Mat 5:3-12 | XteSC | STEP | Allahdi melimrepa, sun kange deipra teleppu kunge nesalada, ukununge. Ada, sun kange dipru eremna gum dipapu, Allahdi “Dumsisipu kunkamrume,” peseryada, ‘Nunda kange dipru mali tenena nengpu kunupa tep, nun pedipapu men kuptepe. Allah er melipserya deiki dipapu telep neng kunkamepe,’ tenepmenge nesalada, Allahdi lyepredi, sun kange dipru telep kupra deiprepa, er nyapu kununge. Anyapu yumada, er cap kikiman dukdongopra kunkamenge. Allahdi sun taleprepa, er tara neng kununga tep, sun kange deipra telep kupra kunung utopu, apio kunkamenge.

Matthew 5:3-12

3 Allahdi melimrepa, sun kange deipra teleppu kunge nesalada, ukununge. Ada, sun kange dipru eremna gum dipapu, Allahdi “Dumsisipu kunkamrume,” peseryada, ‘Nunda kange dipru mali tenena nengpu kunupa tep, nun pedipapu men kuptepe. Allah er melipserya deiki dipapu telep neng kunkamepe,’ tenepmenge nesalada, Allahdi lyepredi, sun kange dipru telep kupra deiprepa, er nyapu kununge. Anyapu yumada, er cap kikiman dukdongopra kunkamenge. Allahdi sun taleprepa, er tara neng kununga tep, sun kange deipra telep kupra kunung utopu, apio kunkamenge.

4 Allahdi melimrepa, sun kange deipra teleppu kunge nesalada, ukununge. Ada, sun pe mali kun keca cap, yuk neng mali kun keca tep, uo tenepmengedi mambul kange doupra engenung nesalada, Allahdi sun dipru kwa dipra melimkamre. Ange tep nengeda, sun kange deipra teleppu kunungtopu, pio kunkamenge. 5 Allahdi melimrepa, sun kange deipra teleppu kunge nesalada, ukununge. Ada, sun kange eremna gum di, bouna di kunge nengda, Allahdi nesala weike lyepredi, sun dipru talenkamre taruda, mutu-mutu yuma ukupunge ketekepra kareprepa, anengdi talenkamenge. Ange tep nengeda, sun kange deipra teleppu kununga utopu, amenda taru pe apio kunkamenge. ^{▼▼Mazmur 37:11}

6 Allahdi melimrepa, sun kange deipra teleppu kunge nesalada, ukununge. Ada, Allahdi, “Dumsisipu kunkamrume,” pesere upu tep, ‘Angepu kuptepe’ tenen, pio putarure nengda, sun kange dipru neitamai dumsisi kun keca putaprenge yuma, Allahdi tupa makupra karenkamre. Ange tep nengeda, sun kange deipra teleppu kunungtopu, amenda taru peda, apio kunkamenge.

7 Allahdi melimrepa, sun kange deipra teleppu kunge nesalada, ukununge. Ada, yuk neng ikin kuprenge tep, dipru kareprepa, makupmenge nengda, Allahdi aneng tep, wenemna gum di makunapu kunkamre. Tonda, yuk nengdi sun tep mali kupmengepa, akunumna tep, yu kuprepa, kwang men dangnunge. Sun tep mali kweipmange neng tep, ka di tamupra mali kudina gum dinin, angeda kaukepmengedi, aneng tep telep kudinunge. Ange tep nengeda, aneng sun kange deipra telep kununga utopu, pio kunkamenge.

8 Allahdi melimrepa, sun kange deipra teleppu kunge nesalada, ukununge. Ada, sun kange dipru wilimtona gum dipapu, ‘Nun dipru cap, nong cap yuma, Allah konum karepmupka tep, mali kun keca tenpunge peda men kunkamepe,’ tenengedi, er upupu gekepra kunge nengda, Allah epkamenge. Ada, sun dipru kange dukdongopra Allah cap, tonpa kuramenga di, Allah cap epdangedi, kange deipra antapkamenge. Ange tep nengeda, sun kange deipra telep kupra kununga utopu, pio kunkamenge. ^{▼▼Mazmur 24:3-4}

9 Allahdi melimrepa, sun kange deipra teleppu kunge nesalada, ukununge. Ada, Allahdi nimi podana cap, pangdana cap kunge taru yumada, ‘Dipru boun kupra kikiman telep kunkameng’ tenen, yu tenedana ngeda, telep kemdirure. Atep, Allah teka tenepra kunge nesaladi, Allah kururtopu kununga cadi, yuk nesala podange taru, ‘Dipru boun kupra kikiman kuptenge’ tenen, “Podana cap, pangdana capda, yapso,” pepra upu sengredi telep kupra betamdiramenge nengda, Allah teka tenepra kununga cadi, amenda taruda, Allahdi aneng tep upepkamre. “Anengda, ne nyapu kununge,” pepkamre.

10 Allahdi melimrepa, sun kange deipra teleppu kunge nesalada, ukununge. Ada, sun Allah upu teka tenenge nengda, dumsisipu kuramengepane, yuk mali nengdi epmengopda, ‘Dumsisi kunada nun song’ tenen, anengda Allah er nyapu kununga tep, ikin keca sun nong deiki deringedi, mali kudinunge. Dinino, sun teka tenenung nengda, Allah konum lyepudi, sun dipru talerura cadi, er nyapu kununge. Atep, sun kange deipra telep kununga utopu, amenda taru pe kunkamenge. ^{▼▼1 Peterus 3:14}

11 Sundi ne Yesus tep, tupa teka tenepneruma tep nengeda, mali nengdi mali upu pepra, tulum kemdina cap, ikin keca sun nong deiki derina cap, luludina upu pena cap kupsengopda, Allahdi melimserepa, sun kange deipra teleppu kunkamrume. 12 Ada, Allahdi sun tep kange deipseua cadi, mesumpu karepkamser keca, weika di im deiki ketenepra konum deipseue. Ange tep nengeda, yu nengdi amali kun keca yuma kupsenga peda, sunda kange pio deipra kunkamrume. Amali kun neng, sun apu yapudi, ne upu lap perami neng, nabi-nabi neng tep, autopu ikin keca sun nong deiki deriramya cadi, ataru kunge neng peda, sunda ne upu gekerum nesala tep, autopu mali kun keca sun deiki derinkamsenge. Ukupkamseng dinin, im deiki benkamrum taruda, Allahdi menenga keca weika di karenkamsere. Ange tep nengeda, sun kange deipra kunkamrume pepsene. Yesusdi amutu deiki bulupra wekmai nesala tep pepu.