Mat 8 | XteSC | STEP | Yesusdi aupu-aupu yuma peteremauanen, konum gawal daku dingeda, amutu buma deiki di kwerepu. Kwerenmau taruda, nimi weike amenda melipra yakanmai.

Matthew 8

Yesusdi kot susu utopu susu jeramu ngebo kwetepu upu

(Markus 1:40-44; Lukas 5:12-14)

1 Yesusdi aupu-aupu yuma peteremauanen, konum gawal daku dingeda, amutu buma deiki di kwerepu. Kwerenmau taruda, nimi weike amenda melipra yakanmai. 2 Anesala yuma kwereyakanmaipane, kot susu utopu susu, nong bol yuma jeramu ngebo, tenpu akunmaua di, Yesus epudi Yesus damai yau. Yau dingeda, Yesus gispal dona tep, gutam tu dipdongopra yana buku. Yana bukudi, Yesus tep moropu. “Naio, kandi kange deipnetumdi, ‘Angebo kwetepkune,’ tenepnetumopda, ne kot susu adipapu kwetepnetume. ‘Kwetepnetum’ tenen, moropmakene,” pepra moropu. 3 Kot susu jeramu ngebodi moropu pangeda, Yesus er buru angebo deiki deipudi aupu pepu. “Nedi kan tep kange deipra kwetepkukene. Ukutaru, kan susu telep kupra konum kweteipkene,” pepu. Upepu pangeda, adipapu angebo er kot susu utopu susu jeramnga yumada, gum kupupa, telep kupu.

4 Gum kupupa, Yesusdi angebo tep pepu. “Kan susu kweteipmakenpa, kaikmaker ngeda, yuk neng tep, men lap perbenkurume. Men lap penkurum dinin, kan nong kweteipmaken nge dipterepkamkera tep, Yahudi yala neng, Allah er si eremna ati pumbon pel dona deiyo ngebo damai bena, lap pepmemdi, er dina tep, kan nong benbeneprume. Tonda, Musadi upepra sekeiamu. ‘Pu jeramne nesala, pu dimpepyopda, Allah gispal dona tep, gam kuramre keca popra karerbankamrume,’ (Imamat 14:1-32)

peiamupa karerbaramengtopu, kan peda akeca ketenepra karerbenkurume. Ada, yuk nesala epmengedi, ‘Allahdi angebo konum kwetepmamere tenepkamkeng’ tenen, pepmakene,” Yesusdi pepu.

Jen talen neng sun deiyo ngebo, er pel don ngebo tep, Yesusdi kwetepu upu

(Lukas 7:1-10)

5 Yesus amutu di tapra banmauanen, Kapernaum mutu beu pangeda, jen talen neng sun deiyo ngebodi, ‘Ne pel melimna ngebo, Yesusdi kwetepnetue’ tenen, Yesus damai yana moropudi aupu pepu.

6 “Naio, ne ati pel don ngeboda, ila pu jeredi, er nong yuma meiyal sepupa, ila di donmarpa, ne ati tapra yanmane,” pepu. 7 Upepra moropu pangeda, Yesusdi tamupra pepu. “Kan ati benedi, kan pel dona ngebo kweteipkune,” pepu. 8 Yesus upepupa, ajen talena deiyo ngebodi tamupra pepu. “Naio, neda, mambul gum ngebo cadi, kanda ila telep ngebo kuruma tep, ne ati bena men wekamrume. Kan atekmaremai dipu, kan upu pepmemnya deiki di, ne pel don ngeboda, pu gum kupredi telep kupkamare.

