Mat 23 | XteSC | STEP | Yesusdi aupu pepu ngeda, sun Farisi neng cap, Musa sekeiamu upu peteremna deiyo neng cap, meneng damai abukmaiya tep, Yesusdi er nyapu 12 neng cap, tonda yuk neng, ‘Yesus er upu perepa gekepkup’ tenen, tali dakunmai neng cap tep, aupu yuma pepu.

Matthew 23

Yesusdi, Farisi neng cap, Musa sekeiamu upu peteremna deiyo neng cap tep, wenepu upu

(Markus 12:38-39; Lukas 20:45-46; Lukas 13:34-35)

1 Yesusdi aupu pepu ngeda, sun Farisi neng cap, Musa sekeiamu upu peteremna deiyo neng cap, meneng damai abukmaiya tep, Yesusdi er nyapu 12 neng cap, tonda yuk neng, ‘Yesus er upu perepa gekepkup’ tenen, tali dakunmai neng cap tep, aupu yuma pepu.

2 Menop taru Allahdi Musa tep, ‘Ne upu peteremkamre pepra’ tenen, peteremna deiyo pel karepupa, Musadi peteremamu. Menop taru, Musadi peteremamutopu, ukutaruda, sun Farisi neng cap, Musa sekeiamu upu peteremna deiyo neng cap, Allah upu peteremna deiyo neng kununge. Musadi apel doramutopu, ukutaru sun anengdi donunge. 3 Apelpu talepra donunga tep, Allah upu deiki peteremsenge upuda, moupra gekepmumdi, angepu talepra kunkamrume. Dinino, sun Farisi neng cap, Musa sekeiamu upu peteremna neng capdi, Allah upu peteremamengtopu, sun peda tek sisi moupra talepmengedi men kununge. Atep, ne nyapu sunda, aneng sun kunge keca epmumdi, sun mali kungetopu men kunkamrume. 4 Sun Farisi neng cap, Musa sekeiamu upu peteremna deiyo neng capda, sun pe kange tenena deiki dipu tapakra, “Ukupkamrume,” pepra peteremenge keca deiki di, nesala yuma sun nong deiki ikin keca weik derinunge. Nesala nong deiki ikin keca weike derinung dinin, anesala ikin kupre ngeda, ‘Nundi ton melipkusepe,’ tenepra, metek tenpu pel peda, sundi ton pio men melimnunge.

5 Anengda, ‘Nun kuramepenge cap, pel doramepe keca cap yuma tep, sun yuk nesala epsengedi, uo anengda pio telep neng, tenepkamseng’ tenen, kununge. Ukungedi, sunda dipru erepra gemenapu kununge. Tonda, Allah upu gekepra teka tenenung nesalada, ‘Allah upu pio tenenkamep’ tenen, metek pala keca di, Allah upu ayat sekra deipnedi, buru tepnyo deiki cap, aso deiki cap, palepra deipra getedongonung dinin, sun Farisi neng cap, Musa sekeiamu upu peteremna deiyo neng capda, utopu men kununge. Sunda, ‘Nimi yumadi epkamseng’ tenen, ila pala weiknge deiki di getedongopmengedi gemenunge. Ukunung nge yumada, ‘Yuk nesala epsengedi, ada pio telep neng, ila kael neng, tenepkamseng’ tenen, kununge.

Tonda, Allah teka tenenung nesalada, sun Allah morokunge taruda, giso pakunung opkal kupkupaida, bum opkal sekra pusupra metekngepu gerengdongonunge. Dinino, sun Farisi nengda utopu men kungedi, ‘Yuk neng epsengedi, anengda Allah morona ila kael neng kununge, tenepkamseng’ tenen, ila lyom opkal sekrapnedi, pusupra giso pakunung opkal kupkupai gerengdongonunge.

