Mat 9 | XteSC | STEP | Sun yuma dakuramyanen, Yesusdi, ‘Ne pe mutu tamupra benkune’ tenen, gapung co deiki wekrap, mokon deiki di ortara banmauanen, ormutu beudi, Kapernaum mutu ati arum domyai beu pangeda, amutu neitamai kurami nesaladi gekepi.

Matthew 9

Yesusdi nong yuma meiyal semu ngebo kwetepu upu

(Markus 2:3-12; Lukas 5:18-26)

1 Sun yuma dakuramyanen, Yesusdi, ‘Ne pe mutu tamupra benkune’ tenen, gapung co deiki wekrap, mokon deiki di ortara banmauanen, ormutu beudi, Kapernaum mutu ati arum domyai beu pangeda, amutu neitamai kurami nesaladi gekepi. 2 Yesus er wekra bungbeu ati kunmaudi peterenmau taruda, nong yuma meiyal semu men embanmanto ngebo tenpu, dumbari nengdi pela co deiki di, baya duyai. Duyaipa, sunda, ‘Yesusdi angebo kweteptue’ tenen, duyanmanga deiki di, Yesusda, ‘Ne tep tek sisi teka tenepmanenge’ tenen, kael kepudi, angebo kapul men kweteipmau taru di, ameiyal semu ngebo tep pepu. “Ne mio, kan mali tenemem keca cap, mali kumem keca cap, gum kupra deipmakendi, kaukepmakene,” pepu.

3 Yesusdi aupu penmau taruda, Musa sekeiamu upu peteremna deiyo neng ton, abuka gekenmaidi, sun kange neitamai di tenenmai. ‘Angebodi aupu penmarada, warya tep do? Yesus aupu penmara deiki di, Allah er si yanipmare. Ada, Yesusdi, ‘Kan mali kumem keca kaukepkene,’ pepmaua deiki di, ada ‘Ne Allah utopu ngebo kunune,’ pepmaua tep, erda tek sisi mali penmare. Nun kaele, ‘Allah er dipapu nun mali kupe keca gum kupra deriserura tep, ware ngebodi ton cap apel doptu do?’ tenepi.

4 Sun dipru neitamai yuma tenepi ngeda, Yesus er kange neitamai konum tenepudi kael kepka tep, erdi Musa sekeiamu upu peteremna deiyo neng tep pepu. “Sun kange dipru neitamai mali tenepmarumada, warya tep do? 5 Ameiyal semupa, men benmanto kamu ngeboda, nedi kanam dipapu tep, ‘Kan mali kumem keca yuma gum kupra deipkene,’ tali peptaptene do? Gum dingeda, tali kanam dipu, ‘Tekromemdi, kan ason dopra benkurume,’ tali peptaptene do? 6 Dinino, neda Nimi Mi Sisa Utopu Ngebo, ne puto deiki di, ‘Tuai nesala sun mali kuramenge keca yuma, gum kupra deipsetue,’ tenen, kael kepmaneruma tep, ameiyal semu ngeboda, adipapu kwetepkune,” Yesusdi pepu. Upepudi, meiyal seamupa, men benmanto ngebo tep aupu pepu. “Kanda, tekromemdi kan ason dopra, kan ati tamupra berume pepkene,” pepu.

7 Upepu pangeda, adipapu meiyal seamupa, men embenmanto kuramu ngebo telep kupupa, sun adinmaipapu, akati pumbon di tekrapudi, er ason doprapudi, bura bena, er pe ati tamupra beu. 8 Beupa, awekmai neng yuma, Yesus ukupunge epya deiki di, ‘Uo, angeboda, Allahdi er puto pio weik karepka deiki di pel dopmarpa, kael kepmap adano,’ tenepra lolomaidi, Allah er sipu eremai.

Yesusdi Matius dopropu upu

(Markus 2:14-17; Lukas 5:27-32)

