Mat 28 | XteSC | STEP | Sun yuma damapra kunmaiyanen, Sabat tumi konum kupkopda, berekupa minggu tumi ipna di, Maria Magdalena cap, Yakobus er nin Maria cap, anerapu butene, ‘Yesus er nong peipmanguai dirbenkunem’ tenen, agel imir damai dirberei.

Matthew 28

Yesus gam buku upu

(Markus 16:1-8; Lukas 24:1-10)

1 Sun yuma damapra kunmaiyanen, Sabat tumi konum kupkopda, berekupa minggu tumi ipna di, Maria Magdalena cap, Yakobus er nin Maria cap, anerapu butene, ‘Yesus er nong peipmanguai dirbenkunem’ tenen, agel imir damai dirberei. 2 Minggu tumi ipna kapul bereng tamupapu, anerapu butene Yesus peipmauai bena, kunmareipa, ila bim lokupa, im deiki di Allah er pel don ngebo malaikat tenpu yaudi, Yesus peipra buplan dekdongopmau gel pala yana gamuptapudi, agel deiki buku.

3 Ayau malaikatda, er opkalda, kulman perenglang peramretopu kupudi, dirine pio weik kupudi kurupu. 4 Ukupupa, akalekmai jen talen neng epidi, lukdana kware weik kupupa, sun nong yuma moropsepudi, derameng neng utopu kupi. 5 ‘Anerapuda sun lukdarengedi kware kuprur’ tenen, aim deiki pel don ngebo malaikatdi anerapu tep pepu. “Sun lungdana cap, kware dangna cap gume. Ne kaele, sunda yuk nengdi Yesus sengdin co deiki popmaiya tep, ‘Yesus erda dan do?’ tenen, enmarume.

6 Dinino, ukutaruda er nong aca men kunmare. Erdi, ‘Gam bukamne,’ pediramutopu, konum gam bukmare. Atep, agel imir pumbon er nong deipmanguaipu, yana dipterepso. Er pio aca men kunmare. 7 Eprumudi adipapu erdi wepra deiamu neng, sun 11 neng damai menmena aupu lap perbenkurerume. Yesusda konum gam bukmare. Atep Yesusdi, ‘Ne gam bukra menmena Galilea tara benmanepane, sun amenda bemumpa, epdankamepe,’ peiamseutopu, er menmena gam bukra benmare. Atep, sun yuma antapkamrume. Aupu yuma lap perbenkurume. Ne akonum pepsene,” Amalaikatdi anerapu tep pepu.

8 Amalaikatdi aupu pepu pangeda, anerapu kange boktapupa, kwar weik kupu dinin, tonda, sun ila kange derina cap, kwar kuna cap kupupapu, ‘Yesus er nyapu damai perbenkunem’ tenen, agel imir damai tapra, sepdaro berei. 9 Bisi neitamai sepdaro banmarei taruda, Yesus dato-dato yaupa antapi. Antapidi, Yesusdi abutene nerapu tep, “Telepe,” pepupa, er damai yareidi, gispal dopra, ‘Er si erepkunem’ tenen, er yan damai yana taleprei. 10 Ukupreipa, Yesusdi aupu pepu. “Sun kwar dangna gume. Ne weit yapu damai berumumdi, sun tep upepkurerume. ‘Galilea tara bemumdi, Yesus cap antapdankamrume,’ pepra lap perbenkurume,” Yesusdi pepu.

Gel imir kalengna tep, jen talena nengdi pepi upu

11 Anerapu butene bisi neitamai banmarei taruda, agel imir damai kalekmai jen talen nengda, Yerusalem mutu ton lap perbei. Ada Yerusalem mutu neitamai dinin, Allah karena cap, er si eremna cap ati pumbon pel dona deiyo neng, sun damai bena akupmau keca yuma tep, lap perbei. 12 Sun jen talen nengdi aupu lap perbeipa, sun Allah karena tep deiyo neng cap, Yahudi yala deiyo neng cap gekepidi, ‘Uo, ware pepkup do?’ tenen, mali kange doupidi upu talenmai. Upu talenmaiyanen, ajen talen neng tep, co bo weik karepidi, ‘Mok upu penkameng’ tenen, aupu pepra deipi. 13 “Sundi upepkurume. ‘Gume, nun mapmapu taruda, Yesus er nyapu lukunda neitamai yanmangudi, Yesus er nong upula dopra benmangu,’ pepra petamkamrume.”

Apepra deipidi, ajen talen neng sun namdina tep, co bo weik karepi. 14 Karepidi aupu ton cap pepi. “Sunda kwar dangna, gume. Sundi, ‘Nunda udungmaseupa mapmapu taru di, upula dopropmangu,’ pepmepe pangeda, ‘Pilatus gekepseredi popserur’ tenen, kwar kuna gume. Nundi sun makuna tep, Pilatus er damai upu sekamepa tep, nun pepmaseptopu balila di bena penkamrume. Angeda, ikin men kupkamsere,” pepra deipi. 15 Upepra deipitopu, jen talen neng aco bo doprapidi, apeipmaitopu perbarami. Aupu perbaramipa, Yahudi yala nesala weike gekeramya tep, ukutaru kunge nesala peda, aupu tupa penunge.

Yesusdi, “Ne upu peteremrume,” pepra, deipu upu

16 Akeca yuma konum kupu pangeda, Yesus erdi wepra deipu neng, sun 11 nengda, Yesusdi, ‘Ne pepsene mutu buma deikipu benkamrume,’ pepra, deiputopu, Yerusalem mutu tapra, Galilea tara neitamai, Yesusdi peipu mutu buma deikipu tamupra bei. 17 Amutu tamupra beidi, dakunmai taruda, Yesus yaupa epidi, ton nengda teka tenepidi, kange deipra er si erepi dinin, ton nengda, ‘Tek do, telel do?’ tenen, tenimtonapu kunmai. 18 Yesus sun damai yaudi aupu pepu.

“Im deiki kure keca cap, tuai mutu kure keca yuma cap, Allahdi ne amutara konum deipneue. ‘Akeca-keca yuma talepra ila nimi deiyo ngebo kunkamre’ tenen, Allahdi er puto weika di karepneupa, talenune. 19 Ange tep nengeda, nesala ban-ban yuma, ne upu moupra gekepmengedi, ‘Ne kune keca utopu kunkameng’ tenen, ne nyapu sundi ‘Nesala ban-ban yuma gekenkameng’ tenen, peterep embankamrume. Peterep baramumpane, ne tep teka tenepmenge nesalada, Allah er si deiki cap, er Mi Sisa, ne Yesus si deiki cap, Allah er Lek Sambala si deiki capdi, sun teka tenenkameng nesala me dongopbankamrume.

20 Tonda, nedi, ‘Angepu kunkamrume,’ pepra peteremamsisi upu yumada, ‘Anesala yumadi utopu kupra kunkameng’ tenen, ne upu dopra peterep embankamrume. Ne tek sisi pepsene, ukunkamrumu taru yumada, ne cap, sun cap, kikiman kunkamepe. Ukupra dakuramepyanen, sirya taru peda, ne cap, sun cap, pio kikimanpu kunkamepe.” Yesusdi pepu.

Telepe, ne Matiusdi aupu sekra deipsene.