Mat 6 | XteSC | STEP | Yesusdi aupu pepu. “Sun kange moupra kuna tep, aupu pepkusene. Sunda, ‘Allah er si erepra er pel donkamepe,’ tenepmum taru yumada, ‘Yuk neng epsengedi, sunda telep neng, tenepkamsenge’ tenen, katuai nimi dinmasengai dipapu men pel donkamrume. Nimi dinmasengaipu, katuai pel dopmum pangeda, sun nai Allah im deiki kurur ngebodi, ‘Menenga karepkamsene’ tenesere kecada men karepkamsere.”

Matthew 6

Yesusdi kankan kunge nesala makuna tep pepu upu

1 Yesusdi aupu pepu. “Sun kange moupra kuna tep, aupu pepkusene. Sunda, ‘Allah er si erepra er pel donkamepe,’ tenepmum taru yumada, ‘Yuk neng epsengedi, sunda telep neng, tenepkamsenge’ tenen, katuai nimi dinmasengai dipapu men pel donkamrume. Nimi dinmasengaipu, katuai pel dopmum pangeda, sun nai Allah im deiki kurur ngebodi, ‘Menenga karepkamsene’ tenesere kecada men karepkamsere.”

2 “Ange tep nengeda, sun mawa di tali pertamnung neng kurameng kecada, sun utopu men kunkamrume. Anengda, Allah er gispal dona tep gum dinin, ‘Yuk neng epra gispal dopsengedi, pio telep neng tenepkamseng’ tenen, kankan kunge nesala putare keca karenge taruda, ila bisai yuma cap, Allah upu peteremna ati bo cap, ‘Nimi weika di embangedi dinkamseng’ tenen, katuai dipu karenunge. Ukupra karenge taruda, ‘Nimi epra gispal donkamseng’ tenen, bung-bung pena pen keca, er sida terompet, lelim weika di penunge. Atep, ne tek sisi pepsene, Allahdi amenda taru aneng tep, telep menenga keca ton tamupra men karepkamre. Sun anengdi telep kupra kunge kecada, ‘Yuk nengdi epkamseng’ tenen, katuai dipu kununga cadi, ukununga deiki di, sun menenga utopu kecada, konum dopropmange. Allahdi amenda taru aneng tep, yuk keca ton tapakra men karepkamre.

3 Kankan neng karepkumum dingeda, ‘Yuk neng epkuseng’ tenen, katuai dipu men karenkamrume. Kankan nesala karepkumum taruda, ‘Yuk nesala epra kael kepsenung’ tenen, inipra karepmumpa, Allah er dipapu epra kael kemkamsere. Angetopu, kankan kunge nesala tep karepkurum taruda, yuk neng tep, lape men penkamrume. Allah er dipapu epra kael kepkamsera tep, katuai lap pena gum dipapu, tali dimpeprap karenkamrume. 4 Ukumum pangeda, yuk nengdi men epkameng dinino, sun nai Allahda inipra karemum keca yuma dirur ngebo cadi, er dipapu epra kael kepseredi, telep menenga keca keteneipseuada amenda taru karepkamsere.” Yesusdi pepu.

Yesusdi Allah morona tep pepu upu

(Lukas 11:2-4)

5 Yesusdi aupu pepu dingeda, aupu ton pepu.

Sun dipruai mali keca tupa akapseupapu, ‘Nimi epsengedi, anengda telep neng tenepkamseng’ tenen, nong bol deiki ngepu telep kupra kunge neng kungetopu, ne nyapu sun peda, sun kunga utopu men kunkamrume. Amali kunge nengda, ‘Yuk nengdi dinkamseng’ tenen, nimi bulupra embarameng bisai cap, Allah upu peteremna ati pumbon cap, nimi dinaipu tekmengedi, Allah moronunge. Akunung keca yumada, ‘Telep neng tenenkamseng’ tenen, kununga cadi, ne tek sisi pepsene. Sun menenga utopu kecada, ukununga deiki di konum doronunge. Amenda taru Allahdi aneng tep, yuk keca ton tapakra men karenkamre.

