Mat 27 | XteSC | STEP | Yahudi yala neng Allah karena tep, ila deiyo neng cap, Musa sekeiamu upu peteremna deiyo neng cap, Yahudi yala neng, yuk deiyo neng wisi neng cap, sun yumadi alukunda neitamai yumada, upu weika di talenmai. Aneng yuma upu weik talenmaiyanen, ‘Yesusda popkamepe. Angeda men tapkamape,’ tenepra upu sisingmai.

Matthew 27

Yudas popdau upu

1 Yahudi yala neng Allah karena tep, ila deiyo neng cap, Musa sekeiamu upu peteremna deiyo neng cap, Yahudi yala neng, yuk deiyo neng wisi neng cap, sun yumadi alukunda neitamai yumada, upu weika di talenmai. Aneng yuma upu weik talenmaiyanen, ‘Yesusda popkamepe. Angeda men tapkamape,’ tenepra upu sisingmai. 2 Konum tenepi dingeda, sundi peipipa, sun jen talen nengdi Yesus ateng koupra, Yudea tara taleamu ngebo, ‘Gubernur Pilatusdi upu bokeipkur’ tenen, bena karepi. 3 Sun Yahudi yala deiyo nengdi, ‘Yesusda konum popkupe,’ tenepra pepmai ngeda, Yudas nimi kai dorbenmau ngebo kael kepudi, ‘Uo, Yesus tep nimi upu perbana yapmatene, ne mali kupmane’ tenen, mali kange doupu. Mali kange doupudi, sundi karepmamei gel uang 30 dopra, sun Allah karena tep deiyo neng cap, yuk Yahudi yala deiyo neng cap, sun damaipu tamupra karerbeu.

4 Sun aneng damai beudi aupu pepu. “Uo, ne nai yapu, ‘Angebo popkamruma’ tenen, nimi upu peryanmasen ngeboda, tek sisi mali keca tenpu pe men kurure. Atep tali minina upu pepsa deiki di, ne tek sisi mali kupsi,” pepu.

Upepupa, sun anengdi tamupra pepi, “Apepmaserem ngeda, men gekepkukepe, dakwapye. Angeda, nundi men tenepkupe. Amali kupmumnge deiyoda, kan pe yuka,” pepi. 5 Upepipa, Yudas pio mali kange doupudi, agel uang 30 karepmaipa doupmau ngeda, ka tamupra Allah karerbarami ati, ason deiki puto di siptapu. Siptapudi akati pum di tapra, bura tara beu dingeda, co tekamnga deiyoi bena, co teru deiki tapu gerekdongopudi, kum gerekdongopra, erepra cung pepudi, popdau.

6 Yudas akati tapra benmau taruda, erdi siptapu gel uang bupra dopropidi, aupu pepi. “Agel uangda, nimi pondin gel uang tep, Musa sekeiamu upu yanipnup cadi, Allah tep men karepkamepe. Angeda men kupmanto,” pepi. 7 Upepi dingeda, ‘Agel uangda, nimi bo neng, yuk mutu di nun mutu yangedi depmengepa, sun nong peinkamepai tep, tu kunupkupe,’ pepidi, tu kunumbei. 8 Ukupra kunuamya tep, anesaladi, “Atuda nimi yapi gel uang di kunuami tu,” peramitopu, ukutaru peda tupa penunge. 9 – 10 Akupinge yumada, Allah upu lap peramu ngebo, nabi Yeremiadi, “Ukupkamenge,” pepra pediramutopu adeiki di kupi. Yeremiadi peramu upuda ake,
‘Israel nesaladi nimi upu peprap, popkamya tep, gel uang 30 karepi ngeda dopra, nimi bo neng peinkamyai tep, tu kunupi. Atu kunupi ngeda, Allahdi ‘Ukupkamenge,’ tenemutopu kupi.’ (Yeremia 32:6-9)

Yeremiadi upepra sekeiamu.

