Mat 22 | XteSC | STEP | Yesusdi, er upu penmau taruda nesala weika di gekenmai nengda, teka tenepmengepa, Allah lyepseredi sun dipru talepra kure keca cap, amenda taru kupkamrenge capda, ‘Kael kepkameng’ tenen, ukupmanto upu deiki di penmau.

Matthew 22

Yesusdi, ner don taru kalemna tep, ukupmanto pepu upu

(Lukas 14:16-24)

1 Yesusdi, er upu penmau taruda nesala weika di gekenmai nengda, teka tenepmengepa, Allah lyepseredi sun dipru talepra kure keca cap, amenda taru kupkamrenge capda, ‘Kael kepkameng’ tenen, ukupmanto upu deiki di penmau. 2 Yesusdi anesala tep upenmau.

Tuai nesaladi teka tenepmengepa, Allahdi sun dipru talerserya utopu keca pepkusene. Ila nimi deiyo ngebo, Raja ngebo tenpu, er midi ner dopkamaua tep, ila kailya kalepra keteneipu. 3 Adeiyo ngebodi, ‘Ne kailya jeryankameng’ tenen, men di konum peiamu neng tep, kailya konum keteneipu dingeda, er melimna neng dopra deipupa, perbei. Anengdi, “Ukuda, sun kailya jeryaso,” pepra perbei dinino, er peiamu nengdi dabal kupupa, “Nun men yankupe,” pepra tapi. 4 Er men di peiamu neng tapi dinin, adeiyo ngebodi er melimna neng tep upupupa, yai pangeda, aperbenmai nengpu kange di ton cap anengpu perbana tep aupu peipu. “Ne ila sapi bisam telep kupra nemunge konum popsidi, kalepra deipsi. Tonda, akeca-keca yuma telep kecapu konum kalepra deipsisa cadi, ne mi ner dopkura tep, ‘Kalya ketenepra deipsisi ngeda jeryankurume, peipmasere,’ perbenkurume,” peipu.

5 Er melimne neng tep ‘Upepkurume,’ peipu upu bena pepterepipane, arup taru kongpepterepmai nengdi pepmaitopu, kange di ton cap dabal kupupa, dongkaua keprap yuk-yuk bei. Ton nengda, sun pe pelpu dorbei. Ton nengda, sun pe wa perbei. 6 Ton atapi nengdi, akai upu perbarami neng dopra, ton neng tep, sun nong deiki ikin keca deipi. Ton neng tep mali upu pepi. Ton neng ton wenepra poptapi. 7 Sun atapi nengdi ukupi pangeda, aila nimi deiyo ngebodi yu weik kupu. Yu weik kupupa, er jen talen neng peipupa, amutu beidi er nyapu tep popmai mutu nesala yuma poprapidi, sun ati arum yuma uku dongopipa, jepropu.

8 Ukupi pangeda, adeiyo ngebodi er melimna neng tep aupu peipu. “Ne ila kailya konum kalepra deipsi dinin, ne menmena taru peiamsi nengdi, ne tep men tapnetenge teptoda, ne kailya yana jeptenge dinin, sundi ne tapnei neng cadi, men jeryankamenge. 9 Ange tep nengeda, ila bisi kwangdanai, nimi weik wengamengai yuma embamumdi, antapdamum nesala yuma tep upenkurume. ‘Nun deiyo ngebodi, ila kailya ketenepra deipmarada, jeryaso,’ perbenkurume,” peipu. 10 Upepupa, er melimna nengdi er peiputopu, bisi kwangdanai yuma embandanmaidi, aneitamai nesala yumada buluprapidi, ner dopkamau ngebo er nai ati weki. Ada, telep nesala pe, mali nesala pe yuma bulupra wengmaipa, akati yuma dinipi.