Dinino, ne nyapu, sundi Allah moropkumum taru yumada, sun aneng kungetopu, pio men kunkamrume. 6 Sunda sun ati bo wekmumdi, buplan dekdongopmumyopda, Allah moronkamrume. Ukumum taruda, nimi asuru di men dinung ngebo, sun nai Allah tep moroprumpa, er dipu dinkamsere. Ukupmum pangeda, sun nai Allah nimidi inipra kuramenge keca yuma dirur ngebo cadi, kael kemseredi, erdi keteneipseu menenga kecada, amenda taru karenkamsere. 7 Tonda, Allah teka tenena gum nengdi, Allah moropkunge taruda, ‘Upu lyoma di pepmepepa gekepkusere,’ tenepra mororamengtopu, ne nyapu sunda ange utopu men kunkamrume. 8 Aneng upu lyoma di pepra, Allah mororamengtopu men moronkamrume. Sun putasere keca tep kapul men moromum taru di, sun nai bo Allah konum kael kepmaserura cadi, upu lyoma di men moronkamrume. 9 Sun Allah moronkamrum ngeda ake.
Nun nai Allah im deiki tupa kurum ngebo, ‘Nun cap, yuk neng yuma capdi, kan sipu erepra kunkamep’ tenen, moropkepe. Tonda, ‘Nun ila deiyo ngebo kan tenpu kumemdi, mutu-mutu yuma cap, nun tuai neng yuma cap, talepra kunkamserem’ tenen, moropkepe, 10 ‘Menmena yamemdi, nesala ban-ban yuma talepra kunkamserem’ tenen, moropkepe. Tonda kandi pepmempa, im deiki kunge neng pel doramengtopu, nun tuai neng peda, ‘Kan tenesememtopu, melimsemempa, kan pelpu donkamep’ tenen, moropkepe. ‘Kandi tenememtopu, im deiki cap, tuai mutu neitamai capda, kan tenememtopu kunkamre’ tenen, moropkepe.
11 ‘Atumi cap, tumi-tumi yuma cap, nun jen keca putaseretopu, makupra karesemempa, dopra jenkamep’ tenen, moropkepe. 12 Yuk nengdi nun tep mali kweipsengepa, nundi kaukemameptopu, ‘Kandi nun mali kupe keca tep, ‘Kau kemsememdi gum kupra derinkamserem’ tenen, moropkepe. 13 ‘Mali kupkameng do?’ tenen, ‘Ila di kurpeten ikin kecada, pio men karenkamserem’ tenen, moropkepe. Ange gum dinin, tonda, Pio Mali Kun Keca Deiyo Ngebo, Kain Jen Ngebodi nun tep, mali kweipserepa nun mali kupnup’ tenen, moropkepe. Ada, ‘Kandi kalekra disememdi makunkamserem’ tenen, moropkepe.

Yesusdi, “Ange upepra Allah moronkamrume,” pepu dingeda, er upu gekenmai neng tep pepu.

14 “Apepmasen upuda, tali tep men pepsene. Deiyoda, yuk nengdi sun tep, mali kupsenge pangeda, kaukepmumdi, ange ton cap men tenepmum pangeda, sun nai Allah im deiki kurur ngebodi, sun mali kurumu keca tep, utopu kaukepseredi, sun mali kun keca gum kupra deipseryopda, akeca tep tupa tenepra, men wenemkamsere. 15 Dinino, yuk nengdi sun tep, mali kupsengepa, men kaukepmumdi, tupa tenenapu kumum pangeda, sun nai Allah er peda, sun mali kurumu keca tep, kaukemna gum di, amali kun keca tep, tupa tenenapu kurura cadi, tek sisi wenepkamsere,” Yesusdi pepu.

Yesusdi, “Allah er gispal dona tep, jen jena gum di, si tepra kunkamrume,” pepu upu

16 Yesusdi pepu. “Sun dipruai mali keca tupa akapseupapu, ‘Nimidi epkamseng’ tenen, nong bol deikingepu telep kupra kurameng neng utopu men kunkamrume. Sun anengda, Allah gispal dona tep, jen jena gum, si tepra kunge taruda, ‘Yuk neng epsengedi, anengda pio mambul neng tenenkamseng’ tenen, sun aso melmel gapra engepmanto kununge. Tonda, ‘Yuk neng epsengedi, uo Allah tep jen jena gum di, talipu kunmange, tenepkamsenge’ tenen, potong wena cap, me gengna cap, gum dipapu, mali-malipu kungedi katuai embanunge. Anengda, yuk nesala epmengedi, sun tep, ‘Uo, sunda mambule,’ tenerameng keca konum dopropmanga cadi, amenda taru Allahdi sun aneng tep, yuk menenga keca ton, sun tep tapakra men karepkamre.

