Mat 24 | XteSC | STEP | Yesusdi aupu konum pepu dingeda, er nyapu cap, Allah karerbaramidi, er si eremami ati pumbon di, bura tara gupsaka bai taruda, er nyapudi adomi ati dipterepidi, aupu pepi. “Naio, kandi dipterepo. Allah er si eremna tep, akati-akati dominge yumada, urasin pio telep kurure,” pepi.

Matthew 24

Yesusdi, akeca-keca yuma gum kupkamre taru damai kupyopda, ataru kupkamre keca tep, lap pepu upu

(Markus 13:1-37; Lukas 21:5-36)

1 Yesusdi aupu konum pepu dingeda, er nyapu cap, Allah karerbaramidi, er si eremami ati pumbon di, bura tara gupsaka bai taruda, er nyapudi adomi ati dipterepidi, aupu pepi. “Naio, kandi dipterepo. Allah er si eremna tep, akati-akati dominge yumada, urasin pio telep kurure,” pepi. 2 Upepipa, Yesusdi er nyapu yuma tep tamupra pepu. “Allah er si eremna tep, amutu ila ati dominge yumada, sundi dipetepso. Ila lyom gel pala di deipra welepidi, domi gel yumada, amendada uruptapmengopda, alyom gel tenpu deipra dominge yuma peda, men tapkamenge. Ayuma dakra sikke bungtamamengtopu kupkamre,” pepu.

3 Upepu dingeda, akati tapra, Zaitun mutu deiki welepra, bena buki taruda, yuk neng cap tapakra men bukmaiya cadi, sun yumadi Yesus tep asipetepi. “Nun naio kandi pepseo. Yerusalem mutu Allah er si eremna atida, dan taru di daktapkameng do? Akati daktapkamenge cap, kan tamupra yamemdi, sirya taru gawal dakamrenge cap tep, ware keca kuptua deiki di, nundi, ‘E, akeca yuma konum damai kupre,’ tenen, kael keptepe do?” pepra asipetepi. 4 Asipetepipa, Yesusdi tamupra aupu pepu.

Nimi weika di ne si deiki di mok upu weik penkamenge. Sundi upenkamenge. “Neda, Yesus er si cap, er puto cap deiki di yakanupe,” pepmengedi, “Nimi Lyemna Deiyo Ngebo ‘Mesias yankamre,’ perami ngeboda, ne pua,” pepra tali upupu penkamenge. Aupu penkamenga deiki di, nimi weike amok upu gekepra, teka tenenkamenge. 5 Amok neng upenkamsenga deiki di, sun kange dipru yuma gipra, yuk tara dubesenunga tep, sun kange moupra kumumdi, dipru kalengdankamrume. Amok upu penkameng nengda, sun upu gekepra, sun tara men kemdongonkamrume. 6 Tonda, amenda taru nimidi, “Ton tara neng cap, yuk tara neng cap podanmange,” pepra, tali peptapkamenge. Tonda, ton tara nengdi, yuk tara neng cap tek sisi podangepa, lap pepkameng nge tep, yana pepmengepa, gekepmumyopda, aupu tep kware men dangkamrume. Allahdi, ‘Akeca utopu keca kunkamre’ tenen, konum teneramnga tep, tek sisi ukunkamre dinin, ‘Sirya gawal dangne taruda, kapula,’ tenenkamrume.

7 Ton kunkamre ngeda, ila nimi deiyo neng, Raja nengdi taleamenge mutu nesaladi, yuk Raja neng taleamenge mutu nesala tep, bena podankamenge. Tonda, ton yala nengdi, ton yuk yala neng tep, podankamenge. ^{▼▼ton yala neng – Aupu pepu ngeda, pumun seki buku neitamaida, “Kerajaan melawan kerajaan dan negara akan melawan negara,” pepra seki. Atep, metek mutu neitamai kunge neng podana tep men pepu. Ada ila pala mutu neitamai kunge nesaladi, yuk ila pala mutu neitamai kunge nesala tep podankamenge. Ada negara tep pepu.} Ukuramengepane, mutu yuk-yuk weika di longkamre. Tonda, wa pepra kouramenge keca yuma nong men kupredi, jen pio putanapu kunkamre. 8 Nerapu mi deipkunge taru mi deiyo pu weik jenmaryanen, mi deriramengtopu, ne lap penmasen keca yuma konum dato-dato di konum kupre pangeda, sundi, ‘E, sirya gawal dangna taru konum gonga kepbanmare,’ tenenkamrume. Dinino, ataru di dipra tek sisi gawal dakamre tumida, amenda taru pua.