9 Yesus amutu tapu di, yuk mutu banmau. Banmauanen, tenpu ngebo, er sida Matius kuramu. Matiusda, Roma mutu nengdi amutu yuma taleramya tep, amutu kurami nengdi, sun pajak co bo, Roma mutu ila nimi deiyo neng tep, bulupra karerami ngebo kuramu. Matiusdi, Roma mutu deiyo neng karena tep, ‘Apajak co bo bulupra deipkamne’ tenen, deiamu ati pumbon bukmaupane, Yesus yaudi yana epu. Epudi, Matius tep, “Kanda ne melipra domyaneo,” pepupa, Matius adipapu er bukmau ati tapra tekrapudi, Yesus melipra dombeu. 10 Banmareiyanen, Matius er ati sisa bena wekrorei taruda, sun cap, Yesus erdi dopropupa, er melipra embarami neng cap, tonda amutu nengdi, Roma mutu deiyo neng tep, pajak co bo bulupra karerami neng weik cap, akati bulupra weki. Tonda, yuk neng cap weika di kikiman jen jenmai. Sun Yahudi yala peteremna deiyo nengdi, atali nesala tep, ‘Sunda mali kunung neng,’ tenerami. ^{▼▼mali neng – Sun Yahudi yala peteremna deiyo nengdi, sun pedi sun pe tepapu utenerami. ‘Nunda, dumsisi telep neng kunupe. Yuk nesala yumada, mali kun nesalapu kununge,’ teneramidi, sun pe dipru eremdarami.}

11 Jen jenmaipane, sun Farisi nengda, Roma mutu deiyo neng karena tep, pajak co bo bulupra derina deiyo neng cap, yuk neng capdi, ada, ‘Sunda mali-mali kunge nesala,’ tenerami neng cap, Yesus cap, kikiman jen jenmaipa, sun Farisi nengdi epi. Epi dingeda, sundi Yesus er melimna neng tep asipetepi. “Sun peteremna deiyo ngebo Yesusda, telep ngebo kurur dinin, pajak co bo bulupra deringepa, talepra kungedi, sunda upula doronung neng kununga cadi, aneng cap, yuk mali-mali keca kunge neng cap, warya tep kikiman jen jenmang do? Sun cap jen jenmara deiki di, malipu kunmare,” pepra wenepi. 12 Upepra wenepipa, Yesusdi aupu gekepudi, aneng tep domon upu pepu.

Nimi ton pu jenmar dinin, ange moupra tenena gum nengda, ‘Nimi kwetena ngebo dokter dan do? Er damai bepepa kweteipkusere’ tenen, putaprepa men erbanunge. Ange utopu gum dinin, yuk pu jenmare nesaladi, ‘Uo, pu jenmasere’ tenen, moupra tenengedi, ‘Kwetena ngebo dokter damai bepepa kweteipkusere’ tenen, putaprepa erbanunge.

Angetopu, neda mali kun nesala telep kudina cap, lyemna cap tep yasi. Ange utopu, yambul telep kunung dinin, sun dipru neitamai mali kun keca akwamrepapu, ange tenena gum di, ‘Nunda telep neng kunupe,’ tenepra kunge nesala tep, ‘Epra lyepkamne’ tenen, men yasi. Atep adomon upu pepsene. Pu jena gum nengda, dokter kwetena ngebo men putarure. Agum dinin, pu jena nesalada, dokter kwetena ngebo tep putarure. ^{▼▼pu jena neng – Yesusdi aupu pepka deiyoda ake. Ada mali kunung dinin, ange tenena gum dipapu, ‘Nunda telep nengpu,’ tenenge nesalada, ‘Yesusdi lyepsetue’ men tenenunge. Dinino, ‘Uo, nunda tek sisi mali kunupe,’ tenen, putarepa, Yesus tep enunge.} 13 Ange tep nengeda, ne pepkusen upuda, sun pe ati tamupra bemumdi, ‘Deiyo ake’ tenen, pio teneprumdi, kael kemkamrume. Ada, Allah upu lap peramu ngebo, nabi Hoseadi sekeiamu upu peseretopu,
‘Allah er kangeda, Allah karena tep, gam keca popra kareramenge ngeda, er putana gume. Ila mambul ngeda, yuk nesala yuma tep bicau tenepra makudanada, ila telepe tenerure.’ (Hosea 6:6)

Allahdi peipupa, Hosea sekeiamu upu tep pepsene. Ange utopu, yambul telep kunung dinin, sun mali kuramenge keca akamrepapu, ange tenena gum di, ‘Nunda telep nengpu kunupe,’ tenedanung nesala tep, ‘Anesala dopra lyepkamne’ tenen, men yasi. Sun mali kuramenge dinin, dipru neitamaida, ‘Uo, nunda mali nengpu kunupe,’ tenengedi, mali kange doupra kunge nesalada, ‘Sun mali kuramenge keca tapmengopda, anesala dopra, lyepkamne’ tenen, ne yasi. Yesusdi sun Farisi neng tep pepu.