11 Ati yuma dinipipa, aila nimi deiyo ngebodi, ‘Ne kailya deipsi keca jepkung nesala epkun’ tenen, diryau. Diryau taruda, nimi tenpu ngebo ton, ner don taru pio telep opkal kenengamitopu men kupmau ngebo ton, animi kankan bukmaupa epu. 12 Epudi aupu pepu. “Kao, nun ner don taru telep opkal kenengamepnge men kepmarem dipapu, warya tep akati inipra wekmarem do?” pepra wenepu. Upepra wenepupa, amali opkal kenekra wekmau ngeboda, ‘Ware peptene do?’ tenen, tenipetepu dinin, ali kupupa tali dimpepra buku. 13 Ukupupa, adeiyo ngebodi er melimna neng tep upepu. “Amali opkal kenekmar ngeboda, talepraprumudi er yan cap, buru cap, ateng koupra, ati pumbon di bura tara kunungnai donokso. Donokmum pangeda, ila kange mun kuprepa, engeredi, mali pepra donkamre,” pepu.

14 Yesusdi awekmai neng tep, ukupmanto upu pepu dingeda, ‘Aupu nong neitamainge kael kepkung’ tenen, lap pepu. “Adomon upu deiki pepmasentopu, nesala weika di teka tenepmengepa, Allah lyepseredi sun dipru taleserya utopu kurure. Allahdi nesala ban-ban yuma weika di, ‘Ne damai yankameng’ tenen, upurur dinin, nesala yambulanunpu wedirepa Allah er damai wengyakankamenge.” Yesusdi pepu.

Yesusdi, amutu taleamnga deiyo ngebo, Roma mutu ila nimi deiyo ngebo Kaisar, pajak co bo karena tep pepu upu

(Markus 12:13-17; Lukas 20:20-26)

15 Yesusdi aupu pepupa, sun Farisi neng gekepidi, tulum kupka tep, ‘Yesus er upu peptua deiki di mali kuptue’ tenen, sun Farisi neng cap, Raja Herodes cap, sun perami upu gekeramidi talepra kurami neng, sun dina di ‘Yesus tali asipetepkup’ tenen, Yesus damai yai. 16 Sun aneng Yesus er damai yaidi, aupu asipetepi. “Kanda peteremna deiyo ngebo kumemdi, upu dumsisingepu perume. Tonda, kan peteremem taruda, ‘Ne peterepne upu moupra gekepnengedi, yu kuprepa wenepkuneng do? Kange deipkuneng do?’ men tenerume. Kan peteremem taru di, ‘Anengda isomka neng do, ila nimi deiyo nengda akunung do? Anengda yuk ila-ila neng akununge do?’ tenena gum dipapu, Allah upu deiki di, ‘Angeda ukunkamrume,’ peseretopu, dumsisipu peteremrume. 17 Ange tep nengeda, asipetepkukepe. Roma mutu ila nimi deiyo ngebodi nun mutu taleserya tep, co bo bulupra derinkamep do? Ada Pemerintah ila deiyo ngebo Kaisardi, ‘Roma mutu Pemerintah tep, pajak co bo karenkamrume,’ peseryada, karena telep do, gum do? Apajak co bo bulupra pemerintah deiyo neng tep karenkamep do, tamkamep do?” pepra dina di asipetepi. Ada, sundi, ‘Yesusdi mali upu peptupa, weneptepe’ tenen, Yesus tep tali asipetepi.

18 Aneng dina di upepra asipetepi pangeda, Yesusdi aneng sun dipruai mali keca tupa akwamupapu, iniptapra penmainge kael kepudi, aupu pepu. “Sunda, ‘Nunda telep neng tenepkamseng’ tenen, bol deikingepu telep kupra kurum dinin, tek sisi sun dipru neitamaida, mali kun keca akwapseupapu kurume. Ukuruma cadi, ‘Er upu peptua deiki di mali kuptue,’ tenen, dina di asipetepmanerum ngeda, warya tep do? 19 Sun pemerintah neng tep pajak co bo karerum gel uang dopra, peterepnemumpa, dipterepkune,” pepu. Upepupa, apajak tep karerami gel uang, sundi dopra Yesus tep peterepi pangeda, Yesusdi asipetepu.

20 “Sunda agel uang deiki dipetepso. Agel uang deikida nimi urasin utopu kupra petupra deipi ngeda, ware ngebo urasin utopu do? Tonda, er upu cap petupra deipi ngeda, ware ngebo sengna keca utopu sekra deipipa kupmar do? Nimi si sekra deipi ngeda, ware ngebo si sekra deipi do?” pepra, Yesusdi asipetepu.