9 Angeda, ne kaele. Tali tep men pepkene. Neda, ne deiyo nengdi pepnengepa, sun pepnengetopu, adipapu pel donune. Tonda, ne peda, ne amutara jen talen neng tep, nedi, ‘Ukupso,’ pepra upu peipnepa, gekepmengedi, adipapu apelpu donunge. Tenpu ngebo tep, nedi, ‘Berume’ pepne pangeda, ne upu gekepra barure. Angetopu, ton ngebo tep ‘Yarume,’ pepnepa, yakarure. Tonda, ne pel don ngebo ^{▼▼pel don ngebo – Co bo deiki kunumami nesalada, isomka nengdi, pio kankan kunge nesala tep, co bo deiki di kunuamipa, akankan kunge nesaladi sun isomka nesala tep, sun pel talipu pel dorami. Tonda, lap pena upuda, nomor 36 dirume.} tep, ‘Apel dopneo,’ pepnepa, apelpu donerure. Atep nengeda, kanda ila puto ngebo kuruma cadi, upupu peptumpa, ne pel melipra don ngeboda, telep kuptue.” Jen talena deiyo ngebodi Yesus tep upepra moropu.

10 Ajen talena deiyo ngebodi aupu pepu pangeda, Yesus gekepudi, uo tenepra lolopu. Lolopudi, er melipra yakanmai neng tep, aupu pepu. “Ne tek sisi pepsene, Israel mutu neitamai embaramsi taru yumada, angeboda Yahudi yala gum ngebo dinin, erda pio ila di teka tenepmanertopu, autopunge, yuk nengdi ton apepmar upu utopunge ton pepnepa, pio men diramsi. 11 Sirya taru, Allahdi tuai mutu ban-ban yuma neitamai, nesala weik lyepredi, sun dipru talenkamraida, nesala weike bulupra wengkamenge. Keteng yakan tara cap, keteng dangban tara cap, dana-dana tara yuma, Yahudi yala gum nesala weike bulupra, nun Yahudi yala neng, nun apu yapu ^{▼▼Yahudi yala neng, sun apu yapu – Lap pena upu nomor 20 dirume.} cap, ada Abraham cap, Isak cap, Yakub cap, yana bukmengepa, Allahdi ila kailya kalepra deiprepa, tonpa kikiman jenkamepe.

12 Anesala yumada, Allahdi er kailya jena tep, ketenepra deipseuai, apu yana bukmengedi jenkameng dinin, Allahdi, ‘Ne mawa nesala kunkamenge’ tenen, men di wepra deiamu Yahudi yala nesalada, ne tep teka men tenenenunga tep, sunda men wekamenge. Allahdi anesala dopra, bura tara kunungna neitamai donokrepa, anesalada kange mun kange doupra, ila di ngolongamengedi, engenkamenge,” Yesusdi er upu gekenmai neng yuma tep pepu.

13 Upepu dingeda, er tep moropmau jen talena deiyo ngebo, er damai aupu pepu. “Kao, tamupra kan pe ati dabeo. Teka tenepmaneremdi, moropmanerema utopu melipmakena tep, atumi di apepmarema utopu kupkukere,” pepu. Upepu pangeda, aketeng deiki dipapu, jen talena deiyo ngebo, er pel don ngebo pu jeramudi, meiyal semu ngeda, gum kupudi telep kupu.

Yesusdi pu jeramu nesala weike kwetepu upu

(Markus 1:29-34; Lukas 4:38-41)

14 Yesusdi upepu dingeda, banmauanen, Peterus ati bena weku. Akati wekudi, Peterus er yamal ner ila nong bupu pu jenmaupa, mapmaua epu. 15 Epudi, aner er buru deiki Yesus buru deipupa, ila nong bupu pu jenmauada, adipapu gum kupu. Pu gum kupupa, aner amapmauai di bukrouopda, Yesus cap, er melimna neng cap, sun jen keca keteneipu. 16 Sun akunmaipane, ipu pangeda, yuk nengdi isok taleamu nesala cap, pu yala-yala yuma jeramu nesala cap, weika di doupra, Yesus er damai duyai. Duyaipa, Yesusdi upu tenpu pepka deiki dipapu, apu jen nesala taleami isok yuma enepupa bendopi. Tonda, pu jeramu nesala yuma kwetepupa, pu jeramunge yumada gum kupu. 17 Yesusdi, apel dopunge yumada, ‘Allah upu lap peramu ngebo, nabi Yesayadi peramutopu kupkure’ tenen, kupu. Nabi Yesayadi jenek pepra sekeiamu upuda ake.
‘Nun Lyemna Deiyo Ngebodi nun pu jeramseunge yumada, gum kupra deipseue.’ (Yesaya 53:4)