Yesus dopra Pilatus damai dubeipa, upu talepmai upu

(Markus 15:2-15; Lukas 23:2-3, 18-25)

11 Yesus dopra, amutu yuma taleamnga deiyo ngebo Gubernur Pilatus er damai bena karepipa, Pilatusdi Yesus tep asipetepu. “Yahudi yala neng sun ila deiyo ngebo ‘Raja kurume,’ penge ngeboda, kan akonum do?” pepra asipetepu. Asipetepupa, Yesusdi tamupra pepu. “Teka apepmarem ngeboda, ne konuma,” pepu.

12 Upepupa, Allah karena tep deiyo neng cap, sun Yahudi yala neng, yuk deiyo neng, wisi neng yuma capdi, ‘Pilatus gekepredi, teka tenepkamar’ tenen, “Yesus er mali kure ngeda, ake-ake,” pepra, luludina upu weika di penmai. Upenmai dinin, Yesusdi upu ton tamupra men penmau. Tali dimpepnapu kupu. 13 Sun upu weika di penmaipa, Yesus dimpepnapu kupmaua tep nengeda, Pilatus ka di ton cap tamupra, Yesus tep asipetepu. “Anengdi, ‘Er mali kure kecada, ake-ake,’ pepra weika di penmakengada, men gekenmarem do? Upenmakenga cadi, kan pedi sun upu men sekurem do? Ware deiyo tep, upu pena gum di, tali dimpepra tekmarem do?” pepra asipetepu.

14 Upepra asipetepu dinino, Yesusdi, sun penmai upu tenpunge pe ton, tamupra men penmaupa, Pilatusdi, ‘Uo, apenmang upu tep, er kware men kunmarada, ware kange doupmar di do?’ tenepudi, lolomau.

15 Uda, Yahudi yala neng, keteng tamun yuma kurami ngeda ake. Kaplemna Kailya Kalemna tep taru neitamaida, kupne taru, wenemna ati dongorami neng kan-kan dinin, nesala yumadi, “Angeboda, loptapso,” pepne ngebopu, Gubernur Pilatusdi, tenpu ngebopu wepra lortamamu. 16 Ukuramya tep, orketeng tamun deiki di yuk nengdi, ‘Roma mutu nengdi, nun mutu yana talesenga tep, aRoma neng yuma popbisipkamep’ tenen, porbirirtererami taruda, nimi tenpu, er si Barabasdi nimi ton popu. Nimi poamunga tep, wenemna ati dongopipa, wenemna ati tupa kunmau. 17 Keteng tamun yuma Kaplemna Kailya Kalemna tep taru di, nimi tenpu lortamamnga cadi, nimi weika di, Pilatus damai bulupra yaipa, Pilatusdi abulupmai neng tep asipetepu. “Tenpu ngebopu loptapkusene ada, Barabas loptapkun do? ‘Nesala weik lyepredi talenkamre’ tenen, Kristus ^{▼▼Kristus – Nimi Lyemna Deiyo Ngebo tep, Yunani upu penge nesaladi, Kristus penunge. Ibrani upu penge nesaladi, Mesias penunge. Atep, ton ayat neitamaida Kristus pepi. Ton ayat neitamaida Mesias pepi. Er sida butene kurur dinin, angebo tenpu pua, ada Yesus tep penunge.} penge ngebo, Yesus loptapkun do, gum do?” pepra asipetepu.

18 Uda, Pilatusdi aupu pepka deiyoda, ake. Ada Allah tep karena deiyo nengdi, Yesus tep dipru wilimdirami ngeda, ‘Sun yuk nesala yuma, Yesus er upupu gekepra dombangedi, nun tara tapsenung cadi, Yesusda nun songe,’ tenerami. Yesus tep tenerami ngeda, Pilatus konum kael keamnga cadi, ‘Anengdi, Yesus poipserume, pepmanenge deiyoda, atepa,’ tenepu. Utenepu dingeda, “Yesusda poipserume,” pepra, er damai mororyanmai neng tep, Pilatusdi asipetepu. “Yahudi yala neng, sun ila deiyo ngebo, Mesias penge ngebo, ‘Yesuspu loptapsetu’ tenen, putapmaserpa, moropmanerum do, ‘Barabaspu loptapsetue’ tenen, penmanerum do?” pepra asipetepu.