21 Asipetepupa, sundi tamupra, “Angeda Kaisar ^{▼▼Kaisar – Roma mutu kurami nesala, sun ila deiyo ngebo. Lap pena nomor 41 dirume.} ernge,” pepi. Upepipa, Yesusdi aneng tep pepu. “Atep, Kaisar er ngeda, adipapu Kaisar tep karenkamrume. Angetopu, Allah er ngeda, adipapu Allah tep karenkamrume.” Yesusdi pepu. 22 Yesus aupu pepupa, sun Farisi neng cap, Raja Herodes er upu pepnepa gekerami neng cap, aupu gekepya deiki di, Yesus tep, ‘Erda upu peptua deiki di mali kuptue,’ tenepmap dinino, ‘Ange men kupmanto kupre,’ tenepidi, “Uo,” peprap lolopi. Lolopidi, Yesus atapra sun yukai bendopi.

Saduki nengdi, ‘Yesus mali peptue’ tenen, ner dona tep, dina di asipetepi upu

(Markus 12:18-27; Lukas 20:27-40)

23 Atumi dipapu, Saduki nengdi, ^{▼▼Saduki nengda, Yahudi yala nengpu kurami dinin, sunda ‘Nimi deramenge nesala amenda taru tamupra gam pio men bukamenge,’ tenepra kurami. Angetopu, sundi, ‘Allah er im deiki pel don neng malaikat ton tek sisi men kununge’ tenepra peteremami neng kurami. Sundi, ‘Ange yumada men kupmanto keca,’ teneramidi teka men tenerami. Tonda lap pena upu nomor 9 dinkurume.} Yesus damai asimyai. Sundi, ‘Nesala depmengedi ka tamupra gam men bukameng,’ tenerami neng cadi, ‘Yesusdi mali upu peptu’ tenen, Saduki neng dina di Yesus tep asimyai. Saduki nengdi upepi.

24 “Musadi sekeiamseu upuda ake. ‘Tenpu ngebodi ner dopmare dinin, angebo depyopda, mi derina gum dipapu, angebo depyopda, anerdi mi derina gum tep, angebo er weitdi, er yo pununa tep, er du bo depredi tapre ner soluda, er weit bo dopredi, nyapu deipkamrenge,’ Musadi upepra sekeiamseue. Upepra sekamnga tep, ukupmantonge ton asipetepkukepe.

25 Tenpu taruda, sun weitapsilip yoneitam bari neng kurami. Sun du boda, menmena ner domu dinin, mi derina gum dipapu depu. Menmena ngebo depu pangeda, aner solu er weit bo butene ngebodi solu daku. 26 Solu dakupa, dopra dakuramreianen, er peda mi ton derina gum dipapu depu. Utopu weneri ngebo peda, aner solupu daku dinin, mi derina gum dipapu depu. Ukupra dakupbaramyanen, aweitapsilip yoneitam bari neng yumadi, atenpu nerpu dopbarami dinin, mi derina gum dipapu depropi. 27 Sun aneng yuma depropitopu, siryada, aner pe depu. 28 Atep nengeda, amenda Allahdi nesala yuma gam bukra deipkamre taruda, ayoneitam bari neng yumadi aner tenpu, yuk-yuk dopdanen baramya cadi, im deiki kunkameng taruda, ware ngebodi aner tep, ‘Ne ner’ tenen, tamupra dopropkamre do?” pepra, Saduki neng dina di, Yesus tep asipetepi. ^{▼▼Saduki nengdi tenepi ngeda, sun yoneitam bari neng yumadi, aner tenpu doramya tep, tenpu ngebo dipapu aner men doptue. Ada men kupmanto tep, Yesusdi, ‘Depmenge nesala yumada, Allahdi gam bukra deipkamre,’ pepra peteremrur upuda, men kupkamre. Atep, aupuda teka men tenepi. Tonda lap pena nomor 9 dinkurume.}

29 Sun Saduki neng dina di asipetepi pangeda, Yesusdi tamupra pepu. “Allahdi peiamupa sekeiami upu cap, Allah er pio puto weik kurenge cap, men kael keamruma tep, sun walwal di asipetepmanerume. 30 Allahdi nesala yuma gam bukra deipkamre taruda, ner cap, nimi cap, ton pio men dodankamenge. Nimi tuai nesala teka teneramengepa, im deiki dubenkamre nesala yumada, Allah er im deiki pel don neng, malaikat, ner dopra men kungetopu, tuai nesala im deiki welepra kunkameng taru peda utopu ner dodana gum dipapu kunkamenge,” Yesusdi pepu. 31 Yesusdi upepu dingeda, aupu ton cap pepu.

