Mat 4 | XteSC | STEP | Yohanesdi Yesus konum me dongopu pangeda, Allah er Lek Sambaladi Yesusda ikin kuprepa, ‘Allah er upupu gekepkamar do, Kain Jen Ngebodi pere upu gekepkamar do?’ tenen, Yesus er dipru neitamai upu peipupa, Yesus er kurpetena tep, nimi pio men kuramidi, katuaipu kwamu mutu neitamai beu. Amutu neitamai kuramu taruda, Kain Jen Ngebodi, ‘Yesusda mali kuptue’ tenen, Yesus damai yana kupetepu.

Matthew 4

Kain Jen Ngebodi, ‘Yesus mali upu peptue’ tenen, asipetepu upu

(Markus 1:12-13; Lukas 4:1-13)

1 Yohanesdi Yesus konum me dongopu pangeda, Allah er Lek Sambaladi Yesusda ikin kuprepa, ‘Allah er upupu gekepkamar do, Kain Jen Ngebodi ^{▼▼Kain Jen Ngebo penup ngeboda, Yahudi yala nesala, sun upu deiki di Setan perami. Yahudi yala nesalada, sun Ibrani upu deiki di, Setan perami upu deiyoda, ‘Nimi Pon Ngebo,’ teneramidi uperami. Tonda, Setan upu deiyoda, “Minina Upu Pen Ngebo kurure,” perami. Tonda, ‘Luludina Upu Pena Deiyo Ngebo kurure’ tenen, aupu perami. Tonda, lap pena upu nomor 13 dinkurume.} pere upu gekepkamar do?’ tenen, Yesus er dipru neitamai upu peipupa, Yesus er kurpetena tep, nimi pio men kuramidi, katuaipu kwamu mutu neitamai beu. Amutu neitamai kuramu taruda, Kain Jen Ngebodi, ‘Yesusda mali kuptue’ tenen, Yesus damai yana kupetepu. 2 Yesus amutu kuramu taruda, keteng komuni cap, lukunda cap yumada, ue denge dumbari, ada 40 malam amutu maramu. Amutu kuramu taru yumada, jen jena gum di, jen tali bulungnapu kuramu. Ukupra kuramupane, ue denge dumbari, 40 tumi konum kupkopda, er jene pio putapu. 3 Jen pio putapu pangeda, Kain Jen Ngebodi, ‘Yesus mali kuptu do?’ tenepudi, ‘Kupetepkun’ tenen, Yesus damai peryau. “Kanda tek sisi Allah er Mi Sisa kuramem dingeda, akwapu gel dopropmemdi, ‘Kwaneng dayo,’ pepmempa, kwaneng darepa, ange dopra jeptume,” pepu. 4 Upepupane, Yesusdi tamupra pepu. “Allah upu buku neitamai sekeipseudi pesere upuda ake.
‘Nimi yuma kwanengpu jepmengedi, gam pio men kunkamenge. Dinino, Allahdi er upu peserenge yuma gekepra, dombaramenge dingeda, gam pio kunkamenge. Jen kecada, yambul mambul dinin, ila mambul kecada, Allah er upu akwapmara tep, jen kecapu tenena gume. Allah upu gekepra dombanada, ila mambule,’ pepu. (Ulangan 8:3)

“Menop taru sekami Allah upu pepsene,” Yesusdi pepu.

5 Upepu pangeda, Kain Jen Ngebodi Yesus dopra, Yerusalem mutu Allah karerbaramidi, er si eremami ati ^{▼▼eremami ati - Allah tep karerbaramidi, er si eremami ati tep, lap pen upuda, nomor 15 dinkurume.} dum deiki deipu.

6 Deipudi, aupu pepu. Allah upu buku neitamaida, aupu pepra seki.
‘Kan popkerur’ tenen, Allah er im deiki pel don neng, malaikat peiprepa, tuai pio moupra kalekmakenga di, tomopkamakenge. Ada, ‘Gel di kan yan giso dukra popkerur’ tenen, kan makuna tep kalekra dinkamkenge. Deiyoda, ‘Er saka poprur’ tenen, tomopra eremdinkamkenga tep, pio moupra kalengkamkenge. (Mazmur 91:11-12)

Kain Jen Ngebodi upepudi, aupu ton dukdongopra pepu. “Uda, Mazmur upu konum pepkenada, Allah upu buku neitamai akwapmara tep, kanda Allah er Mi Sisa kuramem dingeda, akati dum deiki di, tuai sakmempa, men popketue,” Kain Jen Ngebodi Yesus tep pepu.