19 Pilatusdi, ‘Yesus tep upu bokeipkun’ tenen, nimi upu bongdina neng bukmengedi upu bongdirameng bungna keca deiki bukmaupane, er nerdi upu peipupa, yuk ngebodi aupu dopra peryau. “Kao, angebo Yesus tep nengeda, upu bokra deipmemdi men wenepkurume. Ne kene mapmanua deiki di, pio ikin kupmanera tep, angeboda er mali keca ton tek sisi pio men kupka cadi, loptapnapu kupkurume. Ton cap er tep upu talepra men bokeipkurume,” pepu.

20 Upepu dinin, sun Allah karena tep deiyo neng cap, Yahudi yala deiyo neng, wisi neng capdi, “Upepkurume, upepkurume,” pepra tali luludina upu pedinmaipa, sun tali bulupra wekmai nesaladi gekenmai. Sundi pedinmai upuda ake. “Barabasda loptapsememdi, Yesuspuda poipkuserume,” pepra, Pilatus tep pedinmaipa, tali awekmai nesala yumadi gekenmai. 21 Sun aupu pedidanmai taruda, Gubernur Pilatusdi awekmai nesala yuma tep, asipetepu. “Abutene nengda, dan ngebo loptapkusen do?” pepra asipetepu. Asipetepupa, “Barabaspu loptapkuserume,” pepi.

22 Upenmaipa, Pilatusdi tamupra pepu. “Ange tep nengeda, sundi nesala Lyemna Deiyo Ngebo, Kristus penge ngebo Yesusda, ne adipapu ware kupkun do?” pepra asipetepu. Upepu pangeda, sun awekmai nesala yuma, ila upu di penmai. “Kandi ‘Yesuspu popso,’ pepmempa, sengdin co deiki deipra popkunge,” pepra ila upu di penmai. 23 Upenmaipa, Pilatusdi tamupra pepu. “Angeboda, ware keca deiyo tep, popkung do? Nun amutu talenup nengdi, ‘Ukunkamrume,’ penup upuda, Yesus dan nge yaniserya tep, ‘Deiyo ake,’ peptenepa, jen talen nengdi popkung do?” pepu. Pilatusdi upepu dinino, sun wekmai nesala yumadi, kange di ton cap ila upu di penmai. “Kandi pepmempa, sengdin co deiki deipra popkunge,” penmai.

24 Sun upu weika di penmaiya tep, Pilatusdi, ‘Ne upu ton peptenya peda, pio men gekepkunenge. Ne upu ton cap pepnyopda, yu kuprepa, koudangedi, popdanung atep, dakwapye,’ tenepu. Utenepudi, ‘Angebo er yapida, ne buru deiki men kupkamre tenepkamnenge,’ tenepudi, sun aneng dinmaiya dipapu, Pilatus er buru me kupu. Er buru me kupu taruda, aupu pepu. “Angeboda, mali kun keca ton men kurur ngebo cadi, er yapida ne buru deiki men kupkunere. Sun yuk nengdi popkuruma cadi, sun deikipu kapkusere. Deiyo nengda, sun akonuma,” pepu.

25 Upepu pangeda, sun awekmai nesala yuma upu ila di pepi. “Angeda telepe pua. Angebo er yapida, nun buru deiki cap, nun nyapu sun buru deiki cap, kupsetua peda telepe pua,” pepra balila di aupu pepi. 26 Ange tep nengeda, Pilatusdi Barabas loptapupa, tali beu. Barabasda tali beu dinin, Yesuspuda, Pilatusdi er jen talen neng tep peipupa, Yesus dopra, nimi pon keca ^{▼▼nimi pon keca – Sun ataru kurami nengdi, ‘Nimi popkamep’ tenepra, talepra kurami kecada ake. Sapi bol kopra deiamnepa, konum kalapne pangeda, tekrapnedi urup tarada, besi keca takkenge di potokra deiamna di, nimi nong bol deiki bongonmanpa, agat takke keca di nimi nong bol deiki gweleramu.} di bongopra ponmai. Yesus ponmaiyanen, ‘Yuk nengdi, Yesus er nong dopra sengdin co deiki derirbenkung’ tenen, karepi.