6 Ton mali kunge ngeda ake. Ila kailya kalemna taru yumada, kalemna deiyo nengdi kailya yana lukra deipmengepa, jen jepkunge taruda, sun Farisi nengdi, ‘Ila neng tenepkamseng’ tenen, pio putarepa, ila neng bungnaipu yana bungnunge. Angetopu, Allah upu peteremkunge taruda, sun Farisi nengdi, ‘Yuk neng epsengedi, telep neng tenepkamseng’ tenen, Yahudi yala neng Allah upu peteremna ati ^{▼▼Allah upu peteremna cap, gekena cap tep dorami ati – Yahudi yala neng, sun Allah upu peteremna atida, nun gereja metekanun utopu kuramu dinin, tonda metekanun yuk kuramu. Ada, sundi hari Sabtu wengamidi, Allah er si eremami. Tonda, yuk-yuk tumida, Allah upu gekena cap, peteremna cap, nimi pedaramenge tep, sun upu lepsisikra bongdina tep, akati wengami. Bahasa Indonesia deiki di, ‘rumah ibadah’ penunge. Akati lap pena upu tep, nomor 26 dirume.} pumbon wekmengopda, ‘Akati nesala bukmengedi, sun urasin yuma dinkamseng tarapu bukmepepa, epsengedi, uo, sun anengda ila mambul neng, tenenkamseng’ tenen, ila neng bungamengaipu, bungbanunge. 7 Tonda, ‘Nesala yuma jen keca pasar deipra kunumamenga neitamai embapepa, nesala yuma epsengedi gispal donkamseng’ tenen, kange deipra pingpinga di embanunge. Utopu ton, utenenunge. ‘Nesala yumadi, sunda nun ila peteremna deiyo neng, guru pepkamseng’ tenen, kange deipra pingpinga di kununge.

8 Sun Farisi neng cap, Musa sekeiamu upu peteremna deiyo neng capda, ukunung dinino, ne nyapu sunda, aneng kuramengtopu men kunkamrume. Sun ila deiyo ngebo ne tenpu kunepa, sunda ne weit yapu utopu kuruma cadi, yuk nengdi sun tep, “Nun ila peteremna neng, nun Guru,” pepra, ‘Sun si erepsenung’ tenen, sun pedi upu sengdongonkamrume. 9 Tali nimi tuai nesala yuma tep, “Ne nai,” pepra men si eremdankamrume. Sun nai bo sisada, tenpu im deiki ngebo kurura tep, tali tuai neng tep, “Ne nai,” pepra men si eremkamrume.

10 Ange utopu, sun ila peteremna deiyo ngebo, nesala yuma lyepnedi sun dipru talenkamne ngeboda, Kristus ne kununa tep, yuk nengdi sun tep, ‘Nun ila peteremna ngebo, nun Guru, pepsenung’ tenen, sun pedi upu sengdongonkamrume. 11 Sun kankan Allahdi erepra ila keipkamre ngeboda, yuk neng sun putapre keca tep, bicau tenepra makunkamre. Ada tali pel melimna nengdi, sun deiyo neng tep, kange deipra, melipra kuramengtopu, Allahdi ila kepra deipkamre ngeboda, angepu kunkamre. Yuk nesala sun amngai kuredi, melimnapu kunkamre. 12 Ada tali tep gume. Ware nesala do yuma, sun pedi sun pepu eremdindaramenge nengda, Allahdi aneng dopra amngaipu dudeipkamre. Dinino, sun dipru bouna di amu kepra kunge nesalada, Allahdi erepra deipkamre. Yesusdi aneng tep pepu.

13 Yesusdi aupu pepu pangeda, dukdongopra aupu ton cap pepu. “Farisi neng cap, Musa sekeiamu upu peteremna deiyo neng capda, Allahdi wenepra ponkamsera tep, sun bicaue,” pepu. Upepudi aupu dukdongopra pepu.