Yesusdi jen jena gum, si tepra Allah morona tep pepu upu

(Markus 2:18-22; Lukas 5:33-39)

14 Yohanes Pembaptis erdi peteremamu upu gekeramidi, er cap melipra embarami neng cap, sun Farisi neng capdi, sun mali kuramne keca tep, ‘Allah moropkup’ tenen, jen jena gum di, si tepra jen bulungapu kuramidi, Allah moronmai. Sun ukupra moronmaiya tep, ataruda, Yohanes Pembaptis, er upu gekepra embarami neng yuma, Yesus damai yaidi asipetepi. “Nun cap, sun Farisi neng cap, nun yumadi, ‘Nun mali kupe keca gum kupra deipkuser’ tenen, jen jena gum di, si tepra jen bulungapu kupedi, Allah moronupe. Nunda ukunup dinin, kan nyapuda, warya tep nun akunup utopu men kunung do?” pepra asipetepi.

15 Asipetepi pangeda, Yesusdi aneng tep domona upu di tamupra pepu. “Nimi ton ner dopkure taruda, er cap, er kayapu neng cap, er melimna neng capda, kikiman tupa kunge taruda, kange deipdangedi men kunung do? Tonda, kalemna keca kalepra kikiman men jenung do? Ikin kange doupra, engenapu kunung do? Gume, sun kabo er ner don taruda, kange deipmanunga cadi, pio teleppu kange deipdangedi, kalepra kikiman jenunge. Ange utopu, neda ner don ngebo utopu kununa tep, ne nyapuda kange mun kurepa, jen jena gum di, si tepra men kununge. Jen bulungapu men kununge. Dinino, ne talepra gipdaro benkamneng taruda, sun ne nyapu kange ikin kuprepa, jen jena gum di, si tepra jen bulungapu kunkamenge,” Yesusdi ayana asimai neng tep pepu.

16 Aupu pepu taruda, Yesusdi, ‘Allah upu sekami ngeda teleppu kurure,’ tenepu dinin, ‘Sun Farisi neng cap, sun apu yapu Yahudi yala deiyo neng capdi, sun pedi teneramingepu tali tapakra peteremami,’ tenepu. Sun ukupra tupa peteremenge mem kecada, ‘E, ada mali keca peteremsenunge, tenepkameng’ tenen, peterepu. Ada, awekmai neng yuma tep, domon upu butene pepu. Tonda Yesusdi, ‘Ne peteremne keca cap, ne kune keca cap deiki di, kange tenena ukupunge kael kepkameng’ tenen, awekmai neng yuma tep, aupu butene pepu. Yesusdi pepu upuda ake.

“Ware ngebo do yuma, pumun opkal bon dakre pangeda, aopkal lepsikra wina tep, ukupu opkal gwelepmarepa, pumun opkal me men kuramenge opkalda, bon dakamyai deipmengedi, men winunge. Pumun opkal bon dakamyai, ukupu opkal palepra wiramtenge dinin, ‘Ukupu wipmenge nge er urasin yuk kurure. Pumun opkal, er urasin yuk kuprur’ tenen, ange men kununge.

Tonda, aopkal me kupmengedi, ketengai deipmengepa, konum kalapyopda, pumun opkal gwelerure. Deiyoda, ukupu opkal kalapredi, metek kupre pangeda, awiramengaida, weika di ton cap gwelenkamre. Ada, ukupu opkal di, pumun opkal bon dakamyai deipra wipmengepa ukurura tep, pumun opkal cap, ukupu opkal cap, wisipra winada mali. Ada, ‘Ukuprur’ tenen, men winunge.” Yesusdi pepu.

17 Aupu ton pepu. “Ange utopu ton, nesalada domba bol dopra, potong lyektapmengedi, dana-dana tara yuma wipmengopda, pumbonda anggur me gweprapmengedi, apumbon dikdongopra derinunge. Ukununga tep, nimidi purupra, ukupu gwerameng anggur meda, pumun domba bol pumbon dikdongopra men derinunge. Ukupu anggur me ^{▼▼Ukupu anggur me pepu ngeda, ada domon upu pepu. Aupu nongda ake. Ada Musadi sengamu upu yumada, telep upu kwamu dinin, Yesusdi peteremamu upu yumada, ukupu upu kuramu. Atep nengeda, Yesus er upu yuma, Musa sengamu upu yo punupu. Yesus er kangeda, ‘Nesala yumadi, Musa sengamu upu tupa akapmarepanen, ukutaruda, nimi lyemna tep nengeda, ne upupu tep teka tenepmengedi, angepu talepra dombankamenge,’ tenepudi, adomon upu peterepu.} gwepra pumun domba bol pumbon dikdongoptenge dinin, anggur me puto kupredi, domba bol bongopredi, me embarure. Bongopredi embaryopda, anggur me cap, domba bol cap, mali kupredi gum kurure. Angeda, ukupra men kunung dinino, anggur tapu du purupra, ukupu anggur me gweramenge ngeda, ukupu domba bol pumbonpu dikdongopra derinunge,” Yesusdi pepu.

