Mat 25 | XteSC | STEP | Yesusdi er nyapu tep pepu. Ne Nimi Mi Sisa Utopu Ngebodi, ‘Akeca-keca yuma talenkamne’ tenen, im deiki di tuai yankamne taru kupkamre kecada, ‘Kael kepkurum’ tenen, ukupmanto upu deiki pepkusene. Aupuda ake.

Matthew 25

Yesusdi ukupmanto upu deiki 10 kaber nerapu tep pepu upu

1 Yesusdi er nyapu tep pepu.

Ne Nimi Mi Sisa Utopu Ngebodi, ‘Akeca-keca yuma talenkamne’ tenen, im deiki di tuai yankamne taru kupkamre kecada, ‘Kael kepkurum’ tenen, ukupmanto upu deiki pepkusene. Aupuda ake.

2 Sun kaber nerapu 10 neitamai dinin, pamu bari (5) nerapuda walwal nerapu kurami. Ton tara pamu nerapuda, kael nerapu kurami. 3 Sun walwal nerapu pamu bari di, sun weica er si lampu pelita doupra benmai dinin, minyak me uku jepra gawal dakseryopda, ‘Amenda punupra dikdongopkamep’ tenen, mawange ton men tenepmaia tep, gwepra, men dubenmai. 4 Sun ukupi dinino, sun kael nerapu ton tara pamu bari nerapuda, kael nerapu kuramya cadi, sun weica er sida lampu pelita dubenmai. Tonda, ‘Amenda minyak me ton gum kupbaseryopda, ton cap punupra dikdongopkamep’ tenen, uku me mau mawange cap, uku me cap, ketenepra dubenmai. 5 Sun yumadi aweica keteneprapidi, ‘Ner dona deiyo ngebo tep, yarepa antapkup do?’ tenen, ati pum di, bulupra pio dinmaipane, menmena men yanmanto kupka tep, udungna weik kupupa, mapmai. Ner dopkamaua deiyo ngebo sika di yanmaua tep, sun yuma udungmaupa mapmai.

6 Sun yuma mapmaipane, lukunda manduk pena kupkopda, yuk nengdi upepi. “Ner dopkamaua deiyo ngebo yakanmaua tep, sun bisaipu yana epdankurume,” pepi. 7 Upepi pangeda, sun 10 kaber nerapu yumadi bukroi dingeda, sun weica ketenepinge upi. 8 Upipa uku bu jenmau dinin, walwal pamu bari nerapu sun weicada tamtam penmaupa, sundi sun kayapu kael nerapu tep moropi. “Uo, nun weicada, tamtam penmasera tep, sun minyak me metekanun ton karepsetume,” pepra moropi. 9 Upepra moropi pangeda, sun pamu bari kael nerapudi tamupra pepi. “Gume, men karepkusepe. Nundi sun tep karepsepyopda, nun lampu weica peda, tamtam pepserure. Atep, sun pedipapu minyak me kunumameng ati, epra kunumbenkurume,” pepi.

10 Upepipa, sun awalwal nerapu minyak me kunumbenmai taru di, ner dopkamaua deiyo ngebo tamupra ati yau. Yau pangeda, sun kael kaber nerapu minyak me konum gwepra keteneipmai pamu bari nerapu cap, ner dopkamaua deiyo ngebo cap, ner don kailya kalepra deipmai ati kikiman jerbei. Ati wekipa, sun yuk nengdi akati buplan dekdongopi. 11 Dekdongopipa, dakunmaipane, amendada, sun walwal pamu bari kaber nerapudi tamupra akailya keteneipmai ati dam yaidi upepi. “Naio, buplan pakaipsemempa, nun ton wengkupe,” pepra moropi. 12 Upepra moropi dinin, akati deiyo ngebodi tamupra pepu. “Gume, ne tek sisi pepsene, sunda ne walwale,” pepu. Yesusdi er nyapu tep aukupmanto upu pepu dingeda, aupu ton cap pepu.

13 “Ange tep nengeda, Ne Nimi Mi Sisa Utopu Ngebo tamupra yankamne tumi cap, keteng cap, sun walwal cadi, mankau kange doupmum taru, ne dato-dato di yanuna tep, pio kalekra dinkamnerume, pepsene.” Yesusdi er nyapu tep aupu pepu.

