi mapbaramyanen, ati arum doramyai er sida, Betania cap, Betfage cap bisiprapidi, banmaiyanen, Zaitun mutu dup welepi.

Matthew 21

Yesusdi, Yerusalem mutu yau taru, kupu keca tep pepu upu

(Markus 11:1-10; Lukas 19:29-38; Yohanes 12:12-15)

1 Yeriko mutu tapra, ‘Yerusalem mutu benkamep’ tenen, Yesus cap, er nyapu cap, bisi mapbaramyanen, ati arum doramyai er sida, Betania cap, Betfage cap bisiprapidi, banmaiyanen, Zaitun ^{▼▼Zaitun – Amutu er si tep, Zaitun mutu peraminge deiyoda, amutu deiki zaitun co du mouramu co kouamya tep, amutu sida, Zaitun mutu perami.} mutu dup welepi. 2 Welepi dingeda, Yesusdi er nyapu butene neng tep pepu. “Ortara mutu ati arum doramengai bererumdi, ukupu wekrorum taruda, keledai bisam er nin cap, er mi meteknge cap, gerekeipmanga eprumum dingeda, turya gerekdongomanga lopra, keledai bisam dopra ne damai duyanererume. 3 Ukuprumpa, yuk neng epsengedi, ‘Warya tep kuprurum do?’ pepra asipsengopda, ka di tamupra upepkurerume. ‘Gume, nun nai Yesus putapmara tep, dubenemepa, akeledai bisam bali deiki di bukra emberyopda, akeledai bisam ka di tamupra sun damaipu dokotepkamsere,’ pepkamarurume,” Yesusdi abutene neng tep pepu.

4 Yesusdi upepupa, ukupreinge yumada, Allah upu jenek peramu ngebo, nabi Zakariadi peramutopu kupkua tep, Yesusdi aupu pepupa, kuprei. Nabi Zakaria peramu upuda, adano.
5 ‘Kandi Yerusalem mutu kunge nesala tep upepkurume. ‘Sun yuma diso. Sun ila nimi deiyo ngebo, dipru boun kupredi, keledai bisam mi meteknge deiki bukra yakanmare,’ pepra lap pepkurume.’ (Zakaria 9:9)

6 Zakariadi, ‘Ukupkamre’ tenen, peramutopu, Yesusdi upepupa, aupu pepmautopu, Yerusalem ati arum domyai neitamai bereidi, ati buplan damai keledai bisam cap, er mi meteknge cap, gerekmaiya eprei. Epreidi bena lopdara berei. 7 Lopra dubanmareiyanen, Yesus damai bereipa, akunmai nengdi, sun deiki opkal kwiripra keledai bisam meteknge bali deiki yakra deipipa, Yesus adeiki bukupa doupra beu.

8 Yesusda Yerusalem mutu bisi keledai bisam deiki bukra banmaupane, amutu bulupmai nesaladi, ton nengda, ‘Yesus gispal dopkup’ tenen, nimi weika di, sun deiki opkal kwiripra, Yesus yanipra yankamau bisi yakra deipi. Ton nengda, er yakanmau bisi pirmanai di, atekamu co bata gakra, bisi yaninai singipra deipbenmai. 9 Yesus banmauai mepra banmai nesala cap, amenda yakanmai nesala cap, sunda, ‘Yesusdi nun ila nimi deiyo ngebo Raja kepkamaser’ tenen, Allah upu lap perami neng, nabi nengdi menop taru sekami upu dopra, ila di pepbanmai. Pepbanmai upuda ake.
‘Daud er yala nengdi deipi ngeboda, ^{▼▼Daud yala ngebo perami ngeda, ada Allahdi pumun taru pediramutopu, ‘Mesias, nimi Lyemna Deiyo Ngeboda, Daud yala nengdi deipkamenge,’ tenen, teka teneramya cadi, aupu pepya deiki di, ‘Yesusda, nun nimi Lyemna Deiyo Ngeboda kunkamsere’ tenen, aupu penmai.} erda pio telepe. Ibrani upu deiki di ‘Hosana,’ penmai. ^{▼▼Hosana – Aupuda, Ibrani upu kurure. Aupu Hosana deiyoda, ‘Allahdi lyemserure’ tenen, ‘Hosana,’ perami.} Er si erepra gispal dopmepe. Allah er puto cap, er si cap deiki di yanmasere. Angeboda, Allah er ila puto di makurepa, teleppu kurure. Erda ila mambul ngebo kurure. Allah kanda, im deiki kumemdi, ila puto kurum ngebo, kan sipu ila di erepmakepa tep, hosana pepmepe.’ (Mazmur 118:26)

