Mic 1 | XteSC | STEP | Pumun taruda, Yehuda tara yuma cap, Yerusalem mutu neitamai cap, Samaria mutu cap, kuraminge yuma tep, Allah, er si Yahwehdi diramu. Diramudi, nimi tenpu, metek mutu, er si Moresyet mutu di deiami ngebo, er sida Mika kuramu. Angebo er kori Allah Yahweh yakaramudi, er upu lap pediramu. Aupu yana lap pediramu taru neitamaida, Yehuda yala nesala tara talena tep, sun ila nimi deiyo Raja neng wepra deipbaramipa, sundi nimi deiyo kepra talepbarami neng, sun si ake. Ada, Yotam cap, Ahas cap, Hiskia cap, sun anengdi ila nimi deiyo neng, Raja kepra Yehuda tara nesala talepbarami. Allahdi nabi Mika tep lap peramu upuda, ken mapna deiki di lap peramupa, Mikadi epman nge cap, gekepman nge cap tep, lap pepra sengdiramu. Ada Samaria tara cap, tonda Yerusalem mutu neitamai kurami nesala cap tep, Allahdi lap pediramupa, Mika gekeramudi sengamu.

Micah 1

1 Pumun taruda, Yehuda tara yuma cap, Yerusalem mutu neitamai cap, Samaria mutu cap, kuraminge yuma tep, Allah, er si Yahwehdi ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} diramu. Diramudi, nimi tenpu, metek mutu, er si Moresyet mutu di deiami ngebo, er sida Mika kuramu. Angebo er kori Allah Yahweh yakaramudi, er upu lap pediramu. Aupu yana lap pediramu taru neitamaida, Yehuda yala nesala tara talena tep, sun ila nimi deiyo Raja neng wepra deipbaramipa, sundi nimi deiyo kepra talepbarami neng, sun si ake. Ada, Yotam cap, Ahas cap, Hiskia cap, sun anengdi ila nimi deiyo neng, Raja kepra Yehuda tara nesala talepbarami. Allahdi nabi Mika tep lap peramu upuda, ken mapna deiki di lap peramupa, Mikadi epman nge cap, gekepman nge cap tep, lap pepra sengdiramu. Ada Samaria tara cap, tonda Yerusalem mutu neitamai kurami nesala cap tep, Allahdi lap pediramupa, Mika gekeramudi sengamu.

“Propinsi Samaria tara cap, Yerusalem mutu neitamai kurum nesala capda, ila ikin keca doromumdi engenkamrume,” peipu upu

2 Allah er si Yahwehdi peipneupa pepsene. Uo, ne nyapu mutu-mutu yuma kumum nesalada, apepsene upuda, moupra gekepso. Aupu gekepmumdi kael kepkurume. Tonda, sun tuai mutu ban-ban yuma neitamai kurum nesala peda, sun kurumu keca yumada, Allah Yahweh ^{▼▼Allah – Acada, Ibrani upu di, Allah er si ton, ‘Adonay’ pepra sekya cadi, nundi aupu ‘Adonay’ deiyo ngeda jenek kupra sekmupu.} akeca-keca yuma talepra, deiki tara erepra, pio puto weik deiyo ngebo kuredi, pio telep lengnaipu kurure. Ukupra kuredi diserura cadi, sun Israel yala nesala cap, Yehuda yala nesala capdi, mali weik kurumu keca kunumna tep, wenepra popkamsera tep, Allah im deiki di pesere upu yumada, moupra gekenkamrume.

3 Uo, Allah Yahweh, er im deiki pio telepai lengnapu kurur mutu kure ngebodi, tuai mutu kwereryaredi, nun tuai neng kupe mutu deiki, yan yanipdongopra tengyakanmare. Ukupredi, tuai mutu neitamai, ila mutu deiki embankamre. 4 Ukupra tengyakankamre taruda, amutu yuma ila di long-long pepredi, mutu yuma yawa poptapkamre. Ukupmantoda, lilin dopra uku dongopmengepa, uku bu jeredi, me embaramretopu kunkamre. Ada, nun kuramepe mutu deiki tengyarepa, me bukredi, teno pakra embankamre. Tonda, mutu deiki di me bukredi, teno pakra utara baredi opbanmaryane, ban tara neneng baramretopu, kupbenkamre.