‘Yesus cap benkamepe,’ tenepi neng tep pepu upu

(Lukas 9:57-60)

18 Nesala pio weik Yesus damai bulupra yai pangeda, Yesus epudi er nyapu tep, aupu pepu. “Nunda, gapung co deiki bukrapmepedi, Galilea mokon deiki di ortara benkamape,” pepu. 19 ‘Gapung co wekup’ tenen, tupa banmai taruda, Allahdi, ‘Angeda ukunkamrume, angeda men kunkamrume,’ peiamupa, Musadi sekeipu upu talepra peteremna deiyo ngebo, tenpu ngebodi, Yesus damai yaudi aupu pepu. “Naio, kan embankamrem mutu yumada, ne cap kikiman embankamneme,” pepu. 20 Upepupa, Yesusdi angebo tep tamupra pepu. “Kapang cap, yuk tali bura tara kuramre keca yumada, tu kumupra ati dopmengedi kununge. Utopu, ma yala yumada, sun atida, co balu dopra kununge. Tonda co teru deiki manunge. Kapang er atida, co peia pumbon ton marure. Kapang cap, ma cap, sun ati akwapmar dinin, neda Nimi Mi Sisa Utopu Ngeboda, ^{▼▼Nimi Mi Sisa Utopu Ngebo – Yesusda, Allah er Mi Sisa kuramu dinin, er tuai mutu yau taruda, nimi urasin utopu daudi, er kange tenena cap, er nong cap, er putaramu keca cap ayumada, nun kurameptopu kuramu, dinino, mali keca tenpu peda men kuramu. Ukupra kuramunge tep nengeda, Nimi Mi Sisa Utopu Ngebo, penupe. Yesus er pedi, er pe teppu, “Neda, Nimi Mi Sisa Utopu Ngebo kunune,” peramu (Lukas 18:31). Erda, nimi tuai nesala yuma tep, nimi Lyemna Deiyo Ngebo kurura tep, aupu pepdau. Tonda lap pena upu nomor 22 dirume.} ne peda ne man ati ton pio men kapneu,” Yesusdi pepu. “Ne tep domyanememnyopda, ikin kupkamkera tep, ange tenena gum dipapu yankamrem do, tapkamrem do?” Yesusdi Musa sekeiamseu upu talepra peteremna deiyo ngebo tep pepu.

21 Yesus banmau taruda, Yesus er cap kikiman embaramu ngebo tenpu yaudi pepu. “Naio, amendada, kan cap, benkamanem dinin, ne nai sisa depmanera tep, ‘Telepe dabeo,’ pepnemempa, ne nai peirbenkune,” pepu. 22 Angeboda, upepra asipetepu dinin, Yesusdi tamupra pepu. “Gume, adipapu kan melipnemempa, benkuneme. Teka tenena gum nesalada, konum derami neng utopu nesala kununga cadi, sun pedipapu depmange nesala peinkamenge,” pepu.

Yesusdi ila mungna gum kupra deipu upu

(Markus 4:36-41; Lukas 8:22-25)

23 Yesusdi aupu pepupa, sun banmaiyanen, Galilea mokon pirman bei dingeda, Yesus cap, er upu gekepra melipra embarami neng cap, gapung co deiki wekra bungbei. 24 Mokon deiki banmaipane, ila mungna dato-dato di mukupa, me longteng-longteng penmaudi, gapung co pumbon me wekudi, mokon deipu. Sun gapung co dopra mokon pumbon wekronmanto kunmau. Ange yuma ukunmau taruda, Yesus mapnapu kupmau. 25 Ukupra mapmaupa, Yesus er melimna nengdi er mapmauai beidi, “Nun naio, nun mokon jepmanto kunmasera tep, kan menmena bukra upu sekmemdi, nun tep lyepseo,” pepra moropi.