9 Akeca-keca yuma kupkamre taru neitamaida moupra dimumdi, tenepra kunkamrume. Yuk nengdi sun tep, ‘Yesus er nyapu wenepra popkameng’ tenen, nimi upu talena deiyo neng damai dubenkamsenge. Ada, sun ateng koupra, wenemna deiyo neng damai karerbankamsenge. Deiyoda, ne tep teka tenepmaneruma tep, ‘Adeiyo nengdi Yesus er tep teka tenenung nesala wenepra poptapkameng’ tenen, ila nimi deiyo neng cap, ila-ila nimi deiyo neng cap, sun damai dubenkamsenge. Ton nengda, sun deiki ikin keca deipkamsenge. Ton nengda, poptapkamsenge. Ne tep teka teneneruma tep, nimi ban-ban yumadi sun tep, ‘Anengda nun pio song,’ tenepra, mar penkamsenge.

10 Apepmasen keca kupkamre taruda, teka konum teka tenepnei nesala dinin, ne upu cap, ne cap tep taprapmengedi, sun yuk teka tenenge nesala tep, ‘Anengda, nun songe,’ tenepdangedi, sun kayapu neng sisapu dinin, ‘Ila nengdi, anesala tep ateng koupra popkameng’ tenen, wenemna deiyo neng damai napra dubankamenge.

11 Tonda, atarupu, ne nyapu sisa gum dinin, nimi weike tali mok upu pena nengdi, “Nunda Allah upu lap pena deiyo neng kunupe,” pepra, mok upu peptapsengepa, nimi weika di, amok upu penge nengdi penkameng upu teka tenepra dombankamenge. 12 Nesala ban-ban yuma mali kun keca pio weika di kupbaramenga deiki di, yuk nengdi yuk nesala tep, bicau tenepra men makudankamenge. Tonda, sundi ne tep tupa tenepra kange men derinkamnenge. Sun dipru tupa men karenkamnenge. 13 Dinino, ware ngebo do yuma, ne tep tamna gum di, ne cap, nimi yuk neng cap tep, bicau tenepmengedi, kange bongtona gum dipapu, pio dimpepra kuramenge nengda, yuk nengdi aneng tep popmenga peda, Allahdi anesala lyepkamre.

14 Akeca-keca yuma, sirya kapul men gawal dakamre taruda, ne kai telep upu mutu-mutu yuma peterep embankamenge. Ada, Allahdi nimi weika di lyepseredi, sun dipru talenkamser upu dopra, mutu sirik, im sirik peterep embankamenge. Ne kai telep upu peterep embaramengepa, ‘Nesala ban-ban yumadi gekeptenge’ tenen, mutu-mutu yuma peterep embankamenge. Mutu-mutu yuma konum peterep embaramengepa, ton gekena cap, men gekena cap kupbanmangepapu, sirya gawal dangne taru tep, ne tamupra yankamre.