Upepra Allah tep ila di gispal donmai. 10 Yesusdi Yerusalem mutu bisi banmauanen, Yerusalem ati arum doramyai wekupa epidi, sun Yahudi yala neng yumadi, ‘Ware ngebo yanmaser do?’ tenen, mambul kange doupra, lukdanapidi, mambul kange doupidi, dinmai. Ukunmaidi, “Angeboda, ware ngebo do?” pepra asimpetenmaipa, sun awekmai yuk nengdi tamupra pepi. 11 “Ayanmar ngebo er sida, Yesus. Ada, Galilea tara neitamai dinin, Nasaret mutu di, Allah upu jenek perur ngebo yanmar adano,” pepi.

Yesusda, Yahudi yala neng Allah tep karerbarami ati, Yesus beudi kupu keca tep, pepu upu

(Markus 11:15-18; Lukas 19:45-47)

12 Yesusdi, Yahudi yala neng Allah tep karerbaramidi, er si eremami ati buplan dam, ati pirman beu. Tengbeudi, Yahudi yala neng, ‘Nun mali kunup keca, Allahdi gum kupra deipseredi lyepkamser’ tenen, gam keca popra, Allah kareraminge, ‘Yapi keca popkamepe’ tenen, kunumai neng cap tep, Yesusdi derepudi enepra bura dokotenmau. Tonda, yuk mutu nengdi sun co bo dopra deipipa, Yerusalem mutu neng co bo di dengdanmai co lase yuma, yamupra tamuptapnen embeu. Tonda yal ma utopu ma kunumai neng, sun bukmai keca yuma tamuptapra embeu. 13 Ukunmau taruda, akunmai neng yuma tep, aupu yuma peteremau. Allahdi peipupa, nabi Yesayadi sekeiamu upuda men tenerum do? Aupuda adano.
‘Nesala ban-ban yumadi, “Allah er si eremengedi er tep moronung ati adano,” pepra penkamenge, pepu.’ (Yesaya 56:7)

Tonda Yesusdi aupu pepu. “Allahdi peipupa Yesayadi apepmasen upu sekeipseu dinin, aupu ton akapmare.
‘Akatida nati dinin, sunda nimi upula nengdi upula dopra, inimameng neng, sun kurameng ati utopu, ne ati konum mali kupra deipmarume.’ (Yeremia 7:11)

Nabi Yeremia sekeiamu upu dopra konum pepsene,” Yesusdi akeca talepra kunumai neng tep pepu.

14 Yesusda, Yahudi yala neng Allah tep karerbarami ati neitamai kunmau taruda, asuru pun nesala cap, ai bungne nesala cap, er damai bulupra yakanmaipa, kwetedinmau. 15 Yesusdi anesala kwetedinmaudi, telep pel dopra kunmaunge cap yuma dinmaidi, tali akati dam kunmai nyapu yuma, ila upu di upenmai. “Daud er yala ngebodi deipu ngebo, ayanmasere. Angeboda, Nimi Lyemna tep, Mesias ngebo dokotepseu ngebo adano. Er si eremna tep, hosana pepmepe,” penmai.

Upenmaipa, sun Musa sekeiamu upu peteremna deiyo neng cap, Allah karena tep, er si eremna ati pumbon pel talepra ila deiyo neng capdi, Yesus kunmaunge epidi, atali nyapudi penmai upu ton gekepidi, tulum weik kupupa, Yesus tep pepi. 16 “Akati dam tali kunmang nyapudi penmakeng upuda, men gekenmarem do? Sundi penmakeng upuda, mali tepa,” pepra wenepi. Wenepipa, Yesusdi sun Yahudi yala deiyo neng tep tamupra pepu. “Jo, anyapudi penmaneng upuda, ne gekepman dinino, sun apenmangada, Allah upu neitamai kaputopu penmanga cadi, telepe pua. Aupuda, men peramrum do? Perum dinin, moupra men kael keprumdi penmanerum do? Aupuda, adano.
‘Allah kandi sun dipruai peterem dimempa, pio metek nyapu cap, yambul du nyapu capdi, kan si pio telep kupra eremkenunge. ‘Ne si eremkamneng’ tenen, konum teneamume.’ (Mazmur 8:2)

Mazmur neitamai sekami upu pepsene,” Yesusdi pepu. 17 Yesusdi Mazmur upu neitamai sekeiamu upu dopra pepu dingeda, aneng acapu tapra, Yerusalem mutu ati arum doramyai taprapudi, Betania mutu marbeu.