17 Anengda ukunung dinino, ne nyapu sunda ange utopu men kunkamrume. Allah gispal dona tep, jen jena gum, si tepra kunkamrum taru yumada, sun nong cap, sun aso cap yumada, me gekrapmumdi, potong wepra tali kange doupra, nong yuma telep kupra kumumdi, yang-yang pepra, pingping kange doupra kunkamrume. ^{▼▼sun urasinda pio telep kupra kunkamrume – Yesusdi aupu pepka deiyoda ake. Sun Yahudi yala nengdi, Allah gispal dona tep, jen jena gum di, si tepra kurami taruda, ‘Nesala yuma epsengedi, mambul neng tenepkamseng’ tenen, sikke dopra sun giso deiki deriramidi, katuaipu embarami. Atep, “Ukunada meme. Ada pio mali kuna tepa,” Yesusdi pepu.} 18 Akunkamruma yumada, yuk neng epsengedi, ‘Allah tep jen jena gum di, si tepra kunmange, men tenepkamseng’ tenen, pepsene. Sun nai Allah nimi asuru di men dinung ngebo, er dipapu, sun inipra kumum keca yuma, epra kael kemrur ngebo cadi, er gispal dona tep jen jena gum di, si tepra kumum pangeda, kael kepseredi, er keteneipseu keca karenkamsere.” Yesusdi pepu.

Yesusdi mambul keca bupra derina tep, pepu upu

(Lukas 11:34-36)

19 Yesusdi upepu dingeda, aupu ton pepu. “Sun mambul kecada, tuai ngepu bulupra, mawa men derinkamrume. Tuai mutu di mambul tenepra mawa derimum keca yumada, sisilya kuna cap, sinedi jena cap, nimidi ati buplan pakra wekmengedi, upula dorona cap deiki di, mali-mali kurure. Atep, tuai mambul keca yumada, gum kunkamsere. 20 Tuainge tep mambul keca tenepra mawa men derinkamrum dinino, mambul kecada im deikingepu mawa derinkamrume. ^{▼▼Im deiki mambul keca pepu ngeda, Allahdi ‘Ukunkamrume’ pesere keca yuma gekepra kupmepyopda, menenga keca karenkamsera tep pepu.} Im deikida, sisilya kuna cap, sinedi jena cap deiki di, amambul keca mali men kupsetue. Tonda amambul keca im deiki ngeda, nimidi akati buplan pakra yana men dopropsetenge. Atep, im deiki mambul keca yumada, men gum kupsetue. Atep sun ila mambul keca puda, im deikingepu mawa derinkamrume. 21 Apepmasen upuda, tali tep men pepsene. Deiyoda, sun mambul keca mawa derirumaida, sun kange cap, dipru cap, acapu kunkamsere. Angepu tupa-tupa tenenkamrume. Atep im deikingepu mawa derinkamrume.

Sun weica dirinda asurupu kurure pepu upu

22 Sun nong upna utopu kecada, sun asuru kapseu. Asuru telep kupsetuopda, bisi telepngepu epra embetume. Dinino, asuru pupseredi mali kupseryopda, komdamumdi, mali bisipu embankamrume. Ange utopu, sun kange dipru yumadi, sun pe keca cap, mali kun keca cap, angepu tenepra kumumyopda, amenda kupbankamrum keca yumada, malipu kunkamsere. 23 Sun asuru neitamai dirine men kupsetuopda, kunungna bisipu betume. Ange utopu, sun kange dipru neitamai di, sun pe kun keca tepapu tenepmumdi, mali kecapu tupa kapsere pangeda, sun pio malipu kunkamrume. Sun dipru cap, sun kange dipu tenepra kumum keca cap deiki di, pio kunungnai utopu kunkamrume. Telep kun keca, tenpunge peda, ton pio men kunkamrume.” Yesusdi pepu.

“Allah cap tali tuai keca cap men taleptume,” pepu upu

24 Upepudi, aupu ton pepu. “Ware neng do yuma, sun deiyo neng butene neng tep, dipru kareprepa, ton ngebo pel dopmana, ton ngebo pel dopmana, men kuptenge. Tenpu pel don ngebodi, er deiyo neng butene neng kuretenge pangeda, tenpu ngebodi abutene neng tep, pel men doptue. Er deiyo neng butene neng tep, dipru karepra, sun butene neng tep, pel telep kupra men doptue. Ato pel don nengda, ton deiyo ngebo tep, dipru karepredi, ton deiyo ngebo tep, song tenepra kunkamenge. Tonda, er deiyo neng butene kurengepa, ton deiyo ngebo tep, kange deipredi pel donkamre. Ton deiyo ngebo tep, song tenepredi, dabal kuprepa, tamkamre. Ton ngeboda, tapkamre, ton ngeboda, pio talenkamre. Aupu pepmasentopu, co bo do, tali tuai keca yuma do, Allah cap, yuk tali keca yuma cap tep, ‘Angeda mambule’ tenen, kikiman talepra men pel doptume. Ila mambul keca tenpungepu wepra talenkamrume,” Yesusdi pepu.