Uo, sun Farisi neng cap, Musa sekeiamu upu peteremna deiyo neng capda, Allahdi wenepra ponkamsera tep, sun bicaue. Sun dipruai mali keca tupa akapmaserpapu, ‘Telep neng tenepkamseng’ tenen, bol deikingepu telep kupra kurume. Sun mali kumum kecada, pepkusene. ‘Allah teka tenepmepepa, Allahdi nun dopra nun dipru talenkamserai wekupe,’ tenenge nengda, sundi upu sengdongorume. Ukurumada, ‘Sun ati wekup’ tenen, buplan damai nimi tengyangepane, yu kuprepa, puto di buplan dengdongoramengtopu, kurume. Ada, ‘Teka tenepkupe,’ tenenge nesala tep, upu sengdongoruma tep pepsene. Sun peda teka tenepra men wengrume. Tonda, ‘Nun teka tenepra Allah talenkamserai wengkamepe,’ tenenge neng tep nengeda, sun Farisi nengdi kumum keca deiki di, anesala tep upu sengdongorume.

14 Uo, sun Farisi neng cap, Musa sekeiamu upu peteremna deiyo neng cap, Allahdi wenepra ponkamsera tep, sun bicaue. Sun dipruai mali keca akwapmarepapu, ‘Telep neng tenepkamseng’ tenen, telep keca dinin, bol deikingepu kurume. Ukurum dinin, sun dipruaida mali kun keca tupa kurure. Sun mali kumum kecada, pepkusene. Ada, sundi solu nerapu tep, ‘Depmempa, sun talerumu ati cap, yuk keca yuma cap, Allah tep karenkamrume,’ mawa di pertamrum dinin, solu nerapudi sun keca karepmengopda, sun pedipapu akeca bokra, ila di dororume. Tonda, yuk nengdi, ‘Anengda Allah morona ila kael neng pepkamseng’ tenen, Allah moromum taruda, upu lyoma di mororume. Akumum keca yuma tep nengeda, Allahdi akurum neng utopu nesala yuma tep, pio ila di wenepra popkamre. Yesusdi pepu. Upepu dingeda, aupu ton pepu.

15 Uo, sun Farisi neng cap, Musa sekeiamu upu peteremna deiyo neng cap, sunda, ‘Tenpu ngebo pe ton, nun upu gekepra nun tara keprosetue’ tenen, tuai bisi embana cap, mokon deiki embana cap kumumdi, mutu-mutu yuma peterep embarume. Sunda konum mali neng kurum dinin, peterep embarumupa, yuk neng sun upu gekepmengedi, sun kurumu keca dombanga deiki di, mali keca weik ton cap kupmengopda, anengda pio mali kununge. Sundi yuk nesala tep mali kudirume. Sun pe, sun peterepmumpa, sun upu gekepra dombange neng peda, Allahdi wenepra uku jen ban dokotepkamsere. Yesusdi pepu. Upepudi aupu ton dukdongopra pepu.

16 Sunda utenerume. Ada, ‘Nunda nimi bisi peteremdina neng kunupe,’ tenedarum dinino, sunda asuru pun neng utopu kurume. Atep nengeda, Allahdi wenepra popkamsera tep, sun bicaue. Sundi, mali peteremrum upu ake. Ada, ‘Yuk nesala gekepsengedi, tek sisi pepmanga, tenepra, teka tenepkamseng’ tenen, uperume. “Allah tep karerbaramep ati, er ati si deiki pepsene,” peptum dinin, “Ange talye. Akati si deiki, ukupkamne penup upuda, ada kaukepmantonge,” perume. Dinino, sundi yuk neng tep, “Sundi nun tep, ‘Allah karerbaramep ati dela deiki palepra deiami emas, akati emas si deiki di pepsepe,’ perumu pangeda, adeiki di teka tenepsetepe. Ada, “Emas ngeda, tek sisi men kaukepmantonge tep, apenup upuda tek sisi ukunkamepe,” perume.

17 Sunda aupu perum dinin, sunda asuru pun neng utopu kurumudi, pio walwal neng kurume. Sun men tenipmarum do? Ila mambul kecada, emas palepra deipinge do? ‘Allah karenkamep’ tenen, dopi ati do? Apalepra deipi emasda, tali emas dinin, Allah karena ati pum palepra deipya deiki di, aemas pio mambule kupke. Mambul kupra deipka deiyo kecada, Allah er ati pumbon kurura tepa. 18 Tonda, arup pepmasen upu utopu ton cap, sun perum upu ton, pepkusene. Sunda uperume, “Allah karena tep yapi keca popra deripyai, ange si deiki di pepmepe upuda, kaukeptepe. Dinino, Allah tep karenup keca, ayapi keca er si deiki di pepmepe upuda, ‘Dakwapye’ tenen, men kaukeptepe” perume.