Ara co du mouna gum tep, Yesusdi derepudi, upu pepupa, ara co koulupu upu

(Markus 11:12-14, 20-24)

18 Betania mutu mapmaua bereku pangeda, ‘Ka tamupra Yerusalem mutupu benkun’ tenen, bisi neitamai yakanmau taruda, Yesusda jen putapu. 19 Jen putapka tep, kwarang co du mouramretopu, co er sida, ara co tekamngai tep, karenai di bena teka dipetepu. Dipetepudi, bo weik douamnga tep, ‘Du ton moupu do?’ tenen, aco damai dirbeu. Dirbeu dinin, aco du men mouamudi, bopu douamu. Bopu douamnga cadi, Yesusdi aco wenemna tep pepu. “Aketeng tamun, aketeng tamun yuma, du men moupmempa, nimidi kan du men daka jenkamkenge,” pepu. Aco tep upepu pangeda, ataru dipapu, aco yaten cap, bo cap, yuma koulupu. 20 Aco bo cap, nong cap, yaten cap yuma, kolupu ngeda, Yesus er nyapu 12 nengdi epi. Epra lolopi dingeda, Yesus tep, upepi. “Naio, ‘Du men moupmempa, nimidi daka men jenkamkenge,’ pepmaumpa, ara co konum koulupmarada, ware keca tep aco menmena koulupmar do?” pepi.

21 Upepipa, Yesusdi tamupra pepu. “Ne tek sisi pepsene. Ware neng do yuma, kange dipru bongtona gum di, Allah tep pio teka tenepmengedi, ‘Ne Allah tep moropkun kecada, Allahdi tek sisi kupkamnere,’ tenepra, Allah tep moropmenge pangeda, ila mambul keca kuptenge. Ada, nedi pepmanupa, ara co koulupmartopu kuptue. Tonda, angepu gume. Ormutu tep upeptue. ‘Kan pedipapu ereprap, laut mokon neitamai derirbeo,’ peptuopda, er peptu upu deiki di, amutu er pedipapu erepra, laut mokon neitamai dokotepdatue. 22 Ange tep nengeda, nedi pepsene. ‘Akeca-keca yuma, Allahdi karepkamsere,’ tenepra moromum taru yumada, ‘Allahdi tek sisi karepkamser’ tenen, kange bongtona gum dipapu, teka tenepra moropmumyopda, Allahdi tek sisi karenkamsere,” Yesusdi pepu.

Yahudi yala deiyo nengdi, ‘Yesusda nun deiyo ngebo men kupkamser’ tenen, asipetepi upu

(Markus 11:27-33; Lukas 20:1-8)

23 Yesus cap, er nyapu 12 neng cap, bisi yakanmaiyanen, Yerusalem mutu ati arum doramyai yana weki taruda, Yahudi yala nesaladi, Allah karena cap, er si eremna cap tep wengbarami ati dam bei. Allah tep karerbarami ati dam dinin, Yahudi yala gum neng, akati bura tarapu bulupra Allah mororami. ^{▼▼bura tara moronmai – Sun Yahudi yala nesaladi, ‘Yuk mutu nesala yumada, sun Yahudi yala gum nesala kununga cadi, Allah karenup ati pumbon wekmengopda, akati yuma mali kupserure,’ teneramya tep, Yunani nesala cap, yuk mutu nesala yuma capda, akati bura tarapu yana, Allah mororami. Akati pumbon men wengami.} Allah mororami ati dam bei dingeda, Yesusdi akati dam wekmai neng tep er upu peteremau. Peteremaupa, Allah si eremna ati pumbon pel dona tep ila deiyo neng cap, Yahudi yala deiyo neng, yuk ila deiyo neng cap, Yesus damai yaidi, ‘Wenepkamep’ tenen, asipetepi. “Ware ngebodi upu deiyo karepkeupa, yapi keca kunumangu neng enepra bura tara dokotepmarem do? Tonda, ware ngebodi ila deiyo ngebo kuna tep, erepra deipkeupa, apel dorum do?” pepra asipetepi.