Jen talen nengdi Yesus tep nalemai upu

(Markus 15:16-20)

27 Gubernur Pilatus, er jen talen nengdi Yesus dopra, Pilatus er ila ati pumbon doupra bei. Adoupra bei ati neitamaida, nimi upu bongdirami ati Yesus dopra dubei. Akati doupra bei taruda, ‘Nun jen talenup neng yumada yankung’ tenen, kongpepipa, yuma bulupra yai. Yaidi, Yesus neitamai deipipa bukmau pangeda, sun dana-dana tara yuma yana weki. 28 Sun jen talen neng yai dingeda, ‘Yesus nalepra autunkamap’ tenen, Yesus er kenekmau opkal kwiriptapidi, ataruda ila nimi deiyo neng kenengameng kunumna weik bi opkal utopunge, Yesus er nong deiki aopkal dongopra deipi. 29 Ukupidi, takke weik keca kwaneprapidi, Yesus er giso deiki dekdongopi. Tonda, ‘Ila nimi deiyo neng, telep maca talepra bisi embaramengtopu kupkur’ tenen, co karepipa, er urasin tara gutam tu dipdongopra, Yesus er nalepra autunmaidi, aupu ila di penmai.

“Telepe naio, kanda Yahudi yala neng, sun ila nimi deiyo ngebo kuruma cadi, nundi kan tep gispal dokenupe,” pepra nalemai. 30 Nalemai taruda, amaca dopra karepmaingepu, er giso deiki bongopra ponmai. Bongonapu kunmaidi, er nong deiki yumada, silong tulunmai. 31 Ataru yuma ukunmaiyanen, Yesus tep weika di nalepra autunmai dingeda, er nong deiki arup taru kenekra deipmai bi opkalda, kwiriptapidi, er pe opkalpu, kange di dongopra deipi. Ukupi dingeda, ‘Yesus sengdin co deiki deipra popkup’ tenen, Yesus er nong dopra bura dubei.

Yesus sengdin co deiki popi upu

(Markus 15:22-32; Lukas 23:33-43; Yohanes 19:17-24)

32 Yesus sengdin co deiki deipkamaiya tep, bisi banmai taruda, yuk mutu Kirene mutu ngebo, er si Simon, bura tarada kunmauanen, bisi neitamai mankau yakaupane, antapi. Jen talen nengdi Yesus dubanmaipa, Simon cap antapdai dingeda, Yesus er sengdin co ikin tep, jen talen nengdi upu puto di pepi. “Kan adipapu asengdin co topra beo,” pepra deipipa, Simondi aco melipra topra beu. 33 Simondi asengdin co topra banmaupa, bisi neitamai banmaiyanen, mutu si Golgota ^{▼▼Golgota perami ngeda, ada amutu urasinda, nimi giso yo utopu kwamu mutu tep, sun upu deiki di, amutu si tep Golgota perami.} mutu bei. Ada sun upu deiki di, Golgota perami upu deiyoda, nimi giso yo utopu kwamu mutu tep peramya tepa. 34 Golgota mutu deiki bei dingeda, Yesus sengdin co deiki deipkoiya tep, anggur me, kange yawaramnenge cap, ‘Pu jeprur’ tenen, sengdongon obat er sida mur cap, tonda yu peramre keca me tu cap, tapakra ketenepidi, Yesus tep karepterepi dinin, Yesus mangkau kange doupra jerterenkapudi, ameda kael kepudi, ‘Ameda men jepkune. Pu dajepnetue’ tenen, ame men jepu.