19 Uperum dinino, sunda asuru pun neng utopu kurumudi, pio walwal neng kurume. Sun men tenipmarum do? Yapi kecada, weike akapmar dinin, akecada mambule gume. Dinin, yapi keca dopra, Allah karena tep deriramengai deiki konum deipmengopda, akecada pio mambule kurure. Atep, mambul kupra derirya deiyo kecada, Allah karena tep deriramengai tepa.

20 Ange tep nengeda, sundi, “Allah karena tep derin keca si deiki di pepsepe,” tonda sundi, “Allah tep karenup keca si deiki di pepsepe,” pepra pemum upu capda, abutene upuda utoto pua tep, aupu buteneda men bokdanmanto. Akeca-keca si deiki di, “Ukunkamepe,” perum upu yumada, tamna gum, adipapu tek sisi “Ukunkamepe,” pemumtopu angepu kunkamrume. ‘Dakwapye’ tenen, kaukemna gume. Allah karena keca tep, derinai cap, akeca deiki derirum keca capda, bokra men deipmanto pepsene. 21 Ware ngebo do, “Allah karerbaramep ati si deiki di, ukupkamne,” perur ngeboda, aupu perya deiki di, tek sisi akati pum kure ngebo Allah, er si deiki di aupu perure. Apepmansen upu deiyoda, akati cap, akati kure ngebo, Allah cap tep, bokra men deipmanto tepa. Yesusdi pepu.

22 Upepudi, aupu ton dukdongopra pepu. Tonda, “Im deiki kure ngebo si deiki di, ukupkamne,” perur ngeboda, aupu perya deiki di, Allah er si deiki cap, er nong cap tep, aupu perure. Ange yumada, men bokdanmanto tep, sundi, “Akeca yuma si deiki pepsene,” perum upu yumada, pio mali. Yesusdi aneng tep pepu. Upepu dingeda, aupu ton dukdongopra pepu.

23 Musa sekeiamu upu peteremna deiyo neng cap, sun Farisi neng capda, sun dipru neitamai mali keca akwapmaserpapu, ‘Telep neng tenepkamseng’ tenen, nong bol deikingepu telep nong-nong kurume. Ukuruma tep, Allahdi wenepra popkamsera cadi, sun bicaue. Sun mali kumum kecada ake. Akeca yumada, pio metek keca dinin, ‘Allah er dipapu kareserure’ tenen, yu keca kuma cap, tolong cap, erica cap bokra, seper sepuluh ^{▼▼Seper sepuluh penungada, ukupmanto pepkune. Ila co bo seratus ribu (100.000) bo kaptuopda, seper sepuluh tep nengeda, sepuluh ribu bo (10.000) kareptene. Sepuluh ribupu (10.000) kaptuopda, seribu bo tenpu (1.000) bokra kareptene.} dopra, Allah er gispal dona tep ton karerume. Ukurum dinin, ila mambul kecada, men kumumdi, tamdongorume. Sundi tamum kecada, nimi tep tamna gum di, ‘Ne kabo,’ tenepra bicau tenena cap, dipru karena cap, dipru kwa dimna cap, nimidi tek sisi sun akupmangetopu upu bongdina cap, nimi upu bondina taru dumsisi upu pena cap, ayumada tamrume. Allah upu neitamaida, aupu yuma akupupane, sundi akeca yuma tamrume. Atep, ‘Telep neng tenepkamseng’ tenen, metek keca dopra, Allah tep seper sepuluh bokra karemumnyada, telep dinin, ange men taptumopda, sundi, ila mambul tenenange peda kuptume. Metek pel pe, ila mambulnge peda, kupmumyopda, nedi sun tep, ‘Telepe,’ pepsetene dinin, sundi ila mambulnge yumada tamrume.