Yesusdi kange mun kuna tep, pepu upu

(Lukas 12:22-31)

25 Yesusdi aupu pepu, “Sun putasere keca yuma tep, ‘Uo ware kuptepe do?’ tenen, kange mun kuna gume. Sun jen keca cap, opkal capda, yambul mambul dinin, sun nong cap, sun gam kuna capda, ila mambul cadi, Allahdi sun putasere keca tep makunkamsere. Ange tep nengeda, ‘Uo, nun me cap, jen keca capda, ware kupra jenkamep do? Nun opkalda, wareto opkal kenengkamep do?’ tenen, kange mun kange doupra men kunkamrume. 26 Sun ma embanunga yuma tep tenimkamrume. Mada, yal keca kouna cap, nong kina cap, jen keca mawa derina cap, pio men kunung dinin, sun nai Allahdi ama sun jen keca tupa karerepa, jenunge. Mada, yambul mambul dinin, nesala yumada ila mambul cadi, Allahdi sun tep, sun putare keca yuma makupra karenkamsere. Ange yumada, men tenepmarumdi, men kael kepmarum do?

27 Sun awekmarum neng neitamaida, ware ngebo teneptudi er kange mun kuptua deiki di, ue tenpu taru ton cap tapaktudi gam kuptu do? Ada men kupmanto. 28 Sunda ‘Ware kun opkal kenengkamep’ tenen, kange mun kupmaserepa, tenimtonmarum do? Ware deiyo keca tep kange mun kange doupra kuserur do? Moupra tenenkamrume. Ada, mutmuta kankan bongopredi, paramre kait kecada, urasin pio telep kurur dinin, akecada pel dona cap, opkal wina cap, men kurure. 29 Akeca di pel men dorur dinin, ila nimi deiyo ngebo Raja Salomo kenengamu opkalda, urasin yambul telep dinin, atali kait keca er urasinda, pio telepe. Tali paramre mutmuta neitamai di kait kecada, atumi di popmaryanen, keteng dopredi kouluprepa, uku dongonunge.

30 Dinino, Allahdi akait keca er urasin pio telep kupra ketekemdirure. Atep, akecada mambul gum keca dinin, sun tuai nesalada, ila mambul nesala kuruma tep, Allahdi sun opkal putaserenge peda, makupra karenkamsere. Dinino, sundi Allah tep, ila di teka men tenerume. Sundi, ‘Nun putasere kecada, Allahdi karenkamsere,’ tenen, teka tenerum ngeda, metekpu kuserure. 31 Sun pio men tenimtonkamrume. Tek sisi Allahdi makunkamsera cadi, sun ikin kupsere keca tep, ‘Uo, ware kupra jen keca cap, me cap, jenkamep do? Tonda, ware opkal kenengkamep do?’ tenen, kange mun men kunkamsere. Atuai keca tep ila putaserepa, sun dipru cap, kange cap, akeca deikipu men derinkamrume.

32 Tuai mutu neitamai kurepa, nimidi ‘Akeca talepra kutepe’ tenen, putare keca yumada, Allah teka tenena gum nesaladi, ‘Akecapu doproptepe,’ tenepra kununge. Ukunung dinino, sunda ne tep teka tenenerum nesala, sun putasere keca yumada, sun nai Allahdi konum teneseredi melipra karenkamsera tep, sunda kange mun kange doupra men kunkamrume. 33 Akecapu tenepra men kunkamrum dinin, ila mambul ngeda, Allahdi ‘Ukunkamenge,’ tenepra peseretopu, dumsisi kuna cap, lyepseredi nun dipru talepra kunkamserenge cap, im deiki welepkamrumnge cap, akecapu menmena tenepmumdi, pio moupra talepmum pangeda, yuk keca yala-yala yuma pape, erdi karenkamsere. 34 Ange tep nengeda, ‘Ambutumida ware kupkamep do?’ tenen, kange mun kuna gume. Ambutumi kupkamar kecada, ambutumi dipu tenepkamarume. Tumi-tumi yuma kange mun kusere kecada, konum akunkamrura cadi, yuk tumi ngeda, akunmarum tumi neitamai tapakra tenena gume.” Yesusdi pepu.