15 Allah upu lap peramu ngebo nabi Danieldi, ‘Ukupkamre’ peramutopu konum kupyopda, sundi, ‘Uda, sirya taru konum kupre,’ tenepkamrume. Nabi Danieldi peramu ngeda, adano.
‘Allahdi er pio songe tenepra, “Pio mali kure ngebodi, ^{▼▼mali kure ngebo – Sun Indonesia upu penge nengdi, akeca tep, Pembinasa keji penunge. Ada lengna keca, tonda menenga keca pio mali kudirur deiyo ngebo tep penunge. Tonda, lap pena upu nomor 48 dirume.} ne Telep Lek Ati men tengyatue,” pepra upu sekamngaipu, amali weik ngebo yaredi, aTelep Lek Ati pumbon konum tekre pangeda, Allah tep karerbarameng atida, Allahdi pio tapkamre.’ (Daniel 9:27; 11:31; 12:11)

Aupu perum nengda, ‘Deiyo ake’ tenen, moupra tenepetepso.

16 Allah er gispal dona tep karerbarameng atida, pio tapkamre. Pio tapra bere taruda, sun Yudea tara kunkamrum nesalada, Yudea tara tapra, adipapu sepdaro mutu dam tara bankamrume. 17 Sun ati arum deiki beipye peingna tep kunkamrum nesala kwerepmumdi, sun ati pum tapmaumum keca ton tamupra kwereyana men dopropkamrume. 18 Ataru sun wa pel donkamumnya tep, sun deiki kenengamum opkal kwiripra, ati deipmamum ngeda, ka di tamupra ati pum men dorbenkamrume. Adipapu tapra, sepdaro mutu damai benkamrume. 19 Ataruda sun mundu tupa douamenge nerapu cap, mi moum tupa dinimamenge nerapu cap puda pio bicaue. Anerapuda adipapu sepdaro men benmanto tep, pio ikin kunkamre.

20 – 21 Allahdi akeca-keca yuma ketekeiamu taru adinen dipra ukutaru pe, dorkupbankamre taru yuma pepe, ikin keca yambulpu kupyakaramnganen, kupbankamre dinin, ayuma cap, amenda taru ikin kupkamrenge puda, mambule. Dinino, akeca-keca yuma sirya gawal dakamre taruda, pio ikine weik kupkamre. Ange tep nengeda, ayankamre ikin kecada, kapi deipre taru mo cemamretopu, ‘Ikin weik ngeda, yarur do, tonda Allah er gispal dona tep beipye peingna tumi, Sabat tumi deiki di ikin weik keca yarur do?’ tenen, Allah er teppu moronkamrume.

22 Sirya taru ikin keca weika di deipne pangeda, ikin weik kunkamre. Allahdi ikin keca deipkamre taruda, ‘Tuai nesala yuma depnung’ tenen, go yambula dipu karepkamre. Allahdi, ‘Anesalada, ne nyapu kunkamenge,’ tenen, wepra deiamu nesalada, ikin weik kure taru weik kupbaramrepa, ‘Anesala yuma depnung’ tenen, Allahdi, ‘Ikin keca kupkamre taruda, go yambula dipu karepkamne’ tenen, konum keteneiamu.

23 – 24 Ataru neitamai di ton nengda, mok upu deiki di, “Nesala yuma lyepredi talenkamre, penung ngebo, Kristusda amutu konum ayanmar adano,” peryakankamenge. Ton neng dingeda, “Kristus ormutu yana kunmare,” penkamenge. Aneng yumadi, ne si deiki deipra, mok upu penkameng ngeda, pio teka men tenenkamrume. Sunda pio mali kun neng cadi, sun mok upu penkameng ngeda, pio teka men tenenkamrume. Tonda, ne nyapu sisa gum dinin, ton neng dingeda, “Nunda, Allah er upu lap pena neng, nabi kunupe,” pepra, mok upu peryakankamenge. Upenkameng dinino, anengdi penge upuda teka men tenenkamrume. Aneng yumada, sun yuk nengdi, ‘Nun pel dopenge epsengedi, teka tenepra domyankamseng’ tenen, nimidi men kupmanto keca, kunupsek pen pel donkamenge. Ton anengpuda, ‘Apel doramepepa epsengedi, tek sisi Allah er puto deiki apel donunge, tenenkamseng’ tenen, mambul pel ton donkamenge.