24 Sundi, ‘Nunda nimi bisi telep kupra peteremdina deiyo neng kunupe,’ tenedarum dinin, asuru pun neng utopu kurume. Sun mali kumum keca tep, ukupmanto upu deiki di pepkusene. Ada, sun me mau pumbon ngun-nguna akapre pangeda, wepra dorum dinin, ame mau neitamai ila unta bisam akaptu pangeda, dirterena gum dipapu, tali lupra jeptume. Metek telep keca kurum dinin, ila mambul ngeda, men kurume. Ange yumada pio tamruma cadi, sunda mali. Yesusdi pepu. Aupu pepu dingeda, aupu ton dukdongopra pepu.

25 Uo, sun Farisi neng cap, Musa sekeiamu upu peteremna deiyo neng capda, sun dipru neitamai mali keca tupa akwapmaserpapu, ‘Telep neng tenepkamseng’ tenen, nong bol deikingepu telep kurume. Allahdi wenepra popkamsera tep, sun bicaue. Sun me mau cap, piring cap, ‘Buta palepmaserenge yuma tenena gum, mangkau di jepmepepa, mali kupserur’ tenen, bol deikingepu, telep-telep kupra me kurum dinin, sun kange dipru neitamai di, pio mali kuna cap, yuk nesala keca tep aram dona cap, kumum ngeda tupa akwapmaser dinin, ange tenena gum dipapu, tali kange doupra sun pe putasere kecapu, pio tenerume. 26 Sunda asuru pun neng utopu kuruma cadi, men tenepmarum do? Sun mau pumbon me kupmumpa, bol deikinge telep kuramretopu, sun dipru neitamai mali kurum keca yuma tapmumpa, gum kupseryopda, sun kumum keca yumada telep kupkamsere. Dinin, sun dipru neitamai mali keca tupa akapseryopda, telep men kutume.

27 Uo, sun Farisi neng cap, Musa sekeiamu upu peteremna deiyo neng capda, sun dipru neitamai mali keca tupa akwapmaserpapu, ‘Telep neng tenepkamseng’ tenen, nong bol deikingepu telep kurume. Allahdi wenepra popkamsera tep, sunda bicaue. Nimi depmengepa, gel imir pumbon peipmengedi, bura tara gel deiprapmengedi, deiki tara kurun co pe cet kwepmengepa, bura tarada urasin pio telep kurure. Bura tara urasin telep kuramre dinino, agel imir pumbonda, nimi nong cap, yo cap, lyuredi tong perure. Akeca, pio mali kuramretopu, sun kun keca peda, pio mali kurume. 28 Agel imir bura tara urasin telep kurur dinin, pumbon tarada, mali keca kuramra utopu, sun peda utopu kurume. Sunda yuk neng asuru epsengedi, ‘Anengda dumsisi telep kupra kunung neng,’ tenesenung dinin, tek sisi sun dipru neitamaida, pio mali keca tupa akwapseupapu, bol deikingepu telep pel dopra kurume. Dinino, sun dipru neitamaida, pio mali keca tupa akwapmaserpapu, mali nengpu kurume. Yesusdi pepu. Aupu pepu dingeda, aupu ton dukdongopra pepu.

29 Uo, sun Farisi neng cap, Musa sekeiamu upu peteremna deiyo neng capda, sun dipru neitamai mali keca tupa akwapmaserpapu, ‘Telep neng tenepkamseng’ tenen, nong bol deikingepu telep kurume. Allahdi wenepra popkamsera tep, sunda bicaue. Allah upu lap perami neng, nabi neng portamamipa peiramyaida, sun gispal dona tep, ati urasin telep kupra dorume. Tonda, sun dumsisi kuramipa porami neng peiramyaida, sun gispal dona tep, urasin telep keca derirbarume. 30 Ukupra kumumdi aupu perume. “Uo, nunda telep neng cadi, nun apu yapu kuramidi anabi neng porami taruda, nun cap kuramtepe teptoda, nundi melipra aneng tep men poramtepe,” perume.

