Mat 3 | XteSC | STEP | Ataruda, nimi kuna cap, mo cemna cap, pio men kuramngai, Yudea tara neitamai di, Yohanes men di nesala me dongoramu ngeboda, amutu yau. Yau dingeda, erdi aupu peteremamu.

Matthew 3

‘Yesus amenda yankamre’ tenen, Yohanesdi Yesus yakan bisi tep, ketenem dinkamnga tep pepu upu

(Markus 1:3-8; Lukas 3:2-17)

1 Ataruda, nimi kuna cap, mo cemna cap, pio men kuramngai, Yudea tara neitamai di, Yohanes men di nesala me dongoramu ngeboda, amutu yau. Yau dingeda, erdi aupu peteremamu. 2 Yohanes peteremamu ngeda, ake. “Sun yuma, dipru kange mali tenemum keca cap, sun mali kumum keca cap, tapra amnyo karikromumpa, Allahdi amali keca yuma gum kupra deipredi, kaukemkamsere. Ukupkumum ngeda, ada Allahdi nesala weike lyepredi, sun dipru talenkamre taru konum damai kupmara tep, sun mali kumum keca yuma tapkurume,” pepu.

3 Angebo Yohanesda, erda tali ngebo gume. Allah upu lap peramu ngebo nabi Yesayadi, “Bisi Ketenemdin Ngebo yankamre,” pediramutopu, angeboda Yohanes ayanmare. Yesayadi pediramu domon upuda adano.
‘Ne Allahdi, ne upu kai pedin ngeboda, mo cemna cap, nimi kuna cap, pio gumai di, aupu penkamre. Ukupra penkamre. “Nimi Deiyo Ngebo, nun nai Allah yankamra tep, bisi kwiryepu yapra derinkamrume. Nun Deiyo Ngebo benkamre bisida, kwiryepu yapra ketenepra derinkamrume,” penkamre.’ (Yesaya 40:3)

4 Yohanesdi unta bisam bol gongopra, potong kepman opkal wipra dongoramu. Abisam bolpu er deiyoteng deriramu. Tonda, Yohanes erda mong mokon cap, sul po cappu, jeramu. ^{▼▼Yohanes kuramunge – Yohanesdi mong mokon cap, sul po cap jeprap, unta bisam bol gongopra potong kepman opkal wipra dongoramu ngeda, ada sun pumun taru Allah upu lap perami neng, nabi-nabi nengdi ton ukurami. Adeiki di nesala yuma ange epidi, ‘E Yohanesda, tek sisi Allah upu lap pena ngebo, nabi kurure,’ tenerami.} 5 Ila ati arum domi mutu, Yerusalem mutu kurami nesala cap, Yudea tara neitamai kurami nesala cap, Yordan me duman kurami nesala cap, sun gung weika di Yohanes peteremamngai gekerbarami. 6 Ukupra gekerbaramidi, sun mali kurami kecada, yuk nesala gekeramyai di, katuai lap pertamami. “Nun tek sisi mali kuramupke,” pepra, sun mali kurami keca katuai di lap pepra tamamipa, Yohanesdi ateka tenerami nesalapu dopra, me dongoramu. Anesala dopra me dongoramu me sida, Yordan me.

7 Anesala me dongoramu dinin, erdi teka tenena nesala me dongoramngaida, sun Farisi ^{▼▼Farisi nengda, – Yahudi yala nesala, sun deiyo neng kuramidi, agama pel dona deiyo neng kurami. Tonda, Allah upu ila kael neng kuramidi, aupu peteremami dinin, Yesus tep teka men tenerami. Tonda lap pena upu nomor 10 dinkurume.} neng cap, Saduki ^{▼▼Saduki neng – Yahudi yala nengpu kurami dinin, sunda, ‘Nimi deramenge nesala amenda taru tamupra gam pio men bukamenge,’ tenepra kurami. Angetopu, sundi, ‘Allah er im deiki pel don neng malaikat ton tek sisi men kununge’ tenepra peteremami neng kurami. Sundi, ‘Ange yumada, men kupmanto keca,’ teneramidi teka men tenerami. Tonda, lap pena upu nomor 9 dinkurume.} neng cap diryaipa, epu dingeda, anengda tupa mali kuramya cadi, sun tep aupu pepra wenepu. “Sun yu kuna cap, mawa di tali upu pepra inimtamna cap kumumnyada, bal inipra mapmaryadi, nimi toramsertopu kurume. Ware ngebodi sun tep, ‘Allahdi mali kun nesala wenepra popkamre,’ pepipa gekepmumdi, ‘Allahdi nun popsurur’ tenen, sepdaro berum do? Ware nengdi, sun tep aupu lap pepsei do?” Yohanesdi, sun tep wenepra pepu. Upepudi aupu ton pepu.