5 Akange mun keca yuma kupkamra deiyoda, tali tep gume. Deiyoda, sun Israel yala nesala cap, Yehuda yala nesala capdi, Allah er upu bisipra yanimumdi, er damai mali kumum neng tep nengeda, tek sisi sun tep wenepkamsere. Ada ukutaruda, ware nengdi Israel yala nesala damai mali kweipmengepa, popmanto kunung do? Ada Israel yala nesala, sun deiyo mutu, ibu kota Samaria kunge nesaladi, mali weik kungepa, Israel nesala yuma epmengedi, sun peda malipu kununge.

Ange utopu, Yehuda yala nesalada peda, ware nengdi si benepipa, ubo keca isok sipu eremnung do? Ada yuk mutu di gume, Yehuda yala nesala kunga yuma, sun ila deiyo mutu, ibu kota Yerusalem neitamai di, isok sipu eremengepa, yuk Yehuda yala nesala yuma peda epmengedi, utopu isok si eremnunge. Atep nengeda, sun Yerusalem mutu kunge nesala cap, Samaria mutu kunge nesala cap tep, ila di wenepkamne.

6 Atep nengeda, ne Allah Yahwehdi pepsene. Samaria mutu kunung keca yumada, dakra uruptapnepa, orbopu kapkamre. Tenpu ati peda, ton men tapkamne. Akati dongai yuma uruptapnedi, wa pen damai utopu kupkamne. Tonda, amutu yuma sikke bukke utopu kupra deipkamne. Tonda amutu neitamai embarami bisi yumada, nimidi anggur tapu du wa pena tep, tu palipra anggur tapu kounkamenge. Tonda, ila lyom gel beilya ongopgenepra wiaminge yumada, uruptapnedi gum kupra deipkamne.

Ukupnepa, orbopu kupredi, walang kupkamre. Ukupnyopda, amutu deiki kapu keca yuma bupra, tenpu mutu ban utarapu dokotepkamne. Ukupnyopda, sundi gel beilya wiraminge cap, gel ati cap dominge yumada, amutara deiami pala gel yumada, nedi uruptapnepa, katuai kupkamre. Akati yuma, ila pala gel deiki domi dinin, agel tupa akapmarenge yumada, dakra tapkamne. Akati yuma sikke buktapkamre.

7 Tonda, amutu neitamai kumumdi, tali keca tep, nimi buru deiki di petupra deipmumdi, gam men kurur keca dinino, sundi, ‘Akecada ila mambul keca’ tenen, “Nun nai bo,” pepra, si eremrum keca yumada, gum kupra deipkamne. Atali keca si eremengedi, talepra kunge keca yuma cap, tonda tali-tali nyangdange nesala yumada, popra sikke buktapnedi, uku dongopnepa, jepra sikke buktapkamre. Utopu, sundi kunumna weik kunumami keca yumada, ‘Pio akunkamser’ tenen, mawa derin ati neitamai derirami keca yumada, ange peda dakra uruptapnedi, akeca yuma doupra, uku dongopnepa, ukudi jepropredi, gum kupkamre.

Ukupkamna deiyoda, ake. Sun kunumna weik keca, mawa deriraminge yuma cap, tonda, “Nun nai bo,” pepra, si eremenge keca yuma capda, co bo weika di kunuamidi derirami. Aco boda, tali-tali nyangdan nerapu kunupra nyangdaramidi, kunumna keca kareramya deiki di dororami. Ange tep nengeda, akunumna weik keca yumada, dopropnedi, yuk mutu nesala tep karepnepa, amutu nesala peda, akunumna weik keca dopropmengedi, tali-tali nyangdana nerapu tep karenkamenge. Allahdi nabi Mika tep, lap pepra deipupa sekeiamu.