24 Upepra asipetepipa, Yesusdi tamupra aneng tep asipetepu. “Sun tep, tenpu keca ton asipetepkusene. Asipetepsenepane, tamupra pepnemumpa, ne pel dona tep deiyo keca karepneu ngeboda, ‘Er si ake,’ pepra, lap pepkusene. 25 Sundi lape pepneso, Yohanesdi teka tenepi nesala me dongoramu ngeda, Allahdi peiamupa apel dopra kuramu do? Tali nimidi peiamipa, teka tenepi nesala dopra me dongoramu do? Sundi ne pepneso,” Yesusdi pepu.

Upepupa, Yahudi yala nesala, sun ila deiyo nengdi, ‘Ware upu pepkup do?’ tenen, upu talepdai. Upu talepdaidi upepdai. “Uo, ware pepkup do? Nunda, ‘Yohanes me dongoramu ngeda, Allahdi peiamupa kuramnga,’ pepmepyopda, Yesusdi nun tep, ‘Ange tep nengeda, Yohanes peramu upu tep, teka men teneramrum ngeda, ware keca deiyo tep do,’ pepra wenepserure. 26 Dinino, nun kaele, amutu neitamai kunge nesala yumadi, ‘Yohanesda, tek sisi Allah upu jenek pena ngebo, nabi kuramu,’ tenenunga tep, nundi, ‘Yohanes pel doramu ngeda, nimi dipu peipipa, apel doramu,’ pepmepyopda, awekmang neng yuma gekepsengedi, yu kuprepa derepsenunge,” pepdai. Upepdaidi, akati dam kunmai Yahudi yala deiyo nengdi kwardangmai.

27 Kware kupka tep, adeiyo nengdi ‘Inipkup’ tenen, Yesus tep tamupra tali upu peptapi. Sundi upepi. “Yohanesdi teka tenerami nesala dopra, me dongoramu pel deiyo karepu ngeboda, nun walwale,” pepi. Upepipa, Yesusdi tamupra aneng tep pepu. “Walwal pepmaneruma tep, ne pel done keca deiyo upu peipneu ngeboda, er si men sipeipkusene,” Yesusdi pepu.

Tenpu ngebo er nyapu butene kuprei keca tep pepu upu

28 – 29 Yesusdi aupu pepu dingeda, ukupmanto upu deiki di aupu ton pepu. Ada Yesusdi sun Yahudi yala nesala, sun Allah tep karena deiyo neng cap, sun yuk Yahudi yala deiyo neng cap tep, ukupmanto upu pepu.

Tenpu ngebo er nyapu butene kuramreipa, tenpu ngebo damai beudi, pepu. “Ne mio, kanda ne wa pel dorbeneo,” pepupa, amidi, “Ne songe, ne pel men dorbenkukene,” pepu. Upepra dakunmauanen, amendada, ami er kange tamupupa, er naidi moroputopu, er nai wa perbeu. 30 Wa perbeu pangeda, amenda taru anyapu sun naidi er mi ton ngebo tep, arup pepmautopu, butene mi tep upepu, “Ne mio, kanda ne wa perbeneo,” pepu. Upepupa, ami butene dinin, ton ngebodi pepu. “Naio, telepe nedi kan wa perbenkukene,” peptapu dinin, wa men perbeu. Yesusdi ukupmanto upu pepu.

31 Aupu konum pepu dingeda, aYahudi yala deiyo neng tep, asipetepu. “Anyapu butene nengda, sun nai bo putapmarpa moropmar ngeda, dan ngebodi tek sisi er nai upu gekepudi, er nai bodi moroputopu kupu do?” pepra Yesusdi sun Yahudi deiyo neng tep asipetepu. Asipetepupa, sundi, “Menmena ngebodi gekepra, er nai pel tep makupra pel dopu,” pepi. Upepi pangeda, Yesusdi aneng tep tamupra pepu.

Ne tek sisi pepsene. Sun nimi deiyo neng karena tep, pajak co bo upula dorongedi, pio mali kunung neng cap, tali-tali nyangdaramenge nerapu cap, anesala yuma, sun mali keca tapra, konum teka tenepnengedi, Allahdi nesala ban-ban yuma dakunge nesala kan-kan neitamai di, nimi weik lyepra sun dipru taleseryai konum mepra wengnunge. Dinino, sun ukutaru kurumu Yahudi deiyo nengpuda teka tenena gum tep, sunda ukutaru pio men wengyakarume.