Yesusdi pu jeramudi, yapi embaramu ner cap, depu ner mi cap, kwetepu upu

(Markus 5:22-43; Lukas 8:41-56)

18 Sun yuma Yesus cap akunmaipane, tenpu ngebo yau. Angeboda, Yahudi yala neng, Allah si eremami ati neitamaida, sun deiyo neng weik kurami dinin, er ton akuramu. Ukuramnga cadi, er yaudi, Yesus epu dingeda, ‘Yesus tep gispal dopkun’ tenen, Yesus yan damai gutam tu dipdongopra bukudi, Yesus tep weika di moronmau. “Ne ner mi konum depmaner dinin, kandi yana, er nong deiki kan buru deiptumdi kweteptumpa, aner mi gam bukamre,” pepra moronmau. 19 Moronmaupa, Yesus cap, er melimna neng cap, amoropmau ngebo cap, kikiman banmaidi, Yesus damai dana-dana yuma dekpepmaidi banmai.

20 Abanmai neng kan-kan neitamai di, pu jeramupa, keteng tamun 12 deiki di, er lang bon bisi yapi embaramu ner kikiman banmai. Yesus pel dopra kuramu keca gekepudi, ‘Yesusda nimi kwetena ngebo tek sisi kurure,’ tenepka tep, anerdi utenepu. 21 ‘Yesus er opkal tali beptenyopda, erdi kwetepnetue,’ tenepu. Utenepka tep, abanmai neng neitamai di, Yesus er amnyo tara tengyaudi, er deiki kepmau opkalda bepu. 22 ‘Yesus er opkal bepkun’ tenen, yanmaudi, Yesus er opkal bepmaupa, Yesusdi tamupra, ayanmau ner epu. Epudi aupu pepu. “Ne ka nero, kan teka tenepmanerema deiki di kwetepmakene. Kan kange mun kukere ngeda, konum kweteipmakena tep, telep dipu kange deipra benkurume,” pepu. Yesusdi upepu pangeda, ataru dipapu, aner er yapi embaramu ngeda, gum kupudi, telep kupu.

23 Sun yuma kange di banmaiyanen, er ner mi depmau ati pum konum beiyopda, akati dam kunmai neng, sun ila di engena cap, ila di ngolokra mali pena cap, ila upu pepra koudana cap, nimi depnepa perami bung-bung pena penmaidi, ukupra kunmainge yumada, Yesusdi epu. Eprapudi, Yesus akati wekroudi, amali pepra, koudanmai neng tep, pepu. 24 “Sun ila di ngolokra mali penmarumdi, koudanmarumada, warya tep do? Sunda, akati dam di tapra yukai beso. Aner mida men depmare. Tali mapmare,” pepu. Upepu dinin, akati wekra kunmai nengdi, aner mi konum depmauada, sun anesaladi konum kael kepmaiya cadi, anengdi Yesus tep autunmai.

25 Sun awekra autunmaidi engenmai neng yuma tep, Yesusdi bura tara enepra dokotepkopda, aner mi depmaupa deipmai ati pumbon weku. Yesus akati wekudi, aner mi buru talepupa, adipapu aner tekrapudi, akati pumbon neitamai embeu. 26 Aner akati pum tekra embeu pangeda, akati wekra engenmai neng yumadi, ila mambul kange doupra lolomaidi, amutu neitamai kurami neng, yuk neng tep aupu lap peramipa, nesala yumadi aupu weik gekerami.

Yesusdi asuru pun neng cap, upu lup ngebo cap tep, kwetepu upu

27 Aner mi konum gam bukra deipudi, amutu tapra, bisi neitamai banmauanen, asuru puamu neng butene, er amnyo tara tengyarei. Tengyareidi, ‘Nun kwetepsetu’ tenen, yana ila upu deiki di pepra moroprei. “Kanda Daud yala ngebodi deipkeupa kurum ngebo cadi, Nimi Lyemna tep, Allahdi wepra deipkeue. Atep kandi nun bicau tenepsememdi, kwetepsetume,” pepra moroprei. 28 Upepra moropbanmareipane, Yesus tenpu ati bena weku pangeda, sun abutene neng. Yesus er damai yarei. Yareipa, Yesusdi upepu. “Sundi, ‘Nun asuru kwetepsetume,’ pepmanerumada, ‘Er tek sisi kwetepsetue,’ tenepmanerumdi moropmanerum do?” pepra asipetepu.