8 Nabi Mikadi aupu yuma gekepudi, aupu pepu. Uo, Allahdi, Yehuda yala nesala cap, Israel yala nesala cap tep, ila di wenepkamra tep nengeda, ne nabi Mikada, ila kange mun kupmanere. Ada ‘Uo’ tenen, ne dipru pu jenera tep, ne nongda opkal kemna gum, tali banangapu embankamne. Tonda, ne yan dongon keca sepatu peda, kuriptapra, talipu yan banangapu, yanipra embankamne.

Engena cap, ali dangna cap deiki di, pio mali kange doupra embankamne taruda, neda bura kam nimi epredi lungdaramretopu kunkamne. Ila upu di, mali pepra ngolongkamne. Ukupmantoda, ipi ma pena youprepa, upu ila di peramretopu, engepra mali penkamne.

9 Ange yuma kunkamnada, mesum tep gume. Deiyoda, sun Yehuda yala nesala kunge mutu neitamai cap, tonda Yerusalem mutu neitamai kunge nesala, sundi lyom gel beilya deipra wiamidi, wengbarami bisi buplan damai peda, mali-mali weik kununge. Ukupmantoda, nimi nong bol deiki, kot susu jeramrenge, pio men kaekmanto kuramretopu, sun Samaria tara kunung nesalada, utopu kununga cadi, sun mali-mali weik kunge kecada, men tapkamenge. Nabi Mikadi pepu.

“Yerusalem mutu damai kunge nesala tep, aupu men lap perbenkamrume,” pepu upu

10 Allahdi nun mali kunup keca kunumna tep, wenepkamserada, aupu doupra nun podan neng, sun kota Gad mutu kunge nesala kori perbana gume. Sundi, ‘Akange mun keca nun damai kunmasera tep, nun podan neng epsengedi, bicau tenepra kaukepkamseng’ tenen, katuai men engenkamrume. Inipra engenkamrume. Tonda, sun Bet-Le-Afra mutu kunge nesala peda bicaue. ‘Uo, nun pe mali kuramupka kunumna tep, nun nong deiki ila ikin keca doronkamepe’ tenen, kange mun kange doupmengedi, ‘Ware kupra lyepdatepe do?’ tenepra, mali kange doumumdi, engepra sikke but deiki mapra donkamrume. Ukunkamrum ngeda, ‘Uo, kange mun kange doupra donmange, tenepkamseng’ tenen, peten kemna tep, kurpetenkamrume.

11 Tonda, sun Safir mutu kurum nesalada, yuk mutu nesaladi sun tep popbisipsengedi, sun kurum mutu tapra, yuk karen mutu dubenkamseng taruda, opkal kemna gum di, tali nong banangapu benkamrume. Ukumumnyopda, sundi ali weik dangkamrume. Tonda, sun Zanan mutu kurum nesalada, sun kumum mutu di tapra, yuk mutu ton men betume. Ada, ‘Yuk mutu nesaladi yana popsenung’ tenen, sun ati yuma ongomgenepra, pala wiamrum lyom gel beilya, bura tara men embenmanto kunkamrume.

Dinino, sun Bet-Haezel mutu kunung nesalada, sun podan nesaladi, sun domi ati cap, gel beilya wiaminge cap yumada, dakra uruptapkamenge. Tonda, ‘Akeca pio akunkamre’ tenen, tu pumbon deiami pala gel peda, palipra daktapmengedi, sun ati yuma uruptapmengepa, sikke bute utopu kunkamra tep pepne.