35 Me men jepu pangeda, sengdin co tu deiki deiprapidi, Yesus er nong aco deiki alipra deipidi, buru dana-dana cap, yan tenpai wisipra deipidi paku daki. Ukupi dingeda, Yesus er nong sengdin co deiki deipmai coda, erepra tu palipmaiya pumbon dokotepi. Ukupi dingeda, Yesus er dongoramu opkal kwiriptapmaiyada, ‘Ware ngebo dopropkur do?’ tenen, sun petenkemna keca, er si undi ^{▼▼Undi penmai ngeda ake. Yambul co sirik dopropidi, nimi si aco deiki sekra ketenepra deipnedi, aco yuma tu deiki siptapnepa, nimi si katuai kupne ngebopu, sun bokeipi keca dopropu. Ada, ‘Ware kupkup do’ tenen, petenkemna keca tep, undi pel dorami.} deiki di esu peprapidi, Yesus er opkal bokra doronmai. ^{▼▼Yesus er opkal bokra dopropi ngeda, ada nabi-nabi nengdi Mazmur 22:18 deiki di pediramitopu kupi.} 36 Ukupi dingeda, Yesus er sengdin co deiki deipmaiyapu bukmaidi, kaleka dinmai. 37 Nimidi, “Yesus er mali upu perur ngeda ake,” perami ngeda, co lase deiki surat sekra, Yesus er giso deiki tara deipi. Aco lase deiki surat seki upuda, adano. ‘Yesusda, Yahudi yala neng sun ila nimi deiyo ngebo, Raja kurure,’ pepra sekra deipi.

38 Yesus sengdin co deiki deipmaiya dana-dana tarada, upula doramrei neng butene, ton ngeboda, Yesus er dumsisi tara, ton ngebo Yesus er tebalal tara deipra, sengdin co deiki popi. 39 Yesus sengdin co deiki deipra, popmayai bisi embanmai nengdi, Yesus tep mali upu penmameidi, “Walito popmamenge,” pepra, buru du palcopra kail sunmai. 40 Kail sunmaidi aupu penmai. “Uda, walito wenepra konum popmakeng adano. Kandi uperamume. ‘Allah tep karena cap, Allah er si eremna cap karerbarameng atida, nedi uruptapmanyanen, u weneri tumi konum kupyopda, ne kange di yuknge ton lepsikra ^{▼▼yuknge ton lepsikra dopkamne – Yesusdi aupu pepu ngeda, er pe nong popipa, depmauanen, gam bukamunge tep pepu. Dinin, anengdi ange moupra men kael kepi.} dopkamne.’ Kandi aupu peramuma tep, ukutaru kan pedi sengdin co deiki lyepdamemdi, tuai busuko. Kanda tek sisi Allah er Mi Sisa kumem dingeda, tuai sakmempa men popkukere,” pepra ila upu penmaidi, nalemai.

41 Atali embanmai nengdi upepra nalemaitopu, Allah tep karena deiyo neng cap, Musa sekeiamu upu peteremna deiyo neng cap, sun Yahudi yala neng, deiyo neng, wisi neng cap, aneng yumadi sun peda Yesus tep, nyek-nyek penmaidi nalepra autunmai. 42 Sun penmai upuda ake. “Yesusdi yuk neng tep makupra lyemamu dinin, erdi er pe tep men lyepdatue. Erda Yahudi yala neng, nun ila nimi deiyo ngebo, Raja Israel ngebo kuramtu teptoda, sengdin co deiki di lyepdana tuai kwereptupa eptepedi, er tep teka teneptepe. 43 Angebodi, ‘Neda Allah er Mi Sisa kunune,’ peramnga tep, ‘Allah er dipapu melimnerure’ perur ngebo cadi, Allahdi angebo tep putaptuopda, ataru dipapu Allahdi lyeptue,” upepra nalenmai. 44 Sun aneng yumadi, Yesus tep nalemaitopu, Yesus sengdin co deiki deipmaiya dana-dana tara deipmai neng, mali kuramrei neng butene peda, Yesus tep mali upu weika di penmarei.