Asipetepupa, sundi tamupra peprei. “Naio, nunda, ‘Tek sisi kwetepsetue,’ tenepmakenemudi, moropmanumu,” peprei. 29 Upepreipa, Yesus er buru di, aneng sun asuru deiki deipra talepudi, aupu pepu. “Sun teka tenepmaneruma utopu kupkusene,” pepupa, ataru dipapu, sun asuru puamngada, telep kupra deipu. 30 Telep kupupa Yesusdi, ‘Yuk neng gekepmengedi, kael kepnenung’ tenen, sun aneng tep upu moupra deipu. “Akwetepmasen ngeda, ‘Yuk nengdi ne tep kael kepnenung’ tenen, nedi kweteipmasen ngeda, pio lap men perbenkamrume,” pepu. 31 Yesusdi sun aneng tep upepu dinin, abutene nengdi, Yesus kwetepmaunge lap pepra embaramreipa, amutu neitamai kurami nesala yuma, weika di gekerami.

32 Asuru puamu neng butene, Yesusdi kwetepra deipupa, banmarei taruda, yuk nengdi, lup ngebo tenpu ton Yesus damai dopra duyai. Angeboda, isok er dipru neitamai wekra taleamnga deiki di, lup ngebo kuramu. 33 Angeboda, er dipru neitamaida, isokdi taleamupa, lup ngebo kuramu dinin, Yesusdi aisok enepkotepu taru dipapu, angebo er upu telep kupra penmau. Upu telep kupra penmaupa, abulupra weka gekenmai nengdi, ‘Uo’ tenen, lolomai. Lolomaidi, aupu penmai. “Pumun taru Israel mutu neitamaida, akupra keca ton men kuramupa, nun pio men diramepu,” pepi. 34 Anengdi upepi dinin, sun Farisi nengdi, “Gume, Yesusdi aisok enemrur deiyoda, isok-isok yuma, sun deiyo ngebo cadi, Kain Jen Ngebo, erdi peprepa, Kain Jen Ngebo er puto deiki di, upu peprepa isok yuma er upu gekepra banunge,” pepi.

Yesusdi, “Allah er pel don neng metekpu kununge,” pepu upu

35 Ataru neitamaida, Yesusdi, ila ati arum domyai cap, nimi meteka di kuramyai cap, Yahudi yala neng, sun Allah upu peteremna ati bena wekembaramu. Ataruda, ‘Allahdi nesala weika di lyepredi, sun dipru talenkamre’ tenen, kai telep upu, jenek kupra peteremamu. Tonda, Yesusdi mutu-mutu yuma peterep embaramudi, pu yala yuk-yuk jeramu nesala weika di kwetediramu. 36 Amutu-amutu yuma embaramu taruda, nesala denge weik yakaramipa diramu. Diramudi, ayakarami nengda, nimidi domba bisam peramengepane, sun apu bo aca men kunmarepa, adombadi, ‘Ortara benkun do, dan tara benkun do?’ tenen, kange wang-wang peramretopu kunmaipa, Yesusdi anesala tep, bicau tenepudi dipru karepu.

37 Ukupka tep, er upu gekepra, er melipra domembarami neng tep, adomon upu pepu. “Ila wa peamipane, pio weike bongopudi, kwaneng nongda, weike kuredi, konum wisirur dinin, yongopra kirbenmanto nengda, metekpu kununge. 38 Ange tep nengeda, wa deiyo ngebodi upu peiprepa, ‘Er pel don nengdi, er wai dam kirbankameng’ tenen, wai deiyo ngebo tep moronkamrume,” Yesusdi pepu. ^{▼▼wa pena pepu upu – Yesusdi adomon upu pepu ngeda, Allah upu tep putaprepa, moupra gekepmanto neng weike dakunung dinin, Allahdi pedirepa, er upu dopra peterep embankameng nengda, metekpu kununge. Atep, ‘Allah upu peterembana neng weik kupbankameng’ tenen, ‘Allah moronkamenge’ tenen, aupu pepu.}