Ukuda, ‘Deamenge nesala gam men bukamenge,’ tenemumnya tep, lap pepkusene. Allahdi peipupa, Musa sekeiamu upu neitamai, Allahdi pesere upuda, moupra men peramrumdi, ange men kael keprum do? Allahdi sun tep, pesere upuda, adano.
32 ‘Neda Abraham cap, Isak cap, Yakub cap, sundi si eremnenung Allah, akunune,’ pepu. (Keluaran 3:6)

Sun ton tenipetepso. Nun kaele. Musadi aupu peipu taruda, Abraham cap, Isak cap, Yakub cap, sun nong konum deami taru di pepu. Depmenge nesaladi Allah si men ereptenge dinino, Musadi, “Aweneri neng tupa Allah er si eremnenunge,” pepka deiki di, ‘Anengda tupa gam kununge’ tenen, kael kemnupe. Allahdi deamenge nesala men talerure. Gam kunge nesalapu talerure. Ange tep nengeda, sun Saduki neng, ‘Deamenge nesala ka tamupra gam men bukamenge,’ tenemum ngeda, sun pio mali tenerume. Angeda, tek gume. Walwal dipu tenerume. Yesusdi sun Saduki yala neng tep pepu. 33 Yesusdi aupu pepupa, agekenmai neng yumadi, “Uo, er peteremre upuda, pio telepe,” pepra kange deipidi lolomai.

Yesusdi, “Allahdi, ‘Ukunkamrume, angeda men kunkamrume,’ pepra deipu upu neitamai, pio mambul ngeda ake,” pepu upu

(Markus 12:28-31)

34 Yesusdi sun Saduki yala neng tep, telep upu pepudi upu sekupa, sun Saduki nengdi tamupra upu pepmanto men kupka tep, tali upu dimpepra bendopi. Akupmainge, yuk nengdi lap pepipa, sun Farisi neng gekepi. Gekepra buluprapidi, ‘Nundi ton asipetepmepya deiki di mali peptue,’ tenen, ‘Nun ton piripetepkupe,’ tenepidi, Yesus damai yai. 35 Yana asimai taruda, tenpu ngebo ton, Musa sekamu mem upu peteremna deiyo ngeboda, ila kael ngebo kuramnga cadi, er peda Yesus damai yau. Angebo yaudi, ‘Yesus mali upu peptue’ tenen, dina di Yesus tep asipetepu.

36 “Allahdi, ‘Angeda ukunkamrume, angeda men kunkamrume,’ peiamseupa, Musadi sekeiamseu upu ^{▼▼Musa sekeiamseu upu lap pena upuda, nomor 35 dirume.} neitamaida, upu weike akwapmar dinin, pio mambul ngeda dan nge do?” pepra asipetepu. 37 Asipetepupa, Yesusdi tamupra pepu. “Pio mambul ngeda adano.
‘Nun nai Allahda, er tenpu kurure. Sun kange bongtona gum dipapu, teka tenepmumdi, sun kange dipru Allah er nong deikipu derinkamrume. Ada sun kange deipra kumumdi, sun nong cap, sun kange dipru cap, sun puto cap, sun sambala cap ayumada, Allah er deikipu derinkamrume.’ (Ulangan 6:5)

38 Aupuda menmena taru Musadi pio mambul upu sekeiamseua neitamainge dopra pepmasene. 39 Butene ngeda, ake.
‘Sun damai kunge neng tep nengeda, bicau tenepra melimdanapu kunkamrume. Sun pedi sun pe tep, kange deripra melimdamumtopu, yuk nesala sun damai kunge neng tep, bicaue tenepra, kange deipmumdi, melimdankamrume.’ Allahdi pepu. (Imamat 19:18)

40 Allah upu lap perami nengdi sengami upu cap, Musadi sekeiamu upu capda, weike akapmar dinin, pio ila mambul deiyo ngeda, abutene upu konum pepmasene. Allahdi abutene ‘Ukunkamrume,’ peipu upuda, pio mambule. Aupu butene gekepra kael keptum teptoda, yuk akwapmar upu yuma peda ton cap tenepra kael kemkamrume. Yesusdi angebo tep pepu.