Yesus ukupmanto upu deiki, “Tenpu deiyo ngebodi, er pel don neng tep, co bo karepu,” pepu upu

(Lukas 19:12-27)

14 Yesusdi aupu pepu dingeda, aupu ton cap, er nyapu tep pepu. Ne tuai mutu tamupra yankamne taru kupkamre keca, ‘Kael kepkurum,’ tenen, ukupmanto upu ton cap pepkusene.

Tenpu ngebodi er mutu tapra yuk karen mutu benkou taruda, er pel don neng yuma kongpepu. Kongpepupa, yai pangeda, ‘Ne co bo karepnepa pel doramenganen, co bo weik tapakra karepkamneng’ tenen, er ila co bo yuk-yuk bokra, aneng tep karepu. 15 Er kunumna weik co bo ^{▼▼co bo – Yunani upu deiki di, talenta sekami dinin, aco bo tenpu talenta utopu ngeda, amutu neitamai 10 juta utopu kupu. Atep, 5 talenta ngeda, ada 50 juta utopu kupu.} bokra karepu ngeda, tenpu ngebo tep pamu bari karepu. Yuk ngebo tep co bo butene karepu. Yuk ngebo tep co bo tenpu karepu. Ada, sun kael kemna kecada yuk-yuk kael keamya cadi, ‘Sun pel ukupra dopkamenge,’ teneputopu, sun yuk-yuk bokra karepu. Karepu dingeda, adeiyo ngebo amutu tapra, yuk karen mutu dabena kuramu.

16 Beu pangeda, ila co bo pamu bari karepu ngebodi, adipapu gonga kepra pel doramu. Pel dopbaramnganen, adeiki di, ila co bo 5 ton cap tapakra deipupa, 10 kupu. 17 Er kuramutopu, ila co bo 2 dopropu ngebodi, pel doramnga deiki di, ila co bo 2 ton tapakra deipupa, 4 kupu. 18 Sunda ukuprei dinino, ila co bo tenpu dopropu ngeboda, adopropmautopu, adipapu tu paliprapudi, tu pumbon inipra deipudi, singipdongopu. Angebodi co bo ton cap tapakra men deipu.

19 Sun yuma dakuramipane, amendada, adeiyo ngebo er pe mutu tamupra yaudi, sun pel donga deiki di, ‘Ila co bo ware kupra deiamnei do?’ tenen, apel don neng tep kongpepupa, yaipa nukpetepu. 20 Ila co bo 5 dopropudi, pel doramnga deiki di, 5 ton cap tapakra deipu ngebodi pepu. “Naio kandi, ‘Pel dopkamner’ tenen, co bo 5 kareamnemumpa, pel doramsanen, ila co bo 5 ton cap tapakra keteneipmakenpa, 10 akapmar adano,” pepu. 21 Upepu pangeda, er deiyo ngebodi tamupra pepu. “Telepe, kanda pel tamna pio gum di, telep kupra doramnemume. Neda yambulanunpu kareamkesipane, tamna gum di, pel telep kupra doramnemuma tep, ukutaru ne taleamsi keca weika di karepkukene. Ne cap, kan cap, kange deipdanemedi, telep kupra kikiman kunkamneme,” pepu.

22 Ila co bo butene dopramu ngebodi, pel doramnga deiki di, ila co bo 2 ton cap tapakra deipu ngebodi yana pepu. “Naio kandi, ‘Pel dopkamner’ tenen, ila co bo 2 kareamnemumpa, pel doramsanen, ila co bo 2 ton cap tapakra keteneipmakenpa, 4 akapmar adano,” pepu. 23 Upepu pangeda, er deiyo ngebodi tamupra pepu. “Telepe, kanda pel tamna pio gum di, telep kupra doramnemume. Ne yambulanunpu kareamkesipane, tamna gum di, pel telep kupra doramnemuma tep, ukutaru ne taleamsi keca weika di karepkukene. Karepkenepa, ne cap, kan cap, kange deipdanemedi, telep kupra kikiman kunkamneme,” pepu.

24 Amendada, ila co bo tenpu dopropu ngebo yaudi pepu. “Naio kanda pio yu ngebo kuramumpa kael keamkesi. Kan men kouamum wai dam di kwaneng nong weik yongopra dororume. Tonda, kan men kouamum keca cap, men bolokamum keca cap, kipra jerume. Ange yuma ukuramumpa kael keamkesa tep, kware kupneupa, kandi karepnemum ila co bo tenpu ngeda, bura dubena, tu palipra tu pumbon inipra deipsi,” pepu. 25 “Ukupsa tep, kandi kareamnemum ila co bo tenpu adeiamsitopu, tamupra tenpu co bopu karepkene,” pepu.