32 Apepsen upuda, tali tep gume. Deiyoda, ake. Ada, Yohanes teka tenena nesala me dongoramu ngebodi, ‘Dumsisi bisida, ake,’ pepra, peteremamun ngeda, ‘Sun teka tenenkameng’ tenen, peterem yanamseu dinin, sundi er upu teka tenepra men dororamrume. Sundi er upu teka men teneramrum dinin, sun yuk nesalada teka tenenunge. Ada, nimidi tali-tali nyangmenge nerapu cap, pajak co bo bulupra pemerintah neng karena tep, derinung co bo upula doronung neng cap, teka tenepidi, sun mali keca konum tapi. Anesala yuma, sun mali keca tapidi teka tenepipa, sun Yahudi yala deiyo nengdi diramrum dinin, aepmarumnge tep, sun mali kumum kecada tamna gum di, teka men tenerume. Ange tep nengeda, ukupmanto upu ton pepkusene. Yesusdi aYahudi yala deiyo neng tep pepu.

Wa tu ke talepra perami nengdi, mali kupi keca tep pepu upu

(Markus 12:1-12; Lukas 20:9-19)

33 Yesusdi pepu. “Domon upu ton pepkusena tep, gekepneso,” pepudi aupu pepkusene pepu. Yesusda Yahudi yala neng, Allah tep karerbarami ati dam, tupa tekmaua di, abulupra wekmai nesala tep, aupu pepu.

Tenpu taruda, anggur tapu du mouamunge taleamu ngebo kuramu. Anggur tapu kouamudi, awa dana-dana tara yuma gel beilya wipra ongopgenepra wipdongopu. Ukupudi, anggur du taingna tep, gel kumupra keteneipu. Tonda, awa kalekra dina tep, awa damai ila lyom co ikrapudi, adeiki di teknedi kalekra dina tep metek ati dopu. Ange yuma konum ketenepra deipudi, ‘Yuk nengdi awa ke tep talepra pel donkameng’ tenen, yuk neng tep karepupa, anengdi awa keca kunumna tep, tu deiyo ngebo tep co bo karepi. Ukupi pangeda, awa deiyo ngebodi, er kayapu uruna tep, yuk karen mutu beu.

34 Atapu du mouramunge engna taru konum kupupa, ‘Atapu du dakra kipmengopda, bokra ne tep ton karepkamneng’ tenen, awa tu deiyo ngebodi, er pel don neng dopra deipupa, er anggur tapu du wa tep ke dopramidi talepra pel dorami neng damai bei.

35 Beipa, awa tu ke taleami neng epidi, er pel don ngebo tenpu, er nong talepra weika di bongopra popi. Ton ngeboda, tek sisi pio poptapipa depu. Ton ngeboda, er nong deiki gel dopra popipa, depu. 36 Ange utopu ton, awa tu deiyo ngebodi, er pel don neng weika di ton cap dokotemamupa, awa tu ke tep talepra pel dorami nengdi, utopu ton cap, tupa-tupa aneng yuma tep, ikin keca weik sun nong deiki derirami. 37 Ukuramipane, sirya taruda, yuk dokotepmanto ngebo tenpu tupa kuramu. Ada yuk pel don neng gum tep, awa tu deiyo ngebodi, ‘Ne mipu dokotepkune’ tenen, er mi sisa dopra deipu. Ataruda utenepu. ‘Ne wa tu ke tep talepra pel donge nengdi ne mi sisa tep gispal donkameng,’ tenen, er mi sisapu dokotepu.

38 Dokotepupa, awa tu ke talena pel dorami neng damai yakanmaupa, epidi upepdai. “Awa tu deiyo ngebo deprepa, er yo punupkamre ngeboda, er mi sisa akonum yanmar adano. Ange tep nengeda, nundi erpu popkupe. Popmepe dingeda, awa tu yumada, nun pepu dalupropmepedi talenkamepe,” pepdai.

39 Utenepra pepdaiya tep, angebo er mi poptaprapidi, er nongda awa beilya wipra peamya bura tara donoki. 40 Ukuramya tep, anggur tapu wa tu deiyo ngebodi, er wai dam tamupra yankamre taruda, er wa ke taleami neng tep, ware kupkamre do?

Yesusdi sun Allah karena tep deiyo neng cap, Musa sekeiamu upu peteremna deiyo neng cap, sun awekmai neng yuma cap tep, adomon upu pepka deiki di asipetepu.