8 “Sunda, ‘Nundi nun mali kupe keca konum tapmepe,’ pepra, tali upu deiki di pepnetum dinin, co du mouramnya engamretopu, tek sisi taptumdi, dumsisipu kutumpa epsetene teptoda, teka tenepsetene. Atep, sun mali kumum keca yumada, adipapu tapmumdi, teleppu kunkamrume. 9 Tonda, sundi, ‘Gume, nun co puna ngeboda, Abraham kuserura tep, Allahdi men wenepkamsere,’ tenepra men penkamrume. Angeda tenena gume. Allahdi, ‘Abraham er nyapu ne doproptene’ tenen, putaptuopda, tali akwapu gel di dopra, Abraham er nyapu ton ketekepra deiptue. 10 Co kwemna ^{▼▼Co kwemna pepka deiyoda ake. Ada, mali kuramenge nesalada, Allahdi anesala tep wenepra poptapkamre taru, konum damai kupmasera tep, adomon upu pepu.} deiyo ngebodi, ‘Co kwepkamne’ tenen, er ya dopra co deiyoi konum keteneipmare. Telep co du men mouramre co yumada, kweprapredi uku dongopkamre.”

11 “Sun mali keca yuma tapmumpa, me pumbon dongosenun dinin, neda yambul mambul ngebo cadi, amenda taru yankamra ila deiyo ngeboda, erda ila mambul ngebo. Neda, mambul ngebo guma tep, pio mali pelpu donun dinin, er yantang dongona keca, er sida sandal kodongon tapu, nedi men loptaptene. Amenda yankamre ngeboda, er puto pio weik ngebo tep, erdi Allah er Lek Sambala karenkamsere. Nedi me pumbon dongosenepa, sun nong yuma me singiramretopu, amenda yankamre ngeboda, er puto pio weik ngebo tep, erdi Allah Lek Sambala kareserepa, sun kange dipru yuma talenkamsere. Uku di mali keca jedoramretopu, Allah er Lek Sambaladi, sun mali kun keca yuma doproredi, gum kupra deipkamsere.

12 Bakke jepkure ngeboda, bakke bam lapra, uku dongopredi, bakke nongpu jeramretopu, Yesusdi nimi yuma bokra, telepnge dopropredi, malinge tapkamre. ^{▼▼Bakke bam – Allah upu menop taru seki ngeda, bakke men pepi. Sundi, gandum keca tep, domon upu pepi dinin, aupu deiyoda utoto pua.} Nesaladi jen keca telepnge co langdina deiki deriramengtopu, Allahdi er tep teka tenepmengedi, dumsisipu kunge nengda, anesala dopra im deiki deiprepa, er cap kikiman pio kunkamenge. Tonda, nesaladi jen keca bam lapra, uku dongoramengtopu, Yesusdi mali kun nesala yuma dopra, uku pio jerurai dongopkamre. Aukuda pio men tapkamre, pio jenkamre.” Yohanesdi awekmai neng yuma tep, adomon upu pepu.

Yohanesdi Yesus me dongopu upu

(Markus 1:9-11; Lukas 3:21-22; Yohanes 1:31-32)

13 Yesusda, ‘Yohanesdi ne me dongopkamner’ tenen, Galilea tara di Yohanes er peteremamngai Yordan mekin yau. Yaudi, “Me dongopneo,” pepra moropu. 14 Moropupane, Yohanesdi tamupra pepu. ‘Neda mali ngebo kununa,’ tenepudi aupu pepu. “Gume naio, telep ngeda, kandi ne tep me dongopnetum dinin, kandi ne dam yana moropmaneremada, warya tep do? Ne kangeda, ange men kupketene,” pepu. 15 Upepupa, Yesusdi tamupra pepu. “Gume, Allahdi nun tep, ‘Ukupra dumsisipu kunkamenge’ teneseretopu, dumsisingepu kunkupa tep, ukutaru kandi ne me dongopneo,” pepu. Upepupa, Yohanesdi, “Telepe,” pepra, Yesus me dongopu.

16 Me dongopupa, Yesusda me pumbon wekropkanen, tengdongou taruda, adipapu Allahdi im deiki buplan pakeipupa, Yesusdi dinmau. Dinmaupa, Allah er Lek Sambalada, yal ma utopu daudi, Yesus er nong deiki bungyau. 17 Bungyau pangeda, abungyau taruda, Allah im deiki di aupu pepu. “Angeboda, ne Mi Sisa kurure. Nedi er tep, pio bicau tenenuna cadi, er tep ne kange pio derinune,” Allahdi pepu. Upepu pangeda, Allah er Lek Sambaladi, Yesus dipru neitam peipupa, Yesusda nimi pio men kurami mutu, katuai mutu neitamai beu. ^{▼▼Yesaya 42:1}