26 Upepupa, adeiyo ngebodi yu kupupa, tamupra pepu. “Kanda, pel dona dabal di tamuma tep, kanda pio mali ngebo kurume. Uda, nedi men kouamsi yal keca ^{▼▼men kouamsi yal keca – Awa deiyo ngebodi aupu pepkada, ‘Upula dona ngebo kunune’ tenen, men pepu. Deiyoda, awa tuda, er pe wa tu cadi, er pel melipra dorami nengdi kouami keca kipra jeramnga tep pepu. Atu deiyo ngeboda er tepa.} cap, men bolokamsi keca capda, nedi kipra jenepa, kandi kael keamnemume. 27 Ange konum kael keamnemuma cadi, ne karepkesi co boda, co bo mawa derin ati dongomtumpa, sun anengdi co bo ton cap tapakra deipketengepa, weik kupbaramtupane, ange cap tapakra karepnetumpa doproptene. Ukupnetum dinin, talipu inipra deiamuma deiki di, kanda pio mali kuramume,” pepu. 28 Adeiyo ngebodi upepu dingeda, er pel melimne neng, yuk neng tep aupu pepu. “Amali ngebo, ne kareamsipa ila co bo tenpu dopromu ngeda, sundi dopra, ukutaru ila co bo 10 karepmaner ngebopu, aco boda er tep tapakra karepso,” pepu.

29 Yesusdi ukupmanto upu pepudi, aupu ton dukdongopra pepu.

Angeda tali tep gume. Ada ware nesala do yuma, sundi pel telep kupra domenga deiki sun talenge keca ^{▼▼sun talenge keca – Yesusdi anesala tep, “Sun talenge keca yambulanun kwamre nesala,” pepunge deiyoda, tek sisi tali co bo cap, tali bung keca cap tep men pepu. Aupu pepunge deiyoda, ake. Allahdi peseretopu pio pe deipra teleppu kunge nesalada menenga keca weika di karenkamre. Dinin, ‘Allah pere upu nun song’ tenen, dabal kuprepa, pel telep kupra men donge nesalada, menenga keca metekanun peda kareprepa men dopropkamenge.} weikanun akwamre nesalada, nedi ton cap tapakra karepnepa, pio weik kupkamre. Dinino, ware nesala do yuma, sundi pel dona tep dabal kuprepa, ‘Nun song’ tenen, telep kupra pel men dongedi, sun talenge keca yambulanunpu kwamre nesalada, yambulanun kwamre ngeda, tamupra dopropnepa, pio gum kupkamre. Anesalada, tali nongpu kunkamenge. 30 Atep nengeda, angebo dopra ateng koupnedi, ila kunungnai dokotepnepa, erda pio kunungna kan-kan dakunkamre. Ukupra dokotepnepa, dakunkamre taruda, engena cap, mali pena cap, si kerena cap kunkamre. Deiyoda, pio mali kuramnga tepa,” Adeiyo ngebodi pepu. Yesusdi aukupmanto upu yumada pepu.

Yesus ukupmanto upu deiki di, domba cap, kambing cap tep, pepu upu

31 Yesusdi aupu pepu dingeda, aupu ton cap pepu.

Ne Nimi Mi Sisa Utopu Ngebo cap, im deiki pel donge neng, malaikat cap, im deiki di yankamep taruda, im deiki keca yuma kuretopu, ne peda urasin telep kuna cap, ne nong dirin weik kuna cap kupkamne. Ukupneryopda, ila mambul bungna keca deiki buknedi, ban-ban yuma kunge nesala tep upu bokra deipkamne. Aila bungna keca deiki bungkamne taru, akeca yumada, im deikinge kuretopu, pio teleppu kupkamre. 32 Ban-ban yuma kunge nesala bulupra ne damai deriryankamnenge. Ukupmengopda, sun anesala yuma yuk-yuk bokra deipkamne. Ukupmantoda, sun domba bisam peina kael nengdi, kambing bisam yuk, domba bisam yuk, wepra deriramengtopu, tuai mutu ban-ban yuma dakunge nesala yuk-yuk bokra deipkamne. 33 Sun domba utopu yala nesalada, dumsisi kunung nesala tep, ne dumsisi tara deipkamne. Sun kambing utopu yala nesalada, mali kunge nesala tep, ne tebalal tara deipkamne.