Yesus depu upu

(Markus 15:33-41; Lukas 23:44-49)

45 Ipna topne keteng deiki di, Yesus sengdin co deiki deipmaipa, dakunmaupane, keteng dukduk jam 12 kupkopda, amutu yuma adipapu ipudi kunuku. 46 Ipudi kunukmauanen, keteng weneri ton konum kupkopda, sintara jam 3 kupkopda, Yesus ila upu di pepra ngoloku. Er upu deiki di pepu ngeda adano.
‘“Eloi, Eloi lama sabaktani.” Yesusdi pepu. Apepu upu deiyoda ake. “Ne nai Allah, ne nai Allah, warya tep tapra kaukepmanerem do?” pepra ngoloku.’ (Mazmur 22:1)

47 Aupu penmau taruda, meneng damai atekami neng ton gekepidi, walwal di pepi. “E, sun gekepso. Yesusdi nabi Elia, er si pepra upunmare,” pepi. Yesusdi “Eloi, Eloi,” pepmau upuda, moupra men gekepmaiya tep, aupu pepi.

48 Yesus aupu pepu pangeda, tenpu ngebo adipapu sepdaro beudi, me tudon keca, co balana di lyumupra, anggur me suminmin peramrenge, ‘Yesus jepkur’ tenen, me buruprap, Yesus sipyal damai karepterepu. 49 Karepterepu dinino, sun yuk meneng damai akunmai nengdi aupu pepi. “Akeca yuma kurterena gume, dakwapye. Allah upu lap peramu ngebo, ‘Nabi Eliadi, Yesus sengdin co deiki di, yana lyepra dopropkur do?’ tenen, dinapu kunkupe,” pepi. 50 Ukupi pangeda, Yesus ila di ngolokra, mali pepudi, adipapu depu.

51 Yesus depu pangeda, Allah karerbarami ati neitamai, wilipra kapkotemi opkalda, adipapu er pedi, itara di gwelepra dana-dana kepudi butenepu. ^{▼▼opkal gwelepra butenepu – Allah tep karerbarami ati pumbonda ati yuk-yuk wilipra domi. Ila mambul ati, er si Pio Telep Lek Atida, Allah karena neng, sun ila deiyo ngebo ‘Erpu akati wengamre’ tenen, lelimdongona tep, lyom opkal dopra kapkotemi. Alyom opkal kapkotemi ngeda, ‘Allahda akati neitamai kurure,’ teneramya tep, akati yuk tali neng pio men wekmanto kurami. Dinino, Yesus depu pangeda, akati butene wilimna tep, kapkotemi opkalda er pedi gwelepra butenepu. Buteneipka deiyoda, ‘Ukutaru, Yesus depka deiki di, nesala yumadi, Allah er damai yakanada telepe pua’ tenen, nimidi kael kepkamenga tep, Allahdi aopkal gwelepropu.} Ataru dipapu amutu yuma ila di lokudi, gel bukamngai yuma bong-bongopra depu. 52 Tonda, nimi dumsisi kuramnanen, depnepa peirami gel imir pumbon, buplan dengdongorami gel yumada, bongongopra tapupa, pumun taru di konum deamipa, peiami neng weika di, gam bukra yakanmaipa, amutu kunmai nesala weika di epi. 53 Men di konum deamipa, gel imir pumbon peiami nesala yumada, apeiamyai di, gam bukra yana dakunmaipane, Yesus gam bukrou taruda, anengdi Yerusalem mutu ati arum doramya neitamai embanmaipa, amutu kurami nesala yuma, weika di sun gam bukra embanmai neng dinmai.

54 Yesus er ila di ngolokudi, depu taruda, bim lokunge cap, ton atumi kupu keca yuk keca yuma kupupa, yuk neng ton epi. Tonda, jen talen neng denge weik, 100 neng taleamu ngebo tenpu, Yesus sengdin co deiki deipmaiya iritara teka dinmaua cadi, er cap, er cap kikiman kunmai nesala cap, sun yuma epidi, kware weik kupupa, aupu pepi. “Uo, angeboda, tek sisi Allah er Mi Sisa kuramu,” pepi.