Yesusdi, “Allah er Mi Sisa ngeboda ake,” pepu upu

(Markus 12:35-37; Lukas 20:41-44)

41 Farisi neng, Yesus damai bulupra tupa kunmai taruda, Yesusdi aupu pepu. 42 “Sunda, ware tenepmarum do? ‘Allahdi nesala ban-ban yuma kunga neitamai di, nesala weik lyepredi, sun dipru talenkamre’ tenen, dokotepkamre ngebo, perami ngebo Kristus, ^{▼▼Kristus perami ngeda, ada Yunani upu deiki di penunge. Angebopu dinin, sun Ibrani upu penge nengdi, Mesias penunge. Angeboda, tenpu dinin, er si butene. Ada nimi Lyemna Deiyo Ngebo Yesus tep penunge.} er nai sida, ware ngebo do?” Yesusdi sun Farisi neng tep pepu. Upepupa, sun Farisi nengdi tamupra pepi. Ada, “Nesala weik lyepredi sun dipru talenkamre ngebo, Kristusda, nun apu bo Daud, er mipu kurure,” pepi. 43 Upepipa, Yesusdi tamupra pepu.

Sundi, ‘Kristusda, nun apu bo Daud, er yala nengdi deipi ngebo,’ pepmanerumada tek sisi pepnerume. Dinino, Allah er Lek Sambala, Daud er dipru neitamai talepka deiki di, Daud er pedipapu, Kristus yankamnga tep, ‘Ne nai yankamre,’ pepu. Dauddi, Kristus tep, ‘Ne nai bo,’ pepunge deiyoda dan do? Dauddi pepu upuda adano.
44 ‘Allahdi ne nai bo, Mesias ^{▼▼Mesias cap, Kristus cap penupada, tenpu ngebo Yesus tep penupe.} ngebo tep pepu. Nun butene nengdi, nesala yuma talepra kunkamnema tep, ne dumsisi tara, ila mambulai bungkamrume. Abungamempane, amenda taru, kan upu yanikenung nesalada, nedi dopra kan amutara deipnepa, kan dipapu talenkamrume. Kan yan baripra derimemnya amutara, yan baripra derimemtopu, kan upu men gekekenung nesala yumada, kan amutara deipnepa, kandi aneng tep bisipmemdi talenkamrume. Aneng yumada kan amutara kunkamenge.’ Allahdi pepu. (Mazmur 110:1)

Allahdi peipupa, Dauddi sekeiamu upu dopra pepmasene, Yesusdi pepu. Upepu dingeda, aupu ton cap pepu.

45 “Dauddi nimi Lyemna Deiyo Ngebo yankamre pepunge deiyoda, Kristus yankamnga tep, ‘Ne nai bo,’ pepu. ‘Ne nai bo,’ pepu ngeda, nimi Lyemna Deiyo Ngebo, Kristus erda, Daud er dipapu men deipke. ^{▼▼Daud dipapu men deipu mi – Tek sisi Daud er yala ngebodi Yusup deiki di Kristus deipu. Dinino, ada tali tuai nengdi nyapu deiramengtopu gume. Allah er Lek Sambala er puto Maria er nong neitamai pel deiki dipu, Yesus deipu dinin, Yesusda im deiki di tuai mutu yaudi, nimi nong utopu dau. Tuai mutu yaupa, Mariadi Yesus deipu.} Daud er yala ngebodi deipu dinino, Kristusda, nimi yuma talenkamre ngebo, pio ila ngebo kurure.” Yesusdi aFarisi neng cap, awekmai neng yuma cap tep pepu.

46 Aupu yuma telep kupra pepka cadi, sun aupu gekenmai nesala yumadi, upu tenpu pe ton tamupra men pepi. Tonda, atumi di dipra, ortumi neitamai yumada, awekmai nesala yumadi Yesus tep kwar kupupa, sun upu ton cap men asimterenmai.