34 Deipne dingeda, ne Raja kunkamna tep, ne dumsisi tara deipkamne nesala tep aupu pepkamne. Sunda ne nai Allahdi dipru karepupa, bicau tenepra kange derirsere nesalada, ne damai wengyarume. Allahdi akeca-keca yuma kapul men ketekeiamu taru di, ‘Aneng dipapu akeca talenkameng’ tenen, konum ketenepra deiamseu kecada doryarume. 35 Ada tali tep gume. Ne jen keca cap, me cap, putaramneu taruda, sundi melipra kareramnerume. Ne nimi bo ngebo kuramsi taruda, sundi ne tep telepe pepra, napra ati dongoramnerume. 36 Ne opkal bananga kuramsi taruda, opkal keneng diramnerume. Ne pu jeramneu taruda, sundi melimamnerume. Ne wenemna ati dongomnei taruda, sundi ne damai yakaramrumdi, melimamnerume. Nedi sun dumsisi kunge nesala tep pepkamne.

37 Upepne pangeda, sun dumsisi kunge nesaladi aupu tamupra pepkamnenge. “Naio dan taru di jen keca cap, me cap, putaramkeupa, kareamkepu do? 38 Ware taru di nimi bo ngebo kuramumpa, nundi napra nun ati dongoramkepu do? Dan taru opkal bananga kuramumpa, nundi kenengdiramkepu do? 39 Tonda, dan taru di pu jena cap, wenemna ati kuna cap, kuramumpa melipra didongoramkepu do?” pepra, asipetepkamnenge. 40 Asipetepnengopda, ne ila nimi deiyo ngebo Rajadi, anesala yuma tep upepkamne. “Ne tek sisi pepsene, ne tep teka teneramnei neng, ne nyapuda, kankan kunge nesala cap, sengtamne nesala cap, yuk nengdi, ‘Anesalada mambul gume,’ tenenge nesala yumada, tenpu ngebo peda meliamrum ngeda, ada ne tep meliamnerume.”

41 Upepne dingeda, ne tebalal tara deipkamne nesala tep aupu pepkamne. “Allahdi, ‘Anesala ne songe,’ tenepra konum tapseu nesalada, ne damai di tapra yukai beso. Allahdi, ‘Ne tep tapmengedi, mali kecapu talepra mali kunge nesala yumada, uku pio jenkamre’ tenen, uku jen ban ketenepra deipkaipu, sun yumada wengbeso. 42 Ada tali tep gume. Ne jen keca cap, me cap, putaramneu taruda, sundi jen keca melipra men kareramnerume. 43 Ne nimi bo ngebo kuramsi taruda, sundi ne tep telepe pepra, napra sun ati men dongoramnerume. Ne opkal bananga kuramsi taruda, opkal men keneng diramnerume. Ne pu jeramneu taruda, sundi men melimamnerume. Ne wenemna ati dongomnei taruda, sundi melipra men didongoramnerume. Nedi sun mali kunge nesala yuma tep upepkamne.” Yesusdi pepu.

44 Yesusdi upepu dingeda, aupu ton pepu.

Upepne pangeda, sun mali kunge nesaladi aupu tamupra pepkamnenge. “Naio kan dan taru jen keca cap, me cap, putaramkeupa, men kareamkepu do? Dan taru nimi bo ngebo kuramumpa, nundi napra ati men dongoramkepu do? Dan taru opkal bananga kuramumpa, nundi men kenengdiramkepu do? Tonda, dan tarupu jena cap, wenemna ati kuna cap kuramumpa, nundi kan tep men melipra didongoramkepu do?” pepra, asipetepkamnenge.

45 Asipetepnengopda, nedi anesala yuma tep pepkamne. “Ne tek sisi pepsene, ne nyapuda, kankan kunge nesala cap, sengtamne nesala cap, yuk nengdi, ‘Anesalada mambul gume,’ tenenge nesala yuma tep, tenpu ngebo peda ton men meliamrum ngeda, ada ne tep men meliamnerume.” Sun mali kunge nesala tep pepkamne.

46 Upepne dingeda, adipapu, sun mali kunge nesala yumada, dokotepnepa, Allahdi pio wenemkamre. Dinin, sun dumsisi kunge nesalada, telep kungedi gam pio kunkamenge. Yesusdi er nyapu tep aupu yuma pepu.