26 Upepipa, Yesusdi tamupra pepu. “Sun warya tep kwar danmarum do? Ne tep meteka dipu teka tenepmaneruma deiki di kunmarume,” pepu. Yesus upepu dingeda, bukra amungna mungmaua cap, mokon longteng-longteng penmaua cap tep, “Dim pepo,” pepra upu seku. Upu seku pangeda, ataru dipapu amokon longteng-longteng penmaunge cap, ila mungna mungmaua cap, adipapu dimpepudi, telep kupu. 27 Ukupupa, Yesus er melimna nengdi, akupunge epidi, sun kwar weik kupupa, asimdanmaidi lolomai. “Uo, Yesusda, wareto ngebo kurur do? Ila mungna pe, mokon longteng-longteng penmaunge yuma peda, er upu pepupa, er penmaua utopu gekepra dimpepmare,” pepi.

Yesusdi isok wekami neng butene kwetepu upu

(Markus 5:1-17; Lukas 8:26-37)

28 Ila mungna konum dimpepu pangeda, mokon deikipu banmaiyanen, Galilea mokon ortara, mutu si Gerasa mutu bei. Uda, Gerasa mutu neitamaida, isok taleamidi, sun nong neitamai wekami neng butene, nimi peirami gel imir neitamai kuramrei. Sun butene nimi peirami gel imir damaipu kuramrei taruda, isokdi sun nong neitamai wekamya deiki di, abutene neng yu weik kuramreiya cadi, yuk nengdi amutu neitamai men embarami. Yesus cap, er nyapu cap, Gerasa mutu konum bei pangeda, Yesusda, gapung co deiki di tuai kwerepra tengbeu. Tengbeu pangeda, isok taleamidi, sun nong pumbon wekami neng butene, nimi peirami gel imir neitamai di guprapreidi, Yesus damai yarei. 29 Sun abutene neng Yesus damai yarei dingeda, Yesus tep upeprei. “Kanda, Allah er Mi Sisa kurume. Kanda nun ware kupkuserema tep, yanmaserem do? ‘Allahdi isok yuma popra gawal dakamne,’ tenepu taru kapul men kupmaser dinin, kandi, ‘Sun popkaman’ tenen, yanmaserem do?” pepra, isok wekami neng butene di Yesus tep, asipeteprei.

30 Yesus tep aupu penmarei taruda, nimidi peirami bisam, gung pio weik amutu ase tarampu dinin, yambul karenai tu jenmai. 31 Bisam amutu neitamai tu jepra akunmaiya tep, aisok-isok gung yumadi Yesus tep, moronmai. “Kandi enepra dokotepsemempa, akunmang bisam nong pumbon wektepe do?” pepra moronmai. 32 Moronmaipane, Yesusdi, “Telepe, angebo er dipru neitamai wekamrumai di gupra bura beso,” pepupnen, adipapu isok wekami neng butene sun dipruai di, isok yuma guprapidi, ormutu kunmai bisam nong pumbon wengbei. Wengbei pangeda, abisam denge weike, amutu asai di sepra kwererbanmaidi, mokon pumbon wengdongonmai. Wekroi pangeda, abisam yuma mokon jepupa, depropi.

33 Abisam peinmai nesaladi, akupmaunge yuma cap, aneng butene sun nong neitamai isok wekamipane, Yesusdi kweteipunge cap yuma epidi, akupmaunge tep, nimi ati arum domyai neitamai lap pepembanmaipa, nimi weik gekepidi, ‘Yesus cap, akupmaunge cap, epkamep’ tenen, Yesus damai diryai. 34 Akati arum dopra kuramyai kurami nesala yuma, Yesus damai diryaidi, akupunge yuma cap, Yesus cap epidi, kware kupupa, ‘Yesusda, nun mutu yuma tapra, yukai bendoptue’ tenen, Yesus tep moropi.