Apel yuma dopkamenga deiyoda ake. ‘Allah er men di wepra deiamu nengda, Allah tapra, nun tarapu melipra domyakankamseng’ tenen, sun mutu neitamai yana pel donkamenge. Ukunkameng dinino, Allah wepra deiamu neng yumadi, amok keca tep teka men tenenkamrume. 25 Apepmasen keca yuma kunkamra tep, ne nyapu sunda pio kange moupra kumumudi, ketenepra deiya dinkamrume. Akeca yuma kapul men kupmare taru di, amenda taru kupkamre keca yuma lap pepnepa, ketenepra kuramengepane, ‘Akeca kupkamre, tenepmumdi, ketenepra dina kunkamrum’ tenen, pepsene. Tonda, sun anengdi penkameng upuda, pio teka men tenenkamrume. Yesusdi er tep teka tenemi nesala tep pepu.

26 Upepudi, aupu ton pepu. Ange tep nengeda, ataru neitamaida, ware neng do yuma, “Sun diryaso. Nesala yuma lyepredi talenkamre penung ngebo Kristusda, meneng damai, akati pumbon konum yana kunmare,” pepra mok upu pepsengopda, teka men tenenkamrume. Tonda, yuk nengdi, “Nimi Lyemna tep, Kristus perameng ngeboda, ormutu nimi kuna gumai, yana kunmara cadi, sun dirbeso,” pepsengopda, sundi teka men tenenkamrume. Sun pepkamengai peda, men dirbenkamrume. 27 Atep, ne Nimi Mi Sisa Utopu Ngebo yankamne taruda, perenglang peprepa, keteng yakan tara di diripropne baryanen, keteng dangban tara baramretopu, ne Nimi Mi Sisa Utopu Ngeboda, katuaipu yankamna cadi, nimi yumadi dinkamnenge. Yesusdi pepu. Upepu dingeda, aupu ton pepu.

28 Ne tamupra yankamne taruda, potamne keca poptamrepa, lyuramredi tong peramrepa, deibum weika di amuramretopu kunkamenge. Tonda, nesaladi, ‘E lyun kecada ake,’ teneramengtopu, ne yankamne taruda, katuaipu yankamna tep, arup lap pepmasen keca yuma epmumyopda, ‘Oryanmar do, ayanmar do?’ men tenenkamrume. Neda tek sisi katuaipu yanepa, sundi epra kael kepkamnerume. 29 Aikin keca kupkamre taru neitamai dinin, apepmasen kange mun keca konum kupyopda, ‘Akeca kupkamre,’ pepra, Allah upu lap peramu ngebo nabi Yesayadi upepra sekeiamu upu utopu menmena kupkamre. Atep, nabi Yesayadi sekeiamu upu deiki pepkusene. Aupuda ake.
‘Ketengda kunukamre. Tonda, ware dirin gum kupkamre. Tonda, kuru yuma, im deiki di tuai sangkamre. Utopu, im alau tara kure keca yuma lung-lung pepredi embendankamre.’ (Yesaya 13:10)

“Aupuda, nabi Yesayadi sekeiamu upu pepsene,” Yesusdi pepu. Upepudi, aupu ton cap pepu.

30 Neda Nimi Mi Sisa Utopu Ngebo, yankamne taruda, im deiki kure keca yuma peten kepkamre. Ukupre taruda, neda, ila puto cap, dirine cap, urasin pio telep kuna cap deiki di, katuai dua kankan yanepa, tuai nesala yumadi epkamnenge. Epnengedi, tuai mutu nesala ban-ban yuma kunge nesala, kange mun weik kuprepa, ila di engenkamenge. 31 Ne yankamne taruda, im deiki bung-bung pena upu ila di pepmengepa, ne im deiki melimna neng, malaikat dokotepnepane, im sirik, mutu sirik dana-dana tara yuma, Allahdi menop taru wepra deiamu nesala bulupra deipmengedi, ne damai duyankamnenge.