12 Ikin keca doropmepu ngeda, nun wenemna tep, nun nai bo Allah Yahwehdi nun damai karepseupa, Yerusalem mutu ati buplan damai yanmasere. Atep, sun Marot mutu kunge nengdi, ‘Ware mutu nesala yana melipkamseng do?’ tenen, dinmang dinin, utenena gume. Allahdi nun mali kunup keca wenemna tep, ila kange mun keca weika di karenkamsere. Atep, yuk mutu nengdi melipra yana men lyepropsetenge.

13 Tonda, sun Lakis mutu kurum nesalada, sun adipapu kuda bisam bali tara, tapu gerekra tu deiki embana keca betapra keteneipmumdi, ‘Yuk mutu nesaladi, nun ton yana popsenung’ tenen, menmena bendopkurume. Ada mesum tep men pepsene. Yehuda tara neitamai kunge nesala weik dakunung dinin, sunda menmena taru di, isok si eremamrumdi, pio mali kuramrume. Ada, sun Israel yala nesaladi isok si eremamitopu, ‘Nun peda angepu kunkamepe,’ tenen, kuramrume.

Ukuramrumpa, sun Yerusalem mutu kunge nesala diramidi, ‘E, nun ton amali kun kecapu kupkamep’ tenen, mali weik kurami. Ada, sun Lakis mutu kurum nesaladi, mali kurumnya deiki di, amenda taru sun Yerusalem mutu kunge nesala peda, mali keca deiyo konum doropmaidi mali kununge. Dinin, deiyoda, sun Lakis mutu nesala mali kuramruma deiki dia.

14 Uo, sun Yehuda yala nesalao, sun Moresyet-Gat mutu kunge nesala tep, surat sekra dokotepkurume. Ada, “Yo, sunda yuk karen mutu dabenkamrume,” pepra upu dopra deipkamrume. Ukupkamrum ngeda, mesum tep gume. Moresyet-Gat mutuda, sun mutu yuk nesala yasetengedi, men lyepsetenga tep pepsene. Amutu yumada, pio gum kupra deipkamre.

Tonda, sun Akzib mutu kunge nesaladi, Israel yala nesala tep, “Gume, nundi sun ikin kange doupra kunkamruma neitamai yumada, nundi lyepsetepe,” pepra pediramipa, sun Israel yala nesaladi, ila nimi deiyo neng, Raja kepra kurami neng yuma peda, aupu gekepra teka tenerami dinin, sun anesaladi pedirami upuda, mok upupu pedirami. Akzib mutu kurami nesaladi, ‘Israel yala nesala talepra kunge nimi deiyo nengdi, bicau tenepra makupra lyepropsetenge’ tenen, akeca ton, pio men dopropkamrume. Mokpu perami.

15 Uo, sun Maresya mutu kurum nesalao, nun nai Allah Yahwehdi doprapseredi, sun podan neng deiki deipkamsere. Ukupserepa, amutu nengdi, sun Maresya mutu kurum nesala tep, popbisipsengedi, sun ati cap, sun mutu yuma capda, dalupra dopropkamsenge. Ukupsenge pangeda, Israel yala nesala, sun ila puto deiki di talepra kunung nimi deiyo neng yumada, tomopsengedi, ateng koupra, Adulam mutu damai dubenkamsenge.

16 Uo, sun Yehuda yala nesala yuma tep nengeda, ‘Nun pio mali kuramepu,’ tenepmumdi, sun giso potong yuma toupkurume. Toupmumdi, pio engenapu kunkamrume. Ada, sun nyapu tep, bicau tenepmumdi, peten kemdere keca tep kunkamrume. Ada, sun giso potong yumada toupra, delaupu bupdankamrume.

Ukupmantoda, madi kapang cap, ma cap, popredi jepkurya tep, potong yuma lyekra katau keptapredi jeramretopu kupkamrume. Ada tali tep gume. Deiyoda, sun metek nyapu yumada, douprapmengedi, ateng koupmengopda, yuk mutu dubankamenga tep pepsene. “Allahdi aupu lap peipneupa, sun gekena tep lap pepsene,” pepra Mikadi lap pepu.