41 Asipetepupa, sundi tamupra pepi. “Gume, awa deiyo ngebodi er wa ke tep taleami neng damai yaredi, aneng yuma popyopda, anggur tapu wa tuda, yuk neng tep dopra karepkamre. Awa tu karepkamre nengda, anggur tapu du moun li taru kuprepa, anggur tapu du dakra kunupmengedi, er co bo tamupra karepkamemenge. Er keca tamupra karepkamemeng nesala tep, er wa tu dopra aneng ke taru tep karepkamre,” pepi. 42 Upepipa, Yesusdi tamupra aupu ton cap pepu.

Dauddi sekamu buku neitamai kapu upu dopra pepkusen ngeda, aupu neitamai kapu upu moupra men nungmumdi ‘Deiyo ace,’ men tenepmarumdi penmanurum do? Dauddi domon upu deiki sekeiamu upuda adano.
‘Gel ati ^{▼▼Gel ati dorami pepka deiyoda ake. Ada sun amutuda neitamaida mo pio meteka dipu cemamnga cadi, co pio men kuramnga tep, co kwepra ati men dorami. Co pio gum tep, ila pala gel dororamidi, yakra deriramidi, sun ati dorami.} dorami nengdi ‘Agelda mali gel cadi, mambul gel guma,’ tenepra dela dungdongonai deipra dorameng gel dinin, ‘Agel mali’ tenen, tapi gelda, pio mambul gel kurure. ^{▼▼mambul gel – Ada tek sisi gel tep men pepu dinin, Yesus tep domon upu deiki di gel pepu. Atep, ‘Pio mambul gel,’ pepka deiyoda, Yesus tep tenepra domon upu deiki di pepu.} Pio telep kupre ngeda, Allahdi telep kupra deipka cadi, nundi angeda pio telepe tenenupe.’ (Mazmur 118:22-23)

Ada Dauddi sekeiamu upu konum pepsene. Yesusdi Yahudi yala deiyo neng awekmaiya tep pepu. 43 Upepu dingeda, adomon upu ton cap pepu. “Ange tep nengeda, ne tek sisi pepsene. Allahdi nesala ban-ban yuma talenkamser taruda, sun Yahudi yala nesala, sun deiyo neng cap, Yahudi yala nesala yuma cap, men di kareramsetu dinin, sun damai dopra, yuk neng tep karenkamre ja. Er karenkamre nesalada, telep co di du telepngepu mouramretopu, er upu moupra gekepmengedi, er upupu talepmengedi, er pelpu talepra donkameng neng tep karepkamre,” Yesusdi pepu.

44 Yesus aupu pepu dingeda, adomon upu ton cap pepu. “Ware ngebo do, apepmasen gel deiki saka douryankamre ngeboda, er nong cap, buru cap, yane gum kupredi, tenpu sesekra yukai dourbenkamre. Dinino, apepmasen gel di, er nong deiki saka taikre ngeboda, er nong bol ton pio men kapkamre. Sikke utopu kuptapkamre. ^{▼▼Sikke utopu kuptapkamre – Yesusdi aupu pepu ngeda, ada, sundi moupra gekena gum tep, teka men tenenge neng tep nengeda, Allahdi yambulanun wenepra popkamre. Dinino, moupra gekenung dinin, sundi, ‘Nun songe’ tenen, dabal kuprepa, Yesus tep tamenge nesalapuda, Allah weika di wenepra pio poptapkamre. Ange tep, Yesusdi adomon upu pepu.} Apepmasen ngeda, moupra tenenkurume.” Yesusdi aYahudi yala deiyo neng tep pepu.

45 Yesus upepupa, Allah karena tep ila deiyo neng cap, sun Farisi neng cap, sun yumadi utenepi. ‘E, Yesusdi domona upu deiki apepmaserada, nun wenemna tep pepmasere,’ tenepidi yu kupu. 46 Yu kupupa, sundi, ‘Yesus ware taru di poptepe do? Tonda ware kuprap di Yesus ateng kouptepedi, amenda popkamep do?’ tenen, pio tenimtonapu kunmai. Ukupi dinino, ataruda, Allah karerbarami ati dam wekmai nengdi, ‘Yesusda, tek sisi Allah upu jenek perur ngebo, nabi kurure’ tenen, sun kange deipmaiya cadi, sun Yahudi yala deiyo nengdi, ‘Awekmai neng derepsengedi, nun popsenung’ tenen, Yesus acapu tapra yukai bei.