32 Ange tep nengeda, ukupmanto upu pepkusene. Delek co ^{▼▼Delek co – Pumun seki buku neitamaida, delek co men seki dinin, nun mutu kure keca sekmapada, ‘Nimidi moupra kael keptenge’ tenen, sekmepu. Sun pumun taru seki ngeda, ara co du mouramre co seki. Tonda, Yesus kuramu taruda, ara co er co bo belepuopda, ada dou mapkamra tep tenerami.} kait pomyanen, kalum bupkurya tep, telel ongopyopda, ‘Ada, dou mapkamra tepa,’ tenerume. Tonda, ‘Apouwa kupmara cadi, dou mankamre’ tenen, kael kemrumdi perume.

33 Akeca dimumdi, ‘Dou mapkamare’ tenen, kael kemamrumtopu, apepmasen keca yuma epmum dingeda, ‘Sirya gawal dakamre taru konum dam kupre,’ tenepkamrume. Ada, Allahdi akeca-keca yuma cap, nesala ban-ban yuma cap, talepredi, Ila Nimi Deiyo Ngebo kunkamre taru, ‘Konum gonga kepre’ tenen, kael kemkamrume. Ati buplan dam, tengyangedi peten-peten peramengtopu, apepmansen keca konum kupyopda, ‘Sirya gawal dakamre taru konum dam kupre,’ tenepkurume. 34 Ne tek sisi pepsene. Apepmasen keca yumada, ataru kumum nesala kapul men depmamumpapu kuprepa, epkamrume. Tonda, akeca-keca yuma gawal dangne taru peda, tek sisi epkamenge. 35 Im alau tara kure keca yuma cap, tuai tara kure keca yuma capda, gum kupkamre dinin, ne pesene upu yumada, tenpu pe ton men gum kupkamre. Pio akapkamre. Nedi pesenetopu tek sisi nong kupkamre, Yesusdi pepu.

Yesus kapul men yanmare taru nesala men kael kemnunga tep, pepu upu

(Lukas 17:26-27; Lukas 12:42-46)

36 Yesusdi aupu konum pepu dingeda, aupu ton pepu.

Ne tek sisi pepsene. Ware nesala do yuma, ne yankamne tumida, ‘Atumi yankamre do, atumi neitamaida ipna yankamre do, sintara yankamre do?’ tenen, men kael kemnunge. Allah er im deiki pel don neng, malaikat peda men kael kepi. Tonda, Allah er Mi Sisa ne Yesus peda, men kael kepsi. Sirya gawal dange taruda, ne nai Allah erpu, ‘Sirya dangne taru ake’ tenen, konum tenepra keteneiamnga tep, erpu kaele. 37 Pumun taru Nuh kuramu taru, er cap kurami nesala sun kuramitopu, ne Nimi Mi Sisa Utopu Ngebo yankamne taru peda, nesala ban-ban yuma utopu kunkamenge. 38 Ada, Nuh kuramu taru ila mokon kapul men deiamu taruda, sun anesala yumadi, me jena cap, jen keca yala yuma jena cap, ner karedana cap, kupbaramipane, Nuhda ila gapung co wekou tumi peda, mangkau di tupa tali kange doupra kunmai.

39 ‘Mokon jepserur’ tenena gum, tali kange doupra kupbarami. Ukupbaramipane, ila mo cemamudi, mokon deipra erepropudi, ataru kurami nesala yuma jepropu. Sun tali mankau kange doupra kuramipane, mokon deipra jeproputopu, ne Nimi Mi Sisa Utopu Ngebo, tuai mutu tamupra yankamne taruda, tuai nesala utopu, mankau kange doupra tupa kunmange taru neitamai, ne Yesus tamupra yankamne. 40 Ataruda, nimi butene wa penmarengepane, ton ngebo tapra, ton ngebopu Allahdi dopropkamre. 41 Ange utopu, nerapu butene jen keca tep ketenem dinmarengepane, ton ner tapra, ton nerpu dopropkamre. Allah er kange ja.

