Mat 12:22-29 | XteSC | STEP | Yesus bena kunmau mutu neitamai di, isok taleamnga deiki di, upu lup kupra, asuru puamu ngebo tenpu, ‘Yesusdi kwetepkur’ tenen, sun yuk nengdi, angebo dopra, Yesus er damai duyai. Duyaipa, Yesusdi angebo taleamu isok enepra kwetepu pangeda, angebo upu pepra, akeca-keca yuma telep kupra dinmau.

Matthew 12:22-29

Musa sekeiamu upu peteremna deiyo nengdi, “Belesebuldi Yesus talerepa, pel dorure,” pepi upu

(Markus 3:23-27; Lukas 11:17-22)

22 Yesus bena kunmau mutu neitamai di, isok taleamnga deiki di, upu lup kupra, asuru puamu ngebo tenpu, ‘Yesusdi kwetepkur’ tenen, sun yuk nengdi, angebo dopra, Yesus er damai duyai. Duyaipa, Yesusdi angebo taleamu isok enepra kwetepu pangeda, angebo upu pepra, akeca-keca yuma telep kupra dinmau. 23 Ukupu pangeda, aweka dinmai nengdi, Yesus tep lolomaidi aupu pepi. “Uo, angeboda, Daud yala ngebodi deipu ngebo cadi, erda Allahdi, ‘Nimi Lyemna Deiyo Ngebo, Mesias yana kunkamre’ tenen, wepra deipu ngebo, er akonum yanmaser do, gum do?” pepi. Upepya deiyoda, ‘Yesusda, nimi Lyemna Deiyo Ngebo kurur do, gum do?’ tenena tep pepi.

24 Sun anengdi upepipa, Farisi neng gekepidi aupu pepi. “Gume, aisok enemrurada, isok-isok yuma, sun deiyo isok, er si Kain Jen Ngebo, er si ton Belesebul, ^{▼▼Belesebul – Kain Jen Ngebo er si butene cadi, ton taruda er si tep, Belesebul penunge. Ton taruda, er si tep Seramki penunge. Ton taruda, Kain Jen Ngebo penunge. Tonda, lap pena upu nomor 13 dinkurume.} er puto cap, er si cap deiki di, Yesusdi isok-isok enemrure. Isok yuma sun deiyo ngebo Belesebul puto deiki di, Yesusdi aisok yuma enepra dokotemrure,” penmai.

25 Aupu penmaipane, Yesusdi aneng sun dipru neitamai tenepinge yuma kael kepka tep, Yesusdi, aneng tep adomon upu deiki di pepu.

Dan mutu do yuma, tenpu ila deiyo ngebodi talerur nesala, neitamai bokmengedi, popdanmatenganen, yuma popra gawal dakdatenge. Anesala yumadi podanmatenge pangeda, tenpu ngebodi ware kupra anesala yuma taleptu do? Angeda, sun kikiman pio men kutenge dinin, bura saka yuk-yuk bendoptenge. Ange utopu, ware yala neng do yuma, sundi popdatengopda, gawal dakdatenge. Ware kupra kikiman kutenge do? Konuma, sunda bokra yuk-yuk bendoptenge. 26 Farisi nengdi penmang upu utopu, Kain Jen Ngebo ^{▼▼Kain Jen Ngebo penup ngeboda, Yahudi yala nesala, sun upu deiki di Setan perami. Yahudi yala nesalada, sun Ibrani upu deiki di, Setan perami upu deiyoda, Nimi Pon Ngebo, perami. Tonda, Setan upu deiyoda, “Minina Upu Pen Ngebo kurure,” perami. Tonda, ‘Luludina Upu Pena Deiyo Ngebo kurure’ tenen, aupu perami. Tonda, lap pena upu nomor 13 dinkurume.} cap, er nyapu sisa, isok-isok cap, sun pepu podatengedi, Kain Jen Ngebo er nyapu sisa tep, enepra dokoteptuopda, sun puto pio men kuptue. Kain Jen Ngebo, er puto gum kuptu pangeda, nesala ton men taleptue. Kain Jen Ngebodi ne taleamnetupa, pel doptenetoda, er nyapu sisa isokda men enepra dokoteptene. Atep, sun Farisi nengda, tali upu penmaruma.

27 Isok-isok yuma enepra dokotemnyada, ‘Kain Jen Ngebo er puto deiki di dokotemrure,’ tenepmanerum dinin, sun Farisi neng, sun melimna neng peda, isok enepra dokotemnunga cadi, ange dano? Anengda, ware ngebo puto deiki di, isok enepra dokotemnung do? Sun upu gekepra melimenge nengdi, isok-isok enepra dokotemenga deiki di, konum jenek kupmasere. “Ada Allah er puto deiki di kununge,” perume.

Atep nedi isok dokotemnuna tep nengeda, “Allah er puto deiki di dokotemrure,” tenepmumdi peptume. Sundi ne tep, “Isok talepka deiki pel dorure,” penerum upu tep nengeda, sun pe nyapudi pel donunga deiki di, konum katuai kupsera cadi, sun tep upu bongdina deiyo neng utopu kupkamsenge. Sun nyapu pe, ne peda, utopu pel donupa tep, Allah er puto deiki dipapu, isok enepra dokotemnupe. Sun Farisi nengda mok upu perum nengpu kurume.

28 Gume, nedi isok-isok yuma enepra dokotemnunada, Kain Jen Ngebo puto deiki di men enepra dokotemnune. Allah er Lek Sambala, er puto deiki di isok enepra dokotemnune. Ange tep nengeda, Allah erda nesala weik lyepredi, sun dipru talenkamre taru konum gonga kepre. Ne mambul pel done keca cap, isok-isok yuma bisipra dokotemnuna cap, ange deiki di jenek konum kupsere.

29 Sun pepmarumnge yumada, men kupmanto. Ware neng do yuma, ‘Tenpu ngebo, er ati wekra, er keca upula dopropkup’ tenen, er ati wektenge dipunen, akati deiyo ngeboda, ila puto ngebo kuramtupa, ateng men kouptaptengopda, er keca upula men doproptenge. Akati deiyo ngebo, ila puto ngebo menmena ateng kouptaptengetoda, er keca upula dopra betenge. Gum dingeda, gume. Ange pepmasentopu, Seramkida, ati deiyo ngebo utopu kurure. Dinino, neda ila puto ngebo kunedi, er cap, er nyapu isok-isok yuma cap, ateng koupmana cadi, isok enepra dokotemnune. Yesusdi aneng tep pepu.