55 Yesus sengdin co deiki popmai taruda, nerapu ton yambul karenai di teka dinmai. Anerapuda, ‘Nundi Yesus er putapre keca melimkamep’ tenen, Galilea tara dipra, yuk mutu embaramu taruda, sun cap kikiman melipra embarami. 56 Aneitamai dinmai nerapu, sun sida ake. Magdalena mutu ner er si Maria cap, kaber neng Yakobus cap, Yoses cap, sun nin Maria cap, ton Zebedeus er ner cap, kunmaidi dinmai. Anerapu yumada, Yesus Galilea tara embaramu taru di, er cap melipra embaramidi, er putapne keca sundi makupra karerami.

Yesus er nong dopra gel imir pumbon peirbepi upu

(Markus 15:42-47; Lukas 23:50-56; Yohanes 19:38-42)

57 Atumipu ipropu taruda, isomka ngebo tenpu, er sida Yusup, ada Arimatea mutu ngebo, Yesus er upu gekepra taleamu ngebo cadi, kwar dangna gum di, ‘Pilatus damai bena moropnepa, Yesus nong karepkuner’ tenen, Pilatus tep mororbeu. 58 Moropupa, Pilatusdi, ‘Ne jen talen nengdi, Yesus nong dopra karepkung’ tenen, peipupa, karepi. 59 Yusup tep Yesus er nong dopra karepipa, dopropudi, telep boun opkal di getepdongopu. 60 Yahudi yala nengda, nimi depnopda, gel imir pumbon peirami. Sun yuma ukuramya tep, Yusupda telep boun opkal kunupudi, sengdin co deiki di, Yesus nong dopra, aboun opkal di er nong getepra, Yusup er pe gel imir kumuiamya pumbonpu, Yesus er nong bena dongopudi peipu. Agel imir pumbon dongopudi, yuk ila pala gel gamup banmaiyanen, bura tara buplan dekdongopra bei. 61 Yusupdi Yesus er nong dongopra peipmauaida, Maria Magdalena cap, Yoses er nin Maria cap, sundi Yesus peipmai gel imir damai bukmareidi dinmarei.

Yesus nong peipyai tep, kalengna ngebo deipi upu

62 Yesus konum depupa peipmaipa, sun yuma dakuramyanen, mapmaiya Sabat tumi lukunda bereku tumida, ada sun Yahudi yala nesaladi, Kaplemna Kailya Kalemna tep gonga kemna tumi kupka tep, sun Farisi neng cap, Allah karena deiyo neng capdi, Pilatus er damai aupu perbei. 63 “Naio, amok upu peramu ngebo Yesus, er tupa gam kuramu taruda, ‘Ne popnengepa depmanyanen, u weneri tumi mapnedi, tamupra gam bukamne,’ peramu upuda, nun tupa tenimnapu kunmape. 64 Ukunmapa tep, kandi peipmempa, kan jen talen neng bengedi, er nong peipi gel imir bena kalengamengepane, weneri tumi konum kupyopda, tapkamenge. Ada mesum tep gume. Ange men kupmengepa, er upu gekepra melimna nengdi, er nong lukra dopropmengedi, ‘Yesus konum gam bukmar adano,’ peptapsenge pangeda, nimi weik teka tenepmengepa, nunda ikine weik kupkamsere. Er pumun di mok upu peramu ngeda, yambul ikin dinin, er nyapudi apepmap upu pepsengopda, angeda tek sisi ila ikin kupkamsere. Yuk neng yumadi nun tep, ‘Sunda mok upu pena neng kurume,’ pepsenung tep pepmepe,” pepi.

65 Sun Yahudi yala deiyo nengdi upepipa, Pilatusdi sun aneng tep tamupra pepu. “Ange tep nengeda, sun pedipapu ne jen talen neng dopraprumudi, ‘Yesus er nong peipmangai, pio telep kupra kalekso,’ pepra deipkurume,” pepu. 66 Pilatusdi upepka tep, sun anengdi jen talen neng dopra, “Gel imir buplan dam kalekurume,” pepra deipipa, kaleki pangeda, buplan gum-gum alau tara bon kwamngaida, co pedi palepdongopi. Ange dakronmaryopda, nimidi, ‘Yesus nong upula dopropmange’ tenen, ‘Kael kepkamepe,’ tenepidi, gel imir buplan dekdongopmai gel deiki tarada, co pe palepra deipi.