42 Ange tep nengeda, ne sun nai bo kapul men yanmane taruda, keteneipmumdi, kalekra dinkamnurume. Ne yankamne tumida, sundi, ‘E, er ataru yankamre’ tenen, men kael keamrumtopu, amenda taru peda men kael keptuma tep, pepsene. Atep nengeda, sundi kange moupra teneprumudi, teleppu kunkamrume. 43 Dinino, sirya gawal dakamre taru kupkamrenge tep, ‘Sun ton moupra kael kepkuruma’ tenen, ukupmanto upu nukeipkusene. Ati deiyo ngebodi, ‘Upula don ngebo alukunda neitamai, aketeng deiki di upula doryankamanere’ tenen, kael kepmatu teptoda, mana gum di, pio kalekra dinmatu teptoda, upula don ngebodi, er ati wekra, er keca yana upula men dopropmetue.

44 Ange utopu ne Nimi Mi Sisa Utopu Ngebo yankamne taru peda, sun mangkau kange doupra kunmamum keteng deiki dipapu yankamna tep, kange moupra keteneipmumdi, pio kaleka dinkamrume. Ada, ‘Mankau kange doupmepe taru di, Yesus tamupra yarur’ tenen, kange moupra kunkamruma tep pepsene. Yesusdi aupu pepu dingeda, aupu ton cap pepu.

45 Ila kael di pel tamna gum dipapu, pel telep kupra melipra doramengtopu, ware neng ton utopu kunkameng do? Ati deiyo ngebo tenpu di, yuk mutu benkou taruda, er pel don ngebo tenpu tep, “Pel ukupra donkamrume. Ne pel melimna neng yuma tep, sun jen putapre taruda, bokra karenkamrume,” pepra bokra deipu.

46 Akati deiyo ngebo tamupra yankamre taruda, er pel don ngebo tep upu pepra deiputopu, ila kael ngebo kuramtudi, tamna gum dipapu, apel yuma konum doramre pangeda, adeiyo ngebo tamupra yaryopda, er pel melimna ngebo tep, ‘Ne keca yuma talepmemdi, deiyo ngebo utopu kupra, ne pel donkamnerume,’ pepra, adeiyo ngebodi pel dona deiyo keca karepredi, ereipkamre. 47 Ne tek sisi pepsene. Akati deiyo ngebodi, “Ukunkamrume,” peiamretopu, er pel don ngebodi, dumsisi pelpu doramre pangeda, adeiyo ngebo er taleamre keca yuma dopra, angebo tep kareprepa, akeca talepredi, er peda ila deiyo ngebo utopu kunkamre.

48 Gum dingeda, apel deiyo ngebodi, ‘Ukupkurume,’ peprepa, gekepra pel dore ngebo mali kupredi, malipu kupra kupyopda, ‘Gume, ne deiyo ngebo konum benamudi dakurura cadi, sika di orketeng tamunpu tamupra yankamre,’ teneptue. 49 Utenepredi, er cap kikiman pel donge neng cap, nerapu cap tep, bongopra popredi, kange yawaramamre me jen neng cap, tonpa jepra kutuopda, ‘Ne deiyo ngebo, er aketeng deiki yankamre,’ men tenepredi, tali mangkau kange doupra kunkamre.

50 Tali mangkau kange doupra kunmare tumida, er deiyo ngebo tamupra yankamre. Er pel don ngebodi, ‘E atumida, aketeng deiki yankamre,’ tenen, men kael kepre tumi di, er deiyo ngebo tamupra yankamre. 51 Adeiyo ngebo tamupra yare dingeda, amali kupre ngebo, er nong bongopra popredi, sekra buluksingipkamre. Ukupredi, angebo er sambalada, Allah teka tenena gum di, pio mali kun nesala kunkamengai, uku jen ban dongopkamre. Ukuprepa, kange mun kunkamre. Kange mun kuprepa, er cap, sun dipru neitam mali keca kwamrepapu, ange tenena gum di, bol deikipu telep nong-nong kunge nesala cap, kikiman kungedi pio engepra kunkamenge. Yesusdi pepu.