31 Uperum dinin, sundi aneng tep, “Nun apu yapu kununge,” peruma deiki di konum mali upu pedidarume. Sun apu yapu mali kuramitopu, sun peda utopu, dipru mali neng kurume. Mali kun kecapu talepra kurume. Dumsisi kurami neng tep poramya deiyo nengda, sun apu yapu cadi, sun nyapu kuruma tepa. Aupu pemumnya deiki di, Allah upu jenek lap perami neng, nabi-nabi poramya deiyo neng, “Sun nyapuda, nun kunupe,” pepra, sundi sun pe tep, mali upu pedidarume. 32 Ange tep nengeda, sun apu yapudi gonga kepra mali kurami ngeda, sun ukutaru kurumu nengdi ton sirya gawal dakamrume. Yesusdi pepu. Aupu pepu dingeda, aupu ton dukdongopra pepu.

33 Nimi pon baldi inipra mapmaryanen, nesala mangkau embangepa, epredi toramretopu, kurume. Sunda pio mali neng ukuruma cadi, Allahdi uku jen ban dokotepkamsera tep, ware kupra lyepdana betum do? 34 Sun men lyepdanmanto kuruma tep, amenda taru nedi dokotepkamsen nengda pepkusene. Ada, Allah upu jenek kupra penkameng neng cap, ila kael neng cap, Allah upu peteremna kael neng cap, sun damai dokotemkamsene. Dokoteramnepane, ton nengda, portamkamrume. Ton nengda, sengdin co deiki ponkamrume. Ton nengda, sun Allah upu peteremna ati pumbon di, co balana di bongonkamrume. Ton nengda, ‘Poptepe’ tenen, mutu-mutu yuma domembankamrume.

35 Ukunkamruma tep, ware neng do yuma, sun dumsisi kuramipane portamami neng yumada, Habeldi dipdongopra poptapnen yakaramyanen, ukutaruda, Berakia er mi Zakaria, sun apu yapudi, Allah karen keca tep deriramya damai poptapi ngebo cap, aneng yuma sun yapida, sun ukutaru kurumu neng, sun buru deiki akapkamsere. 36 Aneng sun yapida, sun ukutaru kurumu neng, sun buru deiki kupkamra tep, aneng poraminge tep, Allahdi sun ataru kumum neng tep wenepra popkamsere. Aportamami neng sun yapida, ataru kurumu neng, Allahdi sun nong deiki deipkamsere. Yesusdi sun Farisi neng cap, Musa sekeiamu upu peteremna deiyo neng cap tep, pepu. Yesusdi aupu pepudi aupu ton dukdongopra pepu.

37 Uda, sun Yerusalem mutu kurumu nesalao, nedi Allah upu lap pepra peteremnung neng, nabi-nabi neng weike sun damai dokotemamsisi dinin, sundi anabi neng sun nong deiki ikin keca deipmumdi, gel dopra portamna cap, tonda, tali potamna cap kuramrume. Nedi sun Yerusalem mutu kurum nesala tep, ‘Ayam madi er nyapu pol amu deipredi moupra iriramretopu, ne weiamsisi nesala tep kalekra melimkamsene’ tenen, putanerepa, sun tep tupa tenesenun dinin, sundi ne tep, ‘Angebo Yesusda, nun song’ tenen, tupa tamnurume. 38 Ange tep nengeda, sun Allah si eremna tep karerbarumu atida, Allahdi taprepa, tali gopu kunkamre. Allahda akati tupa men kunkamre.

39 Dortaru, ne tapra bendopkamsen taru yumada, ne ton cap men dinkamnerume. Dakuramrumyanen, ne si ereipkamnerum tarupuda, epkamnerume. Ataruda, sundi, ‘Uo, Nimi Lyemna Ngebo, Mesias ngebo konum yanmasere,’ tenepkamnerum tarupu, aupu pepkamnerume. “Allah er puto cap, er si cap deiki di yanmaser ngeboda, pio teleppu kunkamre,” pepra, ne si ereipkamnerum taru, sirya taruda epkamnerume.

Yesusdi sun Farisi neng cap, Musa sekeiamu upu peteremna deiyo neng cap tep, wenepra pepu.