7 Upepupa, Yesusdi tamupra pepu. “Apepmarem ngeda, akwapmar dinin, yuk Allah upu sekami ngeda pepkukene. Ada ake.
‘Sun nai Allahdi, ‘Tek sisi kalekra makunkamser do, gum do?’ tenen, Allah tep kurpeten keca kuna meme.’ (Ulangan 6:16)

Aupuda, Allah upu neitamai kurura tep pepkene,” Yesusdi pepu.

8 Amenda taruda, Kain Jen Ngebodi, Yesus dopra, ila mutu dupai dubeudi, mutu ban-ban yuma cap, ila deiyo nengdi talengepa kunge mutu yuma cap, urasin pio telep keca akwapunge yuma cap, sun kunumna weik keca cap yuma, benbenepudi, “Dipterepo,” penmaupa, Yesusdi ange yuma dinmau. Dinmaupa, Kain Jen Ngebodi Yesus tep, aupu pepu. 9 “Kanda ne gispal dopra, ne si erepnememnyopda, adinmarem keca yuma kan tep karepkukene,” pepu. 10 Upepupa, Yesusdi tamupra pepu. “Gume, Allah upu buku neitamai di upeserure.
‘Sun Nai bo Allahda, er sipu erepra talenkamrume. Sun kangeda, er deiki dipu derinkamrume. Er pelpu donkamrume.’ (Ulangan 6:13)

Aupuda, Allah upu neitamai kurura tep pepkene. Atep, Kain Jen Ngebo kanda, ne tapra kan yukai beo,” Yesusdi Kain Jen Ngebo tep pepu. 11 Upepupa, Kain Jen Ngebo beu taruda, Allah er im deiki pel don neng, malaikat-malaikat, Yesus damai yaidi, er putaramutopu, akeca yumada makurami.

Yesusdi pel gonga kepra peterepu upu

12 Uda, yuk nengdi, “Yohanesda, Raja Herodesdi, ateng koupra nimi wenemna ati dongopmare,” pepipa, Yesus gekepudi, tamupra Galilea mutu yau. 13 Galilea mutu neitamai dinin, Nasaret mutu tapra, Kapernaum mutu yana kuramu. Kapernaum mutuda, Galilea mokon dam ati arum domyai kuramu. Er yana kuramu mutuda, menop di Zebulon yala neng cap, Naftali yala neng cap, kurami. 14 Amutu neitamai bena kuramngada, Allah upu jenek peramu ngebo, nabi Yesaya pediramutopu kupkamua tep, bena kuramu. 15 Yesayadi sekeiamu domon upuda adano. ^{▼▼Yesaya pepu upu – Yesayadi adomon upu peramngada, Kapernaum mutu kurami nesala, Yesus kun keca men kael keami dinin, Yesusdi amutu neitamai gonga kepra peterembeupa, amutu nesaladi Yesus epya tep, aupu peramu.}
‘Zebulon mutu tara kunge nesala cap, Naftali mutu tara kunge nesala cap, Yordan me duman, ton Galilea mokon dam kumum nesala sunda, Yahudi yala gum nesala cap, Yahudi yala nesala cap, kikiman kumum nesala tep pepne. 16 Sun kange dipru kunungna utopu kurami dinin, ukutaruda, ila dirin utopu keca konum epmange. Sun akurami neng dipru kange yumada, dena utopu kwamupa, kunungnai utopu kurami dinin, ukutaruda, ila dirine utopu keca epmanga deiki di, berekredi keteng deiprepa dirin kuramretopu kunmange,’ Yesayadi domon upu pepu. (Yesaya 9:1-2)

17 Yesusdi Nasaret mutu tapra, Galilea mutu beu taruda, adipapu, Allah upu gonga kepra peteremamu. Er peteremamu upuda adano. “Sun mali kumum keca cap, kange dipru mali tenemum keca cap, tamkamrume. Ada, Allahdi nesala weika di lyepredi, sun dipru talenkamre taru konum dam kupmara tepa,” peramu.

Yesusdi er cap tonpa embankami neng tep wepra deipu upu

(Markus 1:16-20; Lukas 5:2-11; Yohanes 1:35-42)

18 Aupu pepbaramu taru neitamai di, Yesusda Galilea mokon pirman embanmau. Embanmaudi, nimi butene sun aweitap duap epu. Epu nengda, Simonpu dinin, ton sida Peterus perami ngebo cap, er weit bo Anderias cap, ‘Mekina yakra popkamanem’ tenen, mokon pumbon alen utopu keca, mekina pon keca, er si jala dokotenmareipa epu. Sun abutene nengda, mekina pon neng cadi, ukunmareipa epu. 19 Sun ukunmareipa, Yesus epu dingeda, abutene neng tep pepu. “Sunda, ne melipra domyanereso. Sun mekina yakra dororamrumtopu, nimi bulupra doron neng kupra deipkusene. Ada, ‘Allah lyepredi sun dipru talenkamre’ tenen, sundi nesala weike bupra, ne damai duyakankamnerume,” pepu. 20 Yesusdi upepu pangeda, Simon cap, Anderias cap, sun butene nengda, mekina yakra doron keca, jala taprapreidi, adipapu Yesus melipra domyarei. 21 Yesus aupu pepudi, amokon pirmanpu banmauanen, butene neng ton, Yakobus cap, er weit Yohanes cap, ada Zebedeus er nyapu, sun gapung co deiki di mekina yakra poramrei keca, er sida jala, akeca bon dakamnga tep, lepsikra tumipra winmareipa epu. 22 Epu dingeda, Yesusdi aneng tep kongpepkopda, sun butene nengdi, sun nai Zebedeusda, gapung co deiki abukmauai, acapu tapra, sun adipapu Yesus melipra berei.

Yesusdi pu jeramu nesala kweteramu upu

23 Sun cap, Yesus cap, Galilea mutu neitamai yuma embanmaiyanen, Yesusdi, sun Yahudi yala neng Allah upu geken ati ^{▼▼Allah upu peteremna ati – Yahudi yala neng, sun Allah upu peteremna atida, nun gereja yambul atonun kwamu dinin, yambul yuk. Ada sundi hari Sabtu wengamidi, Allah er si eremami. Yahudi yala nesala kurami mutu yuma neitamai, Allah upu geken ati domi. Tonda, yuk-yuk tumida, Allah upu gekena cap, peteremna cap, nimi pepdaramipa, sun upu bongdina tep nengeda, akati wekami. Ila mambul ati, Yerusalem mutu neitamai, Allah er karena tep domi atida, tenpu atipu kwamu. Bahasa Indonesia deiki di, ‘rumah ibadah’ penunge. Allah upu geken ati lap pena upuda, nomor 26 dirume.} wekra, er upu peteremamu. Er telep upu peteremamuada, Allahdi nimi lyepredi, sun dipru talenkamre upu, kai telep upu peteremamu.

Er peteremamu taru yumada, sun amutu nesala yumada, yambul pu jeramunge cap, pumun dadi ila pu jeramunge cap, telep kupra kwetedinmaupa, anesala yuma telep kupra kunmai. 24 Yesusda, sun anesala kwetepra dakuramupane, yuk nengdi er kuramunge lap perbaramipa, Siria mutu tara kurami neng yumada, Yesus kuramu keca gekerami. Anesala yumada, ange gekeramya tep, pu yala-yala yuma pio weika di jeramupa, kange mun kange doupra kurami nesala weika di doupra, Yesus damai duyakarami. Ada, pumun di, ila pu jeramu nesala cap, isokdi sun dipru wekra taleamu nesala cap, moropsemredi kange yawaramre nesala cap, sun buru yan yuma, meiyal seramu nesala cap, Yesus damai duyakaramipa, Yesusdi anesala yuma, telep kupra kwetediramu. 25 Yesus erdi ukuramu taru yumada, Galilea tara kurami nesala cap, Yudea tara kurami nesala cap, Yordan me goupra ortara kurami nesala cap, sun ati arum sepuluh di dopra kuramidi, amutu si Dekapolis perami mutu kurami nesala cap, Yerusalem mutu kurami nesala cap, weika